Avek Limilite soumet avek bann bon Berze
Avek Limilite soumet avek bann bon Berze
“Obei zot bann dirizan e [soumet avek] zot lord.”—EBRE 13:17.
1, 2. Kote dan Labib i montre ki Zeova ek Zezi i bann bon Berze?
BONDYE ZEOVA ek son Garson, Zezi Kri i bann bon Berze. Izai ti profetiz lo zot: “Gete! Souvren Senyer Zeova li menm pou vin konman sa enn ki for, e son lebra pou diriz pour li. . . . Parey en berze, i pou pran swen avek son prop troupo. Avek son lebra i pou rasanble bann pti mouton ansanm; e i pou anmenn zot dan son lebra. Dousman, i pou montre semen bann ki pe donn tete.”—Izai 40:10, 11.
2 Sa profesi ti anonse ki serten Zwif ti pou retourn dan zot pei, Zida. Sanmenm ki ti arive an 537 A.N.L., sa ti premye lakonplisman sa profesi. (2 Kronik 36:22, 23) I ti annan en lot lakonplisman ler bann Kretyen swazir ki ankor lo later ti ganny delivre avek “Gran Babilonn” an 1919 par Zezi Kri, ki ti ganny reprezante par Siris. (Revelasyon 18:2; Izai 44:28) Se li ki “lebra” Zeova pour dirize, rasanble mouton e pran swen avek zot avek tandres. Zezi ti dir: “Mwanmenm bon berze. Mon konn mon bann mouton, e mon bann mouton zot konn mwan.”—Zan 10:14.
3. Ki mannyer Zeova i demontre en lentere senser par lafason ki son bann mouton i ganny trete?
3 Profesi dan Izai 40:10, 11 i montre ki konman en bon berze, Zeova pe pran swen son pep avek tandres. (Psonm 23:1-6) Ler i ti lo later, Zezi osi ti demontre tandres ek lentere dan son bann disip ek lezot dimoun an zeneral. (Matye 11:28-30; Mark 6:34) Zeova ek Zezi pa ti kontan lafason dir e san pider ki bann berze oubyen sef Izrael ti abiz e negliz lepep. (Ezekyel 34:2-10; Matye 23:3, 4, 15) Zeova ti promet: “Mon pou sov mon bann mouton, e zot pou nepli en keksoz ki ganny depouye; e mon pou ziz ant mouton ek mouton. E mon pou swazir en sel berze pour zot, e i pou bezwen nouri zot, wi mon serviter David. Li menm ki pou nouri zot, e li menm ki pou vin zot berze.” (Ezekyel 34:22, 23) Dan sa letan lafen, Zezi Kri ki ti ganny reprezante par David, i sa “sel berze” ki Zeova in apwente lo Son bann serviter lo later, tou le de bann Kretyen swazir ek ‘lezot mouton.’—Zan 10:16.
Kado Bondye pour Kongregasyon
4, 5. (a) Ki kado presye Zeova in donn son pep lo later? (b) Ki kado Zezi in donn son kongregasyon?
4 Zeova ti swazir en “sel berze,” Zezi Kri, pour pran swen avek Son bann serviter lo later, sa ti en kado presye pour kongregasyon Kretyen. Sa kado setadir sa Lider dan lesyel ti ganny anonse dan Izai 55:4: “Gete! Mon’n donn li konman temwen pour bann pep, konman en lider ek en komandan pour bann pep.” Tou le de bann Kretyen swazir ek bann ki dan sa “gran lafoul” in ganny rasanble, zot sorti dan bann nasyon, tribi, pep e zot koz diferan langaz. (Revelasyon 5:9, 10; 7:9) Zot tou zot en sel kongregasyon enternasyonal, en “sel troupo,” anba lotorite en “sel berze,” Kris Zezi.
5 Zezi osi in donn en zoli kado avek son kongregasyon lo later. I’n fourni kongregasyon avek bann berze fidel ki anba son lotorite. Parey li ek son papa Zeova, zot pe pran swen kongregasyon avek tandres. Zapot Pol ti koz lo sa zoli kado dan son let pour kongregasyon Efez. I ti ekrir: “‘Ler i ti mont dan son landrwa lao, I ti anmenn avek li bann ki i ti’n ganny laviktwar [lo la]; I ti ofer son kado [setadir sa bann zonm] lo later.’ Se limenm li ki’n etabli serten konman zapot, serten konman profet, serten konman levanzelis, serten konman paster [oubyen berze], ou serten konman ansennyan, pour [redres bann sen, pour en travay ministeryel, pour] konstriksyon lekor Kris.”—Efezyen 4:8, 11, 12.
6. Ki mannyer bann Kretyen swazir ki dan bann konsey ansyen ti ganny dekrir dan Revelasyon 1:16, 20, e ki nou kapab dir osi lo bann ansyen ki dan group lezot mouton?
6 Sa bann “kado” i bann sirveyan oubyen ansyen, ki’n ganny apwente par Zeova ek son Garson, atraver lespri sen, pour pran swen kongregasyon avek tandres. (Akt 20:28, 29) Okonmansman tou sa bann sirveyan ti bann frer Kretyen swazir. Sa bann Kretyen swazir ki servi lo bann konsey ansyen ti ganny reprezante dan Revelasyon 1:16, 20 par bann “zetwal” oubyen “lanz” dan lanmen drwat Kris, setadir anba son kontrol. Me dan letan lafen, lakantite ansyen ki osi bann Kretyen swazir pe diminyen, e mazorite bann ansyen dan bann kongregasyon i dan group lezot mouton. Vi ki zot ganny apwente par bann reprezantan Konsey Direkter anba gidans lespri sen, nou kapab dir ki zot osi zot dan lanmen drwat Zezi Kri, sa Bon Berze, setadir anba son lotorite. (Izai 61:5, 6) Vi ki bann ansyen dan nou bann kongregasyon pe soumet anba lotorite Kris, Sef kongregasyon, zot merite resevwar tou nou korperasyon.—Kolosyen 1:18.
Obeir e soumet
7. Ki konsey zapot Pol ti donnen konsernan nou latitid vizavi bann sirveyan Kretyen?
7 Nou de Berze dan lesyel, Bondye Zeova ek Zezi Kri, i ekspekte ki nou obeir e soumet avek sa bann zonm ki zot in donn sa responsabilite konman berze dan kongregasyon. (1 Pyer 5:5) Zapot Pol ti ganny enspire pour ekrir: “Mazin zot bann dirizan ki’n anons zot parol Bondye; get [byen] zot mannyer viv, e imit zot lafwa. Obei zot bann dirizan e swiv [oubyen soumet avek] zot lord; parski zot pe kontinyelman vey lo zot lam, konman bann dimoun ki bezwen rann kont lo zot size. Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.”—Ebre 13:7, 17.
8. Ki Pol i demann nou pour “get [byen],” e ki mannyer nou devret demontre nou lobeisans?
8 I enteresan ki Pol i envit nou pour “get [byen]” ouswa egzamin oprofon rezilta kondwit fidel bann ansyen e pour swiv zot legzanp lafwa. Deplis, i konsey nou pour obeir e soumet avek gidans sa bann zonm. En spesyalis Labib, R. France i eksplike ki sa mo Grek pour “obei” i pa “sa mo ki ordinerman ganny servi pour en dimoun ki obeir, me plito sa mo i vedir ki en dimoun in ‘ganny persyade’ andotmo i aksepte volonterman [pour obei] sa lotorite.” Nou obei bann ansyen pa zis akoz nou ganny demande pour fer li dan Parol Bondye me osi akoz nou asire ki zot annan lentere Rwayonm aker e zot oule sa ki pli bon pour nou. Nou konnen ki nou pou ere si nou pare pour aksepte zot lotorite.
9. Nou bezwen obeir, me akoz i neseser pour soumet osi?
9 Be si nou pa asire si sa ki bann ansyen i dir lo en serten size i pli bon fason fer keksoz? Se la ki nou bezwen soumet. I fasil pour nou obeir ler tou keksoz i kler e nou dakor, me nou pou montre ki nou soumet si nou pare pour aksepte menm ler nou pa tro konpran akoz tel tel keksoz i ganny fer dan sa fason. Pyer ki plitar ti vin en zapot, ti demontre sa kalite soumisyon.—Lik 5:4, 5.
Kat Rezon pour nou volonterman korpere avek bann Ansyen
10, 11. Ki mannyer bann sirveyan in “anons Parol Bondye” avek lezot Kretyen dan premye syek e ozordi?
10 Dan Ebre 13:7, 17, ki’n ganny site pli boner, zapot Pol i donn nou kat rezon akoz nou devret obeir e soumet avek bann sirveyan Kretyen. Premye, se akoz zot in “anons [nou] Parol Bondye.” Mazinen ki sa bann “kado [oubyen] zonm” in ganny donnen par Zezi pour ‘redres bann sen.’ (Efezyen 4:11, 12) I ti koriz pwennvi ek kondwit bann Kretyen dan premye syek atraver bann berze fidel, ennde ladan ti ganny enspire pour ekri bann let pour bann kongregasyon. I ti osi servi sa bann sirveyan ki ganny apwente par lespri sen pour gid e batir bann premye Kretyen.—1 Korentyen 16:15-18; 2 Timote 2:2; Tit 1:5.
11 Ozordi, Zezi pe diriz nou par mwayen ‘lesklav fidel e pridan’ ki ganny reprezante par son Konsey Direkter e osi bann ansyen dan Kongregasyon. (Matye 24:45) Vi ki nou annan respe pour sa “sef Berze,” Zezi Kri, nou swiv konsey zapot Pol ki ti dir: “Mon demann zot pour respekte bann ki travay [dir] parmi zot, bann ki annan responsabilite pour diriz zot e ansenny zot.”—1 Pyer 5:4; 1 Tesalonisyen 5:12; 1 Timote 5:17.
12. Ki mannyer bann sirveyan i “kontinyelman vey” lo nou?
12 En dezyenm rezon ki nou annan pour korpere avek bann sirveyan Kretyen, se ki zot “zot pe kontinyelman vey lo [nou] lam.” Si zot remark okenn keksoz dan nou latitid oubyen kondwit ki kapab vin en danze pour nou spirityalite, zot pa pou tarde pour donn en konsey apropriye pour ed nou aziste nou sitiasyon. (Galat 6:1) Sa mo Grek ki’n ganny tradwi “kontinyelman vey” i vedir ‘en dimoun ki volonterman pa dormi.’ Dapre en eksper Labib, sa lekspresyon i dekrir “en berze ki kontinyen veye avek vizilans.” Bann ansyen osi i reste vizilan spirityelman, me parfwa zot osi pa kapab dormi aswar akoz zot pe mazin nou byennet spirityel. Pa nou devret volonterman korpere avek sa bann bon berze ki fer zot mye pour imit legzanp Zezi Kri, ‘gran berze bann mouton,’ ki pran swen kongregasyon avek tandres?—Ebre 13:20.
13. Avek ki e dan ki fason bann sirveyan e osi tou Kretyen pou bezwen rann kont?
13 Trwazyenm rezon pour nou korpere volonterman avek bann sirveyan se ki zot pe kontinyelman vey lo nou, “konman bann dimoun ki bezwen rann kont.” Bann sirveyan pa bliye ki zot bann berze ki travay anba lotorite sa de Berze dan lesyel, Zeova ek Zezi Kri. (Ezekyel 34:22-24) Zeova i Propriyeter sa bann mouton, annefe i’n aste zot avek “disan son prop Garson,” e pour Li sa bann sirveyan ki’n ganny apwente dan kongregasyon i annan kont pour rann lo lafason ki zot pe tret Son troupo, setadir si zot fer li avek tandres. (Akt 20:28, 29) Parkont, nou tou nou pou osi rann kont avek Zeova lo lafason ki nou aksepte zot gidans. (Romen 14:10-12) Ler nou obei bann ansyen dan kongregasyon, nou demontre ki nou osi obei Kris ki Sef kongregasyon.—Kolosyen 2:19.
14. Kwa ki kapab fer bann sirveyan fer zot travay dan lapenn, e ki konsekans sa pou anmennen?
14 Pol ti donn en katriyenm rezon akoz nou devret soumet avek limilite avek bann sirveyan Kretyen. I ti ekrir: “Les zot fer zot travay dan lazwa, e non pa dan lapenn ki pa pou anmenn okenn lavantaz pour zot.” (Ebre 13:17) Bann ansyen i annan en gro responsabilite, zot bezwen ansenny e pran swen avek kongregasyon, zot bezwen montre legzanp dan predikasyon, okip zot fanmiy e rezourd bann problenm dan kongregasyon. (2 Korentyen 11:28, 29) Si nou pa pe korpere avek zot, nou pe zis azout en lour lo zot ki pou fer zot fer zot travay dan lapenn. Si nou fer sa, nou pa pe fer plezir Zeova e sa pa pou anmenn okenn lavantaz pour nou. Parkont, si nou demontre en respe apropriye e nou korpere, bann ansyen pou okip zot responsabilite avek lazwa, e sa pou promouvwar linite, ek lazwa dan predikasyon.—Romen 15:5, 6.
Demontre nou Soumisyon
15. Ki mannyer nou kapab demontre nou lobeisans ek soumisyon?
15 I annan plizyer fason ki nou kapab korpere avek bann sirveyan dan kongregasyon. Petet pour esey adapte avek bann nouvo sirkonstans kot nou prese, eski bann ansyen in sanz zour ek ler ki bann renyon pour predikasyon i ganny organize? Eski sa i obliz nou sanz nou progranm? Akoz nou pa esey fer en zefor pour nou siport sa nouvo laranzman. Kekfwa nou pou ganny beni dan en fason ki nou pa pe ekspekte. Meton sirveyan servis pe vizit nou group Letid Liv, annou partisip plis ki nou kapab dan predikasyon sa semenn. E si nou ganny en ekspoze dan Lekol Minister Teokratik? Pour nou i devret enportan ki nou pou la prezan pour fer sa ekspoze. Eski sirveyan ou group Letid Liv in dir ki nou tour pour netway Lasal Rwayonm? Annou donn tou nou sipor dapre nou lasante ek lafors. Si nou fer sa e osi dan bokou lezot fason, nou demontre nou soumisyon avek sa bann zonm ki Zeova ek son Garson i servi pour pran swen avek kongregasyon.
16. Si en ansyen pa fer keksoz parey i ganny demande, akoz sa pa donn nou rezon pour rezet zot lotorite?
16 I kapab arive parler ki en ansyen pa desarz son responsabilite dan lafason ki lesklav fidel ek son Konsey Direkter in demande. Si i kontinyen dan sa semen, i pou bezwen rann kont avek Zeova, ki nou ‘berze ek gardyen.’ (1 Pyer 2:25) Me menm ler serten ansyen i fer bann fot oubyen zot pa lo sa nivo ki fodre, sa pa donn nou okenn rezon pour nou devlop en latitid antete. Zeova pa beni bann ki dezobei e ki rebel.—Nonm 12:1, 2, 9-11.
Zeova pou beni ou si ou volonterman korpere
17. Ki latitid nou devret annan vizavi nou bann sirveyan?
17 Zeova i konnen ki sa bann sirveyan ki i’n apwente dan kongregasyon pa parfe. Pourtan, i servi zot e gras a son lespri sen, i pran swen avek son pep lo later. Ki swa pour bann ansyen ouswa pour nou tou, i evidan ki ‘pisans ki napa son parey i sorti kot Bondye e non pa kot nou.’ (2 Korentyen 4:7) Alor pour sa rezon, nou devret remersye Zeova pour sa ki i kapab akonpli atraver nou bann sirveyan fidel, e nou devret volonterman korpere avek zot.
18. Si nou soumet avek bann sirveyan, an realite ki nou pe fer?
18 Bann sirveyan ki ganny apwente lo kongregasyon Bondye dan sa bann dernyen zour, i fer zot mye pour imit bann berze ki ganny dekrir dan Zeremi 3:15. Dan sa verse i dir: “Mon pou donn zot bann berze selon mon leker, e zot pou vreman nouri zot avek konnesans ek bon zizman.” Vreman bann ansyen dan nou bann kongregasyon i fer en bon louvraz pour ansenny e protez bann mouton Zeova. Alor akoz bann ansyen i travay dir, annou kontinyen demontre lapresyasyon par korpere volonterman, obei e soumet avek zot. Si nou fer sa, nou pou demontre ki nou apresye nou de Berze dan lesyel, Zeova ek Zezi Kri.
Revizyon
• Ki mannyer Zeova ek Zezi Kri in demontre ki zot bann bon Berze?
• Nou bezwen obeir, me akoz i neseser pour soumet osi?
• Donn ennde legzanp kot nou kapab demontre nou soumisyon?
[Kestyon]
[Portre lo paz 29]
Bann ansyen dan kongregasyon i soumet avek lotorite Zezi
[Portre lo paz 31]
I annan plizyer fason pour demontre ki nou soumet volonterman avek bann berze ki Zeova in apwente