Akoz nou bezwen koz Laverite?

ALAZ 18 an, Manfred ti pe ganny formen pour travay dan lofis. * Sa lakonpannyen kot i ti pe travay ti organize pour ki li ek lezot nouvo travayer ti kapab pandan de zour sak semenn asiste en formasyon vokasyonnel dan en kolez. En zour laklas ti fini pli boner ki labitid. Dapre lareg sa lakonpannyen, bann travayer ti devret retourn travay pour larestan sa zournen. Olye fer sa, zot ti al anmize, eksepte Manfred, ki ti retourn travay. Par kwensidans, sa manedyer ki ti ansarz zot ti pas kot travay. Ler i ti vwar Manfred, i ti demann li: “Akoz ou pa dan laklas ozordi? E oli lezot?” Ki mannyer Manfred ti devret reponn?

Sa sitiasyon difisil ki Manfred ti ladan i ariv souvan: Eski i ti devret dir laverite, oubyen eski i ti devret koz manti pour kouver son bann koleg? Si i dir laverite lezot zot kapab ganny problenm e li i perdi son bann zanmi. Eski i akseptab pour koz manti dan en tel sitiasyon? Ki ou, ou ti pou’n fer? Plitar nou pou retourn lo Manfred, me premyerman annou egzaminen kwa ki enplike letan nou fer fas avek en sitiasyon kot nou bezwen swazir si nou pou koz laverite oubyen non.

Laverite ek Mansonz—Depi byen lontan zot an Konfli

Okonmansman listwar imen, tou keksoz ti baze lo laverite. Laverite pa ti ganny detournen, ti napa okenn manipilasyon, e laverite ti ganny byen reprezante. Zeova, sa Kreater, i “sa Bondye laverite.” Son parol i laverite, i pa kapab koz manti, e i kondann koz manti ek bann manter.—Psonm 31:5; Zan 17:17; Tit 1:2.

Si sa i leka, ki mannyer mansonz in konmanse? Zezi ti fourni sa vre larepons ler i ti dir son bann adverser ki ti pe rod li pour touy li: “Zot, zot papa dyab, e se dezir zot papa ki zot oule realize. Depi okonmansman i en kriminel, i pa’n zanmen kontan laverite, akoz napa laverite dan li. Ler i koz manti, i koz selon son natir, akoz i manter e papa tou mansonz.” (Zan 8:44) Byensir, Zezi ti pe refer avek sa levennman dan zarden Edenn ler Satan ti enfliyans sa premye koup imen pour dezobei Bondye e alor vin viktim pese ek lanmor.—Zenez 3:1-5; Romen 5:12.

Parol Zezi i klerman idantifye Satan konman “papa tou mansonz,” sa enn ki’n konmans mansonz. Satan i ankor sa enn ki an  faver mansonz e anfet i pe “tronp lemonn antye.” I responsab pour preski tou sa bann move konsekans ki mansonz in anmenn pour bann imen partou dan lemonn.—Revelasyon 12:9.

Sa konfli ki egziste depi byen lontan ant laverite ek mansonz, ki Satan ti konmanse i ankor pe kontinyen san en kontrol ozordi. I penetre dan tou nivo lasosyete imen e afekte tou dimoun. Lafason ki en dimoun i viv i met li swa lo kote laverite oubyen mansonz. Bann lo kote Bondye zot lavi i baze lo laverite Parol Bondye, Labib. Menm si zot konnen oubyen non, bann ki pa swiv semen laverite i tonm dan lanmen Satan, parski “lemonn antye i dan pouvwar dyab.”—1 Zan 5:19; Matye 7:13, 14.

Akoz sa Tandans pour koz Mansonz?

Lefe ki “lemonn antye” i dan pouvwar Satan, sa i dir nou akoz bokou dimoun i koz manti. Me petet nou kapab demande, ‘Akoz Satan, “papa tou mansonz” ti fer sa?’ Satan ti konnen ki se Zeova ki annan sa drwa pour diriz tou sa ki i’n kree, enkli sa premye koup imen. Kantmenm sa, Satan ti anvi sa pozisyon eleve e inik, en keksoz ki pa ti merit pour li. Akoz son lanbisyon egois ek vorasite, i ti fer plan pour aras Zeova son pozisyon. Pour akonplir sa, Satan ti servi trik ek mansonz.—1 Timote 3:6.

Me ozordi? Pa ou pou dakor ki lanbisyon egois ek vorasite i ankor sa motif ki pous bokou dimoun pour koz manti? Bann biznesmenn ki voras, politik ki’n koronpi, ek fo larelizyon i ranpli avek trik, mansonz, manipilasyon, ek frod. Akoz? Eski pa i akoz souvan dimoun i ganny motive par vorasite ek lanbisyon pour depas lezot oubyen pour ganny larises, pouvwar, oubyen pozisyon ki zot pa merite? Lerwa Salomon, en dirizan saz ansyen Izrael, ti averti: “Sa ki pe depese pour ganny larises pa pou reste inosan.” (Proverb 28:20) E zapot Pol ti ekri: “Lanmour larzan i rasin tou lemal.” (1 Timote 6:10) Sirman sa i aplik byen osi pour sa gran dezir pour ganny pouvwar ek pozisyon.

En lot rezon akoz dimoun i koz manti, se akoz zot per bann konsekans oubyen sa ki lezot pou mazinen si zot koz laverite. I normal ki dimoun i anvi lezot i kontan zot oubyen ganny aksepte par lezot. Parkont, sa dezir i kapab pous zot pour detourn laverite, menm si en pti gin, pour kouver bann defo, pour kasyet bann keksoz ki pa gou, oubyen senpleman kit en bon lenpresyon. I apropriye alors ki Salomon ti ekrir: “Tranble devan zonm se sa ki vin en latrap, me sa ki met konfyans dan Zeova pou ganny proteze.”—Proverb 29:25.

Fidelite anver sa Bondye Laverite

Ki Manfred ti dir ler manedyer sa lakonpannyen ti demann li pour eksplike? Manfred ti dir laverite. I ti dir: “Nou ansennyan ti larg nou boner ozordi, alors mon’n retourn travay. Parkont pour lezot, mon pa kapab koz pour zot. Petet ou kapab demann zot personnelman.”

Manfred ti’n kapab tronp son manedyer par son larepons, e alors vin popiler parmi lezot. Me i ti annan bon rezon pour li reste atase fidelman avek laverite. Manfred i en Temwen Zeova. Son lonnekte ti fer li gard en konsyans kler. E sa ti fer ki son anployer ti annan konfyans dan li. Konman parti son formasyon Manfred ti ganny anvoye dan en departman kot i fer bizou, kot normalman bann ki pe ganny formen ti napa drwa al travay. Apepre 15 an plitar ler Manfred ti ganny en promosyon, sa menm manedyer ti telefonn li pour felisit li e rakont li sa lensidan kot i ti reste fidel anver laverite.

Vi ki Zeova i en Bondye laverite, nenport dimoun ki anvi annan en relasyon pros avek li pou bezwen “rezet mansonz” e “koz laverite.” En serviter Bondye i devret kontan laverite. En zonm saz ti ekrir: “En temwen fidel i enn ki pa  pou koz manti.” Me kisisa mansonz?—Efezyen 4:25; Proverb 14:5.

Kisisa en Mansonz?

Kan en dimoun i koz mansonz sa ki i pe dir i pa vre. Me pa tou keksoz ki pa vre ki en mansonz. Akoz? Sa i fason en diksyoner i dekrir mansonz: “Se kan en dimoun i dir en keksoz ki i konnen oubyen i krwar i pa vre e i annan lentansyon pour anbet lezot.” Wi, mansonz i ganny fer avek bi pour anbet lezot. Alor, si ou pa’n fer ekspre pour dir en keksoz ki pa vre —parey donn bann fe ki fo oubyen bann sif ki mal san fer ekspre—i pa parey koz mansonz.

Anplis, nou bezwen mazinen si sa dimoun ki pe rod lenformasyon i annan drwa ganny en larepons konplet. Par egzanp, si manedyer en lot lakonpannyen ki ti’n demann Manfred sa menm kestyon ki son manedyer ti’n demann li, eski Manfred ti oblize dir li tou sa ki ti’n arive? Pa vreman. Vi ki sa manedyer napa drwa konn sa lenformasyon, alor Manfred pa ti oblize donn li. Menm dan sa ka, ti pou mal pour li koz manti.

Ki legzanp Zezi kri i donnen dan sa domenn? En fwa, Zezi ti pe koze avek serten non krwayan ki ti pe montre lentere dan son bann plan pour vwayaze. Zot ti konsey li: “Sorti isi e al dan Zide.” Ki Zezi ti reponn? ‘Ale zot, al lafet. Mwan mon pa pe ale sa lafet la konmela, akoz mon ler pa ankor arive.’ Zis apre, Zezi ti al Zerizalenm pour lafet. Akoz i ti reponn zot dan sa fason? Zot ti napa drwa konn egzakteman kot Zezi ti pe ale. Alor menm si Zezi pa ti koz mansonz, i pa ti donn zot en larepons konplet pour limit posibilite okenn ditor ki zot ti kapab fer li oubyen son bann disip. Sa pa ti en mansonz parski zapot Pyer ti ekri sa lo Zezi: “I pa’n zanmen fer okenn pese, e zanmen okenn mansonz in sorti dan son labous.”—Zan 7:1-13; 1 Pyer 2:22.

Me Pyer? Sa zour swar letan Zezi ti ganny arete, pa i ti koz manti trwa fwa e renye Zezi? Wi, Pyer ti les lakrent pour zonm fer li tonbe e i ti koz manti. Me deswit i ti “plere avek remor” e repantir, e son pese ti ganny pardonnen. Deplis, i ti aprann atraver son fot. Detrwa zour plitar, i ti koz an piblik konsernan Zezi e avek determinasyon i ti refize aret koz lo li ler i ti ganny menase par bann lotorite Zwif an Zerizalenm. Sa dekourazman ki Pyer ti pas atraver ti zis pour en pti pe letan, me i pa ti tarde pour repran. Sa i devret vin en lankourazman pour nou tou sirtou pour nou ki kapab fasilman dekouraze akoz nou febles oubyen akoz parfwa nou fer pese swa par sa ki nou dir oubyen par nou aksyon.—Matye 26:69-75; Akt 4:18-20; 5:27-32; Zak 3:2.

Laverite pou ganny etabli pour touzour

Proverb 12:19 i eksplike, “Lalev sa enn ki koz laverite pou ganny etabli solidman pour touzour, me lalang sa enn ki koz mansonz pou la pour zis en pti moman.” Wi, en keksoz ki vre i dirab. Bann relasyon imen i pli stab e satisfezan ler tou dimoun i fer zefor pour koz laverite e azir an armoni avek li. Ler nou koz laverite nou pou sirman ganny bann rekonpans konmela menm. Sa i enkli en konsyans kler, en bon repitasyon, bon relasyon dan en maryaz, dan fanmiy, parmi bann zanmi, e menm dan biznes.

De lot kote, sa enn ki koz mansonz pou ganny dekouver avek letan. En dimoun ki koz lalang pou kapab tronp lezot pour en pe letan, me pa pour lontan. Deplis, Zeova, sa Bondye laverite in fikse en letan kot i pou nepli toler mansonz ek bann ki promot mansonz. Labib i promet ki Zeova pou retir tou bann lenfliyans Satan, papa tou mansonz, ki pe tronp lemonn antye. Zeova pou byento met en lafen avek tou mansonz ek bann ki koz manti.—Revelasyon 21:8.

Pa i pou en soulazman ler anfen “lalev sa enn ki koz laverite” pou ganny etabli pour touzour!

[Not anba lo paz]

[Blurb lo paz 4]

Se lanbisyon egois ek vorasite ki pous bokou dimoun pour koz manti

[Blurb lo paz 5]

Tou mansonz pa vre, me pa tou sa ki pa vre ki en mansonz