Ki mannyer rekonnet sa vre Ladorasyon?

LAPLIPAR larelizyon i dir ki sa ki zot ansennyen i sorti kot Bondye. Alors nou bezwen swiv parol en zapot Zezi, ki apel Zan. I ti ekrir: “Byenneme, pa bezwen krwar tou sa ki pretann ki i posed lespri, me teste zot pour verifye si lespri ki zot posede i sorti kot Bondye, parski i annan bokou fo ansennyan dan lemonn.” (1 Zan 4:1) Ki mannyer nou kapab teste en keksoz pour vwar si i sorti kot Bondye?

Tou keksoz ki sorti kot Bondye i reflekte son personnalite, sirtou son kalite ki pli for, lanmour. Par egzanp, nou sans pour santi loder ki permet nou pour apresye loder bann zepis, bann fler oubyen dipen ki’n fek kwi, i en fason ki Bondye i eksprim son lanmour. Nou abilite pour vwar en soley kouse, oubyen vwar sourir en pti manrmay, i reflekte lanmour Bondye pour nou. I menm keksoz konsernan nou abilite pour tann zwazo sante, pour tann en zoli lanmizik, oubyen pour tann lavwa en dimoun ki nou kontan. Menm nou natir imen, kantmenm enparfe, i reflekte lanmour Bondye. Se pour sa ki nou souvan eksperyans sa laverite konsernan sa parol ki Zezi ti dir: “I annan plis lazwa pour donnen ki pour resevwar.” (Akt 20:35) Nou kontan eksprim lanmour akoz nou’n ganny fer dan “resanblans Bondye.” (Zenez 1:27) Menm si Zeova i annan bann lezot kalite, lanmour i sa enn ki pli remarkab dan son personnalite.

Tou mesaz ki sorti kot Bondye i devret reflekte son lanmour. Bann larelizyon dan lemonn i posed en kantite liv ki’n ganny ekrir depi byen lontan. Eski sa bann tel liv in reisi reflekte lanmour Bondye?

Larealite i ki laplipar bann pli vye liv relizye i eksplik en pti gin konsernan ki mannyer Bondye i kontan nou e ki mannyer nou kapab kontan Bondye. Alors, en kantite dimoun pa ganny okenn larepons ler zot demande, “Akoz nou vwar laprev lanmour Bondye atraver kreasyon tandis ki soufrans ek lemal i kontinyen?” Parkont Labib i sa pli vye liv relizye ki eksplik dan en fason byen detaye lanmour Bondye. I osi ansenny nou ki mannyer pour demontre lanmour anver lezot.

Sa Liv ki koz lo Lanmour

Parol Bondye, Labib, i revel Zeova konman sa “Bondye lanmour.” (2 Korentyen 13:11) Labib i dekrir ki mannyer lanmour ti pous Zeova pour donn bann premye imen lavi, san zanmen ki zot bezwen konn maladi ek lanmor. Me rebelyon kont lotorite Bondye in anmenn soufrans lo limanite. (Deterononm 32:4, 5; Romen 5:12) Zeova ti azir pour reganny sa ki ti’n perdi. Parol Bondye i dir: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi  eternel.” (Zan 3:16) Lekritir sen i revel lanmour Bondye plis ankor ler i dekrir ki mannyer Bondye in etablir en gouvernman parfe anba renny Zezi pour anmenn lape pour bann imen obeisan.—Danyel 7:13, 14; 2 Pyer 3:13.

Labib i fer en rezimen responsabilite ki imen i annan par sa bann parol: “Kontan Senyer ou Bondye avek tou ou leker, avek tou ou lam, e avek tou ou lespri. Sa se premye e pli gran konmannman. E dezyenm konmannman i parey li: ‘Kontan ou prosen parey ou kontan ou prop lekor.’ Lalwa antye . . . i depann lo sa de konmannman.” (Matye 22:37-40) Labib i afirmen ki i’n ganny enspire par Bondye. Vi ki i klerman reflekte son personnalite, nou kapab asire ki i sorti kot sa “Bondye lanmour.”—2 Timote 3:16.

Par aplik zis sa enn standar, nou kapab idantifye lekel sa pli vye liv ki vreman sorti kot Bondye. Dimoun i kapab osi idantifye bann vre adorater par zot lanmour, akoz zot imit Bondye dan lafason ki zot demontre lanmour.

Ki mannyer idantifye Dimoun ki kontan Bondye?

I fasil pour remark bann ki vreman kontan Bondye, sirtou la konmela ki nou pe viv dan sa letan ki Labib i apel “bann dernyen zour.” Dimoun pe vin deplizanpli “egois, kontan larzan, . . . kontan plezir plis ki Bondye.”—2 Timote 3:1-4.

Ki mannyer ou kapab rekonnet dimoun ki kontan Bondye? Labib i dir: “Annefe, la lanmour Bondye: ki nou obei son konmannman.” (1 Zan 5:3) Lanmour pour Bondye i pous dimoun pour respekte bann standar moral Labib. Par egzanp, Parol Bondye i annan bann lalwa konsernan sèks ek maryaz. Relasyon seksyel i ganny otorize zis pour bann ki’n marye, e maryaz i devret dire pour lavi. (Matye 19:9; Ebre 13:4) Kan en madanm Lespanny ki ti pe etidye larelizyon ti asiste en renyon kot bann Temwen Zeova ti pe etidye avek lantouzyasm bann lalwa moral dan Labib, i ti fer sa remark: “Apre sa renyon mon ti santi mon fortifye, pa zis par leklersisman sa diskour baze lo Labib, me osi par sa linite ki egziste parmi zot, zot standar moral tre onivo ek zot bon kondwit.”

Anplis ki kontan Bondye, bann vre Kretyen i fasilman ganny remarke par lafason ki zot montre lanmour pour zot prosen. Zot travay pli enportan se pour pres avek lezot konsernan sa sel lespwar pour limanite, sa i Rwayonm Bondye. (Matye 24:14) Napa nanryen ki kapab anmenn plis byenfe dirab pour nou prosen ki ed zot ganny konnesans lo Bondye. (Zan 17:3) Bann vre Kretyen i osi demontre zot lanmour dan lezot fason ankor. Zot donn led dan en fason pratik avek bann ki pe soufer. Par egzanp, kan en tranblemandeter ti koz en dezas Itali, en zournal lokal ti dir ki bann Temwen Zeova “in travay dan en fason itil, zot ti ed bann ki ti pe soufer san gete ki larelizyon zot ladan.”

Apard ki kontan Bondye ek zot prosen, bann vre Kretyen i kontan kanmarad. Zezi ti dir: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.”—Zan 13:34, 35.

Eski dimoun i kapab vwar ladiferans dan sa lanmour ki bann vre Kretyen i annan pour kanmarad? Ema, en madanm ki netway lakaz i dir wi. I travay La Paz, kapital Bolivi, kot i annan diferan group etnik e sa i koz divizyon ant bann ris ek pov. I dir: “Premye fwa ki mon ti asiste en renyon Temwen Zeova, mon ti vwar en zennonm byen sanze ki ti pe asize e fer en konversasyon avek en zenn fiy Endyen ki’n ne dan sa pei. Zanmen mon’n deza vwar sa avan. Apartir sa moman, mon ti konnen ki zot ti bezwen pep Bondye.” Pareyman, en zenn madanm sorti Brezil ki apel Miriam ti dir: “Mon pa ti konnen ki mannyer pour trouv lazwa, menm dan mon fanmiy. Premye fwa mon ti vwar lanmour pe ganny demontre par aksyon,  ti parmi Temwen Zeova.” Dan Letazini, en direkter pour en stasyon televizyon ti ekrir: “Si plis dimoun ti viv parey dimoun dan zot larelizyon i fer, sa nasyon pa ti pou dan sa sitiasyon ki i ladan. Mon enn sa zournalis televizyon ki konnen ki zot lorganizasyon i baze lo lanmour ek en lafwa solid dan Kreater.”

Rod sa vre Ladorasyon

Lanmour i sa laspe ki disteng sa vre ladorasyon. Ler en dimoun in trouv sa vre larelizyon, Zezi ti konpar sa, konmsi i’n trouv sa bon semen e swazir pour mars lo la. I sa sel semen ki anmenn ver lavi eternel. Zezi ti dir: ‘Antre par laport etrwat! Akoz laport i larz, semen i fasil ki anmenn perdisyon, e i annan bokou ki pas par la. Me laport i etrwat, e semen i difisil ki anmenn dan lavi, napa bokou ki trouv li.’ (Matye 7:13, 14) Zis en sel group vre Kretyen ki mars dan linite avek Bondye lo sa semen vre ladorasyon. Alors, i enportan sa swa ki ou fer kan ou swazir en larelizyon. Si ou trouv sa semen e ou swazir pour mars lo la, ou pou’n trouv sa meyer fason pour viv ou lavi akoz i sa semen lanmour.—Efezyen 4:1-4.

Zis mazinen ki lazwa ou kapab gannyen kan ou mars lo semen sa vre ladorasyon! I konmsi ou pe mars avek Bondye. Bondye i kapab ansenny ou konsernan lasazes ek lanmour pour ou apresye en bon relasyon avek lezot. I kapab osi fer ou konnen ki bi lavi, pour ou kapab konpran bann promes Bondye e annan lespwar pour lavenir. Ou pa pou zanmen regrete pour rode lekel sa vre ladorasyon.

[Portre lo paz 3]

Parmi bann pli vye liv relizye zis Labib ki revel lanmour Bondye

[Portre lo paz 5]

Bann vre Kretyen zot ganny rekonnet akoz zot pratik vre lanmour