Eski ou annan menm Pwennvi avek Zeova lo bann Keksoz sakre?

“Fer atansyon ki personn pa anmenn en lavi imoral e mank respe pour keksoz sakre.”—EBRE 12:15, 16.

1. Ki latitid bann serviter Zeova pa aksepte?

PLI ale pli dimoun pa fatig zot avek keksoz sakre. En sosyolog Franse Edgar Morin ti dir: ‘Moralite ti baze lo bann konsep dirab parey Bondye, lanatir, patri, listwar, rezon. Me tousala in fini. . . . Konmela dimoun i swazir li menm son bann valer moral.’ Sa i reflekte “lespri dapre lemonn” oubyen “lespri ki aprezan pe travay dan bann zanfan dezobeisans.” (1 Korentyen 2:12; Efezyen 2:2) Bann ki’n dedye zot lavi avek Zeova e volonterman soumet avek sa enn ki annan tou drwa pour dirize, pa aksepte sa leta lespri rebel. (Romen 12:1, 2) Okontrer, bann serviter Bondye i rekonnet lenportans ki bann keksoz sakre oubyen sen i annan dan zot ladorasyon. Kwa ki devret sakre dan nou lavi? Sa lartik pou egzamin senk keksoz ki sakre pour tou bann serviter Bondye. Sa lot lartik pou montre ki nou bann renyon Kretyen i sakre. Me ki sa mo “sen” i vedir?

2, 3. (a) Ki mannyer Labib i fer resorti sentete Zeova? (b) Ki mannyer nou montre ki nou konsider non Zeova konman en keksoz sen?

² Dan langaz Ebre ki ti ganny servi pour ekrir Labib, sa mo “sen” i vedir en keksoz ki’n ganny met apar. Dan domenn ladorasyon Bondye, si en keksoz i “sen” i vedir ki i pa pe ganny servi dan lavi toulezour, i en keksoz sakre. Zeova i konpletman e parfetman sen. I ganny apele “sa Enn Pli Sen.” (Proverb 9:10; 30:3) Dan lepok bann Izraelit, gran pret ti annan en plak lor lo son tirban ki ti ganny anmare lo son latet. Lo sa plak i ti ekrir “Sentete i pour Zeova.” (Egzod 28:36, 37) Labib i dekrir bann seriben ek serafen dan lesyel ki obor tronn Zeova pe dir: ‘Zeova i sen, sen, sen.’ (Izai 6:2, 3; Revelasyon 4:6-8) Lefet ki sa i ganny repete trwa fwa i montre ki Zeova i sen, prop, e pir lo pli o degre. Anfet, tou sa ki sen i sorti kot Zeova.

³ Non Zeova i sakre oubyen sen. En psalmis ti dir avek santiman: “Ki zot loue ou non. Son non i gran e efreyan, i sen.” (Psonm 99:3) Zezi ti montre nou konman pour priye: ‘Nou papa ki dan lesyel, ki ou non sen i ganny glorifye [oubyen ganny rekonnet sakre oubyen sen].’ (Matye 6:9) Mari, manman Zezi lo later ti dir: “Mon glorifye Senyer [Zeova] avek tou mon leker, . . . Bondye-Toupisan in fer gran keksoz pour mwan, son Non i sen.” (Lik 1:46, 49) Konman serviter Zeova, nou konsider son non konman sen e nou rezet tou sa ki ti kapab anmenn move repitasyon lo son non sen. Deplis nou annan menm pwennvi avek Zeova lo sa ki sakre, andotmo, sa ki sakre pour Zeova, nou osi nou vwar li sakre.—Amos 5:14, 15.

Akoz nou annan en gran Respe pour Zezi

4. Akoz Labib i apel Zezi “sa Sen ki sorti kot Bondye”?

⁴ Zezi i “sel Garson” ki’n ganny kree direkteman  par Zeova sa Bondye sen e pour sa rezon, Zezi i sen. (Zan 1:14; Kolosyen 1:15; Ebre 1:1-3) Alors, i ganny apele “sa Sen ki sorti kot Bondye.” (Zan 6:69) I ti reste sen ler i ti ganny anvoye lo later, akoz se gras a pwisans lespri sen ki Mari ti donn nesans Zezi. Parey en lanz ti dir Mari: “Lespri Sen i a desann lo ou, . . . sa zanfan ki pou ne pou sen, i pou apel Garson Bondye.” (Lik 1:35) Dan lapriyer pour Zeova, de fwa bann Kretyen Zerizalenm ti koz lo Garson Bondye konman “ou sen serviter Zezi.”—Akt 4:27, 30.

5. Ki misyon sakre Zezi ti annan lo later, e akoz son disan i presye?

⁵ Zezi ti annan en misyon sakre pour li akonpli lo later. Zour son batenm an 29 N.L., Zezi ti ganny swazir konman Gran Pret dan gran tanp spirityel Zeova. (Lik 3:21, 22; Ebre 7:26; 8:1, 2) Deplis, i ti mor konman en sakrifis. I ti vers son disan konman pri pour bann imen peser kapab ganny sove. (Matye 20:28; Ebre 9:14) Pour sa rezon, nou konsider disan Zezi konman sakre oubyen “presye.”—1 Pyer 1:19.

6. Ki nou latitid vizavi Kris Zezi, e akoz?

⁶ Pour montre ki nou annan en gran respe pour nou Lerwa e Gran Pret, Kris Zezi, zapot Pol ti ekrir: “Bondye in elev li pli o ki tou, e donn li en non pli enportan ki tou lezot non, pour ki devan non Zezi tou sa ki dan lesyel, lo later e dan lemonn pli ba ki later i tonm azenou, E ki tou lalang i proklanmen, ki Zezi-Kri i Senyer pour laglwar Bondye, Papa.” (Filipyen 2:9-11) Nou demontre ki nou annan menm pwennvi ki Zeova lo sa ki sakre, ler nou kontan pour soumet avek nou Lider ek Lerwa Kris Zezi, li ki Sef kongregasyon.—Matye 23:10; Kolosyen 1:18.

7. Ki mannyer nou montre ki nou soumet avek Kris?

⁷ Pour nou soumet avek Kris, nou bezwen respekte sa bann zonm ki Zezi pe servi pour organiz sa travay ki li menm pe dirize konmela. Nou devret rekonnet ki i en responsabilite sakre pour aksepte rol bann Kretyen swazir ki lo Konsey Direkter e osi bann sirveyan ki zot in apwente pour pran swen bann biro brans, distrik, rezyon ek kongregasyon. Alors, nou bezwen soumet e demontre gran respe pour sa laranzman.—Ebre 13:7, 17.

En Pep sen

8, 9. (a) Dan ki sans bann Izraelit ti en pep sen? (b) Ki mannyer Zeova ti met lanfaz lo sa ki sakre avek bann Izraelit?

⁸ Zeova ti fer en lalyans avek Izrael. Sa relasyon ti donn sa nouvo nasyon en pozisyon spesyal. Dan sa sans, zot ti sen oubyen separe. Zeova ti dir zot: “Zot devret montre zot sen pour mwan, akoz mwan, Zeova, mon sen; e mon ape separ zot avek bann pep pour ki zot vin pour mwan.”—Levitik 19:2; 20:26.

⁹ Okonmansman menm, ler Izrael ti vin en nasyon, Zeova ti met lanfaz lo lenportans sa ki sakre. Si en dimoun ti menm tous  montanny kot Moiz ti ganny sa Dis Komannman, i ti pou mor. Dan sa sans, Montanny Sinai ti ganny konsidere konman sakre. (Egzod 19:12, 23) Bann pret, tabernak ek son bann meb ti devret ganny konsidere konman sakre. (Egzod 30:26-30) Ki mannyer sitiasyon i ete dan kongregasyon Kretyen ozordi?

10, 11. Akoz nou kapab dir ki kongregasyon bann Kretyen swazir i sakre, e ki lefe sa i annan lo ‘lezot mouton’?

¹⁰ Kongregasyon bann Kretyen swazir i sakre dan lizye Zeova. (1 Korentyen 1:2) Anfet group tou sa bann Kretyen swazir lo later dan nenport lepok, i ganny konpare avek en tanp sen, menm si zot pa sa gran tanp spirityel Zeova. Zeova i reste dan sa tanp par son lespri sen. Zapot Pol ti ekrir: “Limenm [Kris Zezi] ki tenir ansanm sa batiman antye e permet li grandi pour form en Tanp sen ini avek [Zeova]. Dan linyon avek li, zot form parti dan sa konstriksyon pour ki ansanm avek tou lezot, zot vin en lakaz kot Bondye i kapab reste par son lespri.”—Efezyen 2:21, 22; 1 Pyer 2:5, 9.

¹¹ Pol ti dir osi bann Kretyen swazir: “Eski zot konnen ki zot Tanp Bondye e ki Lespri Bondye i reste dan zot? . . . Tanp Bondye i sen, e se zot menm sa Tanp.” (1 Korentyen 3:16, 17) Atraver son lespri, Zeova pe ‘reste’ avek bann Kretyen swazir e i pe ‘mars avek zot.’ (2 Korentyen 6:16) I pe kontinyelman gid son ‘lesklav’ fidel. (Matye 24:45-47) ‘Lezot mouton’ i kontan zot privilez pour asosye avek sa “tanp” senbolik, setadir bann Kretyen swazir.—Zan 10:16; Matye 25:37-40.

Keksoz sakre dan nou Lavi Kretyen

12. Kwa ki sakre dan nou lavi, e akoz?

¹² I pa sirprann nou ki plizyer keksoz ki annan pour fer avek lavi bann Kretyen swazir oubyen avek bann ki asosye avek zot, i ganny konsidere konman sakre. Nou relasyon avek Zeova i en keksoz sakre. (1 Kronik 28:9; Psonm 36:7) I telman presye pour nou, ki nou pa pou les nanryen ouswa okenn dimoun separ nou avek Zeova, nou Bondye. (2 Kronik 15:2; Zak 4:7, 8) Lapriyer i en laspe enportan pour nou gard en relasyon pros avek Zeova. Lapriyer ti telman sakre  pour profet Danyel ki i ti kontinyen priy parey labitid menm si son lavi ti dan risk akoz sa. (Danyel 6:7-11) “Lapriyer bann sen” oubyen bann Kretyen swazir i parey lansan ki ti ganny servi dan ladorasyon dan tanp. (Revelasyon 5:8; 8:3, 4; Levitik 16:12, 13) Lefe ki lapriyer i ganny konpare avek lansan i montre ki lapriyer i vreman sakre. Pa i vreman en gran privilez ki nou kapab kominik avek Souvren liniver! I tou normal alors ki nou konsider lapriyer konman sakre dan nou lavi.

13. Ki lafors ki sen, e ki nou devret fer pour les li azir dan nou lavi?

¹³ I annan en lafors ki bann Kretyen swazir ek bann ki asosye avek zot i vreman konsider konman sakre, sa i lespri sen. Sa lespri i lafors Bondye an aksyon. Vi ki sa lafors i toultan ganny servi an armoni avek sa ki sa Bondye sen i oule, i ganny apele ‘lespri sen’ oubyen “lespri sentete.” (Zan 14:26; Romen 1:4, NW) Zeova i servi son lespri sen pour donn lafors son bann serviter pour anons sa bon nouvel. (Akt 1:8; 4:31) Zeova i donn son lespri sen “bann ki obei li” konman zot sef, bann ki ‘les Lespri diriz zot lavi’ e ki pa mars dapre zot bann move dezir. (Akt 5:32; Galat 5:16, 25; Romen 8:5-8) Sa lafors pwisan i fer bann Kretyen devlop “fri Lespri” setadir bann zoli kalite e i osi ed zot pour “anmenn en lavi sen e annan respe pour Bondye.” (Galat 5:22, 23; 2 Pyer 3:11) Si lespri sen i en keksoz sakre pour nou, nou pa pou fer nanryen ki ti kapab ofans sa lespri, setadir anpes sa lespri azir dan nou lavi.—Efezyen 4:30.

14. Ki privilez bann Kretyen swazir i konsider konman sakre, e ki mannyer bann Kretyen ki form par lezot mouton pe osi ed zot?

¹⁴ En lot keksoz ki nou konsider sakre, i sa privilez pour port non nou Bondye sen, Zeova e lefe ki nou son bann Temwen. (Izai 43:10-12, 15) Bann Kretyen swazir in ganny zot kalifikasyon avek Zeova pour vin “bann serviter en nouvo lalyans.” (2 Korentyen 3:5, 6) Pour sa rezon, zot in ganny sa misyon pour pres “sa Bonn Nouvel Rwayonm” e pour ‘fer dimoun sorti dan tou pep vin disip’ Zezi. (Matye 24:14; 28:19, 20) Zot pe desarz fidelman sa responsabilite e plizyer milyon dimoun pe dir dan en fason senbolik avek bann Kretyen swazir: “Nou pou al avek zot, akoz nou’n antann ki Bondye i avek zot.” (Zekarya 8:23) Dan en sans spirityel, zot servi avek lazwa konman bann “fermye” ek bann ki ‘plant pye rezen’ pour bann “minis [swazir] nou Bondye.” Dan sa fason, bann Kretyen ki form par ‘lezot mouton’ pe ed bann Kretyen swazir en kantite pour akonpli zot minister dan lemonn antye.—Izai 61:5, 6.

15. Ki travay ki ti sakre pour zapot Pol, e akoz nou annan menm pwennvi?

¹⁵ Nou annan legzanp zapot Pol ki ti konsider son minister piblik konman sakre oubyen sen. I ti dir lo son prop lekor: “[Mon’n vin ] serviter [piblik] Kris-Zezi pour pep non-Zwif. Mon pe fer en servis sakre [oubyen sen] anonsan Bonn Nouvel Bondye.”  (Romen 15:16) Kan i ti ekrir bann Korentyen, i ti dir ki son minister i en “trezor.” (2 Korentyen 4:1, 7) Atraver nou minister piblik, nou fer konn “parol [sakre] Bondye.” (1 Pyer 4:11) Alors, ki nou fer parti bann Kretyen swazir oubyen lezot mouton, pour nou travay predikasyon i en privilez sakre.

‘Vin konpletman sen avek Respe devan Bondye’

16. Kwa ki kapab fer nou pa “mank respe pour keksoz sen”?

¹⁶ Zapot Pol ti averti bann Kretyen son lepok pour fer atansyon bann dimoun ki “mank respe pour keksoz sen.” Okontrer i ti konsey zot pour rod sa ki “sen,” e “fer atansyon . . . ki personn pa prodwi rasin anmer e [ki] fer problenm e ki par li bokou lezot i ganny afekte.” (Ebre 12:14-16) Sa mo “rasin anmer” i aplik avek ennde dimoun ki kontan kritik tou sa ki ganny fer dan kongregasyon Kretyen. Par egzanp, zot kapab pa dakor avek pwennvi Zeova konmkwa maryaz i sakre oubyen ki i enportan anmenn en lavi drwat. (1 Tesalonisyen 4:3-7; Ebre 13:4) Zot osi kapab donn lanmen bann ki’n “ekart zot avek laverite,” par partisip dan “bann diskisyon vid ki kontrer avek [sa ki sen].”—2 Timote 2:16-18.

17. Akoz i demande ki bann Kretyen swazir pa aret fer zefor pour reflekte pwennvi Zeova lo sa ki sen?

¹⁷ Pol ti ekrir avek bann Kretyen swazir: “Annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.” (2 Korentyen 7:1) Sa verse i montre ki bann Kretyen swazir ki’n ganny “apele” pour viv dan lesyel pa devret aret fer bokou zefor pour prouve ki zot pe reflekte pwennvi Zeova lo sa ki sen dan tou laspe zot lavi. (Ebre 3:1) Lo menm laliny, zapot Pyer ti dir bann Kretyen swazir: “Konman bann zanfan obeisan, pa bezwen les zot bann dezir ki zot ti annan, kan zot ti ankor dan linyorans, kontrol zot. Parey Bondye ki’n apel zot i sen, zot osi, vin sen dan tou zot kondwit.”—1 Pyer 1:14, 15.

18, 19. (a) Ki mannyer sa “gran lafoul” i montre sa respe pour keksoz sen dapre Zeova? (b) Ki sa laspe sakre nou lavi Kretyen ki nou pou egzaminen dan lot lartik?

¹⁸ Eski sitiasyon i diferan pour bann ki form par sa “gran lafoul” ki pou sorti vivan dan sa “gran ladetres”? Zot osi zot bezwen montre ki zot annan menm pwennvi ki Zeova lo sa ki sen. Dan liv Revelasyon, nou trouv sa gran lafoul pe ‘rann en servis sakre’ dan lakour tanp spirityel lo later. Zot annan lafwa dan sakrifis Kris, e dan en sans senbolik zot “in lav zot rob e blansi li dan disan Lanyo.” (Revelasyon 7:9, 14, 15) Sa i met zot dan en kondisyon akseptab dan lizye Bondye e i obliz zot pour ‘pirifye zot avek tou sa ki sali lekor ek lespri, e fer tou pour zot vin konpletman sen an vivan avek respe devan Bondye.’

¹⁹ En laspe enportan dan lavi bann Kretyen swazir ek bann ki asosye avek zot, i bann renyon Kretyen kot zot ador Zeova e etidye son Parol. Zeova i konsider sa bann renyon konman sakre. Konman e akoz nou devret annan menm pwennvi ki Zeova lo sa ki sen dan sa domenn, pou ganny egzaminen dan sa lot lartik.

Revizyon

• Ki pwennvi lemonn ki bann serviter Zeova pa aksepte?

• Akoz tou sa ki sen i sorti kot Zeova?

• Ki mannyer nou montre ki nou annan respe pour sentete Kris?

• Ki nou devret konsider konman sakre dan nou lavi?

[Kestyon]

[Portre lo paz 23]

Lepok bann Izraelit, bann pret, tabernak ek son bann meb ti ganny konsidere konman sakre

[Portre lo paz 24]

Bann Kretyen swazir lo later pe form en tanp sen

[Portre lo paz 25]

Lapriyer ek nou minister piblik i bann privilez sakre