Zeova pou “rann Lazistis”

“Eski zot pa krwar ki Bondye pou rann lazistis bann ki i’n swazir e ki priy li lizour konman lannwit?”—LIK 18:7.

1. Kwa ki vreman ankouraz ou e akoz?

DAN lemonn antye, bann Temwen Zeova i vreman kontan kan zot zwenn ansanm avek zot bann frer ek ser ki pe fidelman servi Zeova pour plizyer lannen. Eski ou konn serten parmi zot? Petet ou kapab mazin en ser aze ki’n batize en bann letan pase e ki byen rar i mank renyon. Oubyen petet ou mazin en frer aze ki fidelman siport predikasyon semenn apre semenn e ki’n fer sa pour en kantite lannen. Anfet, bokou sa bann serviter fidel ti mazinen ki depi tou sa letan Armagedon ti’n devret arive. Sa lemonn enzis i ankor la, me malgre sa, zot konfyans dan bann promes Zeova ek zot determinasyon pour “reste fidel ziska lafen” pa’n diminyen. (Matye 24:13) Zot lafwa ki sitan solid, i vreman ankouraz tou dimoun dan kongregasyon.—Psonm 147:11.

2. Kwa ki fer nou sagren?

² Parfwa nou kapab vwar tou lekontrer. Serten Temwen ti partisip dan predikasyon pour plizyer lannen, me avek letan zot lafwa dan Zeova ti diminyen, answit zot ti aret asosye avek kongregasyon Kretyen. I vreman fer nou lapenn kan serten nou bann frer ek ser i aret servi Zeova, e ofon nou leker nou anvi kontinyen ed sa bann “mouton perdi” pour retourn dan troupo. (Psonm 119:176; Romen 15:1) Lefe ki serten zot lafwa i reste solid e zot toultan aktif, e de lot kote nou vwar ki serten i perdi zot lafwa e zot nepli asosye avek kongregasyon, alors sa i fer nou demann serten kestyon. Akoz ki bokou Temwen zot lafwa dan bann promes Zeova i reste solid tandis ki lezot i perdi zot lafwa? Ki nou kapab fer personnelman pour fer sir ki nou konviksyon ki sa “gran zour Zeova” ki pe aprose i reste ferm? (Tsefanya 1:14) Annou egzamin en parabol ki trouve dan Levanzil Lik.

En Lavertisman pour tou bann ki Vivan “ler Fis-de-Lonm pou vini”

3. Lekel ki kapab benefisye avek sa parabol konsernan en vev ek en ziz, e akoz?

³ Dan Lik sapit 18, nou vwar parabol ki Zezi ti donnen konsernan en vev ek en ziz. I parey sa parabol kot sa zonm ti persiste ki nou ti diskite dan lartik avan. (Lik 11:5-13) Ler nou egzamin konteks kot sa parabol konsernan sa vev ek ziz i ganny tire, nou vwar ki i aplik sirtou pour bann ki vivan “ler Fis-de-Lonm pou vini” pour dirize dan son Rwayonm, e sa ti pran lefe depi 1914.—Lik 18:8. *

4. Ki Zezi ti koz lo la avan ki i ti rakont sa parabol dan Lik sapit 18?

⁴ Avan ki i ti donn sa parabol, Zezi ti dir ki ler i pou konmans dirize dan son Rwayonm, sa pou vreman evidan partou zis “parey zekler i klate e i ekler lesyel depi en bout ziska lot.” (Lik 17:24; 21:10, 29-33) Me kantmenm sa, menm si levidans i kler, laplipar dimoun ki pe viv dan “letan lafen” pa fatig zot avek sa. (Danyel 12:4)  Akoz? Pour menm rezon ki bann dimoun dan letan Noe ek Lot ti inyor lavertisman Zeova. Sa letan, dimoun ‘ti pe manze, bwar, aste, vann, plante, konstri ziska zour ki zot ti ganny detri.’ (Lik 17:26-29) Zot ti perdi zot lavi akoz zot ti telman okipe avek zot bann aktivite dan lavi toulezour ki zot pa ti fatig zot avek sa ki Bondye ti pe al fer. (Matye 24:39) Ozordi osi i parey, dimoun i sitan okipe avek zot bann aktivite dan lavi ki zot pa vwar levidans ki sa move lemonn i pros pour trouv son lafen.—Lik 17:30.

5. (a) Lekel ki Zezi ti averti e akoz? (b) Kwa ki’n fer serten perdi zot lafwa?

⁵ Zezi ti enkyet ki son bann disip osi ti kapab ganny distrer par sa lemonn Satan, ziska en pwen kot zot ti kapab “retourn ver sa bann keksoz ki zot in kit deryer.” (Lik 17:22, 31, NW) Anfet, sanmenm sa ki’n arive avek serten Kretyen. Pour bokou lannen zot ti sitan enpasyan pour vwar sa zour kot Zeova pou met en lafen avek sa move lemonn. Me kan Armagedon pa ti arive sa letan ki zot ti pe ekspekte, zot ti dezapwente. Zot ti konmans perdi konfyans ki zour zizman Zeova i pros. Zot ti konmans pas mwens letan dan predikasyon e avek letan zot ti telman preokipe avek bann aktivite dan lavi toulezour ki zot ti napa ase letan pour fer bann keksoz spirityel. (Lik 8:11, 13, 14) E finalman, zot ti “retourn ver sa bann keksoz ki zot in kit deryer.” Pa sa i fer lapenn!

I neseser pour “touzour priye”

6-8. (a) Rakont sa parabol konsernan sa vev ek sa ziz. (b) Konman Zezi ti aplik sa parabol?

⁶ Ki nou kapab fer pour fer sir ki nou pa perdi sa konfyans solid ki Zeova pou akonpli son bann promes? (Ebre 3:14) Zis apre ki i ti’n averti bann disip pour pa retourn dan sa move lemonn Satan, Zezi ti donn larepons pour sa kestyon.

⁷ Dapre Lik, Zezi “ti rakont zot en parabol pour montre ki fodre touzour priye e pa perdi kouraz.” Zezi ti dir: “Ti annan dan en lavil en ziz ki pa ti ni pran ka avek Bondye, ni annan respe pour personn. Dan sa lavil ti osi annan en vev ki tou letan ti pe vin dir li, ‘Ziz! Fer mwan lazistis kont mon ladverser!’ Pour en bon pe letan, sa ziz ti refize. Me apre i ti dir dan limenm: ‘Menm ki mon pa pran ka avek Bondye e ki mon napa respe pour personn, me akoz sa vev pe fatig mwan tro bokou, mon a rann lazistis pour ki finalman i a aret fatig mwan.’”

⁸ Apre ki i ti’n rakont sa parabol, Zezi ti fer laplikasyon: “Remark byen ki sa move ziz ti dir! Eski zot pa krwar ki Bondye pou rann lazistis bann ki i’n swazir e ki priy li lizour konman lannwit,” menm si i pasyante avek zot? Mon dir zot, i pou rann zot  lazistis vitman. E pourtan, ler Fis-de-Lonm pou vini, eski i pou trouv lafwa lo later?”—Lik 18:1-8.

“Fer mwan Lazistis”

9. Ki pwen kle dan sa parabol?

⁹ Pwen kle dan sa parabol byen vivan i vreman kler. Sa vev, ziz ek Zezi, zot tou le trwa ti fer resorti sa pwen. Sa vev ti sipliye: “Fer mwan lazistis.” Sa ziz ti dir: “Mon a rann lazistis.” Zezi ti demande: “Eski zot pa krwar ki Bondye pou rann lazistis?” E Zezi ti dir sa konsernan Zeova: “I pou rann lazistis vitman.” (Lik 18:3, 5, 7, 8) Kan ki Bondye pou vreman “rann lazistis”?

10. (a) Kan ki lazistis ti ganny anmennen dan premye syek? (b) Kan e konman ki pep Bondye ozordi pou ganny lazistis?

¹⁰ Dan premye syek, “bann zour pour anmenn lazistis” (oubyen “bann zour vanzans,” Nouvo Testaman) ti arive lannen 70 N.L. kan Zerizalenm ansanm avek son tanp ti ganny detrir. (Lik 21:22, NW) Dan nou letan pep Bondye pou ganny lazistis kan “gran zour Zeova” pou arive. (Tsefanya 1:14; Matye 24:21) Kan sa pou arive, Zeova pou ‘repey par soufrans bann ki fer soufer’ son pep, “kan [Zezi Kri] pour tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.”—2 Tesalonisyen 1:6-8; Romen 12:19.

11. Dan ki sans lazistis pou vin “vitman”?

¹¹ Me konman nou devret konpran parol Zezi ler i ti dir avek lasirans ki Zeova pou rann lazistis “vitman”? Labib i montre ki menm si Zeova i pasyante, i pa pou tarde pour anmenn lazistis dan son letan ki i’n fikse. (Lik 18:7, 8; 2 Pyer 3:9, 10) Dan letan Noe, kan Deliz ti arive, san tarde bann move dimoun ti ganny detrir. Pareyman, kan lapli dife ti tonm lo later dan letan Lot, bann move dimoun ti perdi zot lavi. Zezi ti dir: “I pou parey, sa zour ki Fis-de-Lonm pou ganny revele.” (Lik 17:27-30) Ankor enn fwa, “en sel kou destriksyon” pou ariv lo bann move dimoun. (1 Tesalonisyen 5:2, 3) Anfet, akoz lazistis, nou kapab annan konfyans total ki Zeova pa pou les sa lemonn Satan kontinyen egziste en zour anplis ki fodre.

I pou “rann Lazistis”

12, 13. (a) Ki leson sa parabol konsernan en vev ek en ziz i ansenny nou? (b) Akoz nou kapab asire ki Zeova pou ekout nou lapriyer e rann lazistis?

¹² Parabol Zezi lo sa vev ek ziz i met lanfaz lo lezot laverite enportan. Pour fer laplikasyon, Zezi ti dir: “Remark byen ki sa move ziz ti dir. Eski zot pa krwar ki Bondye pou rann lazistis bann ki i’n swazir?” Sirman Zezi pa ti pe konpar Zeova avek sa ziz, konmsi sa i lafason ki Bondye ti pou azir anver bann krwayan. Okontrer par fer resorti en diferans ki egziste ant sa ziz ek Bondye, Zezi ti ansenny son bann disip en leson lo Zeova. Dan ki fason sa ziz ek Zeova i diferan?

¹³ Sa ziz dan sa parabol ti “move,” me “Bondye i en ziz ki zis.” (Psonm 7:11; 33:5) Sa ziz ti napa en vre lentere dan sa vev, me Zeova i enterese avek nou tou endividyelman. (2 Kronik 6:29, 30) Sa ziz pa ti anvi ed sa vev, me Zeova li i pare pour ed nou, anfet i enpasyan pour ed Son bann serviter. (Izai 30:18, 19) Ki leson nou tire ladan? Si sa move ziz ti kapab ekout demann sa vev e rann li lazistis, eski pa nou devret pli ekspekte ki Zeova pou ekout lapriyer son pep e sirman rann zot lazistis!—Proverb 15:29.

14. Akoz nou pa devret perdi lafwa ki zour zizman Bondye pe aprose?

¹⁴ Alors, sa bann ki nepli krwar ki zour zizman Bondye pou arive en zour pe fer en  gro fot. Akoz? Lefe ki zot nepli annan konviksyon ki sa “gran zour Zeova” i pros, an realite zot pe kestyonnen si i vreman vo lapenn annan konfyans dan Zeova ki i pou fidelman akonpli son bann promes. Me personn napa sa drwa pour kestyonn fidelite Bondye. (Zob 9:12) En kestyon tre enportan i, eski mwan mon pou reste fidel? Sanmenm sa topik ki Zezi ti souleve alafen son parabol lo sa vev ek sa ziz.

“Eski i pou trouv sa Kalite Lafwa lo Later?”

15. (a) Ki kestyon Zezi ti demande e akoz? (b) Ki kestyon nou devret demann nou lekor?

¹⁵ Zezi ti demann en kestyon byen enteresan: “Ler Fis-de-Lonm pou vini, eski i pou trouv sa kalite lafwa lo later?” (Lik 18:8, NW, not anba lo paz.) Kan Zezi ti servi sa lekspresyon “sa kalite lafwa” i pa ti pe koz lo lafwa an zeneral, me lo en kalite lafwa an partikilye, savedir sa kalite lafwa ki sa vev ti annan. Zezi pa ti reponn son kestyon. I ti demann sa kestyon pour ki son bann disip i reflesir si zot ti annan sa kalite lafwa. Eski ptit-a-pti zot lafwa ti pe diminyen, ki en zour ou lot zot ti pou retourn ver sa bann keksoz ki zot ti’n kit deryer? Oubyen eski zot ti annan sa menm lafwa ki sa vev ti annan? Pareyman ozordi nou devret demann nou lekor, ‘Ki kalite lafwa “Fis-de-Lonm” i vwar dan mon leker?’

16. Ki kalite lafwa sa vev ti annan?

¹⁶ Pour ki nou kapab vin parmi sa bann ki pou ganny lazistis sorti kot Zeova, nou bezwen swiv legzanp sa vev. Ki kalite lafwa i ti annan? I ti demontre son lafwa par kontinyelman al kot sa ziz e dir li, “Fer mwan lazistis.” Sa vev ti persiste pour ganny lazistis dan lanmen en move zonm. Pareyman pep Bondye ozordi i kapab annan konfyans ki zot pou ganny lazistis sorti kot Zeova, menm si pour zot i paret pran plis letan ki zot ti pe ekspekte. Deplis, nou demontre nou konfyans dan bann promes Bondye kan nou persiste dan lapriyer, wi, par “priy li lizour konman aswar.” (Lik  18:7) Si en Kretyen ti aret priye pour ki lazistis i ganny fer, sa ti pou montre ki i’n perdi konfyans ki Zeova pou fer keksoz an faver son bann serviter.

17. Akoz nou devret persevere dan lapriyer e toultan annan lafwa ki zour zizman Zeova pou vreman arive?

¹⁷ Sitiasyon ki sa vev ti trouv li ladan i montre nou ki nou annan plizyer rezon pour persevere dan lapriyer. Annou gete konman son sitiasyon ti diferan avek sa ki pour nou. I ti kontinyelman al ver sa ziz menm si personn pa ti ankouraz li pour fer sa, me dan Labib nou ganny en kantite lankourazman pour “persevere dan lapriyer.” (Romen 12:12, NW) Sa vev pa ti asire si sa ziz ti pou aksepte son demann, me nou Zeova in asir nou ki i pou rann lazistis. Atraver son profet, Zeova ti dir: “Menm si i devret an retar, kontinyen ekspekte li, akoz san fot i pou arive. I pa pou an retar.” (Abakouk 2:3; Psonm 97:10) Sa vev ti napa personn pour koz pour li, afen pour apiy sa ki i ti pe demande, me nou nou annan en led ki vreman pwisan. Sa i Zezi “ki dan kote drwat Bondye e ki pe entersede pour nou.” (Romen 8:34; Ebre 7:25) Alors, si sa vev malgre son sitiasyon difisil ti kontinyen sipliy sa ziz avek lespwar ki en zour i pou rann li lazistis, konbyen plis ankor nou devret toultan annan lafwa ki sa zour zizman Zeova pou vreman arive!

18. Konman lapriyer pou fortifye nou lafwa e ed nou pour ganny lazistis?

¹⁸ Sa parabol i montre nou ki lapriyer ek lafwa i mars ansanm, e kan nou persiste dan lapriyer sa i kapab anpes nou ganny enfliyanse avek bann keksoz ki kapab afebli nou lafwa. Byensir, bann lapriyer ki ganny fer zis pour enpresyonn lezot, sa pa anpes en dimoun perdi son lafwa. (Matye 6:7, 8) Kan nou ganny pouse pour priye akoz nou realize ki nou bezwen depan antyerman lo Bondye, alors lapriyer pou fer nou vin pros avek Bondye e i pou fortifye nou lafwa. E vi ki lafwa i tre enportan pour kapab ganny delivre, i pa drol alors ki Zezi ti vwar li neseser pour ankouraz son bann disip “ki fodre touzour priye e pa perdi kouraz”! (Lik 18:1; 2 Tesalonisyen 3:13) Byensir, larive sa “gran zour Zeova” pa depan lo nou lapriyer, akoz sa zour pou vini ki swa nou priye pour li vini oubyen non. Parkont kalite lafwa ki nou annan ek nou perseverans dan lapriyer, pou determinen si nou pou personnelman ganny lazistis Zeova e si nou pou sirviv lager Bondye.

19. Konman nou montre ki nou annan konfyans total ki Bondye pou “rann lazistis”?

¹⁹ Zezi ti demande: “Kan Fis-de-Lonm pou vini, eski i pou trouv sa kalite lafwa lo later?” Ki larepons pour sa kestyon byen enteresan? Pa nou vreman kontan ki plizyer milyon serviter fidel Zeova lo later antye i montre par zot lapriyer, pasyans, ek perseverans ki zot annan sa kalite lafwa! Alors, sa kestyon i kapab ganny reponn dan en fason pozitif. Wi, malgre sa bann lenzistis ki sa lemonn Satan i fer nou sibir, nou annan konfyans total ki Bondye “pou rann lazistis bann ki i’n swazir.”

[Not anba lo paz]

Eski ou mazinen?

• Kwa ki’n fer serten Kretyen perdi zot lafwa?

• Akoz nou kapab annan lafwa ki zour zizman Zeova pe aprose?

• Ki rezon nou annan pour persevere dan lapriyer?

• Konman ki ler nou persevere dan lapriyer, sa pou anpes nou perdi nou lafwa?

[Kestyon]

[Portre lo paz 19]

Ki sa pwen kle dan sa parabol en vev ek en ziz?

[Portre lo paz 21]

Plizyer milyon dimoun ozordi i annan konfyans total ki Bondye pou “rann lazistis”