Bann Pwen enteresan dan Liv Eklezyast
Parol Zeova i vivan
Bann Pwen enteresan dan Liv Eklezyast
“ZONM, ki fanm in donn nesans, i viv en pti gin letan e son lavi i ranpli avek azitasyon.” Sa i remark ki patrias Zob ti fer. (Zob 14:1) Pa i tre enportan alors ki nou pa gaspiy nou lavi ki vreman kourt pour akonpli bann lobzektif ek aktivite ki napa valer! Ki bann aktivite ki nou devret donn tou nou letan, lenerzi ek resours? Ki bann aktivite ki nou devret evite? Sa bann parol ranpli avek lasazes ki’n ganny prezerve dan liv Eklezyast i donn nou bon gidans dan sa domenn. Sa mesaz dan sa liv i kapab “desifre tou dezir ek sekre leker imen” e i kapab ed nou pour viv en lavi ki annan sans.—Ebre 4:12.
Liv Eklezyast ti ganny ekrir par Lerwa Salomon dan ansyen Izrael, i ti en zonm ki ti renonmen pour son lasazes. Sa liv i kontyen bann konsey pratik lo kwa ki vreman annan valer dan lavi e kwa ki napa valer. Vi ki dan sa liv, Salomon i refer avek serten bann proze konstriksyon ki li menm i ti form par ladan, i bezwen ki i ti ekrir liv Eklezyast apre ki i ti’n konplet sa bann proze e avan ki i ti rezet vre ladorasyon. (Neemya 13:26) Alors, i ti’n bezwen ekrir sa liv avan lannen 1000 A.N.L., ziska ver lafen sa 40 an ki i ti lerwa.
KWA KI PA ANVEN?
“Tou keksoz i anven!” Sa i parol ki sa enn ki rasanble dimoun ti dir, e apre i ti demande: “Ki profi en zonm i kapab tire dan tou son dir travay ki i’n fer lo later?” (Eklezyast 1:2, 3) Sa lekspresyon “anven” ek “lo later” i aparet plizyer fwa dan liv Eklezyast. Sa mo Ebre ki’n ganny tradwir “anven” i literalman vedir “souf” oubyen “lavaper” e i vedir napa gran lenportans, i tanporer, oubyen i pa dirab. Sa lekspresyon “lo later” i vedir “dan sa lemonn.” Anfet, tou keksoz, savedir tou bann lobzektif ki pa an akor avek lavolonte Bondye, i anven.
Salomon i dir: “Vey ou lipye ler ou al kot lakaz vre Bondye; e koste pour ou tande.” (Eklezyast 5:1) Kan nou pe donn Bondye sa vre ladorasyon, sa i pa anven. Anfet, pour nou kapab annan en lavi ki annan sans, i tre enportan ki nou vey nou relasyon avek li.
Larepons pour bann Kestyon lo Labib:
1:4-10—Kwa ki fer sa sirk natirel “fatigan”? Se enn ki rasanble dimoun i fer resorti zis trwa keksoz debaz ki fer li posib pour imen viv lo later. Sa i soley, lafason ki divan i soufle, ek sirk delo. Annefe, i annan en kantite sirk natirel, e zot vreman konplike. En dimoun i kapab pas tou son lavi pour etidye zot e i pa pou zanmen fini kapab konpran zot. Sa i kapab vreman “fatigan.” I pou rann nou fristre si nou esey konpar longer nou lavi ki kourt avek sa bann sirk ki pe kontinyelman ganny repete san en finisyon. Menm bann lesey pour fer bann nouvo dekouvert i fatigan. Apre tou, dan sa bann nouvo lenvansyon ou kapab vwar ki zot in senpleman aplik bann prensip ki sa vre Bondye in etabli e servi dan kreasyon.
2:1, 2—Akoz riye i ganny asosye avek “lenbesil”? Kan nou riye sa i kapab fer nou oubliy nou traka pour en pti moman, e lanmizman i kapab fer nou pa tro fatig nou avek nou bann problenm. Me kan nou riye sa pa fer nou bann problenm disparet. Alors, Labib i asosye riye avek “lenbesil” kan en dimoun i esey rod vre lazwa par sa mwayen.
3:11—Kwa ki Bondye in fer “zoli dan son letan”? I annan diferan keksoz ki Zeova in fer “zoli” oubyen ki adapte e bon dan son letan apropriye. Par egzanp kan i ti kree Adan ek Ev, sa lalyans larkansyel, lalyans avek Abraam, avek David, larive Mesi e kan Zezi ti ganny kouronnen konman Lerwa dan Rwayonm Bondye. Me i annan en lot keksoz ki Zeova i pros pour fer “zoli.” Nou kapab asire ki sa nouvo lemonn kot pou annan lazistis pou vin vre dan son letan apropriye.—2 Pyer 3:13.
3:15b—Ki mannyer ‘sa vre Bondye i kontinyen rod sa ki pe ganny rode’? ‘Sa ki pe ganny rode,’ i kapab pe refer avek plan ki Bondye in deside pour akonpli. Nesans, lanmor, lager ek lape i bann keksoz ki nou kontinyelman vwar zour apre zour, e sa i kapab fer imen santi ki zot napa okenn pouvwar e fer zot panse ki tousala pou kontinyen pour touzour. Sa vre Bondye i kapab rod e akonpli tou sa ki i anvi fer. (Eklezyast 3:1-10, 15a) ‘Sa ki pe ganny rode’ i osi kapab aplik avek bann dimoun drwat ki souvan ganny menase par bann move dimoun. Dan sa ka, Zeova i kontinyen rod bann dimoun drwat avek bi pour donn zot “son lafors.”—2 Kronik 16:9.
5:9—Ki mannyer ‘profi ki later i fer i parmi zot tou’? Tou dimoun lo later i depan lo “profi ki later i fer,” savedir sa ki later i prodwi. Sa i osi aplik pour en lerwa. Akoz pour li kapab ganny prodwi sorti lo son laferm, son bann serviter i bezwen travay dir pour kiltiv later.
Leson pour nou:
1:15. I pa vo lapenn pour gat nou letan ek lenerzi pour esey elimin lopresyon ek lenzistis dan sa lemonn ozordi. Zis Rwayonm Bondye ki kapab met en lafen avek mesanste.—Danyel 2:44.
2:4-11. Bann aktivite kiltirel parey arsitek, travay dan zarden, lanmizik, e viv en lavi deliks, tousala i konmsi nou pe “tay deryer divan” akoz zot pa vreman fer nou lavi annan en sans e zot pa ni anmenn boner dirab.
2:12-16. En dimoun ki saz oubyen malen i annan plis lavantaz ki en dimoun bet, akoz i kapab rezourd serten problenm dan lavi. Me ler i mor, lasazes imen napa okenn lavantaz. Menm si en dimoun ti renonmen akoz son lasazes, ler i mor tou dimoun i bliy li.
2:24; 3:12, 13, 22. I pa mal pour nou rezwir rezilta nou travay.
2:26. ‘En zonm ki bon dan lizye Zeova’ i ganny lasazes Bondye e sa lasazes i anmenn lazwa. I enposib pour nou ganny sa lasazes si nou napa en bon relasyon avek Bondye.
3:16, 17. I pa rezonnab pour nou ekspekte ki nou pou toultan ganny trete dan en fason zis. Olye les sa ki pe arive dan lemonn ozordi trakas nou, nou devret esper Zeova akoz li ki pou rektifye sa bann problenm.
4:4. Kan en dimoun i travay dir e byen fer son travay, sa i kapab donn li satisfaksyon. Kan nou travay dir zis pour depas lezot, sa i promot konpetisyon e i kapab kree bann move santiman ek zalouzi. Kan nou travay dir dan predikasyon, nou devret fer li avek en bon motivasyon.
4:7-12. Relasyon imen i pli enportan ki keksoz materyel e nou pa devret sakrifye sa relasyon pour rod larises.
4:13. Nou pozisyon dan lasosyete ek nou laz, pa toultan fer dimoun respe nou. Bann ki annan responsabilite i devret azir avek lasazes.
4:15, 16. “Sa dezyenm zanfan,” savedir sikseser lerwa, okonmansman i kapab ganny sipor ‘tou sa bann dimoun avan li,’ me ‘apre zot pa pran plezir dan li.’ Anfet, popilarite, laplipar-di-tan i zis pour en pti pe letan.
5:2. Nou lapriyer i devret montre ki nou’n reflesir avan nou priye, ki nou annan respe pour Bondye, e i pa devret zis en rabasman.
5:3-7. Ler en dimoun i preokip li avek bann keksoz materyel, dan lazournen i kapab rev son bann dezir egois. Aswar i osi kapab anpes en dimoun repoze, anpes li dormi oubyen ganny en bon sonmey. En dimoun ki koz en kantite i kapab paret bet devan lezot, e en dimoun koumsa i kapab fer en ve devan Bondye san reflesir. Kan nou annan ‘lakrent pour sa vre Bondye,’ sa pou anpes nou fer sa bann keksoz.
6:1-9. Ki benefis i annan pour vin ris, annan laglwar, viv lontan, e menm annan en gran fanmiy si sitiasyon lavi i anpes nou rezwir tousala? “Pli vo mye ou vwar avek ou lizye,” oubyen fer fas avek larealite ki “ou nanm i ale vini [oubyen “dezir laser,” not anba lo paz dan Traduction du monde nouveau].” Sa lekspresyon “ou nanm i ale vini,” i vedir ler en dimoun i esey fer tou sa ki i kapab pour satisfer son bann dezir ki enposib pour vin vre. Lavi i pli gou kan nou kontant nou avek “manze ek lenz” anmezir ki nou apresye bann bon keksoz dan lavi e toultan fer sir ki nou reste pros avek Zeova.—1 Timote 6:8.
KONSEY POUR BANN KI SAZ
Konman nou kapab fer sir ki nou non pa ganny sali e nou repitasyon pa ganny gate? Ki mannyer nou devret azir anver bann dirizan imen ek bann lenzistis ki nou kapab vwar? Lefe ki bann mor pa konn nanryen, ki mannyer nou devret servi nou lavi depi konmela menm? Dan ki fason bann zenn i kapab byen servi zot letan ek lenerzi? Sa enn ki rasanble dimoun i donn nou bon konsey lo tousala e lo lezot keksoz ankor. Nou kapab vwar sa bann konsey dan Eklezyast sapit 7 ziska 12.
Larepons pour bann Kestyon lo Labib:
7:19—Ki mannyer lasazes i pli for ki “dis zonm pwisan”? Kan i ganny servi dan en sans senbolik dan Labib, nimero dis i reprezant en keksoz ki konplet. La Salomon pe dir ki proteksyon ki lasazes i donnen i bokou pli for ki tou bann gerye ki pe vey en lavil.
10:2—Ki savedir leker en dimoun i lo son “kote drwat” oubyen “lo son kote gos”? Lefe ki souvan kote drwat i reprezant laprouvasyon, kan leker en dimoun i lo son kote drwat sa i vedir ki son leker i motiv li pour fer sa ki byen. Si son leker i pous li pour fer sa ki mal, nou kapab dir ki son leker i lo son kote gos.
10:15—Ki mannyer ‘gro travay ki bann dimoun bet i fer, i fer zot epwize’? Si en dimoun napa bon zizman, menm si i’n travay dir, son travay pa anmenn okenn profi. I pa ganny okenn satisfaksyon. Sa kantite travay ki i’n fer avek lafatig i zis epwiz li.
11:7, 8—Ki savedir sa parol: “Lalimyer osi i dou, e i fer lizye dibyen pour vwar soley”? Lalimyer ek soley i fer lavi gou. Salomon pe dir ki i en bon keksoz ki nou vivan e ki nou devret “rezwir” avan ki bann zour fernwanr, oubyen letan lavyeyes, i pran tou nou lafors.
11:10—Akoz “lazenes ek sa moman pli aktif dan lavi” i anven? Zot anven akoz si nou pa byen servi zot, sa letan kot nou ankor zenn ranpli avek lafors i disparet en sel kou, zis parey lavaper.
Leson pour nou:
7:6. Riye dan en letan ki pa apropriye i iritan e initil zis parey tapaz pikan ki pe brile anba en marmit. I byen si nou evite riye kan i pa apropriye.
7:21, 22. Nou pa devret tro fatig nou avek sa ki lezot i dir.
8:2, 3; 10:4. I byen pour nou reste kalm kan nou ganny kritike oubyen korize par sa enn ki pe siperviz travay oubyen en anplwayer. I pli byen azir dan sa fason ki ‘deswit sorti devan son figir,’ savedir demisyonnen en sel kou.
8:8; 9:5-10, 12. En sel kou nou kapab mor san ekspekte, zis parey pwason ki ganny atrape dan en kazye oubyen en zwazo ki tonm dan en latrap. Deplis, kan en dimoun pe mor i pa kapab fer nanryen pour anpes li mor, e personn pa kapab eparny sa lager ki lanmor pe fer kont imen. Alors, nou pa devret gat nou letan asize nanryen fer. Zeova i anvi ki nou apresye lavi e rezwir li dan en bon fason. Pour kapab fer sa, nou bezwen met servis Zeova premye dan nou lavi.
8:16, 17. I enposib pour konpran tou keksoz an detay ki Bondye in fer e ki i’n les arive parmi imen, menm si nou pa ganny sonmey akoz nou pe esey konpran zot. Kan nou trakase akoz sa kantite keksoz mal ki pe arive dan lemonn, sa pou fer nou perdi nou lazwa pour viv.
9:16-18. Lasazes i bezwen annan valer pour nou menm si dimoun an zeneral pa tro apresye li. Parol avek ladouser ki sorti dan labous en dimoun saz pou pli ganny apresye ki tapaz ki en dimoun bet i fer avek son labous.
10:1. Nou bezwen vey byen sa ki nou dir ek nou aksyon. Zis en aksyon ki demontre en mank bon zizman tel parey en gran lakoler, labi lalkol, limoralite seksyel, i ase pour gat nou bon repitasyon.
10:5-11. I pa fer sans pour anvi vin parey en dimoun ki annan en bon plas travay me ki enkonpetan. Mank konpetans pour fer en louvraz senp, i kapab anmenn move konsekans. Me i dan nou lavantaz kan nou devlop sa abilite pour ‘servi lasazes pour trouv sikse.’ Pa i enportan ki nou vin konpetan dan sa travay pour pres sa bon nouvel Rwayonm e fer disip!
11:1, 2. Nou devret demontre zenerozite avek tou nou leker. Kan nou fer sa lezot pou demontre zenerozite anver nou.—Lik 6:38.
11:3-6. Bann lenkyetid lavi pa devret fer li enposib pour nou pran bann desizyon dan lavi.
11:9; 12:1-7. Bann zenn pou bezwen rann kont Zeova. Alors, zot bezwen servi zot letan ek lenerzi pour servi Bondye avan ki bann vye zour i pran zot lafors.
“PAROL BANN DIMOUN SAZ” POUR GID NOU
Konman nou devret vwar sa bann “zoli parol” ki sa enn ki rasanble dimoun ti fer zefor pour rode e ekrir? Kontrerman avek sa “kantite liv” ki demontre lasazes imen, “parol bann dimoun saz i parey bann baton pwent, e sa bann ki pas zot letan pour konpoz bann fraz i parey klou ki’n byen anfonse, e zot sorti kot en sel berze.” (Eklezyast 12:10-12) Bann parol saz sorti kot sa “sel berze,” Zeova, i annan en lefe dirab lo nou lavi.
Kan nou aplik sa konsey saz ki trouve dan liv Eklezyast, sa pou fer nou lavi gou e i pou annan sans. Deplis nou annan sa lasirans: “Bann ki annan lakrent pour sa vre Bondye pou byen pase.” Alors, avek determinasyon annou kontinyen “annan lakrent pour sa vre Bondye e gard son bann komannman.”—Eklezyast 8:12; 12:13.
[Portre lo paz 31]
Enn parmi bann pli zoli travay Bondye pou vin en realite dan son bon moman
[Portre lo paz 32]
Manze, bwar e vwar bon rezilta nou dir travay, tousala i bann kado sorti kot Bondye