Kontan sa Bondye ki kontan ou
Kontan sa Bondye ki kontan ou
“Kontan Senyer ou Bondye avek tou ou leker, avek tou ou lam, e avek tou ou lespri.”—MATYE 22:37.
1, 2. Kwa ki ti’n kapab soulev sa kestyon konsernan pli gran komannman?
DAN sa plis ki 600 lalwa ki ti ganny donnen avek Moiz, lekel ki pli enportan? I paret ki sa ti en kestyon ki bann Farizyen dan letan Zezi ti diskit plis lo la. Eski i ti en lalwa ki ti annan pour fer avek sakrifis? Apre tou, sakrifis ti ganny fer pour ki pese i ganny pardonnen, e pour remersye Bondye. Oubyen eski sa lalwa pli enportan i sa lalwa lo sirkonsizyon? Sa osi tou ti enportan akoz sirkonsizyon ti en siny sa lalyans ki Zeova ti fer avek Abraam.—Zenez 17:9-13.
2 De lot kote, bann ki ti viv dapre koutim ti vwar li mal pour konsider en komannman pli enportan ki lezot akoz pour zot, tou lalwa Bondye ti enportan, menm si serten ti kapab paret annan mwens lenportans. Bann Farizyen ti deside pour demann Zezi sa kestyon kontrovers. Petet i ti pou dir en keksoz ki ti kapab fer dimoun perdi en pe zot konfyans dan li. En Farizyen ti apros Zezi e dir: “Lekel pli gran konmannman dan Lalwa?”—Matye 22:34-36.
3. Dapre Zezi, lekel pli gran komannman?
3 Larepons ki Zezi ti donnen i annan en gran lenportans pour nou ozordi. An bref, i ti fer resorti en keksoz ki’n toultan e ki pou kontinyen reste sa laspe pli enportan dan vre ladorasyon. Zezi ti pe sit Deterononm 6:5 kan i ti dir: “Kontan Senyer ou Bondye avek tou ou leker, avek tou ou lam, e avek tou ou lespri. Sa se premye e pli gran konmannman.” Menm si sa Farizyen ti’n demann konsernan zis en komannman, Zezi ti donn li ankor enn. Safwasi i ti sit Levitik 19:18: “Dezyenm komannman i parey li: ‘Kontan ou prosen parey ou kontan ou prop lekor.’” Apre Zezi ti fer resorti ki vre ladorasyon an zeneral i baze lo sa de komannman. Pour ki zot pa demann li pour dir lezot lalwa ki pli enportan dan lord, Zezi ti konklir: “Lalwa antye ek lansennyman bann profet i depann lo sa de konmannman.” (Matye 22:37-40) Dan sa lartik nou pou diskit sa pli gran komannman. Akoz nou devret kontan Bondye? Ki mannyer nou montre nou lanmour pour Bondye? E konman nou kapab devlop li? I tre enportan ki nou konn larepons sa bann kestyon akoz pour nou kapab fer plezir Zeova, nou bezwen kontan li avek tou nou leker, tou nou nanm ek lespri.
Lenportans Lanmour
4, 5. (a) Akoz sa Farizyen pa ti sirprann par sa ki Zezi ti dir? (b) Kwa ki annan plis valer devan Bondye ki sakrifis ek lofrann?
4 I paret ki sa Farizyen pa ti soke oubyen sirprann par larepons ki Zezi ti donn li. I ti konnen ki lanmour pour Bondye ti en laspe enportan dan vre ladorasyon, menm si bokou pa ti demontre sa kalite. Dan sinagog i ti en labitid pour resit for Sema, oubyen konfesyon lafwa. Dan sa lapriyer i ti enkli sa bann parol ki trouve dan Deterononm 6:4-9, ki Zezi ti site. Dapre sa resi dan Mark ki pe koz lo menm size, sa Farizyen ti dir Zezi: “Ou annan rezon, Met! I vre ki i annan en sel Bondye e napa en lot ki li. Pour kontan Bondye avek tou son leker, tou son lentelizans e tou son lafors, e pour kontan son prosen parey limenm, i vo plis ki tou bann lofrann ki ganny brile ek bann sakrifis.”—Mark 12:32, 33.
5 Menm si dapre Lalwa, lofrann brile ek sakrifis ti bezwen ganny fer, sa ki ti vreman enportan pour Bondye ti sa bon motivasyon dan leker son bann serviter ki ti pous zot pour fer sa. En dimoun ki ti ofer Bondye en sren, akoz i kontan e annan devosyon pour Bondye, sa ti annan plis valer pour Li, ki plizyer milye mouton ki ganny donnen avek en move motivasyon. (Mika 6:6-8) Mazin sa resi kot Zezi ti obzerv en pov vev dan tanp Zerizalenm. Ou pa ti pou ni menm kapab aste en sren avek sa de pti sou ki i ti met dan bwat. Pourtan, son kontribisyon ki i ti fer akoz i ti kontan Zeova avek tou son leker, ti annan plis valer dan lizye Bondye ki sa bann gran sonm larzan ki bann dimoun ris ti pe donnen, akoz zot pa ti pou bezwen sa larzan. (Mark 12:41-44) Pa i vreman ankourazan pour konnen ki Zeova i sitan apresye nou lanmour! En keksoz ki nou tou nou kapab demontre nenport ki sitiasyon nou ladan.
6. Ki Pol ti ekrir lo lenportans lanmour?
6 Pour met lanfaz lo lenportans lanmour dan vre ladorasyon, zapot Pol ti ekrir: “Menm si mon ti a kapab koz langaz tou pep ek bann lanz, me mon napa lanmour, mon parol i zis parey tapaz en tanbour, ou en senbal ki rezonnen. Menm si mon annan don profesi, e konnesans tou bann mister e posed tou konnesans, e si mon posed tou lafwa pour fer deplase montanny, me mon napa lanmour, mon en nanryen ditou. Menm si mon ti a donn tou sa ki mon posede, ou menm si mon ti a donn mon lekor pour brile, me mon napa lanmour, i pa servi mwan dan nanryen.” (1 Korentyen 13:1-3) I kler ki lanmour i esansyel si nou anvi ki nou ladorasyon i fer plezir Bondye. Alors, ki mannyer nou demontre nou lanmour pour Zeova?
Konman nou demontre nou Lanmour pour Zeova
7, 8. Konman nou kapab demontre nou lanmour pour Zeova?
7 Bokou dimoun i krwar ki lanmour i zis en santiman ki nou preski pa kapab kontrole, parey ler en dimoun i tonm anmoure. Me vre lanmour pa zis en keksoz ki nou santi anndan nou. I ganny demontre e definir par aksyon, pa santiman. Labib i dekrir lanmour konman en “semen ki bokou pli siperyer” e konman en keksoz ki nou ‘rode.’ (1 Korentyen 12:31; 14:1) Kretyen i ganny ankouraze pour montre lanmour pa zis par ‘bann zoli parol, e zoli diskour, me vreman par zot laksyon’ ek laverite.—1 Zan 3:18.
8 Lanmour pour Bondye i pous nou pour fer sa ki fer li plezir, e pour defann e siport son souvrennte par nou parol ek aksyon. I osi motiv nou pour ay sa lemonn ek son move fason viv. (1 Zan 2:15, 16) Sa bann ki kontan Bondye i annan laenn pour sa ki mal. (Psonm 97:10) Lanmour pour Bondye i osi enplik lanmour pour nou prosen, e dan lot lartik nou pou diskit sa. Deplis, lanmour pour Bondye i enplik nou lobeisans. Labib i dir: “La lanmour Bondye: ki nou obei son konmannman.”—1 Zan 5:3.
9. Konman Zezi ti demontre son lanmour pour Bondye?
9 Zezi ti demontre dan en fason parfe ki savedir kontan Bondye. Lanmour ti pous li pour vin reste lo later konman en zonm. I ti motiv li pour glorifye son papa par sa ki i ti fer e ansennyen. Lanmour ti fer li reste “obeisan ziska lanmor.” (Filipyen 2:8) Son lobeisans, ki ti en fason pour demontre son lanmour, ti fer li posib pour bann imen fidel ganny laprouvasyon Bondye. Pol ti ekrir: “Parey ki bokou in vin peser par dezobeisans en sel zonm [Adan], demenm lobeisans en sel zonm [Zezi Kri] pou zistifye bokou dimoun.”—Romen 5:19.
10. Akoz lanmour pour Bondye i enplik lobeisans?
10 Parey Zezi, nou demontre nou lanmour pour Bondye kan nou obei li. Zan, en zapot ki Zezi ti byen kontan ti ekrir: “La lanmour Bondye: ki nou obei son konmannman.” (1 Zan 5:3) Bann ki senserman kontan Zeova, i toultan anvi rod son gidans. Vi ki zot rekonnet ki zot pa kapab diriz zot prop lepa, zot met zot konfyans dan sa lasazes ki sorti kot Bondye e zot soumet avek son gidans ki ranpli avek lanmour. (Zeremi 10:23) Zot parey bann dimoun dan ansyen lavil Bere ki ti annan en bon latitid e ki ti aksepte mesaz Bondye avek “bokou lentere,” akoz zot ti vreman anvi fer lavolonte Bondye. (Akt 17:11) Avek bokou latansyon zot ti egzamin Lekritir pour pli byen konpran lavolonte Bondye, ki an retour sa ti pou ed zot pour demontre zot lanmour par kontinyen obei Bondye.
11. Ki savedir kontan Bondye avek tou nou leker, lespri, nanm, ek lafors?
11 Zezi ti dir ki nou bezwen kontan Bondye avek tou nou leker, lespri, nanm ek lafors. (Mark 12:30) Sa kalite lanmour i sorti dan nou leker, i enplik nou santiman, lanvi, ek nou panse pli profon, e nou telman anvi fer plezir Zeova. Nou osi servi nou lespri pour demontre lanmour. Nou devosyon pa dan vid akoz nou’n kapab konn Zeova, son bann kalite, standar ek son plan. Nou servi nou nanm, savedir nou lekor ek lavi pour servi e loue Bondye. Nou servi nou lafors pour fer menm keksoz osi.
Akoz nou devret kontan Zeova
12. Akoz Bondye i ekspekte nou pour kontan li?
12 Zeova i ekspekte nou pour demontre son bann kalite, sa i en rezon akoz nou devret kontan li. Bondye i sours e sa enn ki’n demontre pli gran legzanp lanmour. Anba lenspirasyon, zapot Zan ti ekrir: “Bondye i lanmour.” (1 Zan 4:8) Imen ti ganny kree dan resanblans Bondye, nou’n ganny fer avek sa abilite pour demontre lanmour. Anfet, dominasyon Zeova i baze lo lanmour. Konman son bann sitwayen, i anvi selman sa bann ki servi li akoz zot kontan e anvi son dominasyon ki drwat. Wi, lanmour i enportan pour ki tou imen i viv dan lape ek larmoni.
13. (a) Akoz bann Izraelit ti ganny demande pour “kontan Senyer ou Bondye”? (b) Akoz i normal ki Zeova i ekspekte nou pour kontan li?
13 En lot rezon akoz nou kontan Zeova i akoz nou apresye tou sa ki i’n fer pour nou. Pa bliye, Zezi ti dir avek bann Zwif: “Kontan Senyer ou Bondye.” Zot pa ti pou kontan en bondye ki lwen avek zot oubyen ki zot pa konnen. Zot ti pou kontan sa Bondye ki’n demontre son lanmour anver zot. Zeova ti zot Bondye. I ti sa Enn ki ti tir zot Lezip e anmenn zot dan Later Promiz, sa Enn ki ti protez, soutenir, e kontan zot, sa Enn ki ti disiplin zot avek lanmour. E ozordi, Zeova i nou Bondye, sa enn ki ti donn son Garson konman en sakrifis pour nou kapab ganny lavi eternel. Pa i normal ki Zeova i ekspekte nou pour kontan li! Nou lanmour i en lanmour ki nou demontre an retour, nou ganny demande pour kontan sa Bondye ki kontan nou. Nou lanmour i pour sa enn ki’n “kontan nou an premye.”—1 Zan 4:19.
14. Dan ki fason lanmour Zeova i parey sa lanmour ki en bon paran i annan?
14 Sa lanmour ki Zeova i annan pour imen i parey sa lanmour ki en bon paran i annan pour son zanfan. Menm si zot enparfe, en bon paran i trimouse pour plizyer lannen pour pran swen avek son zanfan. I menm fer en kantite depans ek lezot sakrifis pour kapab akonpli sa. Bann paran i enstri, ankouraz, siport e disiplin zot zanfan akoz zot anvi ki zot zanfan i ere e prospere dan lavi. Me ki bann paran i anvi an retour? Zot anvi ki zot zanfan i kontan zot e pran aker tou sa ki zot in ansenny zot pour zot prop dibyen. Eski pa i normal ki nou Papa parfe dan lesyel i ekspekte nou pour montre lapresyasyon apre tou sa ki i’n fer pour nou?
Devlop Lanmour pour Bondye
15. Ki premye keksoz nou bezwen fer pour kontan Bondye?
15 Nou pa’n zanmen vwar Bondye oubyen tann li koze. (Zan 1:18) Me kantmenm sa, i envit nou pour annan en bon relasyon avek li. (Zak 4:8) Konman nou kapab fer sa? Pour nou kapab kontan en dimoun, premye keksoz ki nou fer, nou aprann konn li. I difisil pour kontan en dimoun ki nou pa konnen. Zeova in donn nou son Parol, Labib, pour ki nou aprann konn li. Se pour sa rezon ki atraver son lorganizasyon, Zeova i ankouraz nou pour lir Labib regilyerman. Labib i ansenny nou lo Bondye, son bann kalite, son personnalite e osi lafason ki i’n azir anver imen pour plizyer milye lannen. Kan nou reflesir lo bann resi ki demontre tousala, nou devlop plis lanmour ek lapresyasyon pour Zeova.—Romen 15:4.
16. Konman ki ler nou reflesir lo minister Zezi, sa pou ogmant nou lanmour pour Bondye?
16 Kan nou reflesir lo lavi ek minister Zezi, sa i en fason enportan ki nou lanmour pour Zeova i kapab vin pli for. Lefe ki Zezi ti parfetman resanble son Papa, i ti kapab dir: “Sa ki’n war mwan in osi war mon Papa.” (Zan 14:9) Eski ou pa ganny touse ler ou vwar sa konpasyon ki Zezi ti demontre par resisit sel garson en vev? (Lik 7:11-15) Garson Bondye ki osi pli gran zonm ki’n deza viv lo later, ti lav lipye son bann disip avek limilite. Pa sa i tousan! (Zan 13:3-5) Ler ou konnen ki i ti pli enportan e pli saz ki tou imen, me pourtan lezot ti fasilman kapab apros li, enkli zanfan, eski sa pa tous ou? (Mark 10:13, 14) Anmezir ki nou reflesir lo sa bann keksoz avek lapresyasyon, nou vin parey sa bann Kretyen avek ki Pyer ti dir: “Zot kontan li, menm si zot pa’n zanmen war li [Zezi].” (1 Pyer 1:8) Anmezir ki nou lanmour pour Zezi i vin pli for, nou lanmour pour Zeova pou vin pli for osi.
17, 18. Kwa ki kapab fer nou lanmour pour Bondye ogmante?
17 En lot fason ki nou lanmour pour Bondye i kapab vin pli for, i kan nou reflesir lo sa kantite keksoz ki Zeova in donn nou avek lanmour pour nou rezwir lavi. Par egzanp, labote kreasyon, sa kantite varyete bon keksoz ki nou annan pour manze, sa bon lasosyasyon avek bann bon zanmi, ek plizyer lezot keksoz gou ki anmenn plezir ek satisfaksyon. (Akt 14:17) Pli nou konn nou Bondye, pli nou pou annan plis rezon pour apresye son labonte ek zenerozite ki napa en limit. Mazin tou sa bann keksoz ki Zeova in fer pour ou personnelman. Eski ou pa dakor ki i merite ganny ou lanmour?
18 Parmi sa plizyer kado ki Bondye in donn nou, enn i sa loportinite pour koz avek li dan lapriyer nenport ler, e nou konnen ki sa enn ki “ekout lapriyer” i tann nou. (Psonm 65:2) Zeova in donn son Garson ki i kontan en kantite sa lotorite pour dirize e pour zize. Me i pa’n donn personn, ni menm son Garson sa responsabilite pour ekout lapriyer. I personnelman ekout nou lapriyer. Sa lentere personnel ki Zeova i demontre avek lanmour i fer nou vin pros avek li.
19. Ki promes ki Zeova in fer ki fer nou vin pros avek li?
19 Nou osi vin pros avek Zeova ler nou egzamin sa ki i’n rezerve pour imen. I’n promet pour met en lafen avek maladi, latristes, ek lanmor. (Revelasyon 21:3, 4) Kan tou imen pou’n vin parfe, personn pa pou soufer akoz depresyon, dekourazman, oubyen maler. Pou nepli annan lafamin, lapovrete ek lager. (Psonm 46:9; 72:16) Later pou vin en paradi. (Lik 23:43) Zeova pou donn nou sa bann benediksyon pa akoz i oblize fer li, me akoz i kontan nou.
20. Ki Moiz ti dir konsernan lenportans pour kontan Zeova?
20 Nou annan en kantite rezon konvenkan pour kontan nou Bondye e pour les sa lanmour vin pli for. Eski ou pou kontinyen fortifye ou lanmour pour Bondye e les li gid ou dan lavi? Ou menm ki bezwen fer sa swa. Moiz ti vwar ki i vo lapenn devlop e mentenir sa lanmour pour Zeova. I ti dir avek bann Izraelit: “Ou devret swazir lavi pour ki ou reste vivan, ou ek ou desandans, par kontan Zeova zot Bondye, par ekout son lavwa e par reste atase avek li; akoz i donn lavi e i kapab les zot viv lontan.”—Deterononm 30:19, 20.
Ki ou pou reponn?
• Akoz i enportan pour kontan Zeova?
• Konman nou kapab demontre nou lanmour pour Bondye?
• Ki bann rezon nou annan pour kontan Zeova?
• Konman nou kapab devlop sa menm lanmour ki Bondye i annan?
[Kestyon]
[Portre lo paz 18]
Zeova i vreman apresye lanmour ki tou dimoun i kapab demontre
[Portre lo paz 21]
“Sa ki’n war mwan in osi war mon Papa.” —Zan 14:9