Akfer idantifye Lennmi Kris?

“Zot in deza tande ki Lennmi Kris i devre vini.” Sa parol ti ekrir par en zapot ki ti ganny enspire par Bondye byen lontan. (1 Zan 2:18) I enteresan sa, non? Plizyer syek, dimoun in sey rode ki sa i vedir. Lekel sa lennmi Kris? Kan i pou vini? Ki i pou fer ler i vini?

LALIS bann ki’n ganny apele lennmi Kris i long. Bann Zwif, bann lepap Katolik, ek bann lanperer Romen i parmi bann ki ti ganny apele “Lennmi Kris” dan lepase. Par egzanp, kan Lanperer Frederick 2 (1194-1250) ti deside pour pa partisip dan en Krwazad ki legliz ti fer, Lepap Gregory 9 ti apel li lennmi Kris e ekskominyen li. Innocent 4 ki ti siksed Gregory, ti ekskominyen li ankor. An retour, Frederick ti deklar Innocent en lennmi Kris li osi.

Zapot Zan i sa sel ekriven Labib ki’n servi sa mo “Lennmi Kris.” Dan de let ki port son non, sa mo i aparet senk fwa, swa an sengilye ou an pliryel. Sa bann verse ki sa lekspresyon i aparet ladan i dan sa bwat lo paz swivan. Dan sa bann verse, nou kapab vwar ki lennmi Kris i en manter e en tronper. I determinen pour detrir relasyon en dimoun avek Kris e avek Bondye. Se pour sa ki sa zapot ti sipliy son bann konpanyon Kretyen: “Byenneme, pa bezwen krwar tou sa ki pretann ki i posed lespri, me teste zot pour verifye si lespri ki zot posede i sorti kot Bondye, parski i annan bokou fo ansennyan dan lemonn.”—1 Zan 4:1.

Zezi osi ti averti nou kont bann tronper, oubyen fo profet, ler i ti dir: “Zot vin kot ou parey mouton, me anndan zot bann loulou feros. Zot a ganny rekonnet par zot fri [oubyen aksyon].” (Matye 7:15, 16) Eski Zezi osi ti pe averti son bann disip kont sa Lennmi Kris senbolik? Annou vwar ki mannyer nou kapab idantifye sa tronper kriyel.