Kwa ki pou fer ou Reisi?
Kwa ki pou fer ou Reisi?
ZIS parey paran i pran swen avek zot zanfan e anvi zot reisi dan lavi, nou Papa dan lesyel i pran swen avek nou e anvi nou reisi. Pour montre ki i enterese avek nou, i donn nou bokou lenformasyon lo kwa ki fer en dimoun reisi dan lavi e kwa ki anpes li reisi. Anfet, Labib i dir sa lo en dimoun ki ekout sa ki Bondye i dir: “Tou sa ki i fer pou reisi.”—Psonm 1:3.
Me si sa i leka, akoz en lavi reisi, ere, e satisfezan i zis en rev pour bokou dimoun? Si nou egzamin byen sa psonm, i pou donn nou larepons e montre nou ki mannyer nou osi nou kapab reisi dan lavi.
“Konsey bann Dimoun mesan”
Sa psalmis i averti nou kont danze pour “swiv konsey bann dimoun mesan.” (Psonm 1:1) Satan oubyen Dyab i sef “le mal.” (Matye 6:13) Labib i dir nou ki i “sef lemonn” e ki “lemonn antye i dan pouvwar dyab.” (Zan 16:11; 1 Zan 5:19) Alors i pa sirprann nou ki laplipar konsey ki nou tande dan sa lemonn i reflekte fason panse Dyab.
Ki kalite konsey bann move dimoun i donnen? Normalman, bann move dimoun “napa respe pour Bondye.” (Psonm 10:13) Zot konsey ki inyor Bondye oubyen pa montre okenn respe pour li, i partou otour nou. Lasosyete ozordi i ankouraz “dezir natir imen, dezir atraver nou lizye ek lorgey dan lavi toulezour.” (1 Zan 2:16) Medya i bonbard nou avek sa konsep pour profit lavi ek tou son bann keksoz materyel. Bann lakonpanni partou dan lemonn i depans plis ki 500 bilyon dolar Ameriken tou le zan pour esey fer dimoun aste zot prodwi, menm si bann konsonmater pa vreman bezwen li. Sa pa’n zis sanz labitid dimoun konsernan ki pour aste. Me i’n afekte lafason ki lemonn i vwar lareisit.
Se pour sa ki menm si bokou dimoun i annan en kantite keksoz ki avan dimoun ti zis reve pour annan, zot pa satisfe. Zot ankor swaf pour ganny plis ankor. Zot krwar zot pa pou ere oubyen reisi si zot pa ganny sa bann keksoz. Me sa pa vre e i en fason panse ki “pa sorti kot nou Papa me i sorti dan lemonn.”—1 Zan 2:16.
Nou Kreater i konnen kwa ki pou fer nou vreman reisi. Konsey ki i donnen i diferan avek “konsey bann dimoun mesan.” Alors si nou sey ganny faver Bondye e anmenmtan mars lo sa semen ki dapre lemonn i anmenn ver lareisit, i pou konmsi nou pe sey mars lo de diferan semen anmenmtan. Sa i en keksoz enposib pour fer. Se pour sa ki Labib i averti nou: “Pa swiv bann standar sa lemonn konmela”!—Romen 12:2, Today’s English Version.
Pa les sa Lemonn moul ou
Sa lemonn anba lenfliyans Satan pe sey fer nou krwar i enterese avek nou byennet. Me nou bezwen fer atansyon. Pa bliye ki Satan ti anbet Ev dan en fason egois, pour son prop lentere. Apre i ti servi li pour enfliyans Adan pour fer pese. Ozordi, Satan i osi servi bann imen pour fer pase son bann move konsey.
Par egzanp, David ki nou ti mansyonnen dan lartik avan, ti bezwen travay apre ler e souvan bezwen vwayaze pour rezon biznes. I ti dir: “Mon ti bezwen ale Lendi granmaten e retournen Zedi swar.” Bann zanmi senser, fanmiy, ek koleg travay ki ti krwar ki bann tel sakrifis i neseser pour reisi dan sa lemonn, ti ankouraz David: “Fer sa pour ou fanmiy.” Dapre zot, David ti pou bezwen kontinyen lo sa progranm pour ankor zis ennde lannen ziska ki i’n byen etabli li. David ti eksplike: “Zot ti dir ki sa ti pou pli benefisye mon fanmiy akoz mon ti pou kapab anmenn plis larzan dan lakour, mon ti pou pli reisi. Kantmenm mon pa ti avek mon fanmiy, mon bann zanmi ti konvenk mwan ki an realite mon ti pe donn plis anver mon fanmiy.” Parey David bokou dimoun pe travay dir pour donn zot fanmiy tou sa ki zot krwar i bezwen. Me eski ler nou swiv bann tel konsey, i vreman fer nou reisi? Ki en fanmiy i vreman bezwen?
David ti trouv larepons sa kestyon ler i ti lo son vwayaz biznes. I ti dir: “Mon ti pe koze lo telefonn avek mon fiy Angelica e i ti dir mwan: ‘Dadi, akoz ou pa oule reste avek nou?’ Sa ti tap mwan.” Remark son pti fiy ti donn li lafors pour met son demisyon. David ti deside pour donn son fanmiy sa ki zot ti vreman bezwen—son prezans, letan ek latansyon.
Aplik Konsey Bondye i fer nou reisi
Ki mannyer ou kapab reziste sa bann fo propagann ki sitan popiler dan sa lemonn? Labib i dir nou ki en dimoun reisi e ere i “pran plezir dan lalwa Zeova, e i lir son lalwa avwabas lizour e aswar.”—Psonm 1:2.
Ler Bondye ti apwent Zozye konman lider nasyon Izrael, I ti ganny dir: “Ou devret lir [Parol Bondye] avwabas lizour konman aswar.” Wi, i ti enportan pour Zozye lir e reflesir lo Parol Bondye, me i ti osi bezwen ‘fer sir ki i fer tou dapre sa ki’n ganny ekrir.’ Byensir, si ou zis lir Labib, ou pa pou otomatikman reisi. Ou bezwen aplik sa ki ou lir. Sanmenm ki Zozye ti ganny dir: “Ler ou fer sa ou pou trouv sikse e ou pou azir avek lasazes.”—Zozye 1:8.
Mazin en zanfan pe asize lo lazanm son paran avek en gran sourir lo son figir. Ansanm zot pe lir enn son zistwar prefere. Kantmenm zot in kapab lir sa zistwar sepa konbyen fwa, zot ankor kontan sa bann moman presye ki zot pase pour lir ansanm. I parey avek en dimoun ki kontan Bondye. Lir Labib toulezour i en keksoz ki gou pour li, en letan agreab ki i pase avek son Papa dan lesyel. Akoz i swiv konsey ek gidans Zeova, sa dimoun i vin parey “en pye dibwa ki’n ganny plante obor bann larivyer, ki raport son fri pandan son sezon e ki son fey pa fletri. Tou sa ki i fer pou reisi.”—Psonm 1:3.
Sa pye dibwa mansyonnen dan sa Psonm i pa’n zis pouse par azar. En fermye in plant li par ekspre obor en sours delo e pran swen avek li. Pareyman, nou Papa dan lesyel i aziste e koriz nou fason panse par son bann konsey dan Labib. Se sa ki fer nou grandi e prodwi bann bon fri.
Me “bann dimoun mesan pa koumsa.” I vre ki pour en serten letan zot pou paret pe prospere, me finalman zot pou mal fini. Zot “pa pou reste debout zour zizman.” Okontrer “semen bann dimoun mesan pou fini lanmenm.”—Psonm 1:4-6.
Alors pa les sa lemonn dir ou ki pour fer e kwa ki annan valer. Petet ou annan en talan dan en serten domenn e ou annan potansyel pour reisi dan sa lemonn. Me fer byen atansyon ki mannyer ou servi ou talan oubyen mannyer ou les sa lemonn servi ou talan. Tay deryer bann keksoz materyel i initil e i kapab fer en dimoun “fletri.” De lot kote, en bon relasyon avek Bondye i fer ou vreman reisi dan lavi e ere.
Ki mannyer ou kapab reisi
Akoz ler en dimoun i swiv konsey Bondye, i pou reisi dan tou sa ki i fer? La Labib pa pe koz lo reisi dan sa lemonn. Pour en dimoun ki kontan Bondye, lareisit i relye pros avek fer lavolonte Bondye e lavolonte Bondye i toultan reisi. Annou vwar ki mannyer aplik bann prensip Labib i fer ou reisi.
Fanmiy: Labib i demann bann msye pour “kontan zot madanm parey zot kontan zot prop lekor,” e en madanm i ganny demande pour “respekte son mari.” (Efezyen 5:28, 33) Bann paran i ganny ankouraze pour pas letan avek zot zanfan, riy avek zot, e ansenny zot bann keksoz enportan dan lavi. (Deterononm 6:6, 7; Eklezyast 3:4) Parol Bondye i osi donn paran sa konsey: “Pa eksit lakoler zot zanfan.” Kan paran i aplik sa konsey, i pli fasil pour zanfan “obei zot paran” e “respekte zot papa ek zot manman.” (Efezyen 6:1-4) Ler nou swiv sa bann konsey sorti kot Bondye, nou lavi fanmiy pou reisi.
Zanmi: Preski tou dimoun i anvi zanmi. Nou annan en kapasite mantal e emosyonnel pour kontan lezot e pour lezot kontan nou. Zezi ti dir son bann disip ki zot devret “kontan kanmarad.” (Zan 13:34, 35) Parmi zot, nou kapab trouv bann zanmi ki nou kapab kontan e konfye dan zot nou bann santiman ek panse pli profon. (Proverb 18:24) Pli enportan ankor, ler nou aplik bann prensip Labib, nou kapab “apros avek Bondye,” e parey Abraam, nou menm kapab ganny apele “zanmi Bondye.”—Zak 2:23; 4:8.
En Bi dan Lavi: Olye annan en lavi ki napa okenn bi, bann ki vreman reisi i vwar ki zot lavi i annan en sans ek en bi. Zot lavi pa baze lo bann kondisyon enstab sa lemonn. Zot lobzektif i fer zot ganny en vre satisfaksyon ki dirab akoz i konsantre lo vre bi lavi. Kwa ki fer en dimoun annan en bi dan lavi? Ler i “annan lakrent pour sa vre Bondye e gard son bann komannman. Akoz sa i tou lobligasyon zonm.”—Eklezyast 12:13.
Lespwar: Ler nou annan Bondye konman nou Zanmi, sa i osi donn nou en lespwar pour lavenir. Zapot Pol ti sipliy bann Kretyen pour “pa met zot lesperans dan sa bann larises enserten, me met lesperans dan Bondye.” Dan sa fason, zot “ava anmas en bon e solid trezor pour lavenir, e koumsa zot ava ganny vre lavi.” (1 Timote 6:17-19) Sa vre lavi pou posib tre byento ler Rwayonm Bondye dan lesyel pou reetablir Paradi lo later.—Lik 23:43.
Si ou aplik bann prensip Labib, i pa vedir ki ou pa pou rankontre okenn problenm. Me ou pou kapab evit bokou latet fer mal ek soufrans ki bann move dimoun i anmenn lo zot. David ki nou ti mansyonnen pli boner ek plizyer milyon parey li in aprann konman i tre enportan pour aplik bann prensip Labib dan zot lavi. Apre ki i ti’n trouv en travay ki adapte avek son progranm, David ti dir: “Mon santi mwan ere akoz mon relasyon avek mon madanm ek mon bann zanfan, ensi ki mon privilez pour servi Zeova konman en ansyen dan kongregasyon.” I pa sirprann nou alors sa ki psonm i dir lo en dimoun ki ekout konsey Bondye: “Tou sa ki i fer pou reisi”!
[Bwat lo paz 6]
SENK KEKSOZ KI FER NOU REISI
1 Pa les sa lemonn dir ou kwa ki enportan.
2 Lir e reflesir lo Parol Bondye toulezour.
3 Aplik konsey Labib dan ou lavi.
4 Fer Bondye vin ou zanmi.
5 Annan lakrent pour Bondye, e gard son bann komannman.
[Portre lo paz 7]
Eski ou pe fer sa bann keksoz pour ou reisi?