Zeova i en Bondye ki montre Lapresyasyon
Zeova i en Bondye ki montre Lapresyasyon
“Bondye pa enzis pour li oubliy travay ki zot in fer, ni lanmour ki zot in montre pour li.”—EBRE 6:10.
1. Konman Zeova ti montre lapresyasyon pour sa ki Rit ti fer?
ZEOVA i vreman apresye zefor sa bann ki senserman anvi fer son lavolonte, e i beni zot en kantite. (Ebre 11:6) Boaz, en zonm fidel, ti konn tre byen sa zoli laspe dan personnalite Bondye. Akoz i ti dir Rit, en Moabit ki ti pran byen swen avek son belmer ki ti en vev: “Zeova pou rekonpans ou pour ou aksyon, Zeova pou donn ou en saler parfe.” (Rit 2:12) Eski Bondye ti beni Rit? Definitivman! Anfet, son resi in ganny rikorde dan Labib! Deplis i ti marye avek Boaz e i ti vin zanset Lerwa David ek Zezi Kri. (Rit 4:13, 17; Matye 1:5, 6, 16) Sa i zis en legzanp dan Labib ki montre ki Zeova i apresye sa ki son bann serviter i fer.
2, 3. (a) Kwa ki remarkab avek lapresyasyon ki Zeova i demontre? (b) Akoz Zeova i kapab montre vre lapresyasyon? Donn legzanp.
2 Zeova ti pou vwar li enzis si i pa ti montre lapresyasyon. Ebre 6:10 i dir: “Bondye pa enzis pour li oubliy travay ki zot in fer, ni lanmour ki zot in montre pour li par servis ki zot in rann e pe kontinyen rann bann sen.” En keksoz remarkab avek sa verse, i ki Bondye i montre lapresyasyon anver sa bann ki devoue pour li, menm si zot fer pese e pa’n arive reflekte laglwar Bondye.—Romen 3:23.
3 Akoz nou enparfe, nou kapab panse ki tou sa ki nou fer pour montre nou devosyon anver Bondye, pa enportan e i napa valer. Me Zeova i konn nou motivasyon ek sitiasyon, i apresye en kantite nou servis ki nou fer avek tou nou nanm. (Matye 22:37) Annou pran en legzanp: Meton en manman in vwar en kado lo latab, en sennon bon marse. I kapab pran sa kado konman en keksoz ki napa valer e pa aksepte li. Me avek sa kado i annan en kart ki dir ki i sorti kot son pti fiy, ki’n pran tou son larzan ki i ti’n met dekote pour aste en kado pour son manman. Apre ki i’n lir sa kart i konmans vwar sa kado dan en lot fason. Petet avek larm dan son lizye, i may son pti fiy e dir li konbyen i apresye sa ki i’n fer.
4, 5. Konman Zezi ti imit Zeova dan lafason ki i ti montre lapresyasyon?
4 Zeova i konn tre byen nou motivasyon ek limit, me i apresye kan nou donn li nou meyer, ki swa i pti gin oubyen bokou. Dan en fason parfe Zezi ti demontre ki i ti annan sa menm lapresyasyon ki son papa i annan. Par egzanp nou vwar sa dan sa resi konsernan sa pov vev. “Zezi ti lev lizye e i ti war bann zonm ris ki ti pe met zot don dan trezor Tanp. I ti osi war en pov vev ki ti pe met de pti larzan kwiv. I ti dir, ‘An verite, mon dir zot, ki sa pov vev in met plis ki tou lezot. Akoz lezot in donn lo sa ki zot ti annan anplis, me sa vev, dan son povrete, in donn tou sa ki i ti annan pour li viv.’”—Lik 21:1-4.
5 Wi, Zezi ti konn sitiasyon ki sa madanm ti ladan, i ti en vev e i ti pov. Me kantmenm sa i ti konn vre valer son don e i ti vreman apresye sa. Nou kapab dir menm keksoz lo Zeova. (Zan 14:9) Nenport ki sitiasyon nou kapab ladan, pa i vreman ankourazan pour konnen ki nou kapab ganny laprouvasyon Bondye ek son Garson, zot ki apresye sa ki nou fer!
Zeova ti rekonpans en Etyopyen ki ti annan Lakrent pour li
6, 7. Akoz e konman Zeova ti montre ki i ti apresye sa ki Ebed-melek ti’n fer?
6 Dan Labib nou konstaman vwar bann resi kot Zeova in montre lapresyasyon anver sa bann ki fer son lavolonte. Annou egzamin lafason ki i ti azir anver Ebed-melek, en Etyopyen ki ti annan lakrent pour li, ki ti viv dan menm lepok avek Zeremi, e ki ti osi en serviter dan lakaz Lerwa Sidkya an Zida, ki ti vin enfidel. Ebed-melek ti’n tande ki bann prens Zida ti’n sarz profet Zeremi pour rebel kont lotorite e ki zot ti’n zet li dan en pwi, kot i ti pou mor akoz i ti napa nanryen pour manze. Sa ti lenzistis. (Zeremi 38:1-7) Ebed-melek ti konnen ki dimoun ti ay Zeremi en kantite akoz sa mesaz ki i ti prese, me i ti riske son prop lavi pour fer apel devan lerwa. Avek kouraz i ti dir: “O mon senyer, lerwa, sa bann zonm in fer sa ki move avek profet Zeremi, zot in zet li dan pwi, pour ki i mor laba akoz i annan lafamin.” Avek permisyon lerwa, Ebed-melek ti pran 30 zonm e al delivre profet Bondye.—Zeremi 38:8-13.
7 Zeova ti vwar ki Ebed-melek ti annan lafwa, se pour sa rezon i ti kapab sirmont okenn lafreyer ki i ti’n kapab santi. Zeova ti montre lapresyasyon pour sa ki i ti’n fer e i ti dir li atraver Zeremi: “Mon pou fer mon parol vin vre lo sa lavil, pour anmenn maler, pa sa ki byen . . . Mon pou delivre ou sa zour, . . . e ou pa pou ganny donnen dan lanmen bann zonm ki ou per. San okenn fot mon pou delivre ou . . . ; e sirman ou pou ganny ou lavi konman en keksoz ki’n ganny pran dan lager, akoz ou’n met ou konfyans dan mwan.” (Zeremi 39:16-18) Wi, Zeova ti delivre Ebed-melek ek Zeremi dan lanmen bann move prens Zida e plitar dan lanmen bann Babilonnyen ki ti detrir Zerizalenm. Psonm 97:10 i dir: “[Zeova] pe vey bann ki fidel avek li; e i delivre zot dan lanmen bann mesan.”
“Ou Papa ki war sa ki ou fer an Sekre i a rekonpans ou”
8, 9. Parey Zezi ti demontre, ki kalite lapriyer Zeova i apresye?
8 En lot levidans ki Zeova i apresye e atas bokou valer avek sa ki nou fer pour montre li nou devosyon, i evidan dan sa ki Labib i dir lo lapriyer. Salomon ti dir: “Lapriyer bann dimoun drwat i fer plezir [Bondye].” (Proverb 15:8) Dan letan Zezi, en kantite sef relizye ti priye piblikman, me zot ti fer sa pa akoz zot ti senserman anvi rann Bondye loner, me akoz zot ti anvi enpresyonn lezot. Zezi ti dir ki zot ‘deza pe ganny zot rekonpans.’ I ti dir son bann disip: “Me ou, ler ou priye, antre dan ou lasanm, ferm laport e priy ou Papa la dan sa landrwa sekre; e ou Papa ki war sa ki ou fer an sekre i a rekonpans ou.”—Matye 6:5, 6.
9 Byensir, Zezi pa ti pe dir ki i mal pour priye an piblik, akoz li menm i ti priye piblikman parfwa diran son minister. (Lik 9:16) Zeova i vreman apresye kan nou priy li ofon nou leker, san okenn lentansyon pour enpresyonn lezot. Me kan nou priye kot personn pa vwar nou, sa pou montre ki kantite profon nou lanmour pour Bondye i ete ek nou konfyans dan li. Alors, i pa drol ki souvan Zezi ti al dan en landrwa trankil kot ti napa personn pour li priye. Par egzanp en fwa i ti priye “byen granmaten, avan lizour.” En lot fwa i ti al “li tousel lo en pti montanny pour priye.” Avan swazir son 12 zapot, i ti pas en lannwit antye li tousel pour priye.—Mark 1:35; Matye 14:23; Lik 6:12, 13.
10. Ki nou kapab asire si nou priy Bondye avek senserite e nou revel nou santiman pli profon avek li?
10 Zis esey mazinen konman Zeova ti’n bezwen ekout lapriyer senser son Garson avek bokou latansyon! Anfet, parfwa Zezi ti priye “avek leokri ek larm,” e “Bondye ti egzos li akoz son lobeisans.” (Ebre 5:7; Lik 22:41-44) Kan nou priy avek senserite e nou fer Bondye konn nou santiman pli profon, nou kapab asire ki nou Papa dan lesyel pou ekout nou avek latansyon ek lapresyasyon. Wi, “Zeova i pros avek tou bann . . . ki kriy li avek fidelite.”—Psonm 145:18.
11. Konman Zeova i santi anver sa ki nou fer kan nou tousel?
11 Si Zeova i apresye ler nou priy li an sekre, i vreman bezwen apresye kan nou obeir li an sekre! Wi, Zeova i konn tou sa ki nou fer menm si lezot pa vwar. (1 Pyer 3:12) Ler nou fidel e obeisan menm ler nou tousel kot personn pa vwar nou, sa pou montre ki nou ‘leker i tou’ pour Zeova, en leker ki annan bon motivasyon e ki determinen pour fer sa ki byen. (1 Kronik 28:9) Pa ler nou kondwir nou dan sa fason sa i fer leker Zeova rezwir!—Proverb 27:11; 1 Zan 3:22.
12, 13. Konman nou kapab protez nou lespri ek leker, e imit Natanael?
12 Alors, bann Kretyen fidel i evite fer pese an sekre ki kapab sali lespri ek leker en dimoun, sa i enkli get pornografi ek bann keksoz vyolan. Menm si i annan serten pese ki nou kapab fer dan kasyet san ki lezot i konnen, nou realize ki tou keksoz i “ekspoze devan lizye sa enn avek ki nou bezwen rann kont.” (Ebre 4:13; Lik 8:17) Kan nou fer bokou zefor pour evite fer keksoz ki pou depler Zeova, nou konsyans i reste kler e sa i fer nou kontan akoz nou konnen ki nou annan laprouvasyon Bondye. Wi, san okenn dout, nou asire ki Zeova i vreman apresye sa bann “ki napa okenn repros kont [zot] e ki pe fer sa ki drwat, e ki pe koz laverite dan son leker.”—Psonm 15:1, 2.
13 Me konman nou kapab protez nou lespri ek leker dan en lemonn ki ranpli avek mesanste? (Proverb 4:23; Efezyen 2:2) Anplis ki zis profit omaksimonm bann nouritir spirityel ki nou gannyen, nou devret fer tou sa ki nou kapab pour rezet sa ki mal e fer sa ki byen, nou devret azir vitman pour ki bann move dezir pa devlop plis e donn nesans pese. (Zak 1:14, 15) “La en [zonm] ki napa defo.” (Zan 1:47) Sa i parol ki Zezi ti dir lo Natanael. Pa ou ti pou vreman kontan si Zezi ti dir sa lo ou! Plitar, Natanael, ki ti osi apel Bartelemi, ti ganny sa gran privilez pour vin enn parmi sa 12 zapot.—Mark 3:16-19.
“En Gran-Pret fidel” e mizerikord
14. Konman lafason ki Zezi ti reazir anver Mari ti diferan avek lezot?
14 Vi ki “i resanblans vizib Bondye ki envizib,” Zezi ti toultan imit son Papa dan en fason parfe kan i ti montre lapresyasyon anver sa bann ki servi Bondye avek en bon leker. (Kolosyen 1:15) Par egzanp, senk zour avan ki i ti donn son lavi, Zezi ansanm avek detrwa disip ti’n ganny envite kot Simon an Betani. Pandan sa sware, Mari, ser Lazar ek Mart, “ti pran en liv lesans byen ser (ekivalan saler pour en lannen) ki ti’n fer avek en plant ki apel nar,” e vid lo latet ek lipye Zezi. (Zan 12:3) Serten ti dir: “Akoz sa gaspiyaz?” Me Zezi ti get sa ki Mari ti’n fer dan en lot fason. I ti vwar sa konman en siny zenerozite e konman en keksoz vreman enportan an rapor avek son lanmor ek lanterman ki ti pe aprose. Olye kritik Mari, Zezi ti onor li. I ti dir: “Partou kot sa Bonn Nouvel i ganny prese dan lemonn, sa ki i’n fer pou ganny rakonte an son memwar.”—Matye 26:6-13.
15, 16. Ki byenfe nou kapab gannyen lefe ki Zezi ti viv e servi Bondye konman en imen?
15 Pa nou vreman privilezye pour annan Zezi konman nou dirizan, sa enn ki montre lapresyasyon! Anfet son lavi lo later ti en preparasyon pour li fer sa travay ki Zeova ti pe mazin donn li plitar. Savedir pour servi konman Gran Pret ek Lerwa, premyerman pour kongregasyon bann Kretyen swazir e apre pour lemonn antye.—Kolosyen 1:13; Ebre 7:26; Revelasyon 11:15.
16 Avan i ti vin lo later, Zezi ti deza annan en gran lentere ek en lafeksyon spesyal pour imen. (Proverb 8:31) Lefe ki i ti vin lo later konman en imen, i ti kapab pli byen konpran bann diferan leprev ki nou rankontre dan nou servis pour Bondye. Zapot Pol ti ekrir: “I ti neseser ki [Zezi] i vin parey son bann frer dan tou fason, pour ki i vin zot Gran-Pret fidel” e mizerikord. “Parski i’n soufer limenm, e i’n ganny tante, alor i aprezan kapab vin an ed tou sa ki ganny tante.” Zezi i kapab “senpatiz avek nou febles” akoz i’n “ganny tante dan tou keksoz, parey nou, pourtan san fer pese.”—Ebre 2:17, 18; 4:15, 16.
17, 18. (a) Ki sa bann let pour sa set kongregasyon i montre lo sa profon lapresyasyon ki Zezi i annan? (b) Bann Kretyen swazir ti pe ganny prepare pour fer kwa?
17 Apre son rezireksyon, i ti evidan ki Zezi ti pli byen konpran ankor bann leprev ki son bann disip ti pe pas atraver. Annou egzamin sa ki i ti dir dan bann let pour sa set kongregasyon dan Lazi Miner, ekrir par zapot Zan. I ti dir kongregasyon Smirn: “Mon konn ou bann soufrans, ek ou povrete.” An gro Zezi ti pe dir, ‘Mon vreman konpran ou bann problenm, mon konn tre byen sa ki ou pe pas ladan.’ Vi ki i ti soufer menm ziska lanmor, alors avek konpasyon e osi konviksyon i ti kapab dir: “Reste fidel ziska lanmor, e mon a donn ou kouronn lavi.”—Revelasyon 2:8-10.
18 Sa bann let pour sa set kongregasyon i ranpli avek bann parol ki montre ki Zezi ti konn tre byen difikilte ki son bann disip ti pe fer fas avek, ek son lapresyasyon senser pour zot fidelite. (Revelasyon 2:1–3:22) Pa bliye, sa bann ki Zezi ti pe adrese dan son let ti bann Kretyen swazir ki ti annan lespwar pour dirize akote li dan lesyel. Parey zot Senyer, zot ti pe ganny prepare pour akonpli en tre gran travay pour ede aplik avek bokou konpasyon byenfe sa sakrifis oubyen ranson lo limanite ki pe soufer.—Revelasyon 5:9, 10; 22:1-5.
19, 20. Ki mannyer sa bann ki annan lespwar pour form parti sa “gran lafoul” i montre lapresyasyon pour sa ki Zeova ek son Garson in fer?
19 Byensir, apard annan lanmour pour bann Kretyen swazir, Zezi i osi kontan bann ‘lezot mouton’ ki fidel. Plizyer milyon zot i annan sa lespwar pour form parti sa “gran lafoul . . . sorti dan tou nasyon,” ki pou sirviv sa ‘gran ladetres’ ki pe aprose. (Zan 10:16; Revelasyon 7:9, 14) Zot pe tay ver Zezi akoz zot vreman apresye sa sakrifis ki i’n fer ek sa lespwar pour viv eternelman en zour. Konman zot montre lapresyasyon? Par donn Bondye en servis sakre “lizour konman aswar.”—Revelasyon 7:15-17.
20 Rapor mondyal pour lannen servis 2006, lo paz 27 ziska 30, i montre klerman ki sa bann serviter fidel pe vreman donn Zeova en servis sakre “lizour konman aswar.” Anfet, pandan sa lannen servis, zot ansanm avek sa pti gin Kretyen swazir ki ankor lo later, ti pas en total 1,333,966,199 er-d-tan dan predikasyon. Sa i ekivalan plis ki 150,000 lannen.
Kontinyen montre Lapresyasyon!
21, 22. (a) Akoz ozordi i sirtou enportan pour Kretyen montre lapresyasyon? (b) Ki nou pou egzaminen dan nou lot lartik?
21 Lafason ki Zot in azir avek imen enparfe, i evidan ki Zeova ek son Garson in montre en profon lapresyasyon ki vreman ekstraordiner. Me i fer lapenn pour dir ki lamazorite dimoun ozordi pa tro mazin Bondye, plito zot mazin zis zot lekor. Kan i ti pe dekrir dimoun dan “bann dernyen zour,” Pol ti ekrir: “Zonm pou toultan mazin zot prop lekor, voras larzan . . . Zot pa pou zanmen montre lapresyasyon.” (2 Timote 3:1-5, Phillips) Vreman zot diferan avek bann vre Kretyen ki eksprim zot lapresyasyon pour tou sa ki Bondye in fer pour zot, par zot lapriyer ki sorti ofon zot leker, par zot lobeisans ek servis ki zot fer avek tou zot nanm.—Psonm 62:8; Mark 12:30; 1 Zan 5:3.
22 Dan lot lartik nou pou revwar detrwa parmi sa kantite keksoz spirityel ki Zeova in donn nou avek lanmour. Anmezir ki nou reflesir lo sa bann ‘bon kado,’ annou demontre plis lapresyasyon ankor.—Zak 1:17.
Ki ou pou reponn?
• Konman Zeova in demontre son lapresyasyon?
• Konman nou kapab fer leker Zeova kontan kan nou nou tousel?
• Dan ki fason Zezi ti demontre lapresyasyon?
• Lefe ki i ti viv lo later konman en imen, konman sa ti ed Zezi pour vin en dirizan ki annan konpasyon ek lapresyasyon?
[Kestyon]
[Portre lo paz 19]
Parey en paran i apresye sa pti zes lanmour ki son zanfan i fer, Zeova i apresye kan nou donn li nou meyer