“Sa premye Rezireksyon”—pe deza arive!

“Bann ki’n mor dan Kris pou resisite an premye.”—1 TESALONISYEN 4:16.

1, 2. (a) Ki lespwar i annan pour bann ki’n mor? (b) Akoz ou krwar dan rezireksyon? (Vwar not anba paz 29.)

“BANN vivan i konnen ki zot pou mor.’’ Sa i leka depi ki Adan ti fer pese. Toudilon listwar imen tou dimoun ki’n ne i konnen ki avek letan i pou mor, e bokou i mazinen: ‘Ki pou arive apre? Ki kondisyon bann mor?’ Labib i reponn: “Bann mor, zot pa konn nanryen ditou.”—Eklezyast 9:5.

² Alors, eski i annan en lespwar pour bann ki’n mor? Wi. Annefe i pou bezwen annan si plan Bondye pour limanite pou ganny akonpli. Pandan bann syek ki’n pase, bann serviter fidel Bondye in demontre lafwa dan promes Zeova konsernan en Desandans ki pou detri Satan e retir tou move keksoz ki i’n fer. (Zenez 3:15) Bokou zot in mor. Si zot pou vwar lakonplisman sa promes ek lezot ki Zeova in fer, zot pou bezwen ganny resisite. (Ebre11:13) Eski en tel keksoz i posib? Wi i posib. Zapot Pol ti dir: “Tou dimoun bon  konman move, pou resisite.” (Akt 24:15) Pol en fwa ti resisit en zennonm apele Etikis, ki ti’n tonbe par lafnet sorti lo trwazyenm letaz e ganny “ramase mor.” Sa ti dernyen parmi sa nef rezireksyon rikorde dan Labib.—Akt 20:7-12. *

3. Ki rekonfor personnelman ou’n gannyen atraver parol Zezi rikorde dan Zan 5:28, 29, e akoz?

³ Sa nef rezireksyon i fer nou annan lafwa dan sa ki Pol ti dir. I ranforsi nou konfyans dan sa ki Zezi ti asir nou: ‘Sa ler pe arive kan tou bann mor ki dan tonbo pou tann son lavwa [Zezi] e zot pou sorti dan zot tonbo.’ (Zan 5:28, 29) Sa parol i vreman tousan! E i rekonfortan pour sa kantite dimoun ki’n perdi en dimoun ki zot kontan dan lanmor!

4, 5. Ki diferan kalite rezireksyon Labib i mansyonnen, e lekel ki pou ganny diskite dan sa lartik?

⁴ Lamazorite dimoun ki pou’n resisite pou viv lo en later anpe anba Rwayonm Bondye. (Psonm 37:10, 11, 29; Izai 11:6-9; 35:5, 6; 65:21-23) Parkont i annan lezot rezireksyon ki pou arive avan ler sa i akonpli. Premyerman, Zezi Kri ti pou bezwen resisite pour prezant valer son sakrifis avek Bondye pour nou. Zezi ti mor e an 33 N.L. i ti resisite.

⁵ Apre, bann manm swazir ‘Izrael Bondye’ pou bezwen zwenn Senyer Zezi Kri dan laglwar lesyel, kot zot pou “touzour avek Senyer.” (Galat 6:16; 1 Tesalonisyen 4:17) Sa levennman i apel “sa rezireksyon pli boner” oubyen “sa premye rezireksyon.” (Filipyen 3:10, 11, NW; Revelasyon 20:6) Ler sa premye rezireksyon pou konplete, sa ler pou’n arive pour tou sa kantite dimoun ganny resisite lo later avek en lespwar pour ganny lavi eternel dan Paradi. Alor sa “premye rezireksyon” i enteres nou tou menm si nou annan en lespwar pour viv swa dan lesyel oubyen lo later. Ki kalite rezireksyon sa i ete? Kan i arive?

Avek “ki Kalite Lekor?”

6, 7. (a) Avan ki bann Kretyen swazir i al dan lesyel, ki pou bezwen arive? (b) Dan ki kalite lekor zot pou resisite?

⁶ Dan son premye let pour bann Korentyen, Pol i soulev en kestyon konsernan premye rezireksyon: “Ki mannyer, bann ki’n mor pou kapab resisite, e ki kalite lekor zot pou annan?” Apre i reponn sa kestyon: “En lagrenn ki ou senmen pa viv, si i pa mor . . . Bondye i donn li en lekor ki i oule . . . Lekor seles i annan son prop labote e lekor teres i annan en lot labote.”—1 Korentyen 15:35-40.

⁷ Parol Pol i montre ki bann Kretyen ki’n ganny swazir par lespri sen i bezwen mor avan resevwar zot rekonpans dan lesyel. Ler zot mor, zot lekor laser i retourn an pousyer. (Zenez 3:19) Zot resisit dan en kalite lekor apropriye pour lavi dan lesyel dan letan ki Bondye in fikse. (1 Zan 3:2) Bondye i osi fer zot vin imortel. Sa i pa en keksoz zot posede depi zot nesans, konmsi en nanm imortel ki’n ganny mete dan zot. Pol ti dir: “Fodre ki sa lekor mortel i vin imortel.” Bann ki ganny resisite an premye, zot “vin” imortel akoz sa i en kado ki Bondye in donn zot.—1 Korentyen 15:50, 53; Zenez 2:7; 2 Korentyen 5:1, 2, 8.

8. Ki mannyer nou konnen ki Bondye pa swazir sa 144,000 imen parmi bann manm diferan larelizyon?

⁸ Zis 144,000 imen ki pou ganny sa premye rezireksyon. Zeova ti konmans swazir zot zour Lapannkot lannen 33 N.L., en pe letan apre ki i ti’n resisit Zezi. Zot tou zot annan non “[Zezi] ek non son Papa ekri lo zot fron.” (Revelasyon 14:1, 3) Alor zot pa ganny swazir parmi bann diferan larelizyon. Zot tou zot bann Kretyen e avek lafyerte zot port non Zeova. Ler zot resisite, zot resevwar en travay dan lesyel. Sa loportinite pour servi Zeova dan en tel fason direk i vreman eksitan pour zot.

 Premye Rezireksyon eski i pe deza arive?

9. Ki mannyer Revelasyon 12:7 ek 17:14 i ed nou determinen kan ki premye rezireksyon i konmanse?

⁹ Kan ki premye rezireksyon i arive? I annan levidans konvenkan konmkwa i pe deza arive. Par egzanp, konpar sa de sapit dan Revelasyon. Premyerman get Revelasyon sapit 12. Nou lir la ki nouvo Lerwa Zezi Kri, ansanm avek son bann lanz sen, i lager kont Satan ek son bann demon. (Revelasyon 12:7-9) Parey sa magazin in souvan montre, sa lager ti konmans an 1914. * Me remarke ki ti napa ni enn parmi bann Kretyen swazir ki ganny mansyonnen konmkwa zot ti avek Zezi dan sa lager dan lesyel. Aprezan get Revelasyon sapit 17. Nou lir la ki apre destriksyon “Gran Babilonn” Lanyo pou ganny laviktwar lo bann nasyon. Apre i azoute: ‘I pou ganny laviktwar ansanm avek bann ki’n ganny apele e swazir, e ki fidel.’ (Revelasyon 17:5, 14) ‘Bann ki’n ganny apele e swazir, e ki fidel,’ pou’n bezwen deza resisite si zot pou avek Zezi pour defet sa lemonn Satan enn fwa pour tou. I rezonnab pour dir alor ki bann Kretyen swazir ki mor avan Armagedon i resisite ant 1914 ziska Armagedon.

10, 11. (a) Lekel sa 24 ansyen, e ki enn ti revele avek Zan? (b) Ki konklizyon nou kapab tire par sa?

¹⁰ Eski nou kapab dir pli presizeman kan premye rezireksyon ti konmanse? En nide enteresan i ganny trouve dan Revelasyon 7:9-15, kot zapot Zan i dekrir son vizyon. I ti vwar “en gran lafoul, ki personn pa ti kapab konte.” Lidantite sa gran lafoul i ganny revele avek Zan par enn parmi sa 24 ansyen, e sa bann ansyen i reprezant sa 144,000 zeritye ansanm avek Kris dan zot laglwar dan lesyel. * (Lik 22:28-30; Revelasyon 4:4) Zan li menm ti annan lespwar pour al viv dan lesyel; me vi ki i ti ankor en zonm lo later ler sa ansyen ti koz avek li, dan sa vizyon Zan i bezwen reprezant bann Kretyen swazir lo later ki pa ankor resevwar zot rekonpans dan lesyel.

¹¹ Alor, ki nou kapab konklir lefe ki enn parmi sa 24 ansyen ti revel lidantite sa gran lafoul avek Zan? I paret ki sa bann ki’n resisite ki form par sa group 24 ansyen pe ganny servi ozordi pour transmet laverite sorti kot Bondye. Akoz sa i enportan? Akoz vre lidantite sa gran lafoul ti ganny revele avek bann Kretyen swazir Bondye lo later an 1935. Si enn parmi sa 24 ansyen ti ganny servi pour transmet sa laverite enportan, i ti pou’n bezwen resisite pa plitar ki 1935. Sa ti pou endike ki premye rezireksyon ti konmans ant apepre 1914 ziska 1935. Eski nou kapab pli presi?

12. Eksplike akoz nou kapab dir ki i posib ki sa premye rezireksyon ti konmanse pandan prentan an 1918?

¹² I pou byen si nou egzamin sa ki nou kapab apel bann konparezon Biblik. Zezi Kri ti ganny apwente konman fitir Lerwa dan Rwayonm Bondye tar lannen 29 N.L. Trwa zan edmi plitar, pandan prentan lannen 33 N.L. i ti resisite konman en lespri pwisan. Vi ki Zezi ti ganny kouronnen Lerwa tar an 1914, eski i kapab posib ki rezireksyon son bann disip swazir ki fidel ti konmans trwa zan edmi plitar pandan prentan an 1918? Sa i en posibilite enteresan. Menm si sa pa kapab ganny konfirmen direkteman dan Labib, i pa kont lezot verse Labib ki endike ki sa premye rezireksyon ti konmans deswit apre ki prezans Kris ti konmanse.

13. Dan ki fason 1 Tesalonisyen 4:15-17 i sizere ki premye rezireksyon ti konmans arive boner dan prezans Kris?

¹³ Par egzanp, Pol ti ekrir: ‘Nou bann ki vivan ki’n reste ziska prezans Senyer, [me pa ziska lafen son prezans] nou pa pou al avan  bann ki’n mor. Annefe, ler sinyal pou ganny donnen, avek lavwa en arkanz, e avek son tronpet Bondye, Senyer limenm pou desann sorti dan lesyel, e bann ki’n mor dan Kris pou resisite an premye. Apre, nou bann vivan ki pou reste, nou pou ganny anleve e rasanble ansanm avek zot dan nyaz pour rankontre Senyer dan lezer e alor nou pou touzour avek Senyer.’ (1 Tesalonisyen 4:15-17) Alor bann Kretyen swazir ki’n mor avan prezans Kris, zot ti resisite pour viv dan lesyel avan bann ki ti ankor vivan pandan prezans Kris. Savedir ki premye rezireksyon in bezwen konmans boner dan prezans Kris, e i kontinyen “pandan son prezans.” (1 Korentyen15:23, NW) Olye ki tou i ganny resisite anmenmtan, sa premye rezireksyon i arive pandan en peryod letan.

“Zot ti ganny sakenn en Rob blan”

14. (a) Kan ki bann vizyon rikorde dan Revelasyon sapit 6 i ganny akonpli? (b) Kwa ki ganny dekrir dan Revelasyon 6:9?

¹⁴ Egzamin osi levidans trouve dan Revelasyon sapit 6. Zezi i ganny trouve pe ale lo en seval konman en Lerwa venker. (Revelasyon 6:2) Bann nasyon i enplike dan en tre gro lager. (Revelasyon 6:4) I annan lafamin partou. (Revelasyon 6:5, 6) Bann maladi grav i ravaz limanite. (Revelasyon 6:8) Tou sa bann profesi i klerman montre kondisyon lemonn depi 1914. Me en lot keksoz i arive. Nou latansyon i ganny dirize ver en lotel sakrifis. Anba sa lotel i annan “lam bann ki ti’n ganny touye akoz Parol Bondye e akoz temwanyaz ki zot ti’n donnen.” (Revelasyon 6:9) Vi ki “nanm [oubyen lavi] i dan disan,” sa ki anba lotel i plito reprezant disan bann serviter fidel Zezi ki’n ganny touye akoz zot rann temwannyaz avek devouman ek lardyes.—Levitik 17:11.

15, 16. Eksplike akoz Revelasyon 6:10, 11 i refer avek premye rezireksyon.

¹⁵ Parey disan Abel ki ti en zonm drwat, disan sa bann Kretyen ki’n mor pour  zot lafwa pe kriye pour lazistis. (Zenez 4:10) “Zot ti kriye avek en lavwa for: ‘Ziska kan, Senyer sen e vre, ki ou pou tarde zize e vanz nou disan lo bann zabitan later?’” Apre ki arive? “Zot ti ganny sakenn en rob blan, e zot ti ganny demande pour repoz ankor en pti pe letan ziska ki zot bann kanmarad travay ek bann frer ki devre ganny touye parey zot a ariv kantite konplet.”—Revelasyon 6:10, 11.

¹⁶ Eski sa ta disan ki anba lotel ki ti ganny sa bann rob blan? Me non! Sa bann rob ti pe ganny donnen avek bann endividi ki zot disan ti’n ganny verse konmsi i pe ganny verse lo en lotel. Zot ti sakrifye zot lavi lo non Zezi e aprezan zot in ganny resisite konman bann lespri. Ki mannyer nou konn sa? Dan bann premye sapit liv Revelasyon, nou lir: “Sa ki ganny laviktwar, i pou abiy ensi dan lenz blan; mon pa pou efas son non dan liv lavi.” Osi rapel, ki sa 24 ansyen ti’n “abiye an blan, avek kouronn an-or lo zot latet.” (Revelasyon 3:5; 4:4) Alor apre ki lager, lafamin, ek maladi ti konmans ravaz later, bann manm 144,000 ki ti’n mor, ki ganny reprezante par sa disan anba lotel, zot ti mont dan lesyel e dan en fason senbolik zot abiye an blan.

17. Ki mannyer bann ki resevwar rob blan i bezwen “repoze”?

¹⁷ Bann nouvo resisite i bezwen “repoze.” Zot bezwen esper avek pasyans zour vanzans Bondye. Larestan bann Kretyen swazir ki ankor lo later, i bezwen prouv zot fidelite kan zot pas dan leprev. Kan sa ler zizman Bondye i arive, sa ‘repo’ pou fini. (Revelasyon 7:3) Sa letan zot pou zwenn ansanm avek Senyer Zezi Kri pour detri bann move dimoun, enkli sa bann ki’n vers disan bann Kretyen inosan.—2 Tesalonisyen 1:7-10.

Ki sa i vedir pou nou?

18, 19. (a) Pour ki rezon ou kapab dir ki premye rezireksyon pe deza arive? (b) Ki mannyer ou konprenezon lo sa premye rezireksyon i fer ou santi?

¹⁸ Labib pa dir kan egzakteman ki premye rezireksyon ti konmanse, me i revele ki i arive pandan en peryod letan, setadir pandan prezans Kris. Bann Kretyen swazir ki ti mor avan prezans Kris ti konmans ganny resisite an premye. Anmezir ki sa letan prezans Kris i progrese, bann Kretyen swazir ki konplet zot lavi lo later fidelman pou ganny transformen konman bann lespri pwisan “dan en klendey.” (1 Korentyen 15:52) Eski tou bann Kretyen swazir pou resevwar zot rekonpans dan lesyel avan lager Armagedon? Nou pa konnen. Me nou konnen ki, tou sa 144,000 pou ganny trouve pe debout lo Montanny Siyon dan lesyel dan letan ki Bondye in fikse.

¹⁹ Nou konnen osi ki lamazorite manm 144,000 in deza ini avek Kris. Zis en pti gin zot ki ankor lo later. Sa i vreman endik nou ki sa ler pour Bondye egzekit son zizman pe aprose byen vitman! Byento, sa sistenm lemonn Satan pou ganny detri. Satan li i pou ganny anprizonnen. Apre rezireksyon lo later pou konmanse, e lo baz sakrifis ranson Zezi, dimoun pou resisite e vin parfe parey Adan ti ete. Profesi Zeova rikorde dan Zenez 3:15 pe ganny akonpli dan en fason merveye. Eski pa i en gran privilez pour nou viv dan sa letan!

[Not anba lo paz]

Eski ou kapab eksplike?

Ki mannyer sa bann verse Labib i ed nou konpran kan ki sa “premye rezireksyon” ti konmanse?

• Revelasyon 12:7; 17:14

• Revelasyon 7:13, 14

• 1 Korentyen 15:23; 1 Tesalonisyen 4:15-17

• Revelasyon 6:2, 9-11

[Kestyon]

[Portre lo paz 31]

Ki kalite rezireksyon ki arive avan ki tou dimoun an zeneral i ganny resisite?