Zeova i donn “son Lespri sen tou bann ki demann li”
Zeova i donn “son Lespri sen tou bann ki demann li”
“Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?”—LIK 11:13.
1. Kan ki nou vreman bezwen led lespri sen?
‘M ON pa kapab fer fas avek sa lo mon tousel. San led lespri sen i pou enposib pour mwan andir sa leprev!’ Eski ou’n deza santi koumsa ofon ou leker? Laplipar Kretyen in deza. Petet ou ti santi koumsa ler ou ti aprann ki ou’n ganny en maladi grav. Oubyen petet ler sa enn ki ou ti’n marye e viv avek toudilon ou lavi ti mor. Ouswa kan ou lazwa ti ganny ranplase par depresyon. Dan sa bann letan difisil dan ou lavi, ou ti’n kapab santi ki ou ankor vivan gras akoz lespri sen Zeova ti pe donn ou “sa pisans ki napa son parey.”—2 Korentyen 4:7-9; Psonm 40:1, 2.
2. (a) Ki difikilte vre Kretyen i bezwen fer fas avek? (b) Ki kestyon nou pou egzaminen dan sa lartik?
2 Vre Kretyen ozordi i bezwen fer fas avek presyon ki pe vin pli for ek lopozisyon sorti kot sa lemonn ki lwen avek Bondye. (1 Zan 5:19) E parlao tousala, Satan li menm pe atak bann disip Kris, e dan en fason kriyel i pe lager avek sa bann ki pe “obei konmannman Bondye e ki fidel avek temwanyaz Zezi.” (Revelasyon 12:12, 17) I pa drol alors ki nou bezwen led lespri sen plis ki labitid. Ki nou devret fer pour toultan ganny lespri sen Bondye? E ki mannyer nou kapab asire ki Zeova i vreman anvi donn nou sa lafors ki nou bezwen letan nou pe pas dan leprev? Nou pour vwar larepons sa bann kestyon dan de parabol ki Zezi ti donnen.
Persiste dan Lapriyer
3, 4. Ki parabol Zezi ti donnen e konman i ti aplik li avek lapriyer?
3 En fwa en disip ti demann Zezi: “Senyer, montre nou fer lapriyer.” (Lik 11:1) Pour reponn li, Zezi ti rakont de parabol ki relye avek kanmarad. Premye i konsernan en zonm ki ti envit en envite e lot i konsernan en papa ki ekout son garson. Annou egzamin sa de parabol.
4 Zezi ti dir: “Lekel parmi zot ki annan en zanmi e i al kot li dan milye lannwit e dir li, ‘Mon zanmi, pret mwan trwa dipen, akoz enn mon zanmi in arive dan lakour apre en long vwayaz, e mon napa nanryen pour ofer li.’ Son zanmi ki anndan i reponn li, ‘Pa bezwen deranz mwan; mon laport in fermen, mwan ek mon bann zanfan nou pe dormi; mon pa kapab leve pour donn ou nanryen.’ Mon dir zot, kanmenm i pa pou leve pour donn li keksoz akoz i son zanmi, pour larezon ki i persiste [avek lardyes, NW] i a leve e i a donn li tou sa ki i bezwen.” Apre Zezi ti eksplike konman sa parabol i aplik pour lapriyer. I ti dir: ‘Mwan mon dir zot: kontinyen demande e zot a gannyen; kontinyen rode e zot a trouve; kontinyen frape e laport i a ouver. En dimoun ki demande i resevwar, sa ki rode i trouve, e laport i ouver pour sa ki frape.’—Lik 11:5-10.
5. Ki leson nou tire avek sa parabol konsernan lafason pour priye?
5 Sa parabol byen vivan ki pe demontre en zonm ki persiste, i montre nou ki latitid nou devret annan ler nou priye. Remarke ki Zezi ti dir sa zonm ti ganny sa ki i ti bezwen akoz i ti “persiste avek lardyes.” (Lik 11:8, NW) Sa lekspresyon “persiste avek lardyes” i aparet zis en fwa dan Labib. I sorti dan en mo Grek ki literalman vedir “san lakanmizri.” Souvan dimoun i vwar sa konman en move tre. Me kan en dimoun i demontre ki i san lakanmizri oubyen i persevere pour en bon rezon, sa kalite i kapab ganny byen apresye. Sanmenm sa ki sa zonm ti fer dan sa parabol ki Zezi ti rakonte. I pa ti kanmi pour demann sa ki i ti bezwen avek persistans. Vi ki Zezi ti servi sa parabol pour donn nou en legzanp, pareyman nou devret persiste dan nou lapriyer. Zeova i anvi ki nou ‘kontinyen demande; kontinyen rode; kontinyen frape.’ An retour, i pou “donn son Lespri sen tou bann ki demann li.”
6. Konman lospitalite ti ganny vwar dan letan Zezi?
6 Zezi pa ti zis montre nou konman pour priye, savedir avek persistans, me akoz nou devret fer li. Pour kapab byen sezi sa leson, nou devret egzaminen konman sa bann ki ti ekout Zezi, ti vwar sa koutim pour demontre lospitalite. I annan en kantite resi dan Labib ki montre ki dan letan Labib, pour pran swen avek bann viziter ti en koutim vreman enportan, sirtou parmi bann serviter Bondye. (Zenez 18:2-5; Ebre 13:2) I ti en laont pour pa montre lospitalite. (Lik 7:36-38, 44-46) Annou gard tousala antet anmezir ki nou egzamin ankor enn fwa zistwar ki Zezi ti rakonte.
7. Akoz sa zonm pa ti ezite pour lev son zanmi?
7 Sa zonm dan parabol Zezi ti resevwar en viziter dan milye lannwit. Sa zonm ti santi li oblize pour donn son envite manze, me i ti “napa nanryen pour ofer li.” E pour li sa ti en keksoz tre serye! I ti bezwen rod en pe dipen, e i ti pare pour fer nenport kwa pour ganny sa dipen. Alors, i ti al kot enn son zanmi e i pa ti kanmi pour lev li. I ti kriye: “Mon zanmi, pret mwan trwa dipen.” I ti persiste ziska ki i ti ganny sa ki i ti bezwen. San dipen, i pa ti pou kapab byen akey son envite.
Pli nou bezwen, pli nou devret demande
8. Kwa ki pou ed nou persiste avek lardyes kan nou demann Bondye son lespri sen?
8 Ki sa parabol i montre lo rezon akoz nou persiste dan lapriyer? Sa zonm ti kontinyelman demann son zanmi dipen akoz i ti santi ki i ti vreman enportan pour ganny sa dipen pour li byen desarz son responsabilite konman enn ki pratik lospitalite. (Izai 58:5-7) San dipen, i pa ti pou kapab byen desarz son responsabilite. Pareyman nou kontinyelman demann Bondye son lespri sen dan lapriyer, akoz nou konsyan ki i tre enportan pour ganny son lespri sen pour kapab akonpli nou minister konman vre Kretyen. (Zekarya 4:6) San li nou pa pou reisi. (Matye 26:41) Eski ou vwar sa konklizyon enportan ki nou kapab tire dan sa parabol? Si pour nou lespri sen i en keksoz ki nou vreman bezwen, i pou annan plis sans ki nou pou persiste kan nou demann Bondye son lespri sen.
9, 10. (a) Eksplike akoz nou bezwen persiste pour demann Bondye son lespri sen? (b) Ki kestyon nou devret demann nou lekor, e akoz?
9 Annou vwar konman nou kapab aplik sa leson dan lavi toulezour. Meton enn dan ou fanmiy i tonm malad dan milye lannwit. Eski ou ti pou lev en dokter pour demann li son led? Ou pa ti pou fer sa si ou fanmiy pa gravman malad. Me si i pe ganny en latak leker, ou pa ti pou kanmi pour telefonn en dokter. Akoz? Akoz sa i serye. Ou konsyan ki dan sa sitiasyon ou vreman bezwen en dokter. Si ou pa demann led, ou fanmiy i kapab mor. Pareyman, vre Kretyen pe fer fas avek en sitiasyon ki serye. Anfet, Satan pe sirkile parey “en lyon ki pe kriye,” i pe esey devor nou. (1 Pyer 5:8) Nou vreman bezwen led lespri sen si nou anvi reste vivan spirityelman. Sa i kapab danzere si nou pa demann Bondye son led. Alors, nou persiste avek lardyes pour demann Bondye son lespri sen. (Efezyen 3:14-16) Sa i sel fason ki nou kapab mentenir sa lafors ki nou bezwen pour ‘andire ziska lafen.’—Matye 10:22; 24:13.
10 Alors, i tre enportan ki parler nou demann nou lekor, ‘Ki kantite mon persevere dan mon lapriyer?’ Pa bliye, se kan nou vreman realize ki nou bezwen led Bondye, ki nou pou demann Bondye son lespri sen avek persistans.
Kwa ki pous nou pour priye avek Konfyans?
11. Ki mannyer Zezi ti aplik sa parabol konsernan en papa ek son garson an rapor avek lapriyer?
11 Sa zonm dan sa parabol ki Zezi ti rakonte i montre nou ki latitid nou devret annan ler nou priye. Sa lot parabol i demontre latitid sa enn ki ekout lapriyer. Sa i pa lot ki Zeova. Zezi ti demande: “Lekel sa papa parmi zot, ki si son garson i demann li en pwason, i a donn li en serpan olye en pwason; oubyen si i demann li en dizef, i a donn li en skorpyon?” Apre i ti fer laplikasyon: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?”—Lik 11:11-13.
12. Konman sa dezyenm parabol i montre ki Zeova i anvi reponn nou lapriyer?
12 Lefe ki sa papa i pare pour donn sa ki bon son garson, sa i en legzanp ki montre nou konman Zeova i santi anver sa bann ki koz avek li dan lapriyer. (Lik 10:22) Premyerman, annou remark ladiferans ant sa de parabol. Zeova pa parey sa zonm dan sa premye parabol ki okonmansman pa ti oule sorti pour ed son zanmi, me plito i parey en paran ki kontan son zanfan, ki toultan pare pour azir kan son zanfan i demann li en keksoz. (Psonm 50:15) Pour montre ki Zeova i pare pour ed nou, Zezi ti montre ladiferans ki egziste ant en papa ek Bondye. I ti dir ki si en papa ki “move,” akoz lenperfeksyon ki i’n erite, i kapab donn bon keksoz son zanfan, pa nou devret ekspekte ki nou bon Papa dan lesyel pou donn son lespri sen son bann adorater ki parey en fanmiy pour li!—Zak 1:17.
13. Ki lasirans nou kapab annan ler nou priy Zeova?
13 Ki leson nou tire ladan? Nou kapab annan konfyans ki ler nou demann nou Papa dan lesyel son lespri sen, i pou donn nou avek gran ker. (1 Zan 5:14) Kan nou persiste dan lapriyer, Zeova pa pou zanmen dir: “Pa bezwen deranz mwan; mon laport in fini fermen.” (Lik 11:7) Okontrer Zezi ti dir: ‘Kontinyen demande e zot a gannyen; kontinyen rode e zot a trouve; kontinyen frape e laport i a ouver.’ (Lik 11:9, 10) Wi, Zeova pou reponn nou “zour ki nou kriy li.”—Psonm 20:9; 145:18.
14. (a) Ki move pwennvi ki fatig serten ki pas atraver leprev? (b) Kan nou pe pas dan leprev, akoz nou kapab priy Zeova avek konfyans?
14 Parabol Zezi lo sa papa ki kontan son zanfan, i osi met lanfaz lo lefe ki labonte Zeova i pli for ki sa labonte okenn paran i kapab demontre. Anfet, nenport leprev ki nou kapab pe pas atraver nou pa devret zanmen panse ki sa pe arive akoz nou’n fer en keksoz ki Bondye pa kontan. Napa okenn landrwa dan Labib ki prouv sa. Se Satan, nou pli gran lennmi ki anvi nou mazin koumsa. (Zob 4:1, 7, 8; Zan 8:44) Zeova pa tant nou “par sa ki mal.” (Zak 1:13) I pa donn nou bann leprev oubyen tes konmsi i pe donn nou en serpan oubyen skorpyon. Nou Papa dan lesyel i donn ‘sa ki bon bann ki demann li.’ (Matye 7:11; Lik 11:13) Pli nou apresye labonte Zeova ek lefe ki i pare pour ed nou, pli nou pou santi nou pouse pour priy li avek konfyans. Anmezir ki nou fer sa, nou pou kapab eksprim menm santiman avek sa psalmis ki ti ekrir: “Vreman Bondye in tande; i ti ekout mwan kan mon ti priy li.”—Psonm 10:17; 66:19.
Konman Lespri sen i ed nou
15. (a) Ki promes Zezi ti fer konsernan lespri sen? (b) Nonm en fason ki lespri sen i ed nou.
15 Zis avan son lanmor, Zezi ti redonn ankor sa lasirans ki i ti donnen dan son parabol. Kan i ti pe koz lo lespri sen, i ti dir son bann zapot: “Mon pou demann mon Papa, e i pou donn zot en lot Konseyer [oubyen “led,” NW] ki pou reste avek zot pour touzour.” (Zan 14:16) Zezi ti promet ki sa led oubyen lespri sen, ti pou avek son bann disip dan lavenir, ki osi enkli nou letan. Eski i annan en fason enportan ozordi ki nou ganny sipor lespri sen? Wi, lespri sen i ed nou andir diferan kalite leprev. Konman? Dan son let ki i ti ekrir bann Kretyen dan kongregasyon Korent, zapot Pol, ki li menm ti pas atraver bann tes, i eksplik nou konman i ti ganny led lespri sen. An bref, annou egzamin sa ki i ti ekrir.
16. Konman nou sitiasyon i kapab parey avek sa ki zapot Pol ti pas ladan?
16 Premyerman, Pol ti fransman dir son bann frer ek ser Kretyen ki i ti a pe fer fas avek ‘en soufrans dan son lekor,’ en serten kalite leprev. Apre i ti dir: “An trwa fwa mon’n sipliy Senyer [Zeova] pour anlev sa soufrans.” (2 Korentyen 12:7, 8) Menm si Pol ti sipliy Bondye pour retir son soufrans, i ti bezwen viv avek sa. Petet ou osi ou pe fer fas avek menm sitiasyon. Petet parey zapot Pol ou’n persiste e avek konfyans ou’n priy Bondye pour tir ou dan sa leprev. Malgre ou persistans, sa problenm i ankor touzour la. Alors, eski sa i vedir ki Zeova pa’n reponn ou lapriyer e ki son lespri sen pa pe ed ou? Non! (Psonm 10:1, 17) Remark sa ki Pol ti dir apre.
17. Konman Zeova ti reponn lapriyer Pol?
17 Bondye ti reponn son lapriyer e dir li: “Mon lagras i tou sa ki ou bezwen; parski mon pisans i azir dan lafebles.” Pol ti dir: ‘Alor mon prefere vant mon lekor lo size mon febles, pour ki pisans Kris parey en latant i repoz lo mwan.’ (2 Korentyen 12:9; Psonm 147:5) Alors, Pol ti kapab konstate atraver Kris ki sa proteksyon ranpli avek pwisans sorti kot Bondye ti kouver li parey en latant. Pareyman ozordi, Zeova i reponn nou lapriyer dan sa fason. Zis parey en landrwa kasyet, i kouver son bann serviter avek son proteksyon.
18. Akoz nou kapab andir bann leprev?
18 Byensir, en latant pa kapab anpes lapli tonbe oubyen anpes divan soufle. Me i protez dimoun ki anba la, kan lapli i tonbe e kan divan i soufle. Pareyman, sa proteksyon ki “pisans Kris” i fourni pa anpes nou pas dan leprev oubyen rankontre bann difikilte. Me i protez nou spirityelman kont sa bann keksoz danzere dan sa lemonn e kont latak sef sa lemonn, Satan. (Revelasyon 7:9, 15, 16) Alors, si ou pe fer fas avek en leprev ki pa oule arete, ou kapab asire ki Zeova i konnen ki ou pe lite e asire ki i’n “tann ou kan ou ti pe plere.” (Izai 30:19; 2 Korentyen 1:3, 4) Pol ti ekrir: “Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.”—1 Korentyen 10:13; Filipyen 4:6, 7.
19. Ki ou determinen pour fer e akoz?
19 I vre, sa “bann dernyen zour” dan sa lemonn ki lwen avek Bondye i ranpli avek “letan difisil.” (2 Timote 3:1) Me kantmenm sa, bann serviter Bondye pa vwar li enposib pour fer fas avek sa. Akoz? Akoz zot ganny sipor ek proteksyon lespri sen ki Zeova i donnen avek gran ker e plennman. E akoz i donn sa tou bann ki demann li avek persistans ek konfyans. Alors, annou determinen pour kontinyen demann Bondye son lespri sen toulezour.—Psonm 34:6; 1 Zan 5:14, 15.
Ki ou pou reponn?
• Ki nou bezwen fer pour kapab ganny lespri sen Bondye?
• Akoz nou kapab annan konfyans ki Zeova pou reponn nou lapriyer kan nou demann li son lespri sen?
• Konman lespri sen i ed nou andir leprev?
[Kestyon]
[Portre lo paz 13]
Ki nou aprann dan parabol Zezi konsernan en zonm ki ti persiste?
[Portre lo paz 15]
Eski ou demann Bondye son lespri sen avek persistans?
[Portre lo paz 16]
Ki nou aprann lo Zeova dan sa parabol konsernan en bon papa?