“Gran Zour Zeova i pros”
“Gran Zour Zeova i pros”
“Gran zour Zeova i pros. I pros, e i pe vin byen vit.”—TSEFANYA 1:14.
1, 2. (a) Ki sa zour spesyal bann Kretyen pe espere? (b) Ki kestyon nou bezwen demande e akoz?
E N MANMZEL ki dan lazwa pe esper sa zour ki i pou marye avek enpasyans. En manman ki ansent avek leksitasyon pe esper nesans son pti baba. En travayer ki’n ganny ase, i vreman enpasyan pour konmans son vakans ki i’n espere pour en bann letan. Ki tou sa bann dimoun i annan an komen? Zot tou zot pe esper en zour ki spesyal pour zot, en zour ki pou annan en lefe lo zot lavi. Zot tou zot vreman emosyonnel, me zot lemosyon i pa parey. Sa zour ki zot pe espere pou finalman arive, e zot vreman anvi pare pour sa zour.
2 Pareyman, bann vre Kretyen ozordi pe esper avek enpasyans en zour ki spesyal. Sa gran “zour Zeova.” (Izai 13:9; Yoel 2:1; 2 Pyer 3:12, NW) Kwa sa “zour Zeova” ki pe vini, e ki lefe sa zour pou annan lo limanite? Konman nou kapab fer sir ki nou’n pare pour sa zour? I vreman enportan ki nou rod larepons pour sa bann kestyon depi konmela menm, akoz nou annan laprev ki sa bann parol dan Labib i vre: “Gran zour Zeova i pros. I pros, e i pe vin byen vit.”—Tsefanya 1:14.
“Gran Zour Zeova i pros”
3. Kwa sa “gran zour Zeova”?
3 Kwa sa “gran zour Zeova”? Dan Labib sa lekspresyon “zour Zeova” i refer avek en letan spesyal kot Zeova ti anmenn zizman lo son bann lennmi e i ti glorifye son gran non. Bann dimoun enfidel Zida ek Zerizalenm osi byen bann zabitan kriyel Babilonn ek Lezip, zot tou zot ti fer fas avek ‘bann zour Zeova’ kan zot ti ganny egzekite dan zizman Zeova. (Izai 2:1, 10-12; 13:1-6; Zeremi 46:7-10) Annefe, sa pli gran “zour Zeova” pa ankor arive. I sa “zour” kot Zeova pou ziz bann ki’n sali son non. Premye pour ganny detrir i “Gran Babilonn,” tou bann fo larelizyon, e sa pou finalman anmenn ver lager Armagedon kot i pou met en lafen avek larestan sa move sistenm.—Revelasyon 16:14, 16; 17:5, 15-17; 19:11-21.
4. Akoz lamazorite dimoun i devret per sa zour Zeova?
4 Ki swa zot realize oubyen non, lamazorite dimoun i devret per sa gran zour ki pe vini avek gran pa. Akoz sa? Zeova i donn nou larepons atraver profet Tsefanya: “Sa zour i en zour firer, en zour ladetres ek langwas, en zour tanpet ek dezolasyon, en zour fernwanr ek teneb, en zour nyaz ek teneb epe.” Pa sa i vreman fer per! Deplis, Tsefanya i dir: “Mon pou koz ladetres pour limanite . . . parski se kont Zeova ki zot in fer pese.”—Tsefanya 1:15, 17.
5. Akoz plizyer milyon dimoun pe esper zour Zeova avek enpasyans?
5 Parkont, plizyer milyon dimoun i enpasyan pour vwar sa zour arive. Akoz? Be akoz zot konnen i en zour delivrans pour bann dimoun drwat, en zour kot Zeova pou ganny mete pli o e son gran non pou ganny sangtifye. (Yoel 3:16, 17; Tsefanya 3:12-17) Depandan lo sa ki dimoun pe fer la konmela menm, sa zour i kapab fer zot per oubyen zot kapab pe esper sa zour avek enpasyans. Ou menm personnelman ki mannyer ou vwar sa zour ki pe aprose? Eski ou’n pare pour li? Lefe ki sa zour Zeova in fini pet nyaz, eski sa i annan en lefe lo lafason ki ou pe viv ou lavi?
Pou “annan bann Moker ki pou vin sikann zot”
6. Ki mannyer laplipar dimoun i vwar “zour Zeova,” e akoz sa pa drol pour bann vre Kretyen?
6 Menm si letan i kourt, laplipar dimoun pa fatig zot avek sa “zour Zeova” ki pe aprose. Zot monk e sikann sa bann ki averti zot ki sa zour i pros. Sa i pa drol pour bann vre Kretyen. Zot mazin sa lavertisman ki zapot Pyer ti ekrir: “Mon oule ki zot konnen avan tou, ki dan dernyen zour pour annan bann moker ki pou vin sikann zot an swivan zot prop dezir. Zot pou dir, ‘Oli sa promes, ki i pe vini? Depi ki nou bann zanset in mor, tou i reste parey depi kreasyon lemonn.’”—2 Pyer 3:3, 4.
7. Kwa ki pou ed nou gard antet ki letan i kourt?
7 Kwa ki pou ed nou reziste sa move latitid ki dimoun i annan e touzour gard antet ki letan i kourt? Pyer i dir nou: “Mon’n fer tou mannyer pour met dan zot lespri bann bon lide par sa bann keksoz ki mon’n fer zot rapel. Zot devre mazin bann parol ki bann sen profet in anonse depi lontan ek bann konmannman ki nou Senyer e Sover in donnen par zot bann zapot.” (2 Pyer 3:1, 2) Kan nou pran aker sa lavertisman profetik, sa pou ed nou ‘met dan nou lespri bann bon nide.’ Petet plizyer fwa nou’n tann sa bann rapel, me i tre enportan ki depi ozordi menm, plis ki zanmen oparavan, nou bezwen kontinyen pran aker sa bann lavertisman.—Izai 34:1-4; Lik 21:34-36.
8. Akoz bokou dimoun i inyor bann rapel sorti dan Labib?
8 Akoz serten i inyor sa bann rapel? Pyer i kontinyen: “Zot oubliye par ekspre, ki depi byen lontan lesyel ek later in ganny formen par parol Bondye. Later in sorti dan delo, e in ganny formen avek delo, egalman, lemonn ansyen ti ganny detri par delo, sa gran deliz.” (2 Pyer 3:5, 6, nou ki’n met an italik.) Wi, i annan ki pa ti a kontan sa zour Zeova i arive. Zot pa anvi nanryen i enteronp zot lavi. Zot pa anvi rann kont Zeova pour zot fason viv ki egois. Parey Pyer ti dir, zot viv pour satisfer zot “prop dezir.”
9. Ki latitid bann dimoun dan letan Noe ek Lot ti annan?
9 “Par ekspre,” sa bann moker i plifere inyor levidans ki dan lepase Zeova in deza anmenn zizman lo limanite. Zezi ek Pyer ti refer avek de letan kot Zeova ti azir. Sa i “letan Noe” ek “lepok Lot.” (Lik 17:26-30; 2 Pyer 2:5-9) Menm si Noe ti donn lavertisman avan Deliz, personn pa ti fatig zot. Pareyman, avan ki Sodonm ek Gomor ti ganny detri, bann zann Lot ti pran zot boper konman en “zonm ki ti pe fer fars.”—Zenez 19:14.
10. Ki reaksyon Zeova anver sa bann ki pa fatig zot?
10 Ozordi i menm zafer. Me get reaksyon Zeova anver sa bann ki pa pran okenn ka. Mon pou pini “sa bann zonm ki parey lanmar diven ki pe kaye dan fon boutey e ki pe dir dan zot leker, ‘Zeova pa pou fer sa ki byen, e i pa pou fer sa ki mal.’ E zot fortin pou vin en keksoz pour depouye e zot lakaz en landrwa abandonnen. E zot pou konstri bann lakaz, me zot pa pou reste ladan; e zot pou plant bann plantasyon rezen, me zot pa pou bwar son diven.” (Tsefanya 1:12, 13) Dimoun i kapab kontinyen fer zot bann aktivite dan lavi toulezour “parey labitid,” me zot pa pou vreman ganny okenn benefis dirab menm si zot in travay dir. Akoz? Akoz zour Zeova pou ariv lo zot en sel kou san ekspekte, e zot bann keksoz materyel pa pou kapab sov zot.—Tsefanya 1:18.
“Kontinyen ekspekte li”
11. Ki konsey nou devret gard antet?
11 Olye fer parey bann dimoun otour nou dan sa move lemonn, nou bezwen gard antet sa konsey ki profet Abakouk ti ekrir: “Sa vizyon i pour letan fikse, e i kontinyen al ver lafen, e i pa pou dir en mansonz. Menm si i devret an retar, kontinyen ekspekte li, sirman i pou arive. I pa pou an retar.” (Abakouk 2:3) Vi ki nou enparfe, pour nou sa zour i kapab paret an retar, me nou devret mazinen ki Zeova i pa tarde pour azir. Son zour pou ariv egzakteman sa letan ki i’n fikse, en letan kot limanite pa pou ekspekte.—Mark 13:33; 2 Pyer 3:9, 10.
12. Ki lavertisman Zezi ti donnen, e ki diferans i annan ant bann disip enfidel ek bann disip fidel Zezi?
12 Pour met lanfaz lo nesesite pour kontinyen ekspekte zour Zeova, Zezi ti menm averti ki serten son bann disip ti pou bliye ki letan i kourt. I ti predir: “Me si i pa en bon serviter, i pou dir dan limenm, ‘Mon met i tarde pour li retournen,’ E i konmans bat serviter e i manze e bwar avek bann soular. Son met pou retournen en zour ki i pa pe ekspekte e en ler ki i pa konnen; I pou pini sa serviter severman.” (Matye 24:48-51) Me kontrerman avek sa move serviter, sa group lesklav fidel e pridan i toultan gard antet ki letan i kourt. Sa lesklav in toultan reste eveye e met li pare. Zezi in met li ansarz “tou son byen” isi lo later.—Matye 24:42-47.
I enportan pour gard antet ki Letan i kourt
13. Konman Zezi ti met lanfaz lo sa nesesite pour gard antet ki letan i kourt?
13 I ti vreman enportan ki bann Kretyen dan premye syek ti gard antet ki letan i kourt. Omoman ki zot ti vwar Zerizalenm ganny “antoure par bann larme,” deswit zot ti bezwen sove. (Lik 21:20, 21) Sa ti arive lannen 66 N.L. Remarke konman Zezi ti met lanfaz lo sa nesesite pour bann Kretyen dan premye syek gard antet ki letan i kourt. I ti dir: “Bann ki lo twa lakaz, pa desann e antre dan lakaz pour pran keksoz; e sa ki dan plantasyon pa devre retourn se li pour pran son lenz.” (Matye 24:17, 18) Listwar i montre ki pa ti ariv nanryen avek Zerizalenm pour ankor kat an. Alors, akoz bann Kretyen ti vreman bezwen pran oserye parol Zezi depi lannen 66 N.L.?
14, 15. Akoz i ti vreman enportan pour bann Kretyen dan premye syek sove toudswit kan zot ti vwar Zerizalenm ganny antoure par larme Romen?
14 I vre ki nek lannen 70 N.L. ki bann larme Romen ti detrir Zerizalenm, me sa pa vedir ki pandan sa kat an tou keksoz ti oke. Okontrer i ti pir! Vyolans ek versman disan ti partou. En istoryen i dekrir sitiasyon ki Zerizalenm ti ladan pandan sa letan konman en letan “kot lager sivil ti vers bokou disan, kot ti annan bann aksyon kriyel.” Bann zenn garson ti ganny demande pour antre dan larme pour fortifye lafors defans, pour tyonbo zarm, e pour vin solda. Toulezour zot ti fer parad. Bann ki pa ti dakor avek sa stratezi ti ganny vwar konman bann tret. Si bann Kretyen ti’n trenn trennen dan sa lavil, zot ti pou trouv zot lekor dan en sitiasyon vreman danzere.—Matye 26:52; Mark 12:17.
15 Remarke ki Zezi ti dir, “bann ki dan Zide” ti bezwen konmans sove, pa zis bann Zerizalenm. Sa ti enportan akoz dan lespas detrwa mwan apre ki zot ti’n zis antour Zerizalenm, bann larme Romen ti rekonmans zot loperasyon pour al lager. Premyerman, zot ti konkerir Galile lannen 67 N.L., epi swivi par Zide son lannen apre. Sa ti anmenn en kantite soufrans partou dan lakanpanny. E pli ale i ti pe vin pli difisil pour en Zwif Zerizalenm kapab sove. Baro lavil ti pe ganny veye, e si en Zwif ti esey sove, lezot ti pou mazinen ki i pe pran kote avek bann Romen.
16. Ki bann Kretyen dan premye syek ti bezwen fer si zot ti anvi sirviv sa letan difisil?
16 Kan nou pran an konsiderasyon tousala, nou konpran akoz Zezi ti met lanfaz lo sa nesesite pour gard antet ki letan ti kourt. Bann Kretyen sa letan ti bezwen pare pour fer sakrifis. Zot ti pou bezwen anpes zot ganny distrer par bann keksoz materyel. Zot ti pou bezwen dir “orevwar tou [zot] bann keksoz” pour zot kapab obeir lavertisman Zezi. (Lik 14:33, NW) Bann ki pa ti tarde pour obeir e tay lo lot kote Zourden ti ganny sove.
Toultan gard antet ki Letan i kourt
17. Akoz nou pli bezwen gard antet ki letan i kourt?
17 Bann profesi Labib i montre klerman ki nou pe viv dan bann dernyen zour. Plis ki zanmen oparavan nou pli bezwen gard antet ki letan i kourt. Kan tou keksoz i anpe, en solda pa santi sa presyon ek danze pour lager. Me si i pa vwar li tre enportan pour reste lo son gard e en sel kou i bezwen al lager, i kapab ki i pa’n byen prepare e sa i kapab kout li ser. Sa i osi leka spirityelman. Si avek letan nou nepli gard antet ki letan i kourt, nou kapab pa’n byen prepare pour defann nou lekor kont bann latak e nou kapab sirprann kan zour Zeova i arive. (Lik 21:36; 1 Tesalonisyen 5:4) Si i annan ki’n ‘aret swiv Zeova,’ i’n ariv ler pour zot rod li ankor enn fwa.—Tsefanya 1:3-6; 2 Tesalonisyen 1:8, 9.
18, 19. Kwa ki pou ed nou gard byen antet ‘zour Zeova’?
18 I pa drol alor ki zapot Pyer ti ankouraz nou pour toultan gard byen antet ‘zour Zeova.’ Konman nou kapab fer sa? En fason i kan nou ‘anmenn en lavi sen e fer bann travay ki montre nou annan respe pour Bondye.’ (2 Pyer 3:11, 12) Kan nou okipe dan sa bann aktivite, sa pou ed nou esper avek enpasyans ‘zour Zeova.’ Sa mo Grek ki’n ganny tradwir “gard byen antet” dan Traduction du monde nouveau, i literalman vedir “al pli vit.” An realite nou pa kapab fer sa letan ki reste ziska ki zour Zeova i arive, al vit. Me anmenmtan ki nou pe esper sa zour, si nou reste okipe dan servis Bondye nou pou vwar ki letan i pas vreman vit.—1 Korentyen 15:58.
19 Reflesir lo Parol Bondye ek bann rapel dan Labib, pou fer nou “vreman anvi vwar” sa zour “arive,” oubyen (ekspekte e fer li vin pli vit). Wi, pour “konstaman ekspekte” li. (2 Pyer 3:12, The Amplified Bible; The New Testament, par William Barclay) Dan sa bann rapel i pa zis annan en kantite profesi ki koz lo zour Zeova, me osi lo sa kantite benediksyon sa bann ki ‘kontinyen ekspekte Zeova’ pou gannyen.—Tsefanya 3:8.
20. Ki lavertisman nou devret pran aker?
20 Ler in vreman arive pour nou tou pran aker sa lavertisman ki profet Tsefanya ti ekrir: “Avan ki lakoler brilan Zeova i ariv lo zot, avan ki zour lakoler Zeova i ariv lo zot, rod Zeova, zot tou ki annan limilite lo later. Zot tou ki’n viv an akor avek Son zizman. Rod ladrwatir, rod limilite, e petet zot a kapab ganny kasyet zour lakoler Zeova.”—Tsefanya 2:2, 3.
21. Ki pep Bondye i determinen pour fer pandan sa lannen 2007?
21 Alors, pa i apropriye ki nou teks pour lannen 2007 i: “Gran zour Zeova i pros.” Pep Bondye i konvenki ki sa zour “i pros, e i pe vin byen vit.” (Tsefanya 1:14) “I pa pou an retar.” (Abakouk 2:3) Alors, anmezir ki nou pe esper sa zour, annou toultan konsyan dan ki letan nou pe viv ladan, e mazinen ki sa bann profesi i pros pour trouv son dernyen lakonplisman!
Eski ou kapab reponn?
• Kwa sa “gran zour Zeova”?
• Akoz bokou dimoun pa fatig zot ki letan i kourt?
• Akoz bann Kretyen dan premye syek ti bezwen montre ki zot konsyan letan i kourt?
• Konman nou kapab pli gard antet ki letan i kourt?
[Kestyon]
[Ekstre lo paz 12]
Teks pour lannen 2007 i: “Gran zour Zeova i pros.”—Tsefanya 1:14.
[Portre lo paz 9]
Zis parey dan letan Noe, bann moker pou sirprann kan Zeova i azir
[Portre lo paz 10]
Kan zot ti vwar Zerizalenm “ganny antoure par bann larme,” deswit bann Kretyen ti bezwen azir