Lennmi Kris i ganny devwale

KI MANNYER ou ti pou protez ou lekor si ou ti konnen i annan en lepidemi ki touye pe ravaz ou rezyon? Petet ou ti pou fortifye ou sistenm defans e reste lwen avek bann dimoun ki kapab pas sa maladi avek ou. Nou bezwen fer parey dan en sans spirityel. Labib i dir nou ki Lennmi Kris “i deza dan lemonn.” (1 Zan 4:3) Si nou pa anvi zot “enfekte” nou, nou bezwen idantifye sa bann “porter” pour kapab evit zot. Granmersi Labib i donn nou ase lenformasyon lo sa size.

“Lennmi Kris” i vedir “kont Kris (oubyen dan son plas).” Alors an zeneral, sa lekspresyon pe refer avek tou bann ki opoz Kris oubyen fer krwar i Kris oubyen son bann reprezantan. Zezi li menm ti dir: “Tou sa ki pa avek mwan i kont mwan [oubyen lennmi Kris], e tou sa ki pa rasanble avek mwan, i disperse.”—Lik 11:23.

Zan ti ekrir lo lennmi Kris plis ki 60 an apre ki Zezi ti mor e ganny resisite dan lesyel. Alors nou bezwen konpran bann aktivite lennmi Kris par lafason ki zot afekte bann disip fidel Zezi lo later.—Matye 25:40, 45.

Lennmi Kris i kont bann Disip Kris

Zezi ti averti son bann disip ki lemonn an zeneral pou ay zot. I ti dir: “Zot pou ganny persekite e met a-mor. Tou dimoun pou ay zot akoz mwan. En kantite fo profet pou aparet e anbet bokou dimoun.”—Matye 24:9, 11.

Vi ki bann disip Zezi i ganny persekite “akoz [Zezi],” bann ki persekit zot i bann lennmi Kris, zot kont Kris. Bann “fo profet,” ki serten parmi ti Kretyen  avan, i osi tonm dan sa kategori. (2 Zan 7) Zan ti ekrir: ‘Sa kantite Lennmi Kris i sorti kot nou, me zot pa ti vreman apartenir avek nou. Parski si zot ti apartenir avek nou zot ti a’n reste avek nou.’—1 Zan 2:18, 19.

Sa ki Zezi ek Zan ti dir i montre klerman ki lennmi Kris pa zis en dimoun me i konpoze avek plizyer dimoun ki lennmi avek Kris. Deplis, vi ki zot bann fo profet, enn zot lobzektif prensipal se pour anbet dimoun dan domenn relizye. Ki serten metod zot servi?

Fann bann Mansonz relizye

Zapot Pol ti averti son konpanyon travay Timote pour fer byen atansyon lansennyman bann aposta, parey Imene ek Filet, ki zot “kalite diskisyon i manz lekor konman lakangrenn.” Pol ti azoute ki sa bann zonm in “ekart zot avek laverite e an dizan ki larezireksyon in fini pase, e an fezan sa, zot pe detourn lafwa serten dimoun.” (2 Timote 2:16-18) I paret ki Imene ek Filet ti ansennyen ki rezireksyon i senbolik e ki bann Kretyen in deza fini resisite dan en sans spirityel. I vre ki ler en dimoun i vin disip Zezi, i revin vivan devan Bondye. Sa Pol ti fer byen kler. (Efezyen 2:1-5) Me parkont Imene ek Filet ti rezet promes Zezi ki bann mor pou vreman resisite dan en sans fizik anba dominasyon Rwayonm Bondye.—Zan 5:28, 29.

Lide en rezireksyon pirman senbolik ti ganny devlope plitar par en group apele Gnostics. Zot ti krwar ki zot kapab ganny konnesans (gnoʹsis an Grek) dan en fason misterye. Alors zot ti melanz bann fo lansennyman Kretyen avek filozofi Grek ek bann krwayans misterye sorti dan kiltir Oriyantal. Par egzanp, zot ti krwar ki tou keksoz fizik i move, e pour sa rezon Zezi pa  ti vin lo later dan en lekor imen kantmenm i paret ki i ti annan enn. Parey nou’n vwar, sanmenm sa ki zapot Zan ti averti nou kont.—1 Zan 4:2, 3; 2 Zan 7.

En lot zistwar ki zot in envante plizyer syek plitar i sa ki zot apel doktrin sen Trinite. Sa doktrin i dir ki Zezi i Bondye Tou Pwisan e anmenmtan i Garson Bondye. Dan son liv The Church of the First Three Centuries, Dr. Alvan Lamson i dir ki doktrin Trinite ‘i sorti dan en sours konpletman diferan avek bann Lekritir Zwif ek Kretyen; i’n ganny devlope e azoute avek lansennyman Kretyen par bann Per ki kontan filozofi Plato.’

Aksepte doktrin Trinite ti en gran lakonplisman pour lennmi Kris akoz sa doktrin i fer Bondye vin en mister e fer son relasyon avek son Garson pa kler pour bokou dimoun. (Zan 14:28; 15:10; Kolosyen 1:15) Ki mannyer nou kapab “apros avek Bondye,” parey Labib i ankouraz nou, si Bondye i en mister?—Zak 4:8.

Pour fer dimoun pli konfize ankor, bokou tradikter Labib in tir non Bondye, Zeova, dan zot tradiksyon kantmenm sa non ti aparet plis ki 7,000 fwa ler Labib ti ganny ekrir pour premye fwa! Sa i en gro mank respe pour nou Kreater ek son Parol enspire akoz zot pa’n zis fer Bondye Tou Pwisan vin en mister me en mister ki napa en non. (Revelasyon 22:18, 19) Deplis, ranplas non Bondye avek bann tit parey Senyer ek Bondye i konmsi zot pe mepriz lapriyer model Zezi, kot i dir: “Ki ou non sen i ganny glorifye.”—Matye 6:9.

Lennmi Kris i rezet Rwayonm Bondye

Lennmi Kris i pli aktif sirtou dan sa “bann dernyen zour,” savedir sa letan ki nou pe viv ladan. (2 Timote 3:1) Enn zot lobzektif prensipal se pour anbet dimoun konsernan rol Zezi konman Lerwa dan Rwayonm Bondye, ki en gouvernman dan lesyel ki pou diriz later antye tre byento.—Danyel 7:13, 14; Revelasyon 11:15.

Par egzanp, serten larelizyon i ansennyen ki Rwayonm Bondye i en kondisyon dan leker zonm. Me nou pa trouv sa okenn par dan Labib. (Danyel 2:44) Lezot i dir ki Kris i travay atraver bann gouvernman imen ek lenstitisyon. Pourtan, Zezi ti dir: ‘Mon Rwayonm pa sorti lo sa later.’ (Zan 18:36) Anfet se Satan, pa Kris, ki “gouvern lemonn” e se li ki ‘bondye sa syek.’ (Zan 14:30; 2 Korentyen 4:4) Sa i eksplike akoz Zezi pou byento retir tou bann gouvernman imen e i pou vin sa sel Dirizan lo later. (Psonm 2:2, 6-9; Revelasyon 19:11-21) Dimoun i priye ki sa i ganny realize kan zot resit lapriyer Notreper, kot zot dir: “Ki ou Renny i ganny etabli; ki ou lavolonte i ganny akonpli lo later.”—Matye 6:10.

Akoz zot siport bann sistenm politik sa lemonn, bokou sef relizye in opoz e menm persekit bann ki pe fer konnen laverite lo Rwayonm Bondye. I enteresan note ki dan liv Revelasyon i mansyonn en prostitye senbolik, “Gran Babilonn,” ki “sou avek disan bann sen ek disan bann martir akoz Zezi.” (Revelasyon 17:4-6) I osi fer prostitisyon spirityel par donn son sipor bann “lerwa” later oubyen bann dirizan politik, pour an retour ganny bann faver. Sa fanm senbolik i pa lot ki bann fo larelizyon sa lemonn. Se li ki pli gran parti sa lennmi Kris.—Revelasyon 18:2, 3; Zak 4:4.

Lennmi Kris i ‘dir sa ki Zorey i oule tande’

Apard ki rezet laverite dan Labib, bokou ki dir zot Kretyen in rezet bann standar Labib lo fason viv. Zot prefer sa ki popiler dan sa lemonn. Parol Bondye ti predir ki sa pou arive, kan i ti dir: “En letan pe vini, kot dimoun [ki dir zot servi Bondye] pou nepli siport  lansennyman laverite. Me zot pou swiv zot prop dezir; zot pou rasanble en kantite ansennyan otour zot pour dir zot sa ki zot zorey i oule tande.” (2 Timote 4:3) Sa bann fo ansennyan i osi ganny dekrir konman “bann fo zapot, bann zouvriye manter degize konman zapot Kris.” Labib i kontinyen par dir: “Zot lafen pou koresponn avek zot travay.”—2 Korentyen 11:13-15.

Zot travay i enkli “zot lavi imoral,” ki montre en mank respe pour bann prensip moral onivo Bondye. (2 Pyer 2:1-3, 12-14) Pa nou vwar en kantite sef relizye ek zot bann dimoun pe adopte oubyen toler bann move pratik parey omoseksyalite ek sèks an deor maryaz? Silvouple pran ou Labib e konpar sa bann pwennvi ek fason viv ki akseptab dan sa lemonn avek sa ki Labib i dir dan Levitik 18:22; Romen 1:26, 27; 1 Korentyen 6:9, 10; Ebre 13:4; ek Zid 7.

‘Teste pour verifye si i sorti kot Bondye’

Ler nou vwar tousala, i fer nou realize ki nou devret ekout sa ki zapot Zan ti dir konsernan pa pran alalezer nou krwayans relizye. I averti: “Pa bezwen krwar tou sa ki pretann ki i posed lespri, me teste zot pour verifye si lespri ki zot posede i sorti kot Bondye, parski i annan bokou fo ansennyan dan lemonn.”—1 Zan 4:1.

Bann dimoun ki ti reste dan lavil Bere dan premye syek ti donn en bon legzanp. Zot “ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol [ek Silas] ti dir zot ti vre.” (Akt 17:10, 11) Wi, kantmenm zot ti pare pour aprann, bann Bereen ti fer sir sa ki zot ti tande e aksepte ti vreman baze lo Labib.

Ozordi tou, bann vre Kretyen pa ganny enfliyanse par pwennvi popiler sa lemonn ki sanze detanzaot, me zot reste atase avek laverite dan Labib. Zapot Pol ti dir: ‘Mon demande dan mon lapriyer ki zot lanmour i ogmante e vin plis ankor, avek en vre konnesans ek en zizman parfe.’—Filipyen 1:9.

Si ou pa ankor fer li, fer li ou lobzektif pour rod sa “vre konnesans ek en zizman parfe” par aprann sa ki Labib i vreman dir. Bann ki imit bann Bereen pa ganny anbete par “bann fo zistwar” lennmi Kris. (2 Pyer 2:3) Okontrer, zot ganny libere par laverite spirityel sa vre Kris ek son bann vre disip.—Zan 8:32, 36.

[Bwat lo paz 4]

KI LABIB I DIR KONSERNAN LENNMI KRIS

“Mon bann zanfan, lafen i pros [lafen lepok bann zapot]. Zot in deza tande ki Lennmi Kris i devre vini, i annan deza en kantite Lennmi Kris ki’n fini aparet, alor nou konnen ki lafen i pros.”—1 Zan 2:18.

“Lekel ki manter, si pa sa enn ki dir ki Zezi pa Kris? Limenm Lennmi Kris, sa ki rezet Papa ek son Garson.”—1 Zan 2:22.

“Tou sa ki pa rekonnet Zezi, pa posed Lespri ki sorti kot Bondye. Lespri Lennmi Kris ki zot in tande i devre vini, i deza dan lemonn.”—1 Zan 4:3.

“I annan en kantite tronper fannen partou dan lemonn, bann dimoun ki pa aksepte ki Zezi-Kri in vin dan laser imen. En tel dimoun i en tronper e Lennmi Kris.”—2 Zan 7.

[Bwat lo paz 5]

EN TRONPER ANBA DIFERAN LAPO

Sa lekspresyon “Lennmi Kris” i aplik avek tou bann ki pa aksepte sa ki Labib i dir konsernan Zezi Kri, tou bann ki opoz son Rwayonm, ek tou bann ki maltret son bann disip. I osi aplik pour bann dimoun, lorganizasyon, ek nasyon ki fer krwar zot reprezant Kris oubyen ki oule pran rol Mesi par promet ki zot pou fer bann keksoz ki zis Kris ki kapab fer. Par egzanp, anmenn vre lape ek sekirite.

[Portre lo paz 5]

Augustine: ©SuperStock/age fotostock

[Portre lo paz 7]

Zis parey bann Bereen, nou devret ‘etidye Lekritir toulezour’