Lareisit—Kwa ki fer en Dimoun reisi?

JESSE LIVERMORE ki ti ganny vwar par serten konman sa biznesmenn pli reisi lo marse finansyel Lanmerik, ti renonmen pour fer bann bon desizyon dan biznes. Sa ti fer li vin en zonm byen ris. I ti met bann lenz pli ot kalite fer avek lanmen, reste dan en gran lakaz deliks avek 29 lasanm, e ganny anmennen partou dan en Rolls-Royce nwanr par son prop drayver.

David * ti pe swiv menm semen. Vi ki i ti vis prezidan ek manedyer en lakonpanni grafik, i tre probab ki i ti pou vin prezidan en departman sa lakonpanni. Larises ek prestiz ti atir li en kantite. Me David ti fer en desizyon personnel ki ti fer li demisyonnen dan son travay. I ti dir: “Mon konnen ki mon pa pou zanmen ganny ankor en gran karyer administratif koumsa.” Eski ou krwar David ti’n fer en fot?

Bokou dimoun i krwar ki pour ou reisi dan lavi, ou bezwen vin ris, popiler, oubyen enportan. Parkont bann ki annan en ta larzan i ankor santi zot lavi vid, napa sans, oubyen en bi. I kler ki sa ti leka avek Msye Livermore. Kantmenm i ti annan larzan, son lavi ti mizerab, ranpli avek douler ek tristes. I ti pas atraver depresyon, maryaz kase, e i ti napa en bon relasyon avek son bann garson. Finalman i ti perdi son gran fortin. En zour, i ti  asize lo en bar dan en gran lotel deliks e konmans plenny sa ki i ti’n perdi. I ti konmann en keksoz pour bwar, pran son pti kaye kouvertir kwir, e ekrir en not pour dir orevwar son madanm. Apre ki i ti’n fini son ver, i ti al dan en lasanm en pe fernwanr e touy son lekor.

I vre ki rezon pour dimoun swiside pa toultan kler. Me sa leksperyans i montre sa ki Labib i dir i vre: “Bann ki oule vin ris . . . in met zot lekor dan en kantite tourman.”—1 Timote 6:9, 10.

Eski sa bann ki krwar larises, pozisyon, oubyen popilarite i fer en dimoun reisi i kapab pe tronpe? Eski ou, ou santi ki ou’n reisi dan lavi? Akoz? Ki bann kriter ki fer ou dir sa? Kwa ki fer ou dir en dimoun in reisi dan lavi? Sa lartik ki swiv i egzamin bann bon konsey ki’n ed plizyer milye dimoun reisi dan lavi. Annou vwar ki mannyer ou osi ou kapab reisi.

[Not anba lo paz]