Parol Zeova i vivan

Bann Pwen enteresan dan Liv Izai—2

IZAI pe fidelman akonpli son misyon konman en profet. Son mesaz kont sa dis tribi dan rwayonm Izrael ti’n fini vin vre. Aprezan i annan lezot mesaz konsernan lavenir Zerizalenm.

Lavil Zerizalenm pou ganny detrir, e son bann zabitan pou ganny egzile. Me sa lavil pa pou reste vid oubyen dezerte pour touzour. I pou ariv en letan kot vre ladorasyon pou reganny pratike. Sa i mesaz prensipal dan Izai 36:1–66:24. * I kapab dan nou lavantaz pour egzamin sa bann sapit akoz bokou sa bann profesi pe trouv zot pli gran oubyen dernyen lakonplisman dan nou letan, ouswa zot pou ganny akonpli tre byento. Sa bann sapit i osi annan bann profesi eksitan konsernan Mesi.

“GETE! BANN ZOUR PE VINI”

(Izai 36:1–39:8)

Atraver zot lafors militer, bann Asiryen ti pran kontrol lo Zida. Sa ti arive diran sa katorzyenm lannen ki Lerwa Izkiya ti pe rennyen (an 732 A.N.L.). Zeova ti promet pour defann Zerizalenm. Plan bann Asiryen pour pran kontrol lo bann Izraelit ti tonm dan delo kan en sel lanz ti touy 185,000 solda Asiryen.

Izkiya ti tonm malad. Zeova ti reponn son lapriyer e geri li. I ti fer li viv pour ankor 15 an. Kan lerwa Babilonn ti anvoy son bann reprezantan pour felisit li akoz i ti’n reganny son lasante, Izkiya ti azir dan en fason ki pa ti saz kan i ti montre zot tou son bann trezor. Izai ti al dir Izkiya sa mesaz ki Zeova ti annan pour li: “Gete! Bann zour pe vini, e tou sa ki dan ou lakaz e tou sa ki ou zanset in anmase ziska prezan pou vreman ganny anmennen Babilonn.” (Izai 39:5, 6) Sa profesi ti ganny akonpli en pti pe plis ki 100 tan plitar.

Larepons pour Kestyon lo Labib:

38:8—Kwa sa, sa “bann mars peron” lo ki lonbraz ti retourn an aryer? Vi ki bann Ezipsyen ek Babilonnyen dan wityenm syek A.N.L. ti servi en lenstriman ki mars avek soley pour konnen ki ler i ete, sa bann peron i kapab pe refer avek degre ki lonbraz soley ti’n arive lo sa lenstriman, ki Aaz, papa Izkiya ti’n kapab gannyen. Oubyen i kapab ki i ti annan en gran peron dan pale, e akote sa bann mars peron ti annan en pilye ki ler soley ti tap lo la, petet pti-a-pti sa ti fer en lonbraz lo sa bann mars peron, e sa ti fer li posib pour konnen ki ler i ete.

Leson pour nou:

36:2, 3, 22. Menm si Sebna ti ganny retire konman en sef serviter, i ti kapab kontinyen  servi lerwa konman sekreter dan plas sa enn ki ti ranplas li konman sef serviter. (Izai 22:15, 19) Si nou perdi en privilez dan lorganizasyon Zeova pour en rezon ou en lot, eski pa nou devret kontinyen servi Bondye par fer nenport lezot travay ki i konfye nou?

37:1, 14, 15; 38:1, 2. Nou montre ki nou saz kan nou priy Zeova e met tou nou konfyans dan li ler nou pas dan problenm.

37:15-20; 38:2, 3. Kan bann Asiryen ti pe menas Zerizalenm, premye keksoz ki ti trakas Izkiya, ti si bann Asiryen ti pran kontrol lo zot sa ti pou anmenn move repitasyon lo non Zeova. Kan i ti konnen ki i pou mor akoz son maladi, olye mazin zis son lekor Izkiya ti mazin lezot keksoz. Sa ki ti pe fatig son latet plis, ti si i mor san prodwir en zeritye, ki lefe sa ti pou annan lo bann lerwa ki ti sipoze sorti dan desandans David. I ti pe osi trakase konsernan lekel ki ti pou diriz sa lager kont bann Asiryen. Zis parey Izkiya, pour ki non Zeova i ganny glorifye e ki son plan i ganny akonpli i pli enportan pour nou ki nou prop delivrans.

38:9-20. Sa kantik ki Izkiya ti konpoze i montre nou ki napa keksoz ki pli enportan dan lavi ki sa posibilite pour loue Zeova.

“I POU GANNY REBATIR”

(Izai 40:1–59:21)

Deswit apre ki i ti’n predir ki Zerizalenm pou ganny detrir e ki serten pou ganny egzile Babilonn, Izai ti osi profetize ki pou annan en restorasyon. (Izai 40:1, 2) Izai 44:28 i dir: “I [Zerizalenm] pou ganny rebatir.” Bann bondye zidol Babilonnyen pou ganny anmennen parey “bann bagaz.” (Izai 46:1) Babilonn pou trouv son lafen. Tousala ti vin vre de syek plitar.

Zeova pou anvoy son serviter konman “en lalimyer pour bann nasyon.” (Izai 49:6) Bann Babilonnyen ki ganny konsidere konman “lesyel” oubyen bann dirizan, pou ‘fannen parey lafimen.’ Bann sitwayen Babilonn “pou mor parey en senp moustik”; me ‘fiy Siyon ki’n ganny tyonbo pou detas sa lasenn otour son likou li menm.’ (Izai 51:6; 52:2) Zeova i annan sa pour dir sa bann ki vin kot li e ekout li: “San ezite mon pou fer en lalyans avek zot ki pou dire pour en letan endefini konsernan tou sa labonte leker anver David.” (Izai 55:3) Viv an akor avek bann lalwa drwat Bondye, i fer nou tir “bokou plezir dan Zeova.” (Izai 58:14) Me de lot kote, fot sa pep ti ‘senm divizyon ant zot ek zot Bondye.’—Izai 59:2.

Larepons pour bann Kestyon lo Labib:

40:27, 28—Akoz Izrael ti dir: ‘Mon semen in reste kasyet devan Zeova, e lazistis pour mwan i sap mon Bondye?’ Serten Zwif ki ti Babilonn ti’n kapab santi ki bann lenzistis ki zot ti pe pas atraver, ti’n ganny kasyet devan Zeova oubyen i pa ti vwar. Izai ti rapel zot ki Kreater later, ki pa fatige oubyen epwize i kapab vin sekour zot Babilonn.

43:18-21—Akoz sa bann ki ti pe retournen sorti an egzil ti ganny dir pour ‘pa mazin bann keksoz ansyen’? Sa pa ti vedir ki zot ti devret oubliy bann keksoz ki Zeova ti’n fer pour sov zot dan lepase. Plito, Zeova ti oule ki zot loue li akoz en “keksoz nouvo” ki zot menm zot ti pou eksperyanse. Tel parey zot vwayaz pour retourn Zerizalenm ki zot ti fer sen e sof, ki petet zot ti swiv en semen pli kourt dan dezer. Sa “gran lafoul” ki pou sirviv sa “gran ladetres,” pou osi annan bann rezon ki personnel e nouvo pour glorifye Zeova.—Revelasyon 7:9, 14, NW.

49:6—Ki mannyer Mesi i “en lalimyer pour bann nasyon,” menm si an zeneral ler i ti lo later i ti pres zis avek bann Izraelit? Sa i leka akoz sa ki ti arive apre lanmor Zezi. Labib i aplik Izai 49:6 avek bann disip Zezi. (Akt 13:46, 47) Ozordi bann Kretyen swazir ansanm avek led en gran lafoul ki pe ador Bondye, i konman “en lalimyer pour bann nasyon.” Zot pe eklersi dimoun “ziska landrwa pli lwen lo later.”—Matye 24:14; 28:19, 20.

 53:10—Dan ki sans Zeova ti pran plezir pour kraz son Garson? Vi ki Zeova i en Bondye ki annan konpasyon e ki konpran santiman lezot, sirman son leker ti fer mal ler i ti vwar son Garson soufer. Me kantmenm sa, i ti pran plezir pour vwar ki Zezi ti pare pour obeir, e osi akoz i ti konn tou sa ki son soufrans ek lanmor ti pou akonpli.—Proverb 27:11; Izai 63:9.

53:11—Kwa sa, sa konnesans ki Mesi pou servi pour “fer bokou dimoun ganny trouve drwat” devan Bondye? Sa i sa konnesans ki Zezi ti gannyen ler i ti vin lo later konman en zonm e soufer dan en fason enzis ziska lanmor. (Ebre 4:15) I ti fourni sa sakrifis ki ti esansyel pour ed bann Kretyen swazir ek sa gran lafoul pour ganny trouve drwat devan Bondye.—Romen 5:19; Zak 2:23, 25.

56:6—Lekel sa “bann etranze,” e dan ki sans zot pe “tyonbo lalyans [Zeova]”? Sa “bann etranze” i ‘lezot mouton’ Zezi. (Zan 10:16) Zot tyonbo sa nouvo lalyans dan le sans ki zot obei bann lalwa ki vin avek sa lalyans, zot korpere etrwatman avek laranzman ki’n ganny fer atraver sa lalyans, zot ganny sa menm nouritir spirityel ki bann Kretyen swazir i gannyen, e siport zot dan sa travay predikasyon e pour fer disip.

Leson pour nou:

40:10-14, 26, 28. Zeova i annan en kantite lafors e i dous, i pli pwisan e pli saz, e son konprenezon i bokou pli siperyer ki sa ki pour nou.

40:17, 23; 41:29; 44:9; 59:4. Bann lalyans avek politik ek zidol i ‘pa reel.’ I pa vo lapenn met nou konfyans dan zot.

42:18, 19; 43:8. Si nou ferm nou lizye oubyen nou zorey setadir nou pa antren nou avek Parol Bondye, e nou fer nou latet dir anver son bann lenstriksyon ki i fourni atraver “lesklav fidel e pridan,” i pou konmsi nou pa vwar kler e sourd spirityelman.—Matye 24:45, NW.

43:25. Rezon akoz Zeova i efas pese i annan pour fer avek li. Pour ki non Zeova i ganny sangtifye i pli enportan ki nou prop delivrans anba pouvwar pese ek lanmor e pour ganny lavi eternel.

44:8. Nou annan sipor Zeova ki stab e solid parey en ros. Nou pa devret zanmen per pour rann temwannyaz lo li!—2 Samyel 22:31, 32.

44:18-20. Bann ki pratik idolatri, sa i en lendikasyon ki zot leker i koronpi. Nanryen pa devret pran sa plas ki Zeova i annan dan nou leker.

46:10, 11. Lefe ki i annan sa abilite pour fer ‘son prop konsey reisi,’ savedir pour akonpli son plan, sa i laprev konvenkan ki Zeova i sa sel Bondye.

48:17, 18; 57:19-21. Si nou depan lo Zeova pour ganny sove, vin pros avek li, e swiv son bann komannman, nou lape pou vin en kantite parey delo ki pe koule dan en larivyer e nou bann bon aksyon pou vin parey laroul lo lanmer. Sa bann ki pa enterese avek Parol Bondye i parey “lanmer ki azite.” Zot pa anpe.

52:5, 6. Bann Babilonnyen ti konklir ki sa vre Bondye pa kapab fer nanryen. Me sa pa ti vre. Zot pa ti konpran ki rezon akoz bann Izraelit ti’n vin lesklav, ti akoz Bondye pa ti kontan sa ki zot ti’n fer. Kan lezot i pas dan problenm, nou montre ki nou saz ler nou pa taye pour fer bann konklizyon akoz tel dimoun i dan problenm.

52:7-9; 55:12, 13. Nou annan omwen trwa rezon akoz nou kapab partisip dan sa travay predikasyon e pour fer disip, avek lazwa. Nou lipye i zoli pour sa bann ki annan limilite e ki lafen spirityelman. Nou kapab get Zeova “lizye dan lizye,” oubyen nou kapab annan en relasyon avek li. Nou osi ere akoz spirityelman nou pe prospere.

52:11, 12. Pour nou kapab kalifye pour anmenn “bann lekipman Zeova,” savedir bann provizyon ki i’n fer pour servis sakre, nou bezwen prop spirityelman e moralman.

 58:1-14. Annan devosyon pour Bondye e fer sa ki byen dan en fason ipokrit, tousala i anven. Bann vre adorater i devret montre ki zot annan en kantite devosyon pour Bondye ki sorti dan zot leker, e zot devret osi montre ki zot kontan kanmarad.—Zan 13:35; 2 Pyer 3:11.

59:15b-19. Zeova i obzerv tou sa ki imen pe fer e i pou pran aksyon dan sa letan ki i’n fikse.

I “BEZWEN VIN EN KOURONN LABOTE”

(Izai 60:1–66:24)

Kan i ti pe fer resorti ki vre ladorasyon dan letan bann Izraelit ek nou letan ti pou revin en realite, Izai 60:1 i dir: “Leve, O fanm, les ou lalimyer klere, parski ou lalimyer in arive e laglwar Zeova in eklere lo ou.” Siyon “i bezwen vin en kouronn labote dan lanmen Zeova.”—Izai 62:3.

Delapar son bann konpatriyot, Izai ti priy pour sa bann ki ti pou repantir pandan ki zot ti pou an egzil Babilonn. (Izai 63:15–64:12) Apre ki i ti’n fer ladiferans ant vre serviter Bondye ek sa ki fo, Izai ti montre konman Zeova pou beni sa bann ki pe servi Bondye.—Izai 65:1–66:24.

Larepons pour bann kestyon lo Labib:

61:8, 9—Kwa sa, sa “lalyans ki pou dire pour en letan endefini” e lekel sa “desandans”? Sa i sa nouvo lalyans ki Zeova ti fer avek bann Kretyen swazir. Sa “desandans” i sa plizyer milyon dimoun ki aksepte zot mesaz, ki ganny apele ‘lezot mouton.’—Zan 10:16.

63:5—Ki mannyer lakoler Bondye i siport li? Son lakoler i en santiman ki ganny kontrole, i osi drwat. Son lakoler i donn li sipor e motiv li pour anmenn zizman ki zis.

Leson pour nou:

64:6. Imen enparfe pa kapab sov son lekor. Konsernan propisyasyon oubyen sakrifis ki imen i kapab fer pour kouver pese, tou zot bon aksyon an total pa vo plis ki bann lenz sal.—Romen 3:23, 24.

65:13, 14. Zeova i beni son bann serviter fidel, i satisfer zot bezwen spirityel en kantite.

66:3-5. Zeova i ay bann ki ipokrit.

“Rezwir zot Lepep”

Sirman bann Zwif fidel an egzil Babilonn ti’n bezwen ganny rekonforte par sa bann profesi ki koz lo restorasyon! Zeova ti dir: “Rezwir zot lepep, e dan lazwa pour touzour akoz sa ki mon pe kree. Parski mon pe kree Zerizalenm pour [zot] zwaye e son pep pour [zot] rezwir.”—Izai 65:18.

Nou osi nou pe viv dan en letan kot teneb in kouver later e dimoun i dan fernwanr epe. (Izai 60:2) Nou bezwen fer fas avek “letan difisil.” (2 Timote 3:1) Alors, sa mesaz delivrans ki Zeova in fer ekrir dan liv Izai i vreman en gran lankourazman pour nou.—Ebre 4:12.

[Not anba lo paz]

[Portre lo paz 4]

Eski ou konn rezon prensipal akoz Izkiya ti priye pour li ganny delivre dan lanmen bann Asiryen?

[Portre lo paz 7]

“Pa i zoli pour vwar lipye sa enn ki pe anmenn bon nouvel lo bann montanny!”