“Ou devret ranpli zis avek Lazwa”

“Ou pou selebre sa lafet pour Zeova . . . , e ou devret ranpli zis avek lazwa.”—DETERONONM 16:15.

1. (a) Ki kestyon Satan ti leve? (b) Ki Zeova ti predir apre rebelyon Adan ek Ev kont Li?

KAN Satan ti pous Adan ek Ev pour rebel kont zot Kreater, i ti lev de kestyon tre enportan? Premyerman i ti kestyonnen si vreman Zeova i koz laverite e si i diriz dan en fason drwat. Dezyenmman, Satan ti dir ki tou dimoun ti pou servi Bondye pour bann rezon egois. Sa dezyenm kestyon ti ganny poze dan en fason kler dan letan Zob. (Zenez 3:1-6; Zob 1:9, 10; 2:4, 5) Malgre tousala, Zeova ti azir vitman pour pran ka avek sa sitiasyon. Menm kan Adan ek Ev ti ankor dan zarden Edenn, Zeova ti predir ki mannyer I ti pou fer fas avek sa sitiasyon. I ti predir ki en “desandans” ti pou vini e apre ki son talon ti pou’n ganny kraze, li menm ti pou kraz latet Satan.—Zenez 3:15.

2. Ki leklersisman Zeova ti donnen lo fason ki i ti pou akonpli sa profesi ki’n ganny rikorde dan Zenez 3:15?

² Anmezir ki letan ti pase, Zeova ti donn plis leklersisman lo sa profesi, ki demontre ki i pou finalman ganny akonpli. Par egzanp, Bondye ti dir avek Abraam ki sa “desandans” pou sorti dan son desandans. (Zenez 22:15-18) Pti zanfan Abraam, Zakob, ti vin papa sa 12 tribi Izrael. Kan sa bann tribi ti vin en nasyon an 1513 A.N.L, Zeova ti donn zot bann lalwa ki ti enkli plizyer lafet toudilon lannen. Zapot Pol ti dir ki sa bann lafet ti “en lonbraz bann bon keksoz ki pe vini.” (Kolosyen 2:16, 17; Ebre 10:1) Zot donn en avangou lakonplisman plan Bondye pour sa Desandans. Ler sa bann lafet ti ganny selebre sa ti anmenn bokou lazwa an Izrael. Si nou egzamin an bref sa bann lafet, sa pou ranforsi nou lafwa dan bann promes Zeova lo ki nou kapab depann.

Sa Desandans ti aparet

3. Lekel ki ti sa Desandans promiz e dan ki fason son talon ti ganny kraze?

³ Plis ki 4,000 an apre premye profesi ki Zeova ti anonse, sa Desandans ti aparet. Sa ti Zezi. (Galat 3:16) Konman en zonm parfe, Zezi ti reste fidel ziska son lanmor e alors i ti prouve ki bann lakizasyon Satan ti fo. Anplis, vi ki Zezi ti san pese, son lanmor ti en sakrifis ki ti annan en gran valer. Atraver son lanmor, Zezi ti fourni en mwayen pour delivre bann desandans fidel Adan ek Ev dan pese ek lanmor. Kan Zezi ti mor lo en poto ti sanmenm  moman kot sa Desandans promiz ti ganny “kraz son talon.”—Ebre 9:11-14.

4. Kwa ki ti pe reprezant sakrifis Zezi?

⁴ Zezi ti mor le 14 Nizan, lannen 33 N.L. * Sa zour le 14 Nizan bann dimoun an Izrael ti dan lazwa pe selebre Lapak. Tou le zan, menm dat, bann fanmiy ti partaz en repa ki ti enkli en zenn mouton san okenn defo. Sa ti fer zot rapel rol ki disan en zenn mouton ti zwe dan delivrans premye ne bann Izraelit kan lanz ti touy tou premye ne bann Ezipsyen le 14 Nizan an 1513 A.N.L. (Egzod 12:1-14) Sa zenn mouton zour Lapak ti pe reprezant Zezi, lo ki zapot Pol ti dir: ‘Kris, nou lanyo lapak in ganny sakrifye.’ (1 Korentyen 5:7) Zis parey disan sa zenn mouton zour Lapak, disan Zezi ki’n ganny verse i fer ki bokou dimoun i kapab ganny sove.—Zan 3:16, 36.

‘Premye fri parmi bann Mor’

5, 6. Kan ki Zezi ti resisite e ki mannyer sa levennman ti ganny reprezante dan Lalwa? (b) Konman ki rezireksyon Zezi ti fer li posib pour Zenez 3:15 ganny akonpli?

⁵ Zezi ti resisite lo trwazyenm zour pour prezant valer son sakrifis avek son Papa. (Ebre 9:24) Rezireksyon Zezi ti ganny reprezante pandan en lot lafet. Lafet Gato san Lelven ti konmans son lannmen apre le 14 Nizan. Son zour swivan le 16 Nizan, bann Izraelit ti anmenn en porsyon zot bann premye fri rekolt lorz. Sa ti premye rekolt an Izrael ki ti ganny fer pour bann pret balans li devan Zeova. (Levitik 23:6-14) Vreman i ti apropriye lannen 33 N.L., le 16 Nizan, pour Zeova elimin tou zefor Satan pour touy son “temwen fidel e vre.” Le 16 Nizan lannen 33 N.L., Zeova ti resisit Zezi dan lanmor pour en lavi imortel konman en lespri.—Revelasyon 3:14; 1 Pyer 3:18.

⁶ Zezi ti vin ‘sa premye fri parmi bann mor.’ (1 Korentyen 15:20) Kontrerman avek bann ki ti ganny resisite avan e ki’n mor apre, Zezi pa ti mor ankor. Plito, i ti mont dan lesyel lo kote drwat Zeova, kot i ti espere ziska ler i ganny apwente Lerwa dan Rwayonm Zeova dan lesyel. (Psonm 110:1; Akt 2:32, 33; Ebre 10:12, 13) Depi ki i’n vin Lerwa, Zezi i aprezan kapab kraz latet sa gran lennmi, Satan, pour touzour  e detri son desandans.—Revelasyon 11:15, 18; 20:1-3, 10.

Plis Manm dan Desandans Abraam

7. Ti kwa sa Lafet bann Semenn?

⁷ Zezi ti sa Desandans ki ti ganny promet an Edenn e se par son mwayen ki Zeova pou “detri bann travay Dyab.” (1 Zan 3:8) Sepandan, kan Zeova ti koz avek Abraam, I ti endike ki “desandans” Abraam pou plis ki en dimoun. Sa desandans pou vin bokou “parey zetwal dan lesyel e parey gren disab obor lanmer.” (Zenez 22:17) Larive bann lezot manm sa “desandans” ti ganny reprezante par ankor en lot lafet zwaye. Senkant zour apre le 16 Nizan, bann Izraelit ti selebre Lafet bann Semenn. Lalwa ti dir sa konsernan sa lafet: “Son lannmen apre sa setyenm saba ou devret kont senkant zour e ou devret ofer avek Zeova en nouvo lofrann lagrenn. Ou devret pran de dipen kot ou konman en lofrann balanse. Sa de dipen i devret ganny fer avek de dizyenm en efa lafarin. Zot devret ganny kwi avek lelven, parey bann premye fri mir pour Zeova.” *—Levitik 23:16, 17, 20.

8. Ki sa levennman remarkab ki ti arive zour Lapannkot lannen 33 N.L.?

⁸ Kan Zezi ti lo later, dimoun ti konn sa Lafet bann Semenn konman lafet Lapannkot, (ki sorti dan en mo Grek ki vedir “senkantyenm”). Zour Lapannkot lannen 33 N.L., Zezi sa pli Gran Pret, ki ti’n fini ganny resisite, i ti vers lespri sen lo sa pti group 120 disip ki ti’n rasanble dan Zerizalenm. Alors sa bann disip ti vin bann garson Bondye ek bann frer Zezi Kri. (Romen 8:15-17) Zot ti vin en nouvo nasyon, ‘Izrael Bondye.’ (Galat 6:16) Apartir sa pti group ki’n ganny swazir konman garson Bondye, sa nasyon pou finalman annan 144,000 dimoun.—Revelasyon 7:1-4.

9, 10. Kwa ki ti pe reprezant kongregasyon bann Kretyen swazir zour Lapannkot?

⁹ Sa de dipen avek lelven ki ti ganny ofer konman lofrann balanse devan Zeova sak lafet Lapannkot ti pe reprezant kongregasyon bann Kretyen swazir. Lefet ki sa dipen i annan lelven, i montre ki bann Kretyen swazir i ankor annan pese ki zot in erite. Kantmenm sa,  zot kapab apros Zeova lo baz sakrifis ranson Zezi. (Romen 5:1, 2) Akoz de dipen? Petet akoz finalman sa bann garson swazir Bondye pou sorti dan de group—premye bann Zwif e plitar bann dimoun lezot nasyon.—Galat 3:26-29; Efezyen 2:13-18.

¹⁰ Sa de dipen ki ti ganny ofer zour Lapannkot ti bann premye fri rekolt dible. Pareyman, sa bann Kretyen ki’n ganny swazir par lespri sen zot osi ganny apele “bann premye fri son bann kreatir.” (Zak 1:18) Se zot bann premye pour ganny zot pese pardonnen lo baz disan ki Zezi in verse. Sa i fer li posib pour zot ganny lavi imortel dan lesyel, kot zot pou rennyen avek Zezi dan son Rwayonm. (1 Korentyen 15:53; Filipyen 3:20, 21; Revelasyon 20:6) Konman bann garson Bondye, tre byento zot pou “diriz [bann nasyon] avek en baton feray” e “kraz Satan anba zot lipye.” (Revelasyon 2:26, 27; Romen 16:20) Zapot Zan ti dir: “Zot swiv Lanyo partou kot i ale. Zot in ganny sove parmi bann zonm pour ganny ofer konman bann premye fri devan Bondye e devan Lanyo.”—Revelasyon 14:4.

En Zour ki met Lanfaz lo Delivrans

11, 12. (a) Ki ti arive Zour Propisyasyon? (b) Ki byenfe Izrael ti gannyen atraver bann sakrifis toro ek kabri?

¹¹ Lo dizyenm zour mwan Etanim (apele plitar Tisri), * en lafet ti ganny selebre an Izrael e sa ti pe reprezant ki mannyer benefis sakrifis ranson Zezi ti pou ganny aplike. Sa zour, sa nasyon antye ti zwenn ansanm pour sa Zour Propisyasyon kot bann sakrifis ti ganny ofer pour kouver zot pese.—Levitik 16:29, 30.

¹² Zour Propisyasyon, sa gran pret ti touy en zenn toro, i ti antre dan Tre Sen e fann sa disan set fwa ater devan kouvertir Lars. Dan en fason senbolik i ti pe ofer sa disan devan Zeova. Sa lofrann ti pour pese sa gran pret ek “son fanmiy,” bann pret anba li ek bann Levit. Apre, sa gran pret ti pran de kabri. I ti touy enn konman en lofrann pour “pese lepep.” En pe son disan ti ganny fannen devan kouvertir Lars ki ti dan Tre Sen. Apre sa, sa gran pret ti poz son lanmen lo latet sa dezyenm kabri e konfes fot bann garson Izrael. Apre i ti les sa kabri al dan dezer, e dan en fason senbolik i ti konmsi i pe anmenn pese lepep avek li.—Levitik 16:3-16, 21, 22.

13. Ki mannyer sa bann levennman Zour Propisyasyon ti reprezant rol ki Zezi in zwe?

¹³ Vi ki sa bann levennman ti pe reprezant sa pli Gran Pret, Zezi ti servi valer son prop disan pour fer ki pese i ganny pardonnen. Premyerman  valer son disan ti aplik pour ‘lakaz spirityel’ sa 144,000 Kretyen swazir. Sa in permet zot pour ganny konsidere konman zis e rezwir akoz zot pir devan Zeova. (1 Pyer 2:5; 1 Korentyen 6:11) Sa i ganny reprezante par sakrifis toro. Alor zot annan sa loportinite pour resevwar zot leritaz dan lesyel. Dezyenmman, valer disan Zezi i ganny aplike an faver bann milye lezot dimoun ki annan lafwa dan Kris parey i ganny demontre par sakrifis kabri. Sa bann dimoun pou ganny beni par ganny lavi eternel isi lo later, leritaz ki Adan ek Ev in perdi. (Psonm 37:10, 11) Lo baz son disan ki’n ganny verse, Zezi i anmenn pese limanite zis parey sa kabri vivan dan en sans senbolik, ti pe anmenn pese Izrael dan dezer.—Izai 53:4, 5.

Rezwir devan Zeova

14, 15. Ki ti arive pandan Lafet bann Payot, e ki sa ti rapel bann Izraelit?

¹⁴ Apre Zour Propisyasyon, bann Izraelit ti selebre Lafet bann Payot. Sa ti sa lafet pli zwaye dan lannen bann Zwif. (Levitik 23:34-43) Sa lafet ti konmans le 15 ziska le 21 Etanim e ti termin par en lasanble solannel le 22 sa mwan. Sa ti mark lafen sa rekolt e ti lemoman pour remersi Bondye pour son gran labonte. Se pour sa rezon ki Zeova ti donn sa komann bann ki pe selebre: “Zeova ou Bondye pou beni tou sa ki ou prodwir ek tou travay ou lanmen, e ou devret ranpli zis avek lazwa.” (Deterononm 16:15) Pa sa ti bezwen en moman zwaye!

¹⁵ Pandan sa lafet bann Izraelit ti reste dan bann payot pour set zour. Sa ti fer zot rapel ki en serten moman zot ti reste dan bann payot dan dezer. Sa lafet ti donn zot en gran loportinite pour reflesir lo swen ki Zeova ti demontre konman en papa. (Deterononm 8:15, 16) Vi ki bann ris osi byen ki bann pov zot ti bezwen reste dan bann payot ki ti parey, sa ti rapel bann Izraelit ki pandan sa lafet zot tou zot ti egal.—Neemya 8:14-16.

16. Ki Lafet bann Payot ti pe reprezante?

¹⁶ Sa Lafet bann Payot ti en lafet rekolt, en rasanbleman ki ti ganny selebre dan lazwa. I ti pe reprezant sa rasanbleman zwaye pour bann ki demontre lafwa dan Zezi Kri. Sa rasanbleman ti konmans zour Lapannkot lannen 33 N.L., kan sa 120 disip Zezi ti ganny swazir pour form parti sa sistenm “pret sen.” Zis parey bann Izraelit ti reste dan payot pour detrwa zour, bann Kretyen swazir i konnen ki zot zis bann “etranze” dan sa lemonn ki napa respe pour Bondye. Zot annan sa lespwar pour al viv dan lesyel. (1 Pyer 2:5, 11) Sa rasanbleman bann Kretyen swazir i terminen pandan sa bann “dernyen zour” kot bann dernyen 144,000 i ganny rasanble.—2 Timote 3:1.

17, 18. (a) Kwa ki montre ki apard bann Kretyen swazir i annan lezot ki pou benefisye avek sakrifis Kris? (b) Lekel ozordi ki pe benefisye avek sa ki Lafet bann Payot ti pe reprezante e kan ki sa lafet zwaye pou ganny akonpli lo sa pli gran lesel?

¹⁷ I enteresan pour note ki pandan sa lafet dan lepase, 70 toro ti ganny ofer. (Nonm 29:12-34) Sa nimero 70 i egal 7 miltipliy par 10, e sa de nimero dan Labib i reprezant sa ki konplet dan lesyel oubyen lo later. Anfet sakrifis Zezi pou benefisye bann ki fidel dan tou sa 70 fanmiy imen ki sorti dan desandans Noe. (Zenez 10:1-29) An armoni avek sa, dan  nou letan sa rasanbleman in agrandi, i enkli bann endividi sorti dan tou bann nasyon ki demontre lafwa dan Zezi e ki annan lespwar pour viv dan en paradi lo later.

¹⁸ Zapot Zan ti vwar par en vizyon sa rasanbleman pour nou letan. Premyerman, i ti tann sa lanons ki ti ganny fer kot bann dernyen 144,000 ti pe ganny sele. Apre i ti vwar “en gran lafoul, ki personn pa ti kapab konte,” debout devan Zeova ek Zezi, avek “brans palm dan zot lanmen.” Sa bann in sirviv sa ‘gran ladetres’ pour antre dan sa nouvo lemonn. Zot osi zot zis bann rezidan etranze dan sa lemonn e zot pe esper avek konfyans sa letan kan “Lanyo . . . pou vin zot berze e i pou gid zot kot sours delo ki donn lavi.” Dan sa letan, “Bondye pou eswiy tou larm dan zot lizye.” (Revelasyon 7:1-10, 14-17) Sa Lafet bann Payot ki pe reprezant en lot keksoz pou ganny akonpli lo en pli gran lesel apre lafen Renny Milener Kris kan sa gran lafoul ansanm avek bann ki pou’n ganny resisite, pou ganny lavi eternel.—Revelasyon 20:5.

19. Ki mannyer nou benefisye ler nou reflesir lo bann lafet ki ti ganny selebre an Izrael?

¹⁹ Nou osi nou kapab “ranpli zis avek lazwa” kan nou reflesir lo sinifikasyon sa bann lafet Zwif dan letan ansyen. I eksitan pour vwar ki Zeova in donn bann avangou lo ki mannyer sa profesi ki’n ganny anonse an Edenn pou ganny akonpli. I eksitan pour vwar ki i pe ganny akonpli ozordi pa par pa. Ozordi nou konnen ki sa Desandans in vini e son talon in fini ganny kraze. Aprezan i Lerwa dan lesyel. Deplis, laplipar bann 144,000 in fini demontre zot fidelite ziska lanmor. Kwa ki reste pour fer ankor? Ki kantite letan i reste ankor pour ki sa profesi i ganny akonpli dan en fason konplet? Sa pou ganny diskite dan lartik swivan.

[Not anba lo paz]

Eski ou kapab eksplike?

• Ki Lapak Lanyo ti pe reprezante?

• Ki rasanbleman Lafet Lapannkot ti pe reprezante?

• Ki laspe sa Zour Propisyasyon ki ti fer resorti lafason ki sakrifis ranson Zezi i ganny aplike?

• Dan ki fason rasanbleman bann Kretyen ti ganny reprezante par Lafet bann Payot?

[Kestyon]

[Latab lo paz 24, 25]

(Vwar prezantasyon dan piblikasyon)

Lapak

14 Nizan

Levennman

Lanyo Lapak ti ganny touye

Sa ki reprezante

Zezi ti ganny sakrifye

Lafet Gato san Lelven (15-21 Nizan)

15 Nizan

Levennman

Saba

16 Nizan

Levennman

Lorz ti ganny ofer

Sa ki reprezante

Zezi ti resisite

50 zour

Lafet ban Semenn (Lapannkot)

6 Sivannn

Levennman

De dipen ti ganny ofer

Sa ki reprezante

Zezi ti prezant son bann frer swazir avek Zeova

Zour Propisyasyon

10 Tisri

Levennman

En toro ek de kabri ti ganny ofer

Sa ki reprezante

Zezi ti ofer valer son disan an faver tou imen

Lafet bann Payot (Rekolt, Tabernak)

15-21 Tisri

Levennman

Bann Izraelit ti reste dan bann payot e rezwir zot rekolt. 70 toro ti ganny ofer

Sa ki reprezante

Rasanbleman bann Kretyen swazir ek sa “gran lafoul”

[Portre lo paz 23]

Parey sa disan zour Lapak Lanyo, disan Zezi ki ti ganny verse i fer ki bokou dimoun i kapab ganny sove

[Portre lo paz 24]

Bann premye fri rekolt lorz ki ti ganny ofer le 16 Nizan ti pe reprezant rezireksyon Zezi

[Portre lo paz 25]

Sa de dipen ki ti ganny ofer zour Lapannkot ti pe reprezant rasanbleman bann Kretyen swazir

[Portre lo paz 26]

Lafet bann Payot ti pe reprezant rasanbleman zwaye bann Kretyen swazir ek “sa gran lafoul” sorti dan tou nasyon