Ed Lezot obeir sa ki Labib i dir

“Sa bann lagrenn ki tonm dan bon later se bann ki tann laparol e gard li dan en leker onnet e bon, e avek perseverans zot prodwi bokou fri.”—LIK 8:15.

1, 2. (a) Pour ki rezon sa liv Ki Labib i vreman dir? in ganny pibliye? (b) Ki mannyer Zeova in beni zefor son pep pour fer disip tou resaman?

KONSERNAN sa liv Ki Labib i vreman dir? * en pionye aplentan ti dir: “Sa liv i vreman ekselan. Mon bann etidyan i kontan li. Mwan mon kontan li. Sa liv i fer li posib pour konmans bann letid Labib avek dimoun deswit devan zot laport.” Konsernan sa menm liv en proklanmater aze ti dir: “Mon’n ganny sa privilez pour ed en kantite dimoun pour konn Zeova pandan 50 an ki mon’n aktif dan predikasyon. Me mon bezwen  dir, sa liv i vreman remarkab. Mon vreman apresye sa bann portre ek zot parol ki al avek.” Eski se koumsa ki ou santi lo sa liv Ki Labib i dir? Sa led pour etidye Labib in ganny fer dan en fason pour ed ou obeir sa lord Zezi: “Ale e fer tou pep vin mon bann disip, . . . ansenny zot pour obei tou sa ki mon’n konmande.”—Matye 28:19, 20.

² Ler Zeova i vwar omwen 6.6 milyon Temwen pe obeir lord Zezi pour fer disip, san dout sa i fer son leker kontan. (Proverb 27:11) I kler ki Zeova pe beni zot zefor. Par egzanp pandan lannen servis 2005, sa bon nouvel ti ganny prese dan 235 pei e anviron 6,061,500 letid Labib ti ganny kondwir. Sa in permet bokou dimoun pour ‘ekoute e aksepte parol Bondye, non pa konman parol zonm me konman parol Bondye parey i ete.’ (1 Tesalonisyen 2:13) Plis ki senk san mil nouvo disip in aranz zot lavi pour zot kapab viv an armoni avek standar Zeova e dedye zot lavi avek Bondye pandan sa de zan ki’n pase.

3. Ki kestyon nou pou egzaminen dan sa lartik konsernan lafason pour servi sa liv Ki Labib i dir?

³ Eski ou’n eksperyans sa lazwa pour kondwir en letid Labib avek en dimoun tou resanman? Partou dan lemonn, i ankor annan en kantite dimoun avek “en leker onnet e bon” ki ler zot tann Parol Bondye zot pou “gard li, . . . e avek perseverans zot prodwi bokou fri.” (Lik 8:11-15) Annou vwar ki mannyer ou kapab servi sa liv Ki Labib i dir dan sa travay pour fer disip. Nou pou egzamin trwa kestyon dan sa diskisyon: (1) Ki mannyer ou kapab konmans en letid Labib? (2) Ki metod lansennyman ki pli efikas? (3) Ki mannyer ou kapab ed en dimoun pour pa zis vin en etidyan me osi en ansennyan Parol Bondye, Labib?

Ki mannyer ou kapab konmans en Letid Labib

4. Akoz serten i ezite pour etidye Labib, e ki mannyer ou kapab ed zot sirmont zot lezitasyon?

⁴ Si en dimoun ti demann ou pour sot en sel kou lot kote en larivyer, petet ou ti pou refize. Me si ti annan bann ros ant ant sa larivyer petet ou ti pou santi ou pli pare pour esey traverse. Pareyman, en dimoun ki okipe i kapab ezite pour etidye Labib. Sa met lakour i kapab krwar ki i bezwen en kantite letan ek zefor pour etidye Labib. Ki mannyer ou kapab ed li sirmont sa lezitasyon? Ou kapab servi liv Ki Labib i dir pour fer plizyer diskisyon bref, kot sa dimoun pou aprann keksoz ziska ki i vin en letid regilye Parol Bondye. Si ou byen prepare, pour sa dimoun sak retourn vizit pou vin parey bann diferan pa ver son lanmitye avek Zeova.

5. Akoz ou bezwen lir sa liv Ki Labib i dir?

⁵ Ou bezwen byen familye avek sa liv Ki Labib i dir avan ler ou ed en lot dimoun pour benefisye avek. Eski ou’n lir sa liv konmansman ziska finisyon? En koup ti anmenn sa liv avek zot lo vakans e zot ti konmans lir li ler zot ti pe detann zot lo lans. Anmezir ki en zabitan sa landrwa ki ti pe vann bann marsandiz avek touris ti apros zot, i ti remark tit  sa liv Ki Labib i vreman dir? I ti dir sa koup ki pli boner, i ti’n priye lo sa menm kestyon, e demann Bondye larepons sa kestyon. Avek plezir sa koup ti donn li en kopi sa liv. Eski ou’n fer letan oubyen “servi byen tou bann lokazyon” pour lir sa liv, petet en dezyenm fwa, ler ou pe esper ou apwentman oubyen ler ou pe pran ou brek kot travay oubyen kot lekol? (Efezyen 5:15, 16) Si ou fer sa, ou pou byen familye avek sa led pour etidye Labib e i kapab osi kree en loportinite pour koz avek lezot lo sa ki annan ladan.

6, 7. Ki mannyer ou kapab servi liv Ki Labib i dir? pour konmans bann letid Labib?

⁶ Servi byen bann portre, verse Labib, ek kestyon lo paz 4, 5, ek 6 ler ou pe ofer sa liv dan predikasyon. Par egzanp, ou kapab konmans en konversasyon par demande, “Avek tou sa problenm ki limanite pe fer fas avek ozordi, kote ou krwar nou pou trouv en bon gidans?” Apre ki ou’n byen ekout son larepons, lir 2 Timote 3:16, 17, e eksplike ki Labib i ofer en vre solisyon pour bann problenm imen. Apre diriz latansyon sa dimoun lo paz 4 ek 5, e demann li, “Parmi tou sa bann move kondisyon ki la, lekel ki pli fer ou tris?” Ler sa dimoun i montre ou lekel, demann li pour tenir liv anmezir ki ou lir sa verse Labib ki asosye avek sa kondisyon. Apre, lir lo paz 6, e demann sa dimoun, “Parmi sa sis kestyon ki’n ganny mansyonnen anba lo sa paz, lekel ki ou ti pou kontan ganny son larepons?” Ler sa dimoun i swazir en kestyon, montre li sa sapit ki reponn sa kestyon, kit sa liv avek li e fer laranzman pour ou retournen e diskit sa kestyon.

⁷ Sa prezantasyon i kapab pran apepre senk minit pour fer. Dan sa pti gin letan, ou pou’n aprann kwa ki trakas sa dimoun, lir e aplik de verse Labib, e ou pou’n poz fondasyon pour en retourn vizit. Petet sa pti konversasyon avek sa dimoun i kapab ankouraz li e rekonfort li, en keksoz ki petet i pa’n eksperyanse pour bokou letan. Sa i kapab fer menm en dimoun ki byen okipe anvi pas plis letan avek ou anmezir ki ou ed li pour pran en lot pa devan ver ‘semen ki anmenn dan lavi.’ (Matye 7:14) Avek letan, anmezir ki sa dimoun i montre plis lentere, letan ki zot pase pour etidye i devret ogmante. Ou kapab fer sa par sizere ki zot asize e etidye pour en pe plis letan.

Ki Metod Lansennyman ki pli efikas

8, 9. (a) Ki mannyer ou kapab prepar ou etidyan Labib pour fer fas avek bann lobstak ek leprev ki i kapab rankontre? (b) Kote nou kapab trouv bann materyo ki reziste dife e batir en lafwa for?

⁸ Enn fwa ki en dimoun i konmans obeir sa ki Labib i dir, i kapab fer fas avek serten lobstak ki kapab anpes li progrese. Zapot Pol ti dir: “Tou sa ki oule viv en lavi fidel dan Kris Zezi pou ganny persekite.” (2 Timote 3:12) Pol ti konpar sa bann leprev avek en dife ki ti pou detri bann materyo konstriksyon ki pli fay me kit bann materyo parey lor, larzan, ek pyer presye ki pa kapab andomaze. (1 Korentyen 3:10-13; 1 Pyer 1:6, 7) Pour ed ou etidyan devlop bann kalite neseser pour ki i kapab reziste bann leprev ki i kapab fer fas avek, ou bezwen ed li pour ki i ava ganny batir avek bann materyo ki reziste dife.

⁹ Sa Psalmis i konpar “parol Zeova” avek “larzan ki’n ganny rafinen dan en four dife fer avek later, ki’n ganny pirifye set fwa.” (Psonm 12:6) Sirman, dan Labib nou pou trouv bann materyo presye ki nou kapab servi pour batir en lafwa for. (Psonm 19:7-11; Proverb 2:1-6) E sa liv Ki Labib i dir i montre ou ki mannyer pour byen servi Labib.

10. Ki mannyer ou kapab atir latansyon sa etidyan lo Labib?

¹⁰ Pandan letid, atir latansyon sa etidyan lo bann verse Labib ki’n ganny donnen dan sa sapit ki pe ganny diskite. Servi kestyon pour ed sa etidyan konpran bann verse Labib pli enportan dan sa sapit, e fer sa etidyan vwar  konman i kapab aplik zot dan son lavi. Fer atansyon pour pa dir li ki pour fer. Plito, imit legzanp Zezi. Ler en zonm ki konn byen Lalwa ti kestyon li, Zezi ti reponn: “Ki i’n ekri dan Lalwa? Konman ou lir?” Sa zonm ti reponn an servan Lekritir, e Zezi ti ed li vwar konman pour aplik sa prensip dan son lavi. Par rakont en parabol, Zezi ti ed sa zonm pour osi vwar ki lefe sa lansennyman i devret annan lo li. (Lik 10:25-37) Sa liv Ki Labib i dir i ranpli avek bann legzanp senp ki ou kapab servi pour ed sa etidyan aplik sa bann prensip.

11. Ki kantite lenformasyon ou devret kouver dan sak sesyon letid?

¹¹ Sa liv Ki Labib i dir i servi bann term senp e direk pour eksplik Parol Bondye, zis parey Zezi ti transmet bann nide konplike dan en fason senp. (Matye 7:28, 29) Swiv son legzanp. Pas sa lenformasyon dan en fason senp, kler, e egzakt. Pa bezwen ki ou pas vit lo sa lenformasyon. Plito determinen ki kantite paragraf zot pou diskite pandan sak sesyon letid, dapre sirkonstans ek abilite sa etidyan. Zezi ti konn limit son bann disip e i pa ti fatig zot avek lenformasyon an plis ki zot pa ti bezwen a sa moman.—Zan 16:12.

12. Ki mannyer lezot lenformasyon dan sa liv i devret ganny servi?

¹² Sa liv Ki Labib i dir i kontyen lezot lenformasyon ki koz lo 14 topik. Depandan lo bezwen sa etidyan, ou konman son ansennyan ou devret kapab determinen ki mannyer sa lenformasyon i kapab ganny byen servi. Par egzanp, si en etidyan i trouv en size difisil pour konpran oubyen i annan kestyon lo en size spesifik akoz son bann krwayans avan, petet i bon pour diriz son latansyon lo sa seksyon apropriye dan lezot lenformasyon e les li reflesir lo sa size li menm. De lot kote, petet i pou neseser kouver sa lenformasyon depandan lo bezwen sa etidyan. Sa lenformasyon i tret bann size esansyel lo Labib, parey “‘Nanm’ ek ‘lespri’—ki zot vreman vedir?” e “Lekel ‘Gran Babilonn?’” Ou kapab diskit sa bann topik avek ou etidyan. Vi ki napa kestyon ki’n ganny donnen pour bann size ki’n ganny diskite dan lezot lenformasyon, ou pou bezwen familyariz ou avek sa lenformasyon pour ou kapab demann bann bon kestyon.

13. Ki mannyer lapriyer i kapab fortifye nou lafwa?

¹³ Psonm 127:1 i dir: “Si Zeova li menm pa konstri sa lakaz, i pour nanryen ki bann travayer i travay dir lo la.” Alor, anmezir ki ou prepar ou pour kondwir en letid Labib, priy pour led Zeova. Lapriyer ki ou fer lo konmansman ek finisyon sak letid i devret reflekte ou bon relasyon avek Zeova. Ankouraz sa etidyan pour demann Zeova dan lapriyer lasazes pour konpran Son Parol ek lafors pour aplik sa ki i pe aprann. (Zak 1:5) Si i fer sa, sa etidyan pou ganny plis lafors pour andir bann leprev e son lafwa pou vin pli for.

Ed bann Etidyan Labib pour vin Ansennyan

14. Ki progre bann etidyan Labib i bezwen fer?

¹⁴ Si nou bann etidyan Labib pou obei “tou sa ki” Zezi in komann son disip, zot bezwen progrese pour vin bann ansennyan Parol Bondye non pa zis etidyan. (Matye 28:19, 20; Akt 1:6-8) Ki ou kapab fer pour ed en etidyan fer sa kalite progre spirityel?

15. Akoz ou devret ankouraz ou etidyan pour asiste bann renyon Kretyen?

¹⁵ Envit sa etidyan pour asiste bann renyon kongregasyon avek ou depi premye letid. Eksplik li ki se atraver bann renyon ki ou ganny formen konman en ansennyan Parol Bondye. Pour detrwa semenn pran en pti pe letan alafen sak letid Labib pour dekrir sa progranm lenstriksyon spirityel ki ou gannyen atraver bann diferan renyon ek lasanble. Avek lantouzyasm koz lo bann byenfe  ki ou gannyen dan sa bann renyon. (Ebre 10:24, 25) Enn fwa ki sa etidyan i konmans asiste bann renyon regilyerman, i annan plis sans ki i pou kapab vin en ansennyan Parol Bondye.

16, 17. Ki lobzektif en etidyan Labib i kapab fikse e atenn?

¹⁶ Ed sa etidyan pour etabli bann lobzektif ki i kapab atenn. Par egzanp, ankouraz li pour partaz sa ki i pe aprann avek en zanmi oubyen en manm son fanmiy. Ou kapab osi sizere ki i met en lobzektif pour lir Labib antye. Si ou ed li etabli e mentenir en bon labitid pour lir Labib regilyerman, sa pou benefisye li menm apre son batenm. Anplis, akoz ou pa demann li pour mazin omwen en teks Labib ki reponn en kestyon enportan dan sak sapit sa liv Ki Labib i dir? Si i fer sa, i pou vin “en zouvriye ki napa nanryen pour onte me ki anons byen mesaz laverite.”—2 Timote 2:15.

¹⁷ Olye ankouraz en etidyan pour senpleman resit en verse ki i’n aprann parker oubyen zis dir sa pwen enportan dan sa verse, ankouraz li pour eksplike konman serten sa bann verse Labib i aplik avek sa topik ki pe ganny diskite. Sa pou ed li kapab reponn bann ki demann li en rezon pour son lafwa. Ou kapab fer bann pti legzersis avek li, kot ou zwe rol en manm fanmiy oubyen en koleg travay ki pe demann li pour eksplik son krwayans. Anmezir ki sa etidyan i reponn, montre li komann pour reponn avek “labonte ek respe.”—1 Pyer 3:16.

18. Ki mannyer ou kapab ed en etidyan Labib ki’n kalifye konman en proklanmater non batize?

¹⁸ Avek letan sa etidyan i kapab kalifye pour konmans prese. Met lanfaz lo lefe ki i en privilez pour pran par dan sa travay. (2 Korentyen 4:1, 7) Enn fwa ki bann ansyen in dakor ki sa etidyan i kapab vin en proklanmater non batize, ed li prepar en senp prezantasyon e akonpanny li dan predikasyon. Kontinyen travay avek li dan bann diferan laspe predikasyon regilyerman, e montre li konman pour prepare e fer bann retourn vizit efikas. Ou bon legzanp pou annan en lefe pozitif lo li.—Lik 6:40.

“Sov ou Lekor ek tou bann ki ekout ou”

19, 20. Ki lobzektif nou devret annan e akoz?

¹⁹ San dout, i demann bokou lo nou par pour ed en dimoun arive ganny “konnesans laverite.” (1 Timote 2:4) Kantmenm sa, napa bokou keksoz dan lavi ki donn nou otan lazwa ki ler nou ed en dimoun obeir sa ki Labib i dir. (1 Tesalonisyen 2:19, 20) I vreman en gran privilez pour nou ‘travay ansanm avek Bondye’ pour ansenny lezot dan lemonn antye!—1 Korentyen 3:9.

²⁰ Byento Zeova pou servi Zezi ek bann lanz pwisan, pour amenn zizman lo bann “ki pa konn Bondye ek bann ki pa obei levanzil ki konsern nou Senyer Zezi.” (2 Tesalonisyen 1:6-8) Lavi bokou dimoun i an danze. Eski ou kapab fer li ou lobzektif pour kondwir omwen en letid Labib dan sa liv Ki Labib i vreman dir? Ou annan loportinite pour “sov ou lekor ek tou bann ki ekout ou” anmezir ki ou fer sa travay. (1 Timote 4:16) Plis ki zanmen oparavan, i vreman irzan pour nou ed lezot obeir sa ki Labib i dir.

[Not anba lo paz]

Ki ou’n aprann?

• Akoz sa liv Ki Labib i dir in ganny fer?

• Ki mannyer ou kapab servi sa liv Ki Labib i dir pour konmans en letid Labib?

• Ki metod lansennyman ki pli efikas?

• Ki mannyer ou kapab ed en etidyan Labib vin en ansennyan Parol Bondye?

[Kestyon]

[Portre lo paz 11]

Eski ou pe byen servi sa liv?