Toultan aksepte Disiplin Zeova
Toultan aksepte Disiplin Zeova
“Pa rezet disiplin Zeova.”—PROVERB 3:11.
1. Akoz nou devret aksepte pour ganny disiplinen?
LERWA SALOMON dan lepok Izrael i donn nou tou en bon rezon pour aksepte disiplin Bondye. Salomon ti dir: “Mon garson pa rezet disiplin Zeova, e pa deteste son reprimann, akoz Zeova i reprimann sa enn ki i kontan, parey en papa i fer avek sa enn ki i pran plezir ladan.” (Proverb 3:11, 12) Wi, ou Papa dan lesyel i disiplin ou akoz i kontan ou.
2. Kisisa “disiplin”, e ki mannyer en dimoun i kapab ganny disiplinen?
2 Sa mo “disiplin” i kapab vedir pinisyon, koreksyon, lenstriksyon, ek ledikasyon. Zapot Pol ti ekrir: “Pour sa moman, koreksyon i rann malere plito ki donn lazwa, me pli tar, i prodwi fri lape ek lazistis pour tou bann ki’n ganny disiplinen par li.” (Ebre 12:11) Aksepte e met an pratik disiplin sorti kot Bondye i kapab ed ou pour kontinyen viv en lavi drwat e vin pli pros avek Zeova, nou Bondye sen. (Psonm 99:5) Koreksyon i kapab vin atraver lezot Kretyen, bann renyon kongregasyon, ou letid Labib ek bann piblikasyon ki “serviter fidel” i fourni. (Lik 12:42-44) Pa ou rekonesan si ou ganny montre kote ou bezwen fer en azisteman! Be ki disiplin ki neseser si en dimoun in fer en fot grav?
Akoz serten i ganny ekskli
3. Kan en dimoun i ganny ekskli?
3 Bann serviter Bondye i etidye Labib ek bann piblikasyon Kretyen. Bann standar Zeova i ganny eksplike dan nou bann renyon ek lasanble. Alor bann Kretyen i dan en pozisyon pour konpran sa ki Zeova i ekspekte avek nou. En dimoun dan kongregasyon pou ganny ekskli selman si i fer en pese grav e i pa repantir.
4, 5. Ki legzanp i annan dan Labib kot en dimoun ti ganny ekskli, e akoz kongregasyon ti ganny demande pour aksepte li ankor?
4 Annou egzamin en legzanp dan Labib. Zapot Pol ti ekrir kongregasyon Korent: “I annan limoralite seksyel parmi zot, tel ki menm parmi bann payen ou pa trouve; i menm annan enn parmi zot ki pe viv avek madanm son papa.” E i ti demann zot pour “livre sa zonm avek satan pour ki son lekor i ganny detri me ki son lespri i a ganny sove.” (1 Korentyen 5:1-5) Kan sa zonm ti ganny ekskli e ganny livre avek Satan, i ti retourn dan lemonn Satan. (1 Zan 5:19) Lefe ki sa dimoun ti ganny tire dan kongregasyon, sa ti retir move lenfliyans e ti protez bon leta “lespri” oubyen latitid kongregasyon pour ki i kontinyen reflekte bann standar Bondye.—2 Timote 4:22; 1 Korentyen 5:11-13.
5 Pa tro lontan apre sa, Pol ti demann bann Kretyen Korent aksepte sa dimoun ankor. Akoz? Zapot Pol ti dir: “Pour ki nou pa les nou ganny anbete par Satan.” I paret ki sa dimoun ti’n repantir e aranz son lavi. (2 Korentyen 2:8-11) Si bann frer ek ser Korent pa ti aksepte li ankor dan kongregasyon, Satan ti pou’n anbet akoz zot pa ti pou pare pardonnen e zot ti pou vin dir parey Satan i anvi zot ete. Alor i evidan ki deswit zot ti “pardonn li e ankouraz li.”—2 Korentyen 2:5-7.
6. Ler en dimoun i ganny ekskli, ki bon keksoz ki kapab ganny akonpli?
6 Ler en dimoun i ganny ekskli, ki bon keksoz ki ganny akonpli? I anpes non sen Zeova ganny sali e i protez bon repitasyon pep Bondye. (1 Pyer 1:14-16) Sa i osi montre respe pour bann standar Bondye e gard kongregasyon prop spirityelman. I osi kapab ed sa dimoun ki’n fer en fot e ki pa’n repantir pour retournen.
Pour retournen i bezwen repantir
7. Ki konsekans David ti sibir ler i pa ti konfes son pese?
7 Laplipar ki fer en pese grav i vreman repantir e zot pa ganny ekskli dan kongregasyon. Byensir, repantans senser pa toultan vin fasilman. Annou egzamin legzanp Lerwa David ki ti konpoz Psonm 32. Dan sa Psonm, nou vwar ki pour en serten letan David pa ti konfes son bann pese grav an rapor avek Bat-Seba. An rezilta, son konsyans ti telman sarze ki i ti perdi tou son kouraz, i ti parey en pye dibwa ki’n sek dan gro lasaler soley. David ti soufer fizikman e mantalman, me ler i ti ‘konfes son lofans, Zeova ti pardonn li.’ (Psonm 32:3-5) Apre sa, David ti sante: “Ere sa zonm ki Zeova pa pran kont son fot.” (Psonm 32:1, 2) I ti vreman merveye pour santi ki Zeova ti pardonn li!
8, 9. Ki mannyer repantans i ganny demontre, e akoz i enportan ki en dimoun ekskli i vreman repantir pour li ganny aksepte ankor dan kongregasyon?
8 Alors, i evidan ki pour Zeova pardonn fot en dimoun i bezwen repantir. Parkont, pa laont oubyen lafreyer pangar dimoun i konn nou fot ki vre repantans. “Repantir” i vedir “sanz nou pwennvi” konsernan en move kondwit akoz nou regrete sa ki’n arive. En dimoun ki repantir i annan en “leker kase e brize,” i anvi ‘repar sa ditor’ ki’n fer, si i posib.—Psonm 51:17; 2 Korentyen 7:11, NW.
9 Pour ki en dimoun ekskli i ganny aksepte ankor dan kongregasyon Kretyen, en keksoz tre enportan ki i bezwen fer, se vreman repantir. I pa konmsi i pou ganny otomatikman aksepte dan kongregasyon apre en serten letan. Avan sa i arive, son kondisyon leker i bezwen vreman sanze. I devret realize ki kantite serye son pese i ete e ki mannyer i’n sali non Zeova ek son kongregasyon. Sa dimoun i bezwen repantir, priy senserman pour demann pardon, e aranz son lavi an akor avek bann lalwa drwat Bondye. Ler i fer en demann pour ganny aksepte ankor dan kongregasyon, i’n devret donn ase levidans konmkwa i’n repantir e fer ‘bann keksoz ki montre vreman [i’n] repantir.’—Akt 26:20.
Akoz nou bezwen konfes nou Fot?
10, 11. Akoz nou pa devret esey kasyet pese?
10 Serten i kapab demande: ‘Akfer mon bezwen dir sa ki mon’n fer, mon pou ganny demande en bann kestyon anbarasan, e mon kapab ganny ekskli. Me si mon reste trankil, mon evit tousala e personn dan kongregasyon pa pou zanmen konnen.’ Selman i annan ennde fot enportan dan sa rezonnman. Lekel sa?
11 Zeova i en Bondye ki “annan mizerikord ek konpasyon, ki pa ankoler vitman, e ki annan en kantite labonte leker ek laverite, prezerv labonte leker pour plizyer milye, pardonn fot, lofans ek pese.” Me selman, i koriz son pep lo “en degre apropriye.” (Egzod 34:6, 7; Zeremi 30:11) Si ou fer en pese grav, ki mannyer Zeova pou kapab pardonn ou pese si ou pe esey kasyet li? Zeova i konn tou, e i pa senpleman inyor lemal.—Proverb 15:3; Abakouk 1:13.
12, 13. Ki kapab arive si nou kasyet en pese grav?
12 Si ou’n komet en pese grav, konfes ou fot pour kapab ed ou retrouv en konsyans kler. (1 Timote 1:18-20) Me pa konfese i kapab sali ou konsyans e anmenn ou pour fer ankor plis pese. Pa bliye ki ou’n pese pa selman kont en lot imen oubyen kongregasyon me kont Bondye li menm. Dan en Psonm, i dir: “Zeova, son tronn i dan lesyel. Son lizye i gete, son lizye kler i egzamin bann garson zonm. Zeova li menm i egzamin sa dimoun drwat konman sa dimoun mesan.”—Psonm 11:4, 5.
13 Zeova pa pou beni en dimoun ki kasyet en pese grav e pe esey reste dan kongregasyon Kretyen ki prop. (Zak 4:6) Alor si ou’n fer en pese grav e ou oule fer sa ki byen, pa per pour konfes ou fot avek senserite. Sankwa, ou konsyans pou sarze sirtou ler ou tande oubyen lir bann konsey konsernan ou fot. E si Zeova i tir son lespri sen avek ou parey i ti fer avek Lerwa Sail? (1 Samyel 16:14) San Lespri Bondye, ou ti kapab tonm dan lezot pese ankor pli grav.
Annan Konfyans dan ou bann Frer fidel
14. Akoz en dimoun ki’n fer en pese grav i devret swiv konsey Zak 5:14, 15?
14 Alor ki en dimoun ki repantir i devret fer? ‘I devre apel bann ansyen dan [kongregasyon], e zot a priy pour li e zot a vers delwil lo li o non Senyer. Lapriyer avek lafwa i a sov sa malad, e Senyer i a donn li lasante.’ (Zak 5:14, 15) Koz avek bann ansyen, sa i en fason ki en dimoun i kapab “prodwi bann bon fri repantans.” (Matye 3:8) Sa bann zonm bon e fidel pou ‘priy pour li e vers delwil onon Zeova.’ Zot konsey baze lo Labib pou parey en delwil ki apez douler, i pou rekonfort sa dimoun ki vreman repantir.—Zeremi 8:22.
15, 16. Ki mannyer bann ansyen i swiv legzanp Bondye, parey dan Ezekyel 34:15, 16?
15 Zeova, parey en bon Berze, i donn en tre bon legzanp. Pa i ti liber bann Zwif ki ti an egzil Babilonn an 537 A.N.L. e i ti osi liber Izrael spirityel dan “Gran Babilonn” an 1919 N.L.! (Revelasyon 17:3-5; Galat 6:16) Dan sa fason, i ti akonpli son promes: “Mwanmenm, mon pou donn manze mon bann mouton, e mwanmenm mon pou fer zot alonze . . . Sa enn perdi, mon pou rode, sa enn ki’n elwannyen, mon pou fer retournen, sa enn ki’n blese, mon pou bande e sa enn ki soufer mon pou fortifye.”—Ezekyel 34:15, 16.
16 Parey en berze i fer avek son mouton, Zeova ti donn manze son pep, fer zot alonze an sekirite e rod bann ki ti perdi. Bann ansyen zot, i fer sir ki bann mouton Bondye i annan dekwa manze spirityel e ki zot an sekirite. Bann ansyen i rod bann ki’n elwannyen avek kongregasyon. Parey Bondye i ‘pans bann ki’n blese,’ bann sirveyan dan kongregasyon i pran swen bann ki’n blese swa par parol lezot oubyen par zot prop aksyon. Parey Bondye i ‘fortifye bann ki soufer,’ bann ansyen i ed bann ki malad spirityelman, petet akoz serten fot ki zot in komet.
Konman bann Berze i ede
17. Akoz nou pa devret ezite pour rod led spirityel avek bann ansyen?
17 Bann ansyen i kontan pour swiv sa konsey: “Kontinyen montre mizerikord, . . . , e fer li avek lakrent.” (Zid 23, NW) Ler en Kretyen i kas lalwa Bondye lo sèks, sa i en pese grav. Me si zot vreman repantir, zot pou ganny trete avek mizerikord ek lanmour par bann ansyen ki vreman anvi ed zot spirityelman. Zapot Pol ti dir konsernan li menm ek lezot ansyen: ‘Nou pa konmann zot lafwa, . . . me nou pe [travay ansanm avek zot pour] zot lazwa.’ (2 Korentyen 1:24) Alors, pa zanmen ezite pour rod zot led spirityel.
18. Ki mannyer bann ansyen i tret bann Kretyen ki’n fer en pese?
18 Si ou’n fer en pese grav, akoz ou kapab annan konfyans dan bann ansyen? Akoz zot premye responsabilite, se ki zot berze bann mouton Bondye. (1 Pyer 5:1-4) Napa en bon berze ki pou bat en pti mouton obeisan ki pe kriye akoz i’n bles son lekor. Kan bann ansyen pe ed en lot Kretyen ki’n fer en fot, i pa konmsi zot pe al pini en dimoun ki’n fer en krim me plito si posib pour ed en dimoun ki’n pese geri spirityelman. (Zak 5:13-20) Bann ansyen i devret ziz avek zistis e tret kongregasyon avek tandres. (Akt 20:29, 30; Izai 32:1, 2) Parey tou lezot Kretyen, bann ansyen i bezwen “demontre lazistis, kontan labonte, e mars dan en fason modes avek Bondye.” (Mika 6:8) Sa bann kalite i tre enportan akoz bann desizyon ki zot fer i annan en lefe lo lavi ek servis ‘bann mouton Zeova.’—Psonm 100:3.
19. Ki latitid bann ansyen i annan ler zot ed en dimoun aziste son pwennvi?
19 Bann berze Kretyen in ganny apwente par lespri sen e zot rod gidans atraver li. Si “en dimoun pe fer en keksoz mal,” petet san realize i tonm dan en move semen, sa bann zonm kalifye e spirityel pou esey “redres li avek en lespri ladouser.” (Galat 6:1; Akt 20:28) Zot pou dous me osi zot pou siport bann standar Bondye e esey ed sa dimoun pour aziste son pwennvi. Zot pou fer en pe parey en dokter ki remet dan son plas en lezo kase avek ladouser pour ki sa dimoun pa tro soufer me anmenmtan rezourd sa problenm. (Kolosyen 3:12) Pour kapab demontre mizerikord, bann ansyen pou baz zot desizyon lo Labib ek lapriyer, aprezan desizyon ki pou ganny pran pou reflekte pwennvi Bondye.—Matye 18:18.
20. Kan i kapab neseser pour anons kongregasyon ki en dimoun in ganny reprimande?
20 Si bokou dimoun i konnen oubyen pou okouran sa ki’n arive, tre probab i pou apropriye pour fer en lanons dan kongregasyon pour protez son repitasyon. En lanons pou osi ganny fer si kongregasyon i bezwen ganny enformen. Ler en dimoun dan kongregasyon ki’n ganny reprimande pe refer spirityelman, i parey en dimoun ki pe refer apre en aksidan e pour en pti letan i pa kapab fer parey avan. Pour en serten letan, i tre probab ki i preferab ki en dimoun ki’n repantir apre en pese grav i ekoute plito ki partisip dan bann renyon. Bann ansyen i kapab fer laranzman pour li ganny en letid Labib pour fortifye li kot i pli feb e fer li ‘solid dan lafwa’ ankor. (Tit 2:2) Tousala i ganny fer avek lanmour, pa pour pini sa dimoun.
21. Ki mannyer bann ansyen i kapab ede pour serten fot?
21 Bann ansyen i kapab ede spirityelman dan diferan fason. Meton en frer ti annan en problenm bwar tro bokou lalkol dan lepase e i’n rekonmans ankor enn oubyen de fwa tousel kot li. Ouswa en dimoun ki ti fimen lontan i’n retonm dan fimen enn oubyen de fwa kot lakour akoz en febles. Menm si i’n priy pour demann pardon Zeova e i krwar ki Bondye in pardonn li, i devret rod led en ansyen pour ki son fot pa vin en labitid. Enn oubyen de ansyen pou kapab ed sa dimoun. Zot pou osi enform sirveyan prezidan kongregasyon an ka i annan lezot laspe ki enplike.
Kontinyen aksepte Disiplin Bondye
22, 23. Akoz ou devret touzour aksepte disiplin Bondye?
22 Pour ganny laprouvasyon Bondye, sak Kretyen i devret les li ganny disiplinen par Zeova. (1 Timote 5:20) Alor annou pran aker okenn koreksyon ki nou gannyen ler nou etidye Labib ek bann piblikasyon Kretyen ouswa ler nou ekout progranm bann renyon ek lasanble pep Zeova. Reste vizilan avek nou lekor pour fer lavolonte Zeova. Disiplin sorti kot Zeova pou ed ou batir en gro miray defans toultour pour lager avek pese.
23 Ler nou aksepte disiplin sorti kot Bondye, sa pou ed nou pour reste dan lanmour Bondye. I vre serten in ganny ekskli dan kongregasyon Kretyen, me ou kapab evit sa si ou “protez ou leker” e mars ‘konman en dimoun saz.’ (Proverb 4:23; Efezyen 5:15) Si ou’n ganny ekskli, akoz ou pa fer sa ki neseser pour retourn dan kongregasyon? Bondye i oule ki tou bann ki’n dedye zot lavi avek li, i servi li fidelman e avek “lazwa dan zot leker.” (Deterononm 28:47) Ou pou fer sa pour leternite si ou touzour aksepte disiplin Zeova.—Psonm 100:2.
Ki ou pou reponn
• Akoz serten i ganny ekskli dan kongregasyon?
• Ki enplike dan vre repantans?
• Akoz en pese grav i devret ganny konfese?
• Ki mannyer bann ansyen i ed en dimoun ki’n fer en pese e ki repantir?
[Kestyon]
[Portre lo paz 13]
Akoz Zapot Pol ti demann kongregasyon Korent pour ekskli en serten dimoun?
[Portre lo paz 16]
Parey en berze, bann ansyen dan kongregasyon i ‘bann’ bann mouton ki’n blese