Ansenny sa ki Labib i vreman dir
Ansenny sa ki Labib i vreman dir
“Fer tou pep vin mon bann disip, . . . ansenny zot.”—MATYE 28:19, 20.
1. Ki nou kapab dir konsernan akse ki dimoun i annan avek Labib?
PAROL ZEOVA, Labib, i parmi bann liv ki pli vye e ki’n ganny distribye plis dan lemonn. Omwen en parti in ganny tradwir dan plis ki 2,300 langaz. Plis ki 90 poursan popilasyon lemonn i ganny Labib dan zot prop langaz.
2, 3. (a) Akoz i annan konfizyon lo bann lansennyman Labib? (b) Ki kestyon nou pou konsidere?
2 Bokou dimoun i lir en porsyon Labib toulezour. Serten in lir Labib antye en kantite fwa. Bokou larelizyon i dir ki zot bann lansennyman i baze lo Labib, me zot pa tonm dakor lo sa ki Labib i dir. Anplis bokou dimoun dan menm larelizyon pa tonm dakor ditou lo serten size e sa i fer zot pli konfize. Serten i annan doutans lo Labib, son lorizin, ek son valer. Bokou i vwar li konman en liv sakre senpleman dan bann seremoni pour fer ve oubyen ler zot sermante pour koz laverite devan lakour.
3 An realite, Labib i Parol pwisan Bondye, oubyen son mesaz, pour limanite. (Ebre 4:12) Alor konman bann Temwen Zeova, nou anvi ki dimoun i aprann sa ki Labib i vreman dir. I en plezir pour nou swiv sa komann ki Zezi ti donn son bann disip ler i ti dir: “Ale e fer tou pep vin mon disip, . . . ansenny zot.” (Matye 28:19, 20) Dan nou minister, nou zwenn bann dimoun senser ki trouble avek sa bann konfizyon ki komen dan bann larelizyon dan lemonn. Zot anvi konn laverite lo nou Kreater e aprann sa ki Labib i dir lo vre sans lavi. Annou konsider trwa kestyon ki konsern bokou dimoun. Pour sak kestyon nou pou konsider sa ki bann sef relizye i dir, ki mal, e apre nou pou vwar sa ki Labib i vreman dir. Bann kestyon i: (1) Eski Bondye i enterese avek nou? (2) Akoz nou la lo later? (3) Ki arive avek nou ler nou mor?
Eski Bondye i enterese?
4, 5. Akoz dimoun i krwar ki Bondye pa enterese avek nou?
4 Annou konmans avek sa kestyon, Eski Bondye i enterese avek nou? Malerezman, bokou dimoun i mazinen ki larepons i non. Akoz zot santi koumsa? En rezon i ki zot pe viv dan en lemonn ranpli avek laenn, lager, ek soufrans. Zot rezonn koumsa: ‘Sirman si Bondye ti enterese avek nou, i ti pou anpes bann move keksoz arive.’
5 En lot rezon akoz dimoun i mazinen ki Bondye pa enterese avek nou, se ki bann sef relizye i fer zot santi sa fason. Souvan si en maler i arive, ki bann sef relizye i dir? Ler en madanm ti perdi son de pti zanfan dan en aksidan loto, son pret ti dir: “Sa i lavolonte Bondye. Bondye ti bezwen ankor de lanz.” Ler zot fer bann tel komanter, zot pe an realite blanm Bondye pour bann move keksoz ki arive. Pourtan, disip Zak ti ekrir: “Personn pa devre dir, ler i ganny tante, ‘Mon’n ganny tante par Bondye.’ Parski Bondye pa kapab ganny tante par sa ki mal, e li menm i pa tant personn.” (Zak 1:13) Zeova pa zanmen fer sa ki move. Vreman, “zanmen sa vre Bondye pou azir dan en move fason.”—Zob 34:10.
6. Lekel ki par deryer mesanste ek soufrans dan lemonn?
6 Akoz, alors i annan sitan bokou mesanste ek soufrans? En rezon se ki imen an zeneral in rezet Bondye konman Dirizan. Zot pa anvi soumet avek son bann lalwa ek prensip drwat. San realize imen in soumet zot avek Satan, Lennmi Bondye, parski “lemonn antye i dan pouvwar dyab.” (1 Zan 5:19) Letan nou konn sa i fer li pli fasil pour nou konpran akoz bann move keksoz i egziste. Satan i mesan e kriyel, i ranpli avek laenn ek mansonz. Alor nou bezwen ekspekte ki sa lemonn pou reflekte personnalite son dirizan. I pa etonnan alors ki i annan en kantite mesanste!
7. Nonm serten rezon akoz nou eksperyans soufrans.
7 En lot rezon akoz nou soufer i akoz lenperfeksyon imen. Imen enparfe i lalit pour zot domin lezot, e sa souvan i anmenn lager, labi pouvwar, ek soufrans. Eklezyast 8:9 i dir klerman: “Zonm in domin zonm e sa in fer ditor zot menm.” “Letan ek levennman san ekspekte” i en lot rezon akoz nou soufer. (Eklezyast 9:11) Souvan dimoun i fer fas avek en maler akoz par azar zot dan en landrwa ki maler pe al arive.
8, 9. Ki mannyer nou konnen ki Zeova i vreman enterese avek nou?
8 I rekonfort nou pour konnen ki Zeova pa fer nou soufer. Me eski Bondye i vreman enterese avek sa ki arive dan nou lavi? Larepons i wi e sa i vreman tousan! Nou konnen ki Zeova i enterese parski son Parol enspire i dir nou akoz i’n permet imen swiv en move semen. Rezon akoz, i enplik de keksoz: son drwa pour dirize ek fidelite imen. Zeova sa Kreater tou pwisan, pa oblize dir nou akoz i permet soufrans. Kantmenm sa i dir nou, akoz i enterese avek nou.
9 Annou vwar plis levidans ki Bondye i enterese avek nou. Ler mesanste ti ranpli later dan letan Noe i ‘ti fer leker Bondye fer mal.’ (Zenez 6:5, 6) Eski son santiman in sanze ozordi? Non, akoz i pa sanze. (Malaki 3:6) I deteste lenzistis e i pa kontan vwar dimoun pe soufer. Labib i ansenny nou ki byento Bondye pou retir tou bann move keksoz ki bann dirizan imen ek lenfliyans Dyab in anmennen. Pa sa i en laprev konvenkan ki Bondye i vreman enterese avek nou?
10. Ki santiman Zeova anver soufrans bann imen?
10 Bann sef relizye i mal reprezant Bondye ler zot dir ki bann maler ki nou fer fas avek i son lavolonte. Okontrer, Zeova i vreman anvi met en lafen avek soufrans imen. 1 Pyer 5:7 i dir i “pran swen avek zot.” Sa i sa ki Labib i vreman dir!
Akoz nou la lo Later?
11. Ki bann larelizyon i dir konsernan lavi lo later?
11 Annou aprezan get en lot kestyon ki bokou i reflesir lo la, Akoz nou la lo later? Bann larelizyon dan lemonn, souvan zot dir ki zonm i zis lo later tanporerman. Pour zot, later i zis en landrwa kot nou’n senpleman aret pour en pti moman, apre nou kontinyen nou semen ver lavi dan en lot landrwa. Serten sef relizye i ansenny sa fo konsep ki Bondye pou detri sa plannet. Akoz sa bann tel lansennyman, bokou i deside ki vomye zot profit lavi ler zot kapab, akoz lanmor i voler. Ki Labib i vreman dir konsernan akoz nou la?
12-14. Ki Labib i dir konsernan plan Bondye pour later e pour bann imen?
12 Bondye i annan en zoli plan pour later e pour bann imen. I “pa’n kree [later] pour nanryen ditou” me i’n “fer li pour dimoun reste lo la.” (Izai 45:18) Deplis, Zeova in “met later dan son landrwa fiks; i pou reste stab pour en letan endefini, oubyen pour touzour.” (Psonm 104:5) Ler nou aprann konsernan plan Bondye pour later e pour bann imen sa i ed nou konpran akoz nou lo later.
13 Zenez sapit 1 ek 2 i montre ki Zeova ti prepar later avek bokou swen pour ki imen i reste lo la. Alafen sa peryod kreasyon kot later ti ganny kree, tou keksoz ti “tre bon.” (Zenez 1:31) Bondye ti met sa premye zonm ek madanm, Adan ek Ev, dan sa zoli zarden Edenn e i ti donn zot bann bon manze annabondans. Sa premye koup imen ti ganny dir: “Fer zanfan e vin bokou, ranpli later e domin li.” Zot ti pou annan bann zanfan parfe, agrandi sa zarden pour ki later antye i vin parey, e avek lanmour zot ti pou egzers lotorite lo bann zannimo.—Zenez 1:26-28.
14 Zeova i anvi ki lafanmiy imen parfe i reste lo later pour touzour. Parol Bondye i dir: “Bann dimoun drwat pou posed later, e zot pou reste lo la pour touzour.” (Psonm 37:29) Wi, bann imen ti’n ganny kree pour rezwir lavi pour touzour dan en Paradi lo later. Sa i plan Bondye, e se sa ki Labib i vreman dir!
Ki arive avek nou ler nou mor?
15. Ki bokou larelizyon dan lemonn i ansennyen konsernan ki arive avek nou ler nou mor?
15 Aprezan annou diskit en trwazyenm kestyon ki konsern bokou dimoun: Ki arive avek nou ler nou mor? Bokou larelizyon dan lemonn i ansennyen ki i annan en keksoz dan en dimoun ki kontinyen viv apre ki i’n mor. Serten larelizyon i ankor atase avek sa nide ki Bondye i pini bann move dimoun par fer zot soufer eternelman dan lanfer. Me eski sa i vre? Ki Labib i vreman dir lo lanmor?
16, 17. Dapre Labib, ki kondisyon bann dimoun mor?
16 Parol Bondye i dir: “Annefe bann vivan i konnen ki zot pou mor, me bann mor, zot pa konn nanryen ditou, zot nepli annan saler.” Vi ki bann mor “pa konn naryen ditou,” zot pa kapab tande, vwar, koze, santi, ni reflesir. Zot nepli ganny saler. I enposib! Zot nepli kapab travay! Deplis, “zot lanmour ek zot laenn ek zot zalouzi in disparet,” zot pa kapab eksprim okenn santiman.—Eklezyast 9:5, 6, 10.
17 Sa ki Labib i dir lo sa size i senp e kler—bann dimoun ki’n mor pa kontinyen viv en lot bor. Ler nou mor napa nanryen ki kit nou lekor e kontinyen viv pour ne ankor dan en lot lekor, parey bann ki krwar dan reenkarnasyon i dir. Nou kapab servi sa legzanp: Sa lavi ki nou rezwir i parey en labouzi ki pe alimen. Ler i tennyen, sa dife pa al okenn par. I nepli egziste.
18. Ler en etidyan Labib i aprann ki bann mor pa konn nanryen, ki konklizyon i kapab tire?
18 Zis mazin sa lozik par deryer sa laverite senp me pwisan. Ler en etidyan Labib i aprann ki bann mor pa konn nanryen, i devret kapab fasilman konpran ki menm si son bann zanset ki’n mor ti mekontan avek li toudilon zot lavi, zot pa pou kapab fer li ditor. Deswit i devret osi realize ki bann ki i kontan ki’n mor i nepli kapab tande, vwar, koze, annan santiman, oubyen reflesir. Alors, zot pa kapab pe eksperyans lasolitid dan en pirgatwar oubyen pe soufer dan en lanfer. Me Labib i dir ki bann mor ki dan memwar Bondye pou resisite. Pa sa i en lespwar merveye!—Zan 5:28, 29.
En nouvo Liv pour nou servi
19, 20. Ki responsabilite nou annan konman Kretyen e ki led pour etidye Labib nou’n gannyen pour servi dan nou minister?
19 Nou’n konsider selman trwa kestyon ki bokou dimoun i demann zot lekor. Pour sak kestyon, sa ki Labib i dir i kler e direk. Pa i en lazwa pour nou partaz bann tel laverite avek bann ki anvi konn sa ki Labib i dir! Me i annan ankor lezot kestyon enportan ki bann dimoun senser i bezwen konn son vre larepons e satisfe avek sa larepons ki zot gannyen. Konman Kretyen, nou annan en responsabilite pour ed zot trouv larepons bann tel kestyon.
20 I en defi pour ansenny laverite dan Labib dan en fason ki kler e tous leker sa dimoun. Pour ed nou fer fas avek sa defi, ‘lesklav fidel e pridan’ in prepar en liv espesyalman pour nou servi dan nou minister Kretyen. (Matye 24:45-47) Sa liv 224 paz i annan pour tit Ki Labib i vreman dir?
21, 22. Ki serten laspe enteresan sa liv Ki Labib i vreman dir?
21 Dan Lasanble Distrik “Lobeisans anver Bondye” pour Temwen Zeova an 2005/06, sa liv ki annan diferan laspe enteresan ti ganny lanse. Par egzanp, i annan en prefas senk paz ki vreman itil pour konmans letid Labib kot lakour. Ou pou vwar li fasil pour diskit bann portre ek verse Labib ki ganny trouve dan prefas. Ou menm kapab servi lenformasyon dan sa seksyon pour montre bann etidyan ki mannyer pour rod bann sapit ek verse Labib.
22 Lafason ki sa liv in ganny ekri i senp e kler. Zefor in ganny mete pour tous leker sa etidyan par enplik li ladan ler i posib. Sak sapit i annan bann kestyon lentrodiksyon ek en bwat alafen avek tit “Ki Labib i dir.” Dan sa bwat i annan bann larepons baze lo Labib pour bann kestyon lentrodiksyon. Bann zoli portre avek zot bann fraz anba la, ek bann legzanp dan sa piblikasyon pou ed sa etidyan konpran bann nouvo nide. Menm si sa liv in ganny ekri dan en fason senp, i annan lezot lenformasyon ki pou permet ou konsider 14 size enportan pli oprofon si sa etidyan i bezwen lenformasyon adisyonnel.
23. Ki sizesyon i’n ganny donnen konsernan lafason nou kapab servi sa liv Ki Labib i dir pour kondwir bann letid Labib?
23 Sa liv Ki Labib i dir in ganny fer dan en fason pour ed nou ansenny dimoun avek diferan nivo ledikasyon ek diferan krwayans relizye. Nou kapab fer plis ki en sesyon letid pour kouver en sapit, si sa etidyan napa okenn konnesans Labib. Pa bezwen pas tro vitman lo sa lenformasyon, me pran letan pour ou kapab tous leker sa etidyan. Si i pa konpran en serten legzanp dan liv, eksplik li sa legzanp oubyen servi en lot. Byen prepare, e fer ou mye pour byen servi sa liv. Atraver lapriyer demann Bondye led pour ki ou a kapab ‘anons byen mesaz laverite.’—2 Timote 2:15.
Apresye ou bann Privilez ki presye
24, 25. Ki privilez presye Zeova in donn son pep?
24 Zeova in donn son pep bann privilez presye. I’n ed nou aprann laverite lo li. Nou pa devret zanmen pran sa privilez alalezer! Apre tou, Bondye in kasyet son plan avek bann ki orgeye e i’n revel zot avek bann ki dous. Konsernan sa, Zezi ti dir: “Mon remersi ou Papa, Senyer lesyel ek later, akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan.” (Matye 11:25) I en gran loner pour ganny konsidere parmi bann ki dous ki pe servi sa Souvren Liniver, Zeova.
25 Bondye in osi donn nou sa privilez pour ansenny lezot konsernan li. Mazinen ki i’n mal ganny reprezante par bann ki’n ansenny mansonz lo li. Alors bokou dimoun i annan en move lenpresyon lo Zeova. Zot mazinen ki i pa enterese avek nou e ki i napa santiman. Eski ou pare e vreman anvi ede pour koriz sa mal konprenezon? Eski ou anvi ki tou dimoun avek en leker senser i konn laverite lo Bondye? Alors, fer tou sa ki ou kapab pour demontre lobeisans anver Bondye par prese e ansenny lezot avek devouman sa ki Labib i dir lo sa bann size tre enportan. Bann ki pe rod laverite zot bezwen aprann ki Labib i vreman dir.
Ki ou pou reponn?
• Ki mannyer nou konnen ki Bondye i enterese avek nou?
• Akoz nou la lo later?
• Ki arive avek nou ler nou mor?
• Kwa ki ou’n pli apresye dan sa liv Ki Labib i dir?
[Kestyon]
[Portre lo paz 7]
Labib i dir ki soufrans pou nepli egziste
[Credit line]
Pti fiy anler adrwat: © Bruno Morandi/age fotostock; sa madanm agos: AP Photo/Gemunu Amarasinghe; anba adrwat bann refizye: © Sven Torfinn/Panos Pictures
[Portre lo paz 9]
Bann dimoun drwat pou viv pour touzour dan Paradi