Lanmour i donn plis Kouraz
Lanmour i donn plis Kouraz
‘Bondye pa’n donn nou en lespri timidite, me okontrer, en lespri ki ranpli nou avek lafors, lanmour ek moderasyon.’—2 TIMOTE 1:7.
1, 2. (a) Ki lanmour i kapab pous en dimoun pour fer? (b) Akoz kouraz ki Zezi ti demontre ti eksepsyonnel?
E N NOUVO koup marye, ti pe plonze obor en lavil lo lakot les Lostrali. Omoman ki zot ti pe met pare pour mont parlao sirfas delo, en gro reken blan ti pe vin ver sa madanm avek en gran lavites. Avek kouraz, deswit sa zonm ti pous son madanm akote, e i ti les sa reken devor li. “I ti donn son lavi pour sov mwan.” Sa i parol ki sa madanm ti dir dan lanterman son msye.
2 Wi, lanmour i kapab pous en dimoun pour demontre kouraz dan en fason ekstraordiner. Zezi ti dir: “Pli gran lanmour ki en dimoun i kapab posede: se donn son lavi pour son bann zanmi.” (Zan 15:13) Mwens ki 24 er-d-tan apre ki i ti’n dir sa parol, Zezi ti donn son lavi, pa zis pour en dimoun, me pour limanite. (Matye 20:28) Deplis, Zezi pa ti zis demontre en gran kouraz par donn son lavi en sel kou koumsa menm. I ti konnen ki i ti pou ganny sikannen, abize, zize enzisteman, e finalman ganny met amor lo en poto martir. I ti menm prepar son bann disip pour tousala. I ti dir zot: “La nou pe mont Zerizalenm, e Fis-de-Lonm pou ganny livre avek bann sef-pret ek bann profeser lalwa, e zot pou kondann li a-mor e livre li avek bann payen. Zot pou monk li, kras lo li, fwet li, e touy li.”—Mark 10:33, 34.
3. Akoz Zezi ti kapab annan kouraz?
3 Kwa ki ti fer li annan sa kalite kouraz? Sirman lafwa ek lakrent pour Bondye ti zwe rol mazer. (Ebre 5:7; 12:2) Me pli enportan ankor, Zezi ti kapab demontre kouraz akoz i ti kontan Bondye ek son prosen. (1 Zan 3:16) Si nou azout sa kalite lanmour ansanm avek nou lafwa ek lakrent pour Bondye, nou osi nou pou kapab annan sa menm kouraz ki Kris ti demontre. (Efezyen 5:2) Konman nou kapab devlop sa kalite lanmour? Avan, nou bezwen konnen kote i sorti.
“Lanmour i sorti kot Bondye”
4. Akoz nou kapab dir ki Zeova i Sours lanmour?
4 Zeova i demontre lanmour dan en fason parfe e li menm ki Sours lanmour. Zapot Zan ti ekrir: “Byenneme, annou kontan kanmarad parski lanmour i sorti kot Bondye. Sa ki kontan son prosen i zanfan Bondye e i konn Bondye. Sa ki pa kontan son prosen, pa konn Bondye, parski Bondye i lanmour.” (1 Zan 4:7, 8) En dimoun i kapab devlop sa kalite lanmour ki Bondye i annan si i apros avek Zeova, e pour fer sa i bezwen ganny en konnesans egzakt e met an pratik sa konnesans avek tou son leker.—Filipyen 1:9; Zak 4:8; 1 Zan 5:3.
5, 6. Kwa ki ti ed bann premye Kretyen pour devlop sa lanmour ki Kris ti annan?
5 Dan son dernyen lapriyer ki i ti fer avek son 11 zapot, Zezi ti fer resorti sa lyen ki egziste ant konn Bondye e kontinyen annan plis lanmour. I ti dir: “Mon’n fer zot konn ou, e mon pou kontinyen fer li, pour ki zot a annan sa menm lanmour avek lekel, ou’n kontan mwan, e ki mwanmenm mon a dan zot.” (Zan 17:26) I ti ed son bann disip pour devlop sa menm kalite lanmour ki egziste ant li ek son Papa, e par son parol ek legzanp Zezi ti montre zot ki non Bondye i reprezant son bann kalite merveye. Se pour sa rezon i ti kapab dir: “Sa ki’n war mwan in osi war mon Papa.”—Zan 14:9, 10; 17:8.
6 Lespri sen i prodwi sa kalite lanmour ki Kris ti annan. (Galat 5:22) Zour Lapannkot lannen 33 N.L., kan bann premye Kretyen ti ganny lespri sen parey zot ti’n ganny promet, zot pa ti zis mazin bann keksoz ki Zezi ti’n ansenny zot, me zot ti osi pli byen konpran Lekritir. Sa konprenezon pli profon, ti ogmant zot lanmour pour Bondye. (Zan 14:26; 15:26) Ki rezilta sa ti anmennen? Zot ti pres sa bon nouvel avek devouman ek lardyes, menm si zot lavi ti an danze.—Akt 5:28, 29.
Kouraz ek Lanmour an Aksyon
7. Ki Pol ek Barnabas ti bezwen andire dan zot vwayaz misyonner?
7 Zapot Pol ti ekrir: ‘Bondye pa’n donn nou en lespri timidite, me okontrer, en lespri ki ranpli nou avek lafors, lanmour ek moderasyon.’ (2 Timote 1:7) Pol ti pe koz avek leksperyans. Annou egzaminen ki li ek Barnabas ti eksperyanse dan zot vwayaz misyonner. Zot ti pres dan bokou lavil, parey Antyos, Ikonyonm ek Lis. Dan tou sa bann lavil serten ti vin bann krwayan, me lezot ti vin bann lennmi. (Akt 13:2, 14, 45, 50; 14:1, 5) En lafoul ankoler Lis, ti menm saboul Pol avek ros ziska ki zot ti krwar i’n mor! “Me kan bann krwayan ti rasanble otour li, i ti leve e antre dan lavil. Lannmen i ti al Derb avek Barnabas.”—Akt 14:6, 19, 20.
8. Ki mannyer kouraz ki Pol ek Barnabas ti annan i demontre zot lanmour senser pour dimoun?
8 Lefe ki zot ti esey touy Pol ek Barnabas, eski sa ti fer zot aret prese? Pa ditou! Apre ki zot ti’n ‘ganny detrwa disip’ Derb, zot ti “retourn Lis, Ikonyonm ek Antyos.” Akoz? Pour ankouraz bann nouvo pour mentenir en lafwa for. Zot ti dir: Nou “bezwen pas par bokou soufrans pour antre dan Rwayonm Bondye.” I kler ki zot ti kapab annan sa kouraz akoz zot ti senserman kontan bann ‘pti mouton’ Kris. (Akt 14:21-23; Zan 21:15-17) Apre ki zot ti’n apwent bann ansyen dan sa bann nouvo kongregasyon, Pol ek Barnabas ti priye e “konfye zot dan lanmen Bondye dan ki zot ti’n met zot lafwa.”
9. Ki mannyer bann ansyen ti reazir anver lanmour ki Pol ti demontre pour zot?
9 Pol ti en dimoun ki ti annan lanmour ek kouraz, e se pour sa rezon bokou bann premye Kretyen ti kontan li en kantite. Annou revwar sa ki ti arive dan en renyon ki Pol ti fer avek bann ansyen dan kongregasyon Efez, kot i ti reste pour trwa zan e anmenmtan rankontre en kantite lopozisyon. (Akt 20:17-31) Apre ki i ti’n ankouraz zot pour pran swen avek troupo Bondye ki zot ti’n ganny konfye, Pol ti azenou ansanm avek zot e priye. Apre, “tou dimoun ti plere e ser Pol dan zot lebra e anbras li pour fer zot adye. Zot ti tris sirtou akoz i ti’n dir zot sa parol konmkwa zot pa pou war son figir ankor.” Pa sa bann frer ti vreman kontan Pol! Anfet, kan ti’n ariv ler pour zot ale, Pol ek son bann konpanyon ti bezwen ‘fors zot lekor pour zot ale,’ akoz bann ansyen dan kongregasyon Efez pa ti anvi zot ale.—Akt 20:36–21:1.
10. Ki mannyer avek kouraz bann Temwen Zeova ozordi in demontre lanmour pour kanmarad?
10 Ozordi, bann sirveyan rezyonal e distrik, ansyen ek bokou lezot ankor i ganny byen apresye akoz zot demontre kouraz pour pran swen avek mouton Zeova. Par egzanp, parfwa bann sirveyan ek zot madanm in vizit kongregasyon dan bann pei ki’n ganny ravaze par lager sivil oubyen kot zot napa drwa prese. E si zot ti ganny tyonbo zot ti kapab perdi zot lavi oubyen ganny met dan prizon. Pareyman, bokou Temwen in soufer dan lanmen zot bann move dirizan ek zot bann siporter akoz zot pa’n oule donn lenformasyon lo lezot bann Temwen, oubyen akoz zot pa’n oule dir kote zot ganny zot nouritir spirityel. Plizyer milye lezot in ganny persekite, tortire e menm ganny touye zis akoz zot pa’n oule aret pres sa bon nouvel oubyen aret asosye avek lezot Temwen dan bann renyon. (Akt 5:28, 29; Ebre 10:24, 25) Annou imit lafwa ek lanmour ki sa bann frer ek ser kouraze in demontre!—1 Tesalonisyen 1:6.
Pa les ou Lanmour vin fre
11. Dan ki fason Satan pe fer lager spirityel kont bann serviter Zeova, e ki nou bezwen fer lo nou par?
11 Kan Satan ti ganny zete lo later, i ti determinen pour tir son lakoler lo bann serviter Zeova, akoz zot ‘obei komannman Bondye e fidel avek temwannyaz Zezi.’ (Revelasyon 12:9, 17) En taktik ki Dyab i servi, i persekisyon. Me parfwa olye ki persekisyon i fer pep Bondye per, okontrer i fer zot vin pli pros avek kanmarad, sa lanmour antre zot i vin pli for e i motiv bokou parmi zot pour annan plis devouman. En lot taktik ki Satan i servi, i sa tandans dan imen pour fer pese. Pour kapab reziste sa tandans nou bezwen demontre kouraz dan en lot fason, akoz i en lalit anndan nou, kont sa move dezir dan nou leker ‘tret e move.’—Zeremi 17:9; Zak 1:14, 15.
12. Konman Satan i servi sa ‘lespri lemonn’ pour esey detri nou lanmour pour Bondye?
12 I annan ankor en lot kalite zarm pwisan ki Satan i servi. Sa i ‘lespri lemonn.’ I sa leta lespri ki domin oubyen motiv bann dimoun e ki konpletman opoze avek lespri sen Bondye. (1 Korentyen 2:12) Sa lespri lemonn i promot vorasite ek materyalism, tousala i bann “dezir atraver nou lizye.” (1 Zan 2:16; 1 Timote 6:9, 10) I vre ki napa nanryen mal avek keksoz materyel ek larzan li menm, me si nou pli kontan sa bann keksoz ki Bondye, alors nou’n fini tonm dan latrap Satan. Sa “pisans” oubyen lotorite ki lespri lemonn i annan, i zwe avek bann move dezir dan imen, i anbet dimoun, i vin pli pir, e i partou, zis parey ler ki nou respire. Pa bezwen les sa lespri lemonn afekte ou leker.—Efezyen 2:2, 3; Proverb 4:23.
13. Ki mannyer nou kouraz pour reste prop moralman i kapab ganny teste?
13 Pour kapab reziste e rezet sa move lespri lemonn, nou pou bezwen annan kouraz pour reste prop moralman. Par egzanp i demann kouraz pour leve e kit en lasal sinema, oubyen tenny konpiter ouswa televizyon kan nou konmans vwar bann portre imoral. I demann kouraz pour kapab reziste sa presyon ki lezot dan nou laz i mete lo nou, e pour rezet move frekantasyon. Pareyman, i demann kouraz pour defann lalwa ek prensip Bondye menm si nou bann kanmarad lekol, koleg travay, vwazen oubyen fanmiy i sikann nou.—1 Korentyen 15:33; 1 Zan 5:19.
14. Ki nou devret fer si nou’n ganny kontaminen avek sa lespri lemonn?
14 Alors, pa i enportan ki nou fortifye nou lanmour pour Bondye e pour nou bann frer ek ser! Pran letan pour egzamin ou bann lobzektif ek lafason ki ou viv, pour vwar si dan en fason ou en lot ou pa’n ganny kontaminen par sa lespri lemonn. Si wi, menm si i’n afekte ou en pti gin, priy Zeova pour donn ou sa kouraz pour ki ou retir li dan ou lavi, enn fwa pour tou. Si ou senserman sipliy Zeova, i pou ekout ou. (Psonm 51:17) Deplis, son lespri i pli for ki sa lespri lemonn.—1 Zan 4:4.
Fer fas avek bann Difikilte avek Kouraz
15, 16. Konman sa lanmour parey pour Kris i kapab ed nou fer fas avek bann difikilte? Donn en legzanp.
15 Maladi, dezabilite, depresyon, ek lezot problenm ankor, i serten defi ki souvan bann serviter Zeova i bezwen fer fas avek, e sa i akoz zot lenperfeksyon oubyen akoz zot in vye. (Romen 8:22) Sa lanmour parey Kris i annan i kapab ed nou fer fas avek sa bann difikilte. Annou egzamin legzanp Namangolwa, ki ti grandi dan laverite, Zambia. Kan i ti annan de zan, Namangolwa ti vin andikape. I ti dir: “Mon ti pe trakase ki lezot ti a pe dir lo mwan, e mon ti pe mazinen ki mon kondisyon ti pou vreman sok dimoun. Me mon bann frer ek ser spirityel ti ed mwan get keksoz dan en lot fason. Finalman, mon ti kapab rezet sa kalite santiman e avek letan mon ti batize.”
16 Menm si i annan en wiltyer, kan i bezwen pas lo semen later, souvan i mars katpat. Pourtan, i fer pionye asistan omwen de fwa tou le zan. En zour en madanm ti plere kan Namangolwa ti pres avek li. Akoz? Be akoz i ti ganny touse en kantite par lafwa ek kouraz nou ser. Zeova in beni li en kantite, parski senk son bann letid Labib in batize e enn i ansyen. I dir: “Souvan mon lipye i fer mal en kantite, me mon pa les li met mon ater.” Namangolwa i zis enn parmi bokou Temwen dan lemonn antye ki napa en bon lasante, me zot vreman kouraze, akoz zot kontan Bondye ek zot prosen. Pa zot vreman presye dan lizye Zeova!—Agai 2:7.
17, 18. Kwa ki ed bokou pour andir maladi ek lezot difikilte? Donn serten legzanp lokalman.
17 Maladi kronik i kapab dekouraz nou e menm fer nou tonm dan depresyon. En ansyen i dir: “Sa letid liv kot mon ale, en ser i ganny dyabet e i malad son ronnyon li menm, en lot i ganny kanser, de lezot ser i ganny arthritis, zot ganny en kantite douler, e en lot ser li, i annan lupus ek fibromyalgia. Parfwa zot dekouraze. Me kantmenm sa zot pa zanmen mank renyon, eksepte kan zot vreman malad oubyen zot lopital. Zot tou zot regilye dan predikasyon. Zot fer mwan mazin sa ki Pol ti dir: ‘Ler mon feb, lanmenm ler ki mon for.’ Mon admir zot lanmour pour Zeova ek zot kouraz. Petet zot sitiasyon i donn zot en pli bon vizyon lo lavi e lo kwa ki pli enportan.”—2 Korentyen 12:10.
18 Si ou pe lit avek en dezabilite, maladi oubyen lezot problenm ankor, “priye tou letan” pour ganny led, e koumsa ou pa pou dekouraze. (1 Tesalonisyen 5:14, 17) Byensir, i kapab ki i annandezour ou pou santi ki ou moral i ba, annannler i o. Me esey konsantre lo sa ki pozitif, parey bann keksoz spirityel, espesyalman sa lespwar presye ki nou annan. En ser ti dir: “Predikasyon i parey en terapi pour mwan.” Avek led lezot i kapab partaz sa bon nouvel, e sa i ed li reste pozitif.
Lanmour i ed bann Peser pour retourn kot Zeova
19, 20. (a) Kwa ki kapab ed sa bann ki’n fer pese grav pour ganny kouraz e retourn kot Zeova? (b) Ki nou pou egzaminen dan lartik swivan?
19 En kantite ki’n vin feb spirityelman oubyen ki’n fer pese grav pa vwar li fasil pour retourn kot Zeova. Me en dimoun i kapab ganny kouraz si i senserman repantir e renouvle son lanmour pour Bondye. Pran par egzanp Mario, * ki reste Letazini. I ti kit laverite, i ti konmans abiz lalkol e i pa ti kapab viv san drog. E 20 tan plitar i ti ganny met dan prizon. Mario i dir: “Mon ti konmans mazin seryezman lo mon lavenir e mon ti rekonmans lir Labib. Avek letan mon ti konmans apresye bann kalite Zeova, sirtou son mizerikord, ki souvan mon ti demann li. Apre ki mon ti sorti dan prizon, mon pa ti frekant mon bann zanmi avan, mon ti konmans asiste renyon e finalman mon ti ganny reentegre dan kongregasyon. Ozordi, mon pe rekolte bann konsekans fizik, me omwen aprezan mon annan en lespwar merveye. Mon pa pou zanmen kapab fini remersye Zeova pour son konpasyon ek pardon.”—Psonm 103:9-13; 130:3, 4; Galat 6:7, 8.
20 Byensir, bann ki dan menm sitiasyon ki Mario ti ladan, zot bezwen travay dir pour retourn kot Zeova. Me zot lanmour ki’n ganny renouvle pou donn zot sa kouraz ek determinasyon. E pour kapab renouvle sa lanmour zot bezwen etidye Labib, priye e reflesir. Sa lespwar pour viv eternelman ti osi fortifye Mario. Wi, ansanm avek lanmour, lafwa ek lakrent pour Bondye, lespwar i kapab annan en bon lefe lo nou lavi. Dan lot lartik nou pou egzamin en pe pli profon sa kado presye ki nou annan.
[Not anba lo paz]
^ par. 19 Non in sanze.
Ki ou pou reponn?
• Ki mannyer lanmour ti ed Zezi pour demontre kouraz dan en fason ekstraordiner?
• Konman lanmour pour bann frer ti donn Pol ek Barnabas kouraz?
• Dan ki fason Satan i esey detri sa lanmour ki egziste parmi bann vre Kretyen?
• Lanmour pour Zeova i kapab donn nou sa kouraz pour andir ki kalite difikilte?
[Kestyon]
[Portre lo paz 21]
Lanmour ki Pol ti annan pour dimoun ti donn li sa kouraz pour persevere
[Portre lo paz 23]
I demann kouraz pour defann bann standar Bondye
[Portre lo paz 23]
Namangolwa Sututu