Bann Pwen enteresan dan Liv Izai—1
Parol Zeova i vivan
Bann Pwen enteresan dan Liv Izai—1
“LEKEL ki mon pou anvoye, e lekel ki pou ale pour nou?” Kan Zeova ti fer sa lenvitasyon, Izai garson Amots ti reponn: “La mon la! Anvoy mwan.” (Izai 1:1; 6:8) Depi sa zour i ti ganny anvoye konman en profet. Sa ki i ti fer konman en profet in ganny ekri dan sa liv ki annan menm non avek li.
Sa liv ki’n ganny ekri par profet Izai, i kouver bann levennman ki’n arive pandan 46 zan, depi 778 A.N.L. ziska en pe letan apre 732 A.N.L. Sa liv i enkli mesaz kont Zida, Izrael ek bann lezot pei dan zalantour. Me mesaz prensipal dan sa liv i pa zizman, plito i ‘delivrans sorti kot Bondye.’ (Izai 25:9) Anfet, Izai i vedir “delivrans sorti kot Zeova.” Dan sa lartik nou pou diskit bann pwen enteresan depi Izai 1:1–35:10.
“ZIS EN PTI GIN KI POU RETOURNEN”
Labib pa dir si sa mesaz profetik dan sa senk premye sapit dan liv Izai, ti ganny anonse avan Izai ti vin en profet oubyen apre. (Izai 6:6-9) Me en keksoz ki nou asire i ki Zida ek Zerizalenm i malad spirityelman, “depi plak lipye ziska latet.” (Izai 1:6) Ladorasyon zidol in ranpli partou. Bann dirizan in vin koronpi. Bann madanm in vin orgeye. Bann dimoun pa pe servi Bondye konman i fodre. “Ankor e ankor,” Izai ti ganny anvoye pour al koz avek sa bann ki pa ti konpran oubyen ki pa ti anvi ganny konnesans.
Zida i dan lafreyer akoz Izrael ansanm avek Siri in menase pour atak li. Pour asir Zida ki sa lalyans ant Siri ek Izrael pa pou marse, Zeova ti servi Izai ek son bann zanfan “konman bann siny ek mirak.” (Izai 8:18) Me lape ki pou dire pour leternite pou selman posib atraver dominasyon “Prens Lape.” (Izai 9:6, 7) Zeova pou osi fer Lasiri rann kont, sa nasyon ki i servi konman “en baton pour tir [son] lakoler.” Finalman bann zabitan Zida pou ganny anmennen an egzil, me “zis en pti gin ki pou retournen.” (Izai 10:5, 21, 22) Vre lazistis pou vin en realite anba sa dominasyon ki ganny reprezante dan en fason senbolik par sa “pti brans ki’n pouse avek siko Zese.”—Izai 11:1.
Larepons pour bann Kestyon lo Labib:
1:8, 9—Dan ki fason fiy Siyon pou “reste deryer parey en payot dan en plantasyon rezen, parey en pti lakaz gardyen dan en plantasyon kokonm”? Kan bann Asiryen ti pou fer zot latak, Zerizalenm pa ti pou kapab defann zot lekor zis parey en senp payot dan en plantasyon rezen, oubyen en pti lakaz anpay ki fasilman degrengole dan en plantasyon kokonm. Me Zeova i vin sekour li e i anpes li vin parey Sodonm ek Gomor.
1:18—Ki sinifikasyon sa parol, “Aprezan, vini zot lepep, annou remet keksoz drwat antre nou”? Sa i pa en lenvitasyon pour fer en diskisyon pour finalman tonm lo en konklizyon apre ki zot in fini ekout kanmarad e pare pour sede. Plito, sa verse pe refer avek en renyon pour etabli lazistis, kot sa Ziz ki zis, Zeova, i donn Izrael en loportinite pour sanz son fason viv e rezet sa ki mal.
6:8a—Akoz sa de pronon “mwan” ek “nou” i ganny servi dan sa verse? Dan sa verse sa pronon “mwan” pe refer avek Zeova. E sa pronon “nou,” ki an pliryel i montre ki i annan ankor en lot dimoun avek Zeova. Byensir sa lot dimoun i pa lot ki “son sel Garson” ki i’n kree li tousel.—Zan 1:14; 3:16.
6:11—Akoz Izai ti demande: “Ziska kan O Zeova?” Izai pa ti pe demande ziska kan ki i pou anons mesaz Zeova avek en pep ki dir tande. Plito, i ti anvi konnen ziska ki tan sa pep ki ti malad spirityelman ti pou kontinyen anmenn laont lo non Bondye.
7:3, 4—Akoz Zeova ti sov move Lerwa Aaz? Bann lerwa Siri ek Izrael ti’n fer plan pour tir Lerwa Aaz Zida o pouvwar, e met garson Tabeel dan son plas, ki zot ti pou kapab kontrole. Deplis, i pa ti sorti dan desandans David. Sa ki Satan ti pe esey fer ti pou afekte sa lalyans pour en Rwayonm ki ti ganny fer avek David. Zeova ti sov Aaz pour protez sa desandans kot sa “Prens Lape” ti pou sorti parey in ganny promet.—Izai 9:6.
7:8—Konman Efraim ti pou ganny “kraze an pti morso” pour 65 an? “Pandan bann zour ki lerwa Peka,” ti o pouvwar Izrael, pa bokou letan apre ki Izai ti’n anons sa profesi, bann dimoun dan sa dis tribi ti konmans ganny deporte e sa pei ti rekonmans ranpli avek bann etranze. (2 Lerwa 15:29) Sa ti dire pour en kantite letan ziska dan bann zour Esar-Adonn Lerwa Lasiri, garson ek sikseser Senakerib. (2 Lerwa 17:6; Ezra 4:1, 2; Izai 37:37, 38) Parey i ganny fer resorti dan Izai 7:8, bann Asiryen ti’n bezwen fer dimoun sorti oubyen al Samari pandan 65 an.
11:1, 10—Konman Zezi Kri i kapab vin en “pti brans ki’n pouse avek siko Zese” e osi “rasin Zese”? (Romen 15:12) Zezi ti sorti dan “siko Zese” akoz i ti enn son desandans, atraver David ki ti en garson Zese. (Matye 1:1-6; Lik 3:23-32) Vi ki i ti ganny sa pouvwar konman en lerwa, sa ti annan en lefe lo son relasyon avek son bann zanset. Lefe ki i ti’n ganny sa pouvwar ek lotorite pour donn imen obeisan lavi eternel lo later, Zezi ti vin zot “Papa Eternel.” (Izai 9:6) Alors, i osi “rasin” son bann zanset, enkli Zese.
Leson pour nou:
1:3. Kan nou refize swiv sa ki nou Kreater i demann nou pour fer, i konmsi nou konn mwens keksoz ki en toro oubyen en bourik. De lot kote, kan nou devlop lapresyasyon pour tou sa ki Zeova in fer pour nou, sa pou toultan ed nou annan konprenezon e reste fidel avek li.
1:11-13. Bann seremoni relizye ki ipokrit ek bann lapriyer ki zis en repetisyon koumsa menm tousala i fatig Zeova. Tou keksoz ki nou fer, enkli nou lapriyer, nou devret fer li avek en bon motivasyon.
1:25-27; 2:2; 4:2, 3. Lesklavaz ti pou fini e Zida ti pou nepli reste dezerte kan bann Zwif ki ti’n repantir ti pou retourn Zerizalenm e reetablir vre ladorasyon. Zeova i montre son mizerikord anver sa bann ki repantir.
2:2-4. Kan nou partisip avek devouman dan sa travay predikasyon e pour fer disip, sa i ed bann dimoun dan tou pei pour konn sa semen lape e pour fer lape avek zot prosen.
4:4. Zeova pou retir oubyen lav tou bann aksyon sal oubyen imoral ek kriminalite.
5:11-13. Kan en dimoun napa kontrol oubyen napa moderasyon dan lafason ki i diverti, i pa pe azir dapre konnesans.—Romen 13:13.
5:21-23. Bann ansyen oubyen sirveyan i devret evite “vin saz dan zot prop lizye.” Zot devret osi “bwar diven” avek moderasyon e zot pa devret fer lapliferans.
11:3a. Lafason ki Zezi ti ansennyen ek son legzanp i montre ki ler nou annan lakrent pour Zeova sa i anmenn lazwa.
“ZEOVA POU PRAN PITYE POUR ZAKOB”
Sapit 13 ziska 23 i kontyen bann mesaz kont bann nasyon. Me “Zeova pou pran pitye pour Zakob,” akoz i pou les tou bann tribi Izrael retourn se zot. (Izai 14:1) Sapit 24 ziska 27 pa zis dir ki Zida pou reste dezerte me i osi promet ki i pou ganny restore. Zeova i ankoler avek “bann soular Efraim [Izrael],” akoz zot in fer en lalyans avek Siri. I osi ankoler avek bann “pret ek profet” Zida akoz zot in fer en lalyans avek Lasiri. (Izai 28:1, 7) Maler pour “Ariyel [Zerizalenm]” akoz zot in “met zot pare pour desann Lezip” pour ganny proteze. (Izai 29:1, not anba lo paz; 30:1, 2) Me kantmenm sa, sa bann ki ti annan lafwa dan Zeova ti pou ganny sove.
Zeova pou vey “Montanny Siyon” parey ‘en zenn lyon ki pe gronnyen akoz i pe vey sa zannimo ki i’n tyonbo.’ (Izai 31:4) En promes ti osi ganny fer: “Gete! En lerwa pou rennyen pour ladrwatir.” (Izai 32:1) Menas bann Asiryen kont Zida, ti menm fer “bann mesaze ki ti pe anons lape” plere en kantite, alors Zeova ti promet ki son pep pou ganny geri, ‘zot fot pou ganny pardonnen.’ (Izai 33:7, 22-24) “Zeova i vreman ankoler kont tou sa bann nasyon, e i montre son firer kont tou zot larme.” (Izai 34:2) Zida pa pou reste dezerte. “Dezer ek rezyon ki napa delo pou rezwir, e laplenn dezerte pou dan lazwa e i pou fleri parey safran.”—Izai 35:1.
Larepons pour bann Kestyon lo Labib:
13:17—Dan ki sans bann Med ti konsider larzan konman en nanryen ditou e zot pa ti pran plezir dan lor? Pour bann Med ek Pers zot ti ganny plis laglwar apre ki zot ti’n detri en pei, ki pran bann keksoz ki’n reste deryer apre en lager. Sa ti vre dan ka Siris, ki ti donn bann Zwif sorti an egzil lor ek larzan ki Neboukadnetsar ti’n pran dan tanp Zeova.
14:1, 2—Konman pep Zeova ti ‘kontrol sa bann ki ti’n fer zot prizonnyen’ e “fer sa bann ki ti pe fer zot travay soumet avek zot?” Sa ti vre pour Danyel ki ti annan en o plas Babilonn anba dominasyon bann Med ek Pers. I ti osi leka pour Ester ki ti vin larenn Pers; e Mordekay li i ti ganny apwente premye minis Pers.
20:2-5—Eski Izai ti vreman mars touni pour trwa zan? I posib ki Izai ti tir zis son lenz me pa konpletman touni, e sa mo Ebre ki’n ganny tradwir “touni” i kapab vedir osi i ti napa “preski nanryen lo li.”—1 Samyel 19:24, not anba lo paz.
21:1—Lekel sa landrwa ki ganny apele “lanmer dezerte”? Menm si Babilonn pa ti obor lanmer, Labib i refer avek li konman lanmer dezerte. Sa i akoz tou le zan ler larivyer Efrat ti deborde e larivyer Tig ti inonde, sa landrwa ti vin parey en “lanmer” ranpli avek labou.
24:13-16—Ki mannyer bann Zwif ‘parmi bann pep ti pou vin parey ler zot kas zoliv dan pye, parey ler zot anmas rezen ki’n ganny kit deryer apre rekolt’? Apre rekolt, en pe fri ti ganny lese lo pye oubyen en pe rezen dan plantasyon. Alors, zis en pti gin ki ti pou sirviv kan Zerizalenm ek Zida ti pou ganny detrir. Nenport landrwa sa bann sirvivan ti ganny anmennen, ki swa dan rezyon kot i annan “lalimyer [dan les Babilonn]” oubyen dan “bann zil dan lanmer [Lamediterane],” zot ti pou glorifye Zeova.
24:21—Lekel “sa larme anler” ek “bann lerwa lo later”? “Sa larme anler” i kapab pe refer avek bann demon. “Bann lerwa lo later,” i bann dirizan imen ki bann demon i annan en gran lenfliyans lo zot.—1 Zan 5:19.
25:7—Dan ki sans ‘tou bann dimoun in ganny anvlope, e latwal ki’n ganny fabrike pe kouver tou bann nasyon’? Sa konparezon i fer nou mazin sa de pli gran lennmi, pese ek lanmor.
Leson pour nou:
13:20-22; 14:22, 23; 21:1-9. Mesaz profetik Zeova i toultan vin vre, zis parey i ti leka avek Babilonn.
17:7, 8. Menm si laplipar Izraelit pa ti ekoute, serten ti rod Zeova. Pareyman, serten dimoun ki dir zot Kretyen i ekout sa mesaz Rwayonm.
28:1-6. Lasiri pou defet Izrael, me Bondye pou fer sir ki son bann fidel serviter pou reste vivan. Kan Zeova i anmenn zizman i pa les bann dimoun drwat san okenn lespwar.
28:23-29. Zeova i koriz bann dimoun senser dapre zot bezwen ek sirkonstans.
30:15. Pour ki Zeova i sov nou, nou bezwen annan lafwa. Nou demontre nou lafwa kan nou “repoze” oubyen kan nou evite fer bann plan avek imen an krwayan ki zot pou sov nou. Kan nou “reste kalm” oubyen nou pa per, nou montre ki nou annan konfyans ki Zeova i kapab protez nou.
30:20, 21. Nou ‘vwar’ Zeova e “tann” li kot pe koze pour delivre nou, kan nou rod son gidans dan son Parol enspire Labib, e atraver “lesklav fidel e pridan.”—Matye 24:45, NW.
Profesi Izai i batir nou Konfyans dan Parol Bondye
Pa nou vreman apresye sa mesaz sorti kot Bondye rikorde dan liv Izai! Sa bann profesi ki’n fini akonpli i batir nou konfyans ki ‘parol ki sorti dan labous Zeova pa pou retourn kot li san rezilta.’—Izai 55:11.
Me ki nou pou dir lo sa bann profesi lo Mesi dan Izai 9:7 ek 11:1-5, 10? Eski pa zot batir nou lafwa dan provizyon ki Zeova in fer pour sov nou? Sa liv i osi kontyen bann profesi ki son pli gran lakonplisman pe deza ganny realize ozordi, oubyen ki pou ganny akonpli plitar. (Izai 2:2-4; 11:6-9; 25:6-8; 32:1, 2) Anfet, sa liv i donn nou plis levidans ki “Parol Bondye i vivan”!—Ebre 4:12.
[Portre lo paz 6]
Izai ek son bann zanfan ti “konman bann siny ek mirak an Izrael”
[Portre lo paz 7]
Izrael ti pou vin “parey en payot dan en plantasyon rezen”
[Portre lo paz 8]
Konman bann dimoun dan lemonn antye pe ganny ede pour “forz zot lepe an pyos”?