Annan Lakrent pour Zeova e trouv Lazwa
Annan Lakrent pour Zeova e trouv Lazwa
“Annan lakrent pour Zeova, zot son bann sen, sa bann ki annan lakrent pour li pa mank nanryen.”—PSONM 34:9.
1, 2. (a) Ki diferan fason bann larelizyon Kretyen in dekrir lakrent pour Bondye? (b) Ki bann kestyon nou pou egzaminen aprezan?
SA KALITE lakrent ki bann dimoun i annan pour Bondye, i souvannfwa baze lo bann keksoz ki bann minis relizye i ansennyen ki pa baze lo Labib, tel parey ki Bondye i pini bann peser dan lanfer dife pour touzour. En tel lansennyman i pa an akor avek sa ki Labib i ansennyen konsernan Zeova konman sa Bondye lanmour ek lazistis. (Zenez 3:19; Deterononm 32:4; Romen 6:23; 1 Zan 4:8) Lezot minis relizye zot fer tou lekontrer. Zot pa zanmen mansyonnen ki nou devret annan lakrent pour depler Bondye. Okontrer, zot ansennyen ki Bondye i toleran e aksepte preske tou dimoun, nenport ki kalite lavi ki zot anmennen. Sa osi i pa sa ki Labib i ansennyen.—Galat 5:19-21.
2 Anfet, Labib i ankouraz nou pour annan lakrent pour Bondye. (Revelasyon 14:7) Sa lansennyman Labib in soulev bokou kestyon. Akoz en Bondye lanmour i oule nou annan lakrent pour li? Ki kalite lakrent Bondye i ekspekte? Ki byenfe nou kapab gannyen ler nou annan lakrent pour Bondye? Nou pou konsider sa bann kestyon anmezir ki nou kontiny nou diskisyon lo Psonm 34.
Akoz annan Lakrent pour Bondye
3. (a) Ki ou pwennvi lo sa komannman ki demann nou pour annan lakrent pour Bondye? (b) Akoz bann ki annan lakrent pour Zeova i ere?
3 Konman Kreater ek Souvren Senyer dan liniver, nou merite annan lakrent pour Zeova. (1 Pyer 2:17) Sepandan, en tel lakrent i pa en lafreyer eksesif pour en bondye kriyel. I en respe ranpli avek ladmirasyon pour sa ki Bondye i ete. I osi sa lakrent kot nou pa oule depler li. Lakrent pour Bondye i pli siperyer ki okenn lezot kalite lakrent, i fer nou zwaye, me i pa fer nou tris oubyen per. Zeova, “sa Bondye ere,” i oule ki bann imen i apresye lavi. (1 Timote 1:11, NW) Me pour arive fer sa, nou bezwen viv an armoni avek sa ki Bondye i ekspekte nou fer. Pour bokou sa i vedir sanz zot fason viv. Tou sa ki fer bann sanzman neseser i eksperyans sa laverite ki psalmis David ti dir: “O zot lepep, goute e vwar konman Zeova i bon. Ere sa zonm kosto ki pran refiz dan li. Annan lakrent pour Zeova, zot son bann sen, akoz sa bann ki annan lakrent pour li pa mank nanryen.” (Psonm 34:8, 9) Akoz zot annan en bon relasyon avek Bondye, tou sa bann ki annan lakrent pour Zeova pa pou mank nanryen konsernan bann keksoz ki annan en valer dirab.
4. Ki lasirans David ek Zezi ti annan konsernan resevwar bann bezwen debaz sorti kot Zeova?
4 Remarke, parey ti leka dan son letan, David ti rann loner son bann zonm par apel zot “bann sen.” Zot ti form parti en nasyon sen ki ti pour Bondye. Zot ti pe osi met zot lavi dan risk par swiv David. Kantmenm David ek son bann zonm ti pe sov Lerwa Sail, David ti annan sa konfyans ki Zeova ti pou kontinyen donn zot, zot bann bezwen debaz. David ti ekrir: “Bann zenn lyon for ti napa preski nanryen pour manze e zot ti lafen; me bann ki pe rod Zeova pa pou mank okenn keksoz ki bon.” (Psonm 34:10) Zezi i donn sa menm lasirans son bann disip.—Matye 6:33.
5. (a) Dan ki kalite kiltir bokou parmi bann ki ti swiv Zezi ti grandi ladan? (b) Ki konsey Zezi ti donnen konsernan lakrent pour Bondye?
5 Parmi bann Zwif ki ti ekout Zezi, en bon pe ti ganny konsidere konman bann dernyen dimoun ki ti enferyer. Alors Zezi “ti ranpli avek konpasyon pour lafoul . . . akoz zot ti fatige e dekouraze parey bann mouton ki napa berze.” (Matye 9:36) Eski sa bann ki ti ganny konsidere konman enferyer ti pou ganny sa kouraz pour swiv Zezi? Pour arive fer sa zot ti pou bezwen devlop lakrent pour Zeova, me pa pour zonm. Zezi ti dir: “Pa bezwen per sa bann ki touy lekor me ki apre sa zot pa kapab fer nanryen plis ki sa. Me mon a montre zot lekel ki zot devre per: ganny lafreyer pour sa ki kapab touy lekor, e osi annan pouvwar pour zet zot dan [zeenn, NW]. Wi, mon dir zot, per li. Eski senk sren pa i vann pour de sou? Me napa enn ki Bondye i obliye. Wi, menm bren seve lo ou latet in konte. Pa bezwen per; zot vo plis ki en kantite sren.”—Lik 12:4-7.
6. (a) Ki bann parol ki Zezi ti dir, ki ti fortifye bann Kretyen? (b) Akoz Zezi i sa dimoun ki’n demontre sa pli bon legzanp lakrent pour Bondye?
6 Kan bann ki annan lakrent pour Zeova i ganny met anba presyon par zot bann lennmi pour aret servi Bondye, zot kapab rapel sa konsey Zezi: “Nenport ki, ki rekonnet mwan devan dimoun, Fis-de-Lonm osi pour rekonnet li devan bann lanz Bondye. Me sa ki rezet mwan devan dimoun, mwan osi mon pou rezet li devan bann lanz Bondye.” (Lik 12:8, 9) Sa bann parol in fortifye bann Kretyen, sirtou dan bann landrwa kot vre ladorasyon in ganny restrikte. Malgre sa zot kontinyen loue Zeova par fer bann renyon Kretyen ek predikasyon, me dan en fason tre pridan. (Akt 5:29) Zezi in kit sa pli bon legzanp dan lafason ki i’n demontre “lakrent pour Bondye.” (Ebre 5:7, NW) Konsernan li, dan en fason profetik Labib ti dir: “Lespri Zeova i bezwen repoz lo li, lespri . . . lakrent pour Zeova. Son plezir pou dan lakrent pour Zeova.” (Izai 11:2, 3) Alors Zezi i sa enn ki pli kalifye pour ansenny nou bann byenfe ki nou gannyen ler nou annan lakrent pour Zeova.
7. (a) Ki mannyer bann Kretyen pe aksepte en lenvitasyon en pe parey sa enn ki David ti fer? (b) Ki mannyer bann paran i kapab swiv bon legzanp David?
7 Tou bann ki swiv legzanp Zezi e obeir son lansennyman pe an realite aksepte en lenvitasyon en pe parey sa enn ki David ti fer: “Vini, zot bann garson, ekout mwan; mon pou ansenny zot lakrent pour Zeova.” (Psonm 34:11) I ti natirel pour David adres son bann zonm konman son bann “garson” akoz zot ti konsider li konman zot lider. Lo son kote, David ti ed sa bann ki ti pe swiv li pour annan lakrent pour Bondye pour ki zot kapab reste ini e ganny faver Bondye. Pa sa i en bon legzanp pour bann paran Kretyen! Zeova in donn zot lotorite lo zot fiy ek garson pour “elve zot dan en ledikasyon ek lenstriksyon Senyer.” (Efezyen 6:4) Par diskit lo bann keksoz spirityel sak zour e kondwir en letid Labib regilye avek zot zanfan, bann paran pou ed zot pour annan lakrent pour Zeova e viv en lavi ere.—Deterononm 6:6, 7.
Ki mannyer aplik Lakrent pour Bondye dan nou Lavi
8, 9. (a) Akoz viv en lavi ki demontre lakrent pour Bondye i enn ki atiran? (b) Ki nou bezwen fer pour protez nou lalang?
8 Parey i’n ganny mansyonnen pli boner, lakrent pour Zeova pa anpes nou zwaye. David ti demande: “Lekel sa zonm ki kontan lavi, ki ti pou kontan viv lontan pour vwar sa ki bon?” (Psonm 34:12) I kler ki lakrent pour Bondye i sa fakter enportan pour viv lontan, dan lazwa e vwar sa ki bon. I fasil pour dir, “Mon annan lakrent pour Bondye” me i en lot zafer pour prouv li par nou kondwit. Se pour sa rezon ki David ti kontinyen eksplike ki mannyer nou kapab montre ki nou annan lakrent pour Bondye.
9 “Protez ou lalang kont sa ki mal e ou lalev kont dir keksoz pour anbet lezot.” (Psonm 34:13) Zapot Pyer ti ganny enspire pour sit sa bout dan Psonm 34, apre ki i ti’n konsey bann Kretyen pour kontan kanmarad konman frer. (1 Pyer 3:8-12) Protez nou lalang kont sa ki move i vedir ki nou pou evite fer bann move bavadarz. Okontrer, nou pou touzour fer zefor pour annan bann konversasyon ki batir kan nou koz avek lezot. Deplis, nou pou fer zefor pour ganny kouraz e koz laverite.—Efezyen 4:25, 29, 31; Zak 5:16.
10. (a) Eksplike ki i vedir pour rezet sa ki move? (b) Ki i vedir fer sa ki byen?
10 “Rezet sa ki move e fer sa ki byen; rod lape e kontinyen rod li.” (Psonm 34:14) Nou evit bann keksoz ki Bondye pa kontan, tel parey limoralite seksyel, pornografi, vole, grigri, vyolans, soular, ek labi drog. Nou osi rezet divertisman ki met lanfaz lo sa bann keksoz degoutan. (Efezyen 5:10-12) Okontrer, nou servi nou letan pour fer sa ki byen. Pli gran dibyen ki nou kapab fer se partisip dan predikasyon e fer disip, pour ed lezot ganny sove. (Matye 24:14; 28:19, 20) Fer dibyen i osi enkli prepar e asiste nou bann renyon, kontribye finansyerman pour siport sa travay mondyal, pran swen avek nou Lasal Rwayonm, e montre lentere pour bann Kretyen ki dan bezwen.
11. (a) Ki mannyer David ti aplik sa ki i ti krwar ladan konsernan lape? (b) Ki ou kapab fer pour ‘gard lape’ dan kongregasyon?
11 David ti kit en bon legzanp lo ki mannyer pour kontinyen rod lape. De fwa i ti ganny sa sans pour touy Sail. Dan tou le de lokazyon i ti refize servi vyolans e plitar i ti demontre respe ler i ti koz avek Sail, avek lespwar pour reetablir lape. (1 Samyel 24:8-11; 26:17-20) Kwa ki kapab ganny fer ozordi kan en sitiasyon i met an danze lape dan kongregasyon? Nou devret “rod lape e gard li.” Alor, si nou santi ki relasyon ki nou annan ant enn nou konpanyon Kretyen i nepli sa relasyon pros parey avan, nou devret obeir konsey Zezi: ‘Avan tou al fer lape avek ou frer.’ Apre nou kapab kontinyen avek lezot laspe sa vre ladorasyon.—Matye 5:23, 24; Efezyen 4:26.
Lakrent pour Bondye i anmenn en kantite Benediksyon
12, 13. (a) Ki byenfe bann ki annan lakrent pour Bondye i gannyen denozour? (b) Ki gran rekonpans bann serviter fidel pou rezwir byento?
12 “Lizye Zeova i lo bann ki drwat e son zorey i ver zot lapel pour led.” (Psonm 34:15) Tou sa ki’n ganny ekrir konsernan lafason ki Bondye ti azir avek David i prouve ki sa parol i vre. Ozordi, nou pe eksperyans en gran lazwa ek lape lespri akoz nou konnen ki Zeova pe vey lo nou. Nou annan konfyans ki i pou touzour donn nou sa ki nou bezwen, menm kan nou anba bokou presyon. Nou konnen ki byento, tou bann vre adorater pou fer fas avek sa latak Gog sorti Magog ki’n ganny predir e “sa gran zour efreyan Zeova.” (Yoel 2:11, 31; Ezekyel 38:14-18, 21-23) Nenport ki sitiasyon ki nou pou fer fas avek dan sa moman, parol David i osi aplik pour nou: “Zot in kriye e Zeova li menm in tande e dan tou zot soufrans i’n delivre zot.”—Psonm 34:17.
13 Pa i pou eksitan sa moman pour vwar Zeova loue son gran non! Nou leker pou ranpli avek respe ek gran ladmirasyon plis ki zanmen oparavan e tou bann lennmi pou ganny en destriksyon ki pou anmenn laont. “Zeova in vir son figir kont bann ki fer sa ki mal, pour ki zanmen nou tann koz ankor lo zot lo sa later.” (Psonm 34:16) Pa i pou en gran rekonpans pour eksperyans sa gran delivrans dan sa nouvo lemonn drwat Bondye!
Bann Promes ki ed nou andire
14. Ki panse dan Labib ki pou ed nou andire malgre bann difikilte?
14 Antretan, pour ki nou kontinyen obeir Zeova dan en lemonn koronpi e agresif i demann landirans. Lakrent pour Bondye i ed nou en kantite pour devlop lobeisans. Akoz sa letan difisil ki nou pe viv ladan, serten serviter Zeova i fer fas avek bann gro difikilte ki rann zot malere e dekouraz zot. Kantmenm sa, zot kapab annan sa lasirans total ki si zot kont lo Zeova, i pou ed zot andire. Parol David i transmet sa vre rekonfor: “Zeova i pre avek sa bann ki annan leker brize; e i sov bann ki zot lespri i fatige.” (Psonm 34:18) Dan en fason ankourazan David ti azoute: “En dimoun drwat i rankontre bokou maler, me Zeova i delivre li dan tou sa bann maler.” (Psonm 34:19) Nenport ki kantite maler ki nou rankontre, Zeova i ase for pour sov nou.
15, 16. (a) Ki maler David ti tande zis apre ki i ti konpoz Psonm 34? (b) Kwa ki pou ed nou andir bann leprev?
15 Pa bokou letan apre ki i ti konpoz Psonm 34, David ti tann konsernan maler ki ti’n arive avek bann zabitan dan lavil Nob, kan Sail ti touy zot ek laplipar bann pret. Sa ti bezwen fer David sagren akoz son vizit dan lavil Nob ki ti provok lakoler Sail! (1 Samyel 22:13, 18-21) San dout David ti tourn ver Zeova pour led e i ti sertennman ganny rekonforte par sa lesperans kot alavenir dimoun “bon” pou ganny resisite.—Akt 24:15.
16 Ozordi, nou osi nou ganny fortifye par sa lesperans rezireksyon. Nou konnen napa nanryen ki nou lennmi i fer ki kapab afekte nou pour leternite. (Matye 10:28) David ti eksprim sa menm konviksyon par sa bann parol: “I gard tou lezo sa enn ki drwat; napa enn ki’n kase.” (Psonm 34:20) Sa verse ti ganny akonpli lo Zezi. Menm si Zezi ti ganny met amor dan en fason kriyel, napa enn son lezo ki ti ganny “kase.” (Zan 19:36) Psonm 34:20 pe osi ganny akonpli dan nou letan, i asir nou ki nenport ki leprev bann Kretyen swazir ek zot konpanyon ‘lezot mouton’ i fer fas avek, sa pa pou zanmen afekte zot dan en fason permanan. Dan en sans senbolik zot lezo pa pou zanmen ganny kase.—Zan 10:16.
17. Ki maler pe esper sa bann ki pa oule repantir e ki ay pep Bondye?
17 Pour bann mesan, sitiasyon i diferan. Byento zot pou rekolte sa bann move keksoz ki zot in senmen. “Sa enn mesan pou mor akoz maler; e sa bann ki ay sa enn ki drwat pou ganny trouve koupab.” (Psonm 34:21) Tou bann ki kontinyen opoz pep Bondye zot pou fer fas avek sa pli gran maler. Kan Zezi Kri pou aparet dan en fason envizib, zot “pou ganny konman pinisyon destriksyon eternel.”—2 Tesalonisyen 1:9.
18. Dan ki sans sa “gran lafoul” in fini ganny sove e ki zot pou eksperyanse dan lavenir?
18 Sa psonm ki David ti ekrir ti termin avek sa bann parol ankourazan: “Zeova pe sov son bann serviter; e parmi sa bann ki pe rod refiz kot li, napa enn ki pou ganny trouve koupab.” (Psonm 34:22) Apre ki i ti’n diriz pour preski 40 an, Lerwa David ti dir: “[Bondye] i sov mwan dan tou maler.” (1 Lerwa 1:29) Parey David, bann ki annan lakrent pour Zeova pou kapab byento mazin lepase e rezwir lefet ki zot pou ganny delivre kont pese ki rann zot koupab e ganny delivre dan tou zot bann leprev. Deza, laplipar bann Kretyen swazir in resevwar zot rekonpans dan lesyel. “En gran lafoul” sorti dan tou nasyon pe aprezan zwenn avek leres frer Zezi pour servi Bondye e an rezilta zot rezwir laprouvasyon Zeova. Sa se akoz zot demontre lafwa dan disan Zezi ki’n ganny verse e ki kapab sov zot. Pandan sa Renny mil an Kris ki pe vini, zot pou konn byenfe total ki sakrifis ranson pou anmennen pour zot e ptit-a-pti zot pou vin parfe.—Revelasyon 7:9, 14, 17; 21:3-5.
19. Ki bann manm sa “gran lafoul” i determinen pour fer?
19 Akoz tou sa bann byenfe pou vin pour sa “gran lafoul” bann adorater Bondye? Akoz zot determinen pour kontinyen annan lakrent pour Zeova par servi li avek respe ranpli avek ladmirasyon ek lobeisans. Anfet, lakrent pour Zeova i fer lavi gou la konmela e i ed nou pour “ganny vre lavi,” savedir lavi eternel dan nouvo lemonn Bondye.—1 Timote 6:12, 18, 19; Revelasyon 15:3, 4.
Eski ou Rapel?
• Akoz nou devret annan lakrent pour Bondye, e ki i vedir annan lakrent pour li?
• Ki lefe annan lakrent pour Bondye i devret annan lo nou kondwit?
• Ki bann byenfe sa ki annan lakrent pour Bondye i gannyen?
• Ki bann promes ki ed nou pour andire?
[Kestyon]
[Portre lo paz 29]
Bann ki annan lakrent pour Zeova i pridan kan zot ganny enterdi
[Portre lo paz 31]
Pli gran dibyen ki nou kapab fer pour nou prosen se pour partaz bon nouvel Rwayonm avek zot