“Zanfan, i zot Devwar obei zot Paran”

“Zanfan, i zot devwar obei zot paran dan Senyer, akoz sa i byen.”—EFEZYEN 6:1.

1. Ki mannyer obeir i kapab protez nou?

PETET nou ankor vivan akoz en serten moman dan nou lavi nou ti obeir, ler lezot in mor akoz zot pa ti obeir. Obei kwa? Obeir ler nou lekor ki’n “ganny fer dan en fason merveye” i averti nou. (Psonm 139:14) Petet, nou lizye i vwar letan pe anmase, nou zorey i tann tapaz loraz. En sel kou, zekler i fer nou sote. Pour en dimoun ki kapab rekonnet danze, sa i fer li konpran ki i’n ler pour li rod en landrwa kasyet akoz zekler oubyen en gro lavalas i kapab met son lavi dan risk.

2. Akoz zanfan i bezwen ganny averti, e akoz zot devret obei zot paran?

² Zot, bann zenn, zot bezwen ganny averti konsernan bann danze ki kapab annan, e i responsabilite ou paran pour fer sa. Kekfwa ou ankor rapel: “Pa tous kouker, i so.” “Pa al zwe dan larivyer, i danzere.” “Get tou le de kote avan ou koup semen.” I regretab ki serten zanfan in ganny dimal oubyen in ganny touye akoz zot pa ti ekout zot paran. Obei ou paran i “byen,” i apropriye e normal. I osi saz pour fer sa. (Proverb 8:33) En lot verse dan Labib i dir ki sa i “fer plezir” nou Senyer Zezi Kri. Wi vreman, se Bondye ki demann ou pour obei ou paran.—Kolosyen 3:20; 1 Korentyen 8:6.

En Rekonpans dirab pour bann ki obeir

3. Kisisa “vre lavi” pour preski nou tou, e konman bann zanfan i kapab resevwar sa rekonpans?

³ Obei ou paran i protez ou “lavi dan letan prezan” me i pou fer li posib pour ou ganny lavi “dan lavenir,” ki osi ganny apele “vre lavi.” (1 Timote 4:8; 6:19) Pour preski nou tou, vre lavi i lavi eternel dan nouvo lemonn Bondye ki’n ganny promet avek bann ki fidelman obei son bann komannman. Enn sa bann komannman tre enportan i dir: “ ‘Respekte zot papa ek zot manman’: Sa i premye konmannman avek en promes; ‘Pour ki ou a viv ere e lontan lo later.’” Alor si ou obei ou paran, ou pou ere. Ou lavenir pou asire e ou pou kapab ere pour lavi eternel dan paradi lo later!—Efezyen 6:2, 3.

4. Ki mannyer bann zanfan i kapab onor Bondye e konman zot pou benefisye?

⁴ Ler ou respekte oubyen onor ou paran par obei zot, ou pe osi onor Bondye akoz se li ki’n demann ou pour obei ou paran. E anplis ki sa, ou menm ki benefisye. Labib i dir: “Mwan Zeova, mon ou Bondye, sa Enn ki pe ansenny ou pour ou prop byenfe.” (Izai 48:17; 1 Zan 5:3) Ki mannyer lobeisans i benefisye ou? I fer ou manman ek ou papa kontan, e alor zot pou fer fason pour fer ou plezir. (Proverb 23:22-25) Me sa ki pli enportan, ou lobeisans i fer ou Papa dan lesyel kontan, e i pou rekonpans ou dan en fason merveye! Annou vwar ki mannyer Zeova ti beni e protez Zezi ki ti dir lo li menm: “Mon touzour fer sa ki fer li plezir.”—Zan 8:29.

Zezi ti travay dir

5. Ki rezon nou annan pour krwar ki Zezi ti travay dir?

⁵ Zezi ti premye garson son manman  Mari. Son papa sonnyen Zozef ti sarpantye. Li osi Zezi ti aparaman aprann son metye avek Zozef e i ti vin sarpantye. (Matye 13:55; Mark 6:3; Lik 1:26-31) Dapre ou, ki kalite sarpantye Zezi ti ete? Zezi ti dan lesyel avan ki Mari ti ganny li gras a en mirak Bondye. Dan en verse Labib, Zezi i ganny dekrir konman lasazes ki pe koze. La Zezi ti dir: “Mon ti vin en zouvriye abil akote [Bondye], e mon ti sa enn ki i ti sirtou atase avek de zour an zour.” Sa ki Bondye ti kontan avek Zezi, se ki i ti travay dir. Ki ou panse alor, eski ler Zezi ti ankor zenn lo later i ti fer bokou zefor pour li travay dir, pour li vin en bon sarpantye?—Proverb 8:30; Kolosyen 1:15, 16.

6. (a) Akoz ou panse Zezi ti’n bezwen travay kot lakour? (b) Ki mannyer zanfan i kapab imit Zezi?

⁶ I evidan ki ler Zezi ti ankor manrmay, i ti zwe bann zwe parler parey Labib i mansyonnen bann zanfan ti fer dan letan Labib. (Zekarya 8:5; Matye 11:16, 17) Me selman, ou bezwen realize ki pli gran zanfan en fanmiy pov ti pou bezwen ede kot lakour e osi aprann en travay avek Zozef pour li vin sarpantye. Avek letan, Zezi ti konmans prese e ti sitan devoue dan son minister ki parler i ti bezwen sakrifye son konfor personnel. (Lik 9:58; Zan 5:17) Eski ou trouve ki mannyer ou kapab fer parey Zezi? Eski ou paran i demann ou pour netway ou lasanm oubyen fer lezot louvraz kot lakour? Eski zot ankouraz ou pour ador Bondye par asiste bann renyon Kretyen e koz lo ou lafwa avek lezot? Dapre ou, ki Zezi ti pou’n fer dan ou plas?

Zezi ti en bon Etidyan ek en bon Ansennyan

7. (a) Avek lekel Zezi in kapab vwayaze pour al lafet Lapak? (b) Kote Zezi ti ete ler son fanmiy ti pe retourn kot zot e akoz i ti laba?

⁷ Tou zonm ek garson en fanmiy Izraelit ti ganny demande pour al kot tanp pour ador Zeova zour sa trwa lafet Zwif. (Deterononm 16:16) Ler Zezi ti annan 12 an, i paret ki tou son fanmiy ti fer sa vwayaz pour al Zerizalenm pour lafet Lapak. I tre probab ki son bann demi frer ek ser ti la osi. Kekfwa dan bann ki ti vwayaz dan group Zezi, i ti annan osi Salome, ki paret ti ser Mari, avek son msye Zebede ek zot bann garson Zak ek Zan ki plitar ti vin zapot. * (Matye 4:20, 21; 13:54-56; 27:56; Mark 15:40; Zan 19:25) Ler zot ti pe retourn se zot, Zozef ek Mari ti probableman krwar ki Zezi ti avek son bann fanmiy, alor premye kou zot pa ti realize si i pa ti la. Trwa zour plitar, ler Mari ek Zozef ti  finalman retrouv Zezi, i ti dan tanp, “pe asize parmi bann profeser, i ti pe ekout zot e kestyonn zot.”—Lik 2:44-46.

8. Ki Zezi ti fer dan tanp, e akoz dimoun ti etonnen?

⁸ Ki savedir ler i dir ki Zezi ti pe “kestyonn” sa bann ansennyan? I paret ki sa pa pe refer zis avek demann ennde kestyon pour konn en pe plis lenformasyon oubyen par kiryozite. Sa mo Grek “kestyonnen” ki ganny servi isi i kapab annan pour fer avek kestyon ki en ziz i demande e ki kapab enkli bann lezot kestyon pour verifye si en dimoun pe vreman dir laverite. Wi, menm si i ti ankor byen zenn, Zezi ti’n vin en etidyan Labib e sa ti sirprann bann ansennyan relizye byen edike! Labib i dir: “Tou dimoun ki ti tann li, ti etonnen par son lentelizans ek son repons.”—Lik 2:47.

9. Ki mannyer ou kapab swiv legzanp Zezi pour etidye Labib?

⁹ Parey nou fek vwar menm bann ansennyan relizye byen edike ti sirprann avek konnesans ki Zezi ti annan lo Labib. Ki mannyer sa ti posib vi ki Zezi ti ankor byen zenn? Vi ki paran Zezi ti annan lakrent pour Bondye, i evidan ki zot ti ansenny li lo Parol Bondye depi ptipti. (Egzod 12:24-27; Deterononm 6:6-9; Matye 1:18-20) Nou asire ki ler Zezi ti ankor zenn, Zozef ti anmenn li kot sinagog pour ekout Parol Bondye pe ganny lir e eksplike. Eski ou osi ou annan sa privilez pour annan bann paran ki etidye Labib avek ou e ki anmenn ou dan bann renyon Kretyen? Eski ou apresye zot zefor parey Zezi ti kontan zefor son paran? Eski ou osi parey Zezi, ou kontan koz avek lezot lo sa ki ou aprann?

Zezi ti obei son Paran

10. (a) Akoz paran Zezi ti’n kapab konnen kote pour trouv Zezi? (b) Ki tre bon legzanp Zezi in kite pour bann zanfan?

¹⁰ Dapre ou, ki mannyer Mari ek Zozef ti santi ler zot ti finalman trouv Zezi dan tanp apre trwa zour ki zot ti pe rod li? I evidan ki zot ti santi zot soulaze. Zezi li parkont ti sirprann pour vwar ki son paran pa ti konnen kot i ete. Pa tou le de ti konnen ki i ti ne par en mirak Bondye? E menm si zot pa ti konn tou detay, zot ti bezwen konnen ki plitar Zezi ti pou vin Sover ek Lerwa dan Rwayonm Bondye. (Matye 1:21; Lik 1:32-35; 2:11) Pour sa rezon, Zezi ti demann zot: “Akoz ki zot ti rod mwan? Zot pa konnen ki mon bezwen dan lakaz mon Papa?” Me selman, akoz i ti obeisan, Zezi ti kit sa landrwa e retourn se li Nazaret avek son paran. Labib i dir: “I ti kontinyen obei zot.” Deplis, “son manman ti gard [tou sa bann parol] dan son leker.”—Lik 2:48-51.

11. Ki leson lo lobeisans ou kapab tire avek legzanp Zezi?

¹¹ Eski ou vwar li fasil pour touzour obeir ou paran parey Zezi? Ouswa souvan-d-fwa ou santi zot pa konpran sa lemonn modern ki ou pe viv ladan e ki ou konn plis ki zot? Nou dakor ki ou kapab konn plis ki zot lo konman pour servi en mobayl, en konpiter oubyen lezot lekipman modern. Me mazin en kou Zezi, akoz son “lentelizans ek son repons,” bann ansennyan byen edike ti sirprann. Ou pou dakor pour dir ki Zezi ti konn plis ki ou. Pourtan, Zezi ti obei son paran. Sa pa vedir ki i ti neseserman dakor avek tou zot desizyon. Me selman, “i ti kontinyen obei zot” toudilon son ladolesans. Ki ou panse, ki leson ou kapab tire avek son legzanp?—Deterononm 5:16, 29.

Obeir i pa fasil

12. Ki mannyer obeir i kapab sov ou lavi?

¹² I pa toultan fasil pour obei lord nou paran. Par egzanp, en pe letan pase, de pti fiy ti pe al koup semen kot i annan bokou trafik, olye pas lo en pon parlao semen. Zot ti dir en lot pti garson ki ti pe al pas lo sa pon: “Annou Zan, pas bor isi, vini!” Vi ki i ti en pe ezite, enn sa pti fiy ti dir: “E ou la, ou per ou!” Menm si Zan pa ti per, i ti dir: “Mon pe ekout  mon manman, mwan.” Ler i ti lo sa pon, i ti tann en gro tapaz loto, ler i ti gete i ti vwar sa de pti fiy ti’n ganny tape avek en loto. Enn ti mor, lot ti bezwen koup en kote lipye. Pourtan, manman sa de pti fiy ti’n dir zot pas lo sa pon. Plitar i ti dir manman Zan, “Mon ti a prefere mon de fiy ti ava osi obeisan ki ou garson.”—Efezyen 6:1.

13. (a) Akoz ou devret obei ou paran? (b) Kan i pou apropriye pour en zanfan pa fer sa ki son paran i dir li fer?

¹³ Akoz Bondye i dir: “Zanfan, i zot devwar obei zot paran”? Ler ou obei ou paran, ou osi obei Bondye. Deplis ou paran i annan plis leksperyans ki ou dan lavi. Par egzanp, senk an avan aksidan sa de pti fiy, manman Zan ti annan en zanmi ki son zanfan ti ganny touye ler i ti pe koup sa menm semen! I vre ki i pa touzour fasil pour obei ou paran, me Bondye i dir ou, ou devret fer li. Parkont, si ou paran oubyen lezot dimoun i dir ou vole, koz lalang oubyen nenport kwa ki kas lalwa Bondye, ou bezwen “obei Bondye plito ki zonm.” Sanmenm sa rezon ki Labib i dir “obei zot paran dan Senyer,” ler i dir “dan Senyer” sa i vedir obei ou paran dan tou sa ki zot demann ou ki an armoni avek lalwa Bondye.—Akt 5:29.

14. Akoz lobeisans i pli fasil pour en dimoun parfe, selman akoz en dimoun parfe i ankor kapab aprann lo lobeisans?

¹⁴ Ki ou panse, si ou ti parfe, setadir “san okenn pese, separe avek tou bann peser” parey Zezi ti ete, eski i ti pou touzour fasil pour ou obei ou paran? (Ebre 7:26) Si ou ti parfe, ou pa ti pou anvi fer sa ki mal parey i leka la konmela. (Zenez 8:21; Psonm 51:5) Me menm Zezi ti aprann ankor serten leson lo lobeisans. Labib i dir: “Menm ki [Zezi] ti Garson [Bondye] i ti aprann lobeisans atraver sa ki i ti soufer.” (Ebre 5:8) Ki mannyer sa bann soufrans ti ed Zezi pour aprann lobeisans, en leson ki i pa ti’n zanmen aprann dan lesyel?

15, 16. Ki mannyer Zezi ti aprann lobeisans?

¹⁵ Avek gidans Zeova, Zozef ek Mari ti protez Zezi pour li pa ganny okenn dimal ler i ti ankor zanfan. (Matye 2:7-23) Avek letan selman, Zeova ti aret protez Zezi dan en fason mirakile. Soufrans fizik e mantal ti vin sitan gran ki Labib i dir ki Zezi “ti ofer son lapriyer ek son siplikasyon, avek leokri ek larm.” (Ebre 5:7) Kan sa ti arive?

¹⁶ Sa ti arive dan bann dernyen moman lavi Zezi lo later ler Satan ti fer tou pour kas son fidelite. Pour Zezi, i ti telman fer mal pour li ganny touye konman en brigan e sali repitasyon son Papa ki “i ti priy plis ankor [dan zarden Zetsemane]; son transpirasyon ti tonm ater parey gro gout disan.” Pa lontan apre sa, i ti mor en lanmor martir lo en poto e sa ti telman kriyel ki Zezi ti fer ‘leokri e vers larm’ akoz sa gro douler ki i ti pe pas ladan. (Lik 22:42-44; Mark 15:34) Alor “i ti aprann lobeisans atraver sa ki i ti soufer” e dan sa fason i ti fer leker son Papa kontan. Aprezan dan lesyel, Zezi i konpran nou soufrans sak fwa ki nou lager pour demontre lobeisans.—Proverb 27:11; Ebre 2:18; 4:15.

Aprann pour obeir

17. Ki mannyer ou devret reazir ler ou ganny disiplinen?

¹⁷ Ler ou papa oubyen ou manman i disiplin ou, sa i montre ki zot pe rod sa ki pli meyer pour ou, akoz zot kontan ou. Labib i demande: “Lekel sa garson ki son papa pa koriz  li?” Pa i ti pou vreman regretab si ou paran pa ti vreman kontan ou e pa pran letan e fer sa zefor pour koriz ou? Pour sa menm rezon, akoz Zeova i kontan ou, i koriz ou. I vre “pour sa moman, koreksyon i rann malere plito ki donn lazwa, me pli tar, i prodwi fri lape ek lazistis pour tou bann ki’n ganny disiplinen par li.”—Ebre 12:7-11.

18. (a) Si ou paran i disiplin ou, ki sa i demontre? (b) Ki bon lefe disiplin in fer lo serten dimoun?

¹⁸ En lerwa dan ansyen Izrael ki Zezi ti dir i ti vreman saz ti koz lo nesesite en koreksyon ranpli avek lanmour sorti kot bann paran. Salomon ti dir: “Sa enn ki pa oule servi son baton i ay son garson, me sa enn ki kontan li i vreman rod li avek disiplin.” Salomon ti menm dir ki sa enn ki ganny en koreksyon avek lanmour i kapab sov son lavi. (Proverb 13:24; 23:13, 14; Matye 12:42) En ser Kretyen i ankor rapel ki ler i ti manrmay e i ti fer ensinifyan kot lasal, son papa ti dir li ki i pou ganny disiplinen kot lakour. Aprezan i annan en bon souvenir lo ki mannyer son papa ti disiplin li avek lanmour e ki sa in ed li reisi dan lavi.

19. Akoz i vreman enportan ki ou obei ou paran?

¹⁹ Si ou paran i annan ase lanmour pour ou pour zot pran letan e fer zefor pour disiplin ou avek lanmour, ou devret vreman apresye. Obei ou paran parey nou Senyer Zezi Kri ti obei son paran Zozef ek Mari. Me sirtou fer li akoz se ou Papa dan lesyel, Zeova ou Bondye ki dir ou fer sa. Alors ou menm ki pou benefisye, e osi “pour ki ou a viv ere e lontan lo later.”—Efezyen 6:2, 3.

[Not anba lo paz]

Ki ou pou reponn?

• Ki lavantaz i annan pour bann zanfan obei zot paran?

• Ler Zezi ti ankor zanfan, ki legzanp i’n kite an sa ki konsern lobeisans?

• Ki mannyer Zezi ti aprann lobeisans?

[Kestyon]

[Portre lo paz 20]

Ler Zezi ti annan douz an i ti deza konn tre byen Labib