Kontinyen montre plis Lapresyasyon
Kontinyen montre plis Lapresyasyon
“Ou bann panse i vreman presye pour mwan! O Bondye zot tou ansanm pa zot vreman en kantite!”—PSONM 139:17.
1, 2. Akoz nou devret apresye Parol Bondye, e konman en psalmis ti eksprim son lapresyasyon?
SA TI en gran dekouvert. Kan tanp Zerizalenm ti an reparasyon, Gran Pret Ilkya ti vwar “liv lalwa Zeova ki Moiz ti’n ekrir.” Sirman sa kopi orizinal ti’n fini ekrir apepre 800 an pli boner! Eski ou kapab esey mazinen konman Lerwa Yosiya ki ti annan lakrent pour Bondye ti’n bezwen santi kan zot ti anmenn sa liv kot li? I ti vreman kontan pour vwar sa liv, e san tarde i ti fer son sekreter, Safann, lir pour li tande.—2 Kronik 34:14-18.
2 Ozordi plizyer bilyon dimoun dan lemonn i kapab lir Parol Bondye, zot kapab annan li an antye oubyen zis en serten parti. Eski sa i fer ki Labib napa bokou valer oubyen i pa tro enportan? Byensir non! Apre tou, i parol sa enn Tou pwisan, i’n ganny ekrir pour nou byennet. (2 Timote 3:16) Kan i ti pe dir sa ki i santi lo Parol Bondye, psalmis David ti ekrir: “Ou bann panse i vreman presye pour mwan! O Bondye zot tou ansanm pa zot vreman en kantite!”—Psonm 139:17.
3. Kwa ki montre ki David ti vreman spirityel?
3 Lapresyasyon ki David ti annan pour Zeova, son Parol ek son laranzman pour vre ladorasyon pa ti zanmen diminyen. David ti eksprim son santiman dan bann zoli psonm ki i ti konpoze. Par egzanp i ti ekrir dan Psonm 27:4: “Sa ki mon’n demann Zeova, se sa ki mon pou rode, ki mon kapab reste dan lakaz Zeova tou mon lavi, pour vwar labote Zeova e pour get son tanp avek ladmirasyon.” Sa mo Ebre ki’n ganny tradwir ‘get avek ladmirasyon,’ i vedir pour reflesir lo en keksoz pour en bon pe letan, egzamin oprofon, pour get avek plezir ek lakontantman. Vreman David ti en zonm vreman spirityel, ki ti apresye en kantite bann provizyon spirityel ki Zeova ti fourni. Sak fwa ki Bondye ti revel en nouvo keksoz i ti pran plezir pour konpran zot. I vo lapenn imit son legzanp kot i ti montre lapresyasyon.—Psonm 19:7-11.
Apresye sa Privilez ki nou annan pour konn Laverite
4. Akoz Zezi ti “ranpli avek lazwa”?
4 Pour kapab konpran Parol Bondye, i pa depan lo nou lentelizans oubyen ledikasyon dan sa lemonn, ki paret zis fer dimoun vin orgeye. Okontrer i depan lo labonte ekstraordiner Zeova, ki i montre anver sa bann ki annan limilite, anver bann dimoun senser ki konsyan zot bezwen spirityel. (Matye 5:3; 1 Zan 5:20) Kan Zezi ti reflesir lo lefe ki non serten imen enparfe ti pe ganny ekrir dan lesyel, i ti ranpli “avek lazwa e i ti dir, ‘Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan.’”—Lik 10:17-21.
5. Akoz bann disip ti bezwen pran oserye laverite presye ki zot ti pe konnen lo Rwayonm Bondye?
5 Apre ki i ti’n fer sa lapriyer ofon son leker, Zezi ti vir avek son bann disip e dir: “Ere sa lizye ki war sa bann keksoz ki zot war! Parski mon dir zot, bokou profet ek lerwa ki ti a anvi war sa ki zot war, me zot pa’n war, e tann sa ki zot pe tande, me pa’n tande.” Wi, Zezi ti ankouraz son bann disip fidel pour pa pran alalezer bann laverite presye ki zot ti pe dekouver lo Rwayonm Bondye. Okenn serviter Bondye avan zot, pa ti konn sa ki zot ti pe konnen la, e sirman bann dimoun ki ti swadizan ‘malen e entelizan’ dan letan Zezi, pa ti annan sans pour konn sa bann keksoz.—Lik 10:23, 24.
6, 7. (a) Ki rezon nou annan pour montre lapresyasyon pour laverite lo Bondye? (b) Ki diferans i annan ant vre larelizyon ek sa ki fo?
6 Ozordi nou annan bokou plis rezon pour montre lapresyasyon pour laverite ki nou konnen lo Bondye, akoz atraver ‘lesklav fidel e pridan,’ Zeova in fer son pep konpran son Parol dan en fason pli profon. (Matye 24:45; Danyel 12:10) Kan i ti pe ekrir lo letan lafen, profet Danyel ti dir: “Bokou pou rode, e sa vre konnesans pou annabondans.” (Danyel 12:4) Eski ou pa dakor ki sa konnesans lo Bondye ozordi i “annabondans” e ki son bann serviter pe ganny byen nouri spirityelman?
7 Pa sa i en gran diferans ant pep Bondye ki pe prospere spirityelman ek Gran Babilonn ki dan konfizyon spirityelman! Sa in fer ki bokou dimoun ki’n dezapwente oubyen degout fo larelizyon pe vin ver sa vre ladorasyon. Zot parey bann mouton ki pa oule “partisip [avek Gran Babilonn] dan son bann pese” oubyen “resevwar en par son bann fleo.” Zeova ansanm avek son bann serviter i envit sa bann tel dimoun pour vin zwenn vre kongregasyon Kretyen.—Revelasyon 18:2-4; 22:17.
Bann ki annan Lapresyasyon pe tay kot Bondye
8, 9. Konman Agai 2:7 pe ganny akonpli ozordi?
8 Zeova ti predir sa konsernan son lakaz ladorasyon: “Mon pou sekwe bann nasyon, e bann keksoz presye sorti dan tou nasyon pou vini, e mon pou ranpli sa lakaz avek laglwar.” (Agai 2:7) Sa profesi ti ganny akonpli dan letan Agai kan pep Bondye ki ti’n retournen sorti an egzil ti rekonstrir tanp Zerizalenm. Ozordi profesi Agai pe trouv en pli gran lakonplisman an rapor avek gran tanp spirityel Zeova.
9 Plizyer milyon dimoun in fini deza tay kot sa tanp spirityel pour zot ador Bondye “an espri e an verite,” e tou le zan plizyer santenn milye “keksoz presye sorti dan tou nasyon” pe kontinyen zwenn avek pep Bondye. (Zan 4:23, 24) Par egzanp, rapor mondyal pour lannen servis 2006 i montre ki 248,327 dimoun ti batize pour montre ki zot in dedye zot lavi avek Zeova. Sa i ekivalan 680 nouvo ki batize toulezour! Zot lanmour pour laverite ek lentere pour servi Zeova konman bann proklanmater, i montre ki vreman Bondye ki’n atir zot.—Zan 6:44, 65.
10, 11. Rakont en leksperyans pour montre konman serten in apresye laverite.
10 Bokou sa bann dimoun senser ti ganny atire avek laverite akoz zot ti kapab fer “ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.” (Malaki 3:18) Annou egzamin leksperyans Wayne ek Virginia, en koup ki ti Protestan me ki ti annan en kantite kestyon san larepons. Zot pa ti kontan lager, alors zot ti konfize e vreman pa kontan kan bann pret ti beni bann solda ek zarm. Anmezir ki sa koup ti vin vye, zot ti santi ki lezot dan legliz ti pe inyor zot, pourtan pour plizyer lannen Virginia ti’n ansenny larelizyon tou le Dimans. Zot ti dir: “Personn pa ti vin vizit nou oubyen montre lentere dan nou bezwen spirityel. Sel keksoz ki zot ti oule, ti nou larzan. Nou ti konfize.” Zot ti pli dezapwente ankor avek legliz kan zot ti aksepte omoseksyalite.
11 Pandan tou sa letan, zot pti zanfan e apre zot fiy ti vin Temwen Zeova. Menm si sa pa ti fer zot plezir okonmansman, plitar zot ti sanz zot lide e aksepte en letid Labib. Wayne ti dir: “Dan zis trwa mwan nou ti aprann plis keksoz lo Labib ki pandan sa 70 an ki’n pase! Nou pa ti zanmen konnen ki Bondye i apel Zeova, e nou pa ti konn nanryen lo son Rwayonm ek Paradi lo later.” Pa bokou letan apre, sa koup senser ti konmans asiste renyon avek bann Temwen Zeova e konmans prese. Virginia ti dir: “Nou anvi fer tou dimoun konn laverite.” An 2005, dan zot 80 an montan, zot tou le de ti batize. Zot ti dir: “Nou’n vwar sa vre group Kretyen kot nou santi nou alez.”
Lapresyasyon pour Lefe ki nou “byen ekipe pour fer tou Aksyon ki bon”
12. Ki Zeova i toultan donn son serviter, e ki nou bezwen fer si nou oule benefisye?
12 Zeova i toultan ed son serviter pour fer son lavolonte. Par egzanp, Noe ti ganny bann lenstriksyon kler e spesifik lo konman pour konstri sa lars. Akoz i ti bezwen reisi sa proze premye kou. E sanmenm sa ki ti ganny fer. Akoz? Akoz Noe “ti fer tou dapre sa ki Bondye ti’n donn li lord pour fer. I ti fer egzakteman parey.” (Zenez 6:14-22) Ozordi osi, Zeova i byen ekip son serviter pour fer son lavolonte. Byensir, nou premye travay i pour pres sa bon nouvel lo Rwayonm Bondye ki’n deza etablir e ed bann ki merite pour vin disip Zezi Kri. Zis parey ti leka avek Noe, nou sikse i depan lo nou lobeisans. Nou devret swiv lenstriksyon ki Zeova i donn nou atraver son Parol ek son lorganizasyon.—Matye 24:14; 28:19, 20.
13. Par ki mwayen Zeova i form nou?
13 Pour kapab akonpli sa travay, nou bezwen aprann konman pour ‘byen servi’ nou zouti prensipal, ki Parol Bondye. Parol Bondye “i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” (2 Timote 2:15; 3:16, 17) Parey dan premye syek, Zeova i donn nou bon formasyon atraver kongregasyon Kretyen. Ozordi dan sa 99,770 kongregasyon atraver lemonn, Lekol Minister Teokratik ek Renyon Servis i ganny fer tou le semenn pour ed nou byen akonpli nou minister. Eski ou montre lapresyasyon par regilyerman asiste sa bann renyon tre enportan e par aplik sa ki ou aprann?—Ebre 10:24, 25.
14. Konman bann serviter Bondye i montre lapresyasyon pour sa privilez ki zot annan pour servi Bondye? (Enkli komanter lo latab depi paz 27-30.)
14 Plizyer milyon serviter Bondye dan lemonn pe demontre lapresyasyon pour sa formasyon ki zot pe gannyen, par fer tou sa ki zot kapab pour akonpli zot minister. Par egzanp, 6,741,444 proklanmater ti pas 1,333,966,199 er-d-tan pour pres sa bon nouvel par servi diferan kalite metod pour prese pandan lannen 2006. Zot ti osi kondwir 6,286, 618 letid Labib. Sa i zis detrwa parmi bann detay byen ankourazan dan sa rapor servis pour lemonn antye. Nou envit ou pour egzamin byen sa rapor e nou swete ki sa i ankouraz ou zis parey bann Kretyen dan premye syek san okenn dout ti ganny ankouraze en kantite, kan zot ti tann rapor lo konman sa travay predikasyon ti pe progrese dan zot letan.—Akt 1:15; 2:5-11, 41, 47; 4:4; 6:7.
15. Akoz nou pa devret dekouraze si nou pe servi Zeova avek tou nou nanm?
15 Sa kantite louanz ki mont kot Bondye tou le zan i reflekte sa gran lapresyasyon ki bann serviter Zeova i annan pour sa privilez pour konn Zeova e pour rann temwannyaz lo li. (Izai 43:10) I vre, sa sakrifis ki nou bann frer ek ser aze, malad oubyen andikape i fer, i kapab ganny konpare avek don ki sa pov vev ti fer. Me annou pa zanmen bliye ki Zeova ek son Garson i vreman apresye tou sa bann ki servi Bondye avek tou zot nanm, anmezir ki zot fer tou sa ki zot kapab pour li.—Lik 21:1-4; Galat 6:4.
16. Ki zouti lansennyman Bondye in fourni nou tou resaman?
16 Apard form nou pour akonpli nou minister, atraver son lorganizasyon Zeova i ekip nou avek bann zouti lansennyman ki ekselan. Diran bann lannen ki’n pase nou’n ganny bann liv parey The Truth That Leads to Eternal Life, You Can Live Forever in Paradise on Earth, Konnesans ki Anmenn ver Lavi Eternel, e resaman Ki Labib i vreman dir? Sa bann ki vreman apresye sa bann provizyon i byen servi zot dan zot minister.
Byen servi sa Liv Ki Labib i dir
17, 18. (a) Kwa dan sa liv ki ou kontan met lanfaz lo la dan ou minister? (b) Ki komanter en sirveyan rezyonal ti fer lo sa liv Ki Labib i dir?
17 Sa liv Ki Labib i vreman dir? ki konpri 19 sapit, en seksyon ki annan lezot lenformasyon detaye, ki kler e senp, i en vre benediksyon pour nou minister. Par egzanp, sapit 12 i diskit sa size “Viv en Lavi ki fer Plezir Bondye.” Dan sa sapit, en etidyan pou aprann konman i kapab vin zanmi Bondye. En keksoz ki bokou dimoun pa’n zanmen mazinen avan oubyen panse i posib. (Zak 2:23) Ki reaksyon dimoun anver sa liv?
18 En sirveyan rezyonal Lostrali i dir ki sa liv Ki Labib i dir i fasilman atrakte dimoun, e sa i fer ki deswit dimoun i konmans koz avek ou.” I azoute ki sa liv i vreman fasil pour servi ki “i’n fer bokou proklanmater reganny konfyans dan zot menm e trouv lazwa dan zot minister. I pa drol alor ki serten i apel sa liv en pti trezor!”
19-21. Rakont serten leksperyans ki fer resorti vre valer sa liv Ki Labib i dir.
19 “Bondye ki’n bezwen anvoy ou.” Sa i parol ki en madanm Guyana ti dir en pionye ki ti’n ariv devan son laport. Sa msye ki i ti reste avek ti’n fek kit li ek zot de pti manrmay. Sa pionye ti ouver sa liv Ki Labib i dir lo sapit 1 e lir for paragraf 11, anba sa soutit “Konman Bondye i santi ler i vwar Lenzistis lo Later?” Sa pionye ti dir: “Sa paragraf ti tous li en kantite. Anfet i ti bezwen leve, al deryer son laboutik pour li plere asodlarm.” Sa madanm ti aksepte pour etidye Labib regilyerman avek en ser lokalman e ziska prezan i ankor pe fer progre.
20 José, en msye ki reste Lespanny ti perdi son madanm dan en aksidan loto. I ti esey rod rekonfor dan drog, e i ti osi rod led avek psikolog. Me zot pa ti kapab reponn sa kestyon ki ti pe fatig li plis, “Akoz Bondye ti les mon madanm mor?” En zour, José ti zwenn Francesc, en msye ki ti travay pour sa menm lakonpanni ki li i ti pe travay. Francesc ti sizere ki zot diskit sapit 11 dan sa liv Ki Labib i dir ki annan pour tit “Akoz Bondye i les nou soufer?” Leksplikasyon baze lo Labib ek legzanp ki en ansennyan i servi pour ed son zelev konpran, ti vreman tous José. I ti konmans serye avek son letid, asiste en lasanble rezyonal e aprezan i asiste renyon kot Lasal Rwayonm dan son pei.
21 Roman, aze 40 an, ki en biznesmenn Lapolonny, ti toultan respe Parol Bondye. Me vi ki i ti pe pas en kantite letan dan son travay, i pa ti fer bokou progre dan son letid Labib. Toudmenm i ti asiste en lasanble distrik e i ti ganny en kopi sa liv Ki Labib i dir Depi sa zour dimoun ti kapab remark son bann progre. I ti dir: “Tou sa bann lansennyman debaz dan sa liv i paret kordin byen avek kanmarad pour finalman form en portre, zis parey en puzzle.” Aprezan, Roman i etidye Labib regilyerman e i pe fer bon progre.
Kontinyen montre plis Lapresyasyon
22, 23. Konman nou kapab kontinyen montre nou lapresyasyon pour sa lespwar ki nou annan?
22 Parey sa Lasanble Distrik byen eksitan, “Delivrans i pros” ti eksplike, vre Kretyen pe esper avek enpasyans sa zour kot zot pou ganny “delivrans eternel,” zis parey Zeova in promet zot e in fer sa posib par disan Zezi Kri ki’n ganny verse. Napa pli bon fason pour montre nou lapresyasyon pour sa lespwar sitan presye ki par kontinyen evite sali nou par bann “travay initil pour nou servi Bondye vivan.”—Ebre 9:12, 14.
23 Wi, i vreman en mirak ki plis ki sis milyon proklanmater fidel pe andire dan servis Bondye menm si sa presyon pour vin egois i vreman for. Sa i en laprev ki bann serviter Zeova i apresye en kantite sa privilez ki zot annan pour servi Bondye, “zot konnen ki dan Senyer zot travay pa anven.” Nou swete ki nou kontinyen demontre plis lapresyasyon!—1 Korentyen 15:58; Psonm 110:3.
Ki ou pou reponn?
• Ki nou aprann avek sa psalmis konsernan montre lapresyasyon pour Bondye ek sa ki I fourni spirityelman?
• Konman Agai 2:7 pe ganny akonpli ozordi?
• Konman Zeova in ekip son serviter pour servi li avek lefikasite?
• Ki ou kapab fer pour montre ou lapresyasyon pour labonte Zeova?
[Kestyon]
[Portre lo paz 31]
Zeova i byen ekip nou pour fer son lavolonte
[Latab lo paz 27-30]
RAPOR MONDYAL LANNEN SERVIS 2006 BANN TEMWEN ZEOVA