Bann Pwen enteresan dan Liv Zeremi
Parol Zeova i vivan
Bann Pwen enteresan dan Liv Zeremi
SIRMAN sa bann maler ki Zeremi ti anons son prop pep, ti’n bezwen sokan pour zot! Sa tre zoli tanp ki ti sa landrwa prensipal pour ador Bondye pour plis ki trwa syek, ti pe al vin lasann. Lavil Zerizalenm ek later Zida, ti pou reste dezerte, son bann zabitan ti pou ganny anmennen an egzil. En resi lo sa bann zizman ek lezot ankor i trouve dan sa dezyenm pli gran liv dan Labib, sa i liv Zeremi. Sa liv i osi rakont lavi Zeremi anmezir ki i ti fidelman akonpli son minister ki ti dir pour 67 an. Lenformasyon dan sa liv pa’n ganny mete dan lord kronolozik, me i’n ganny klasifye par topik.
Akoz nou devret enterese avek liv Zeremi? Sa bann profesi dan sa liv ki’n ganny akonpli i fortifye nou lafwa dan Zeova, sa Enn ki akonpli tou son bann promes. (Izai 55:10, 11) Travay ki Zeremi ti fer konman en profet ek reaksyon dimoun anver son mesaz, i parey dan nou letan. (1 Korentyen 10:11) Deplis, sa resi lo konman Zeova ti azir avek son pep, i fer resorti son bann kalite e sa i devret annan en gran lefe lo nou.—Ebre 4:12.
“DE MOVE KEKSOZ KI MON PEP IN FER”
Zeremi ti ganny anvoye konman en profet pandan sa trezyenm lannen ki Yosiya, lerwa Zida ti pe dirize. Sa ti 40 an avan ki Zerizalenm ti ganny detri an 607 A.N.L. (Zeremi 1:1, 2) Sa mesaz ki ti ganny pase plizoumwen pandan sa 18 an ki ti reste pour lerwa Yosiya dirize, ti en mesaz ki ti revel bann keksoz mal ki Zida ti enplike ladan ek zizman Zeova kont li. Zeova ti dir: “Mon pou fer Zerizalenm vin bann ta ros, . . . e mon pou fer bann lavil Zida vin dezerte, personn pa pou reste laba.” (Zeremi 9:11) Akoz? Li menm i reponn: “Akoz i annan de move keksoz ki mon pep in fer.”—Zeremi 2:13.
Dan son mesaz, Zeremi ti osi fer resorti ki bann ki ti pou ganny anmennen an egzil e ki ti pou repantir, ti pou retourn dan zot pei. (Zeremi 3:14-18; 12:14, 15; 16:14-21) Me kantmenm sa, zot pa ti anvi tann li. “Sef komisyoner dan lakaz Zeova” ti tap Zeremi e met li dan blok dibwa, i ti reste ladan lannwit antye.—Zeremi 20:1-3.
Larepons pour bann Kestyon lo Labib:
1:11, 12—Akoz lefet ki Zeova i reste eveye konsernan son parol i ganny asosye avek “en pti brans ki pe pouse avek en pye almonn”? Pye almonn i “enn parmi bann premye pye dibwa pour fleri pandan prentan.” (Verse 11, not anba lo paz) Dan en sans senbolik Zeova ti pe kontinyen “leve byen boner e anvoy [son profet]” pour averti son pep ki i ti pe al ziz zot, e i ti pe “reste eveye” ziska ki son zizman ti ganny realize.—Zeremi 7:25.
2:10, 11—Akoz aksyon bann Izraelit enfidel ti vreman drol? Menm si bann nasyon payen dan was avek Kitim e dan les avek Kedar ti’n kapab anmenn bann bondye sorti dan lezot nasyon pour azout avek sa ki pour zot, sa nide pour konpletman ranplas zot bondye avek sa bann bondye sorti dan lezot landrwa, ti vreman drol. Me bann Izraelit zot, zot ti’n abandonn Zeova, olye glorifye sa Bondye vivan zot ti glorifye bann zidol ki napa lavi dan zot.
3:11-22; 11:10-12, 17—Akoz Zeremi ti enkli sa dis tribi dan rwayonm nor dan son mesaz restorasyon, menm si Samari ti’n ganny detrir an 740 A.N.L.? Sa i akoz kan Zerizalenm ti ganny detrir an 607 A.N.L., sa ti en zizman ki Zeova ti anmennen lo nasyon Izrael an antye, pa zis lo Zida. (Ezekyel 9:9, 10) Deplis, menm apre ki sa dis tribi dan nor Izrael ti’n ganny detrir, sa lespwar pour zot retourn kot zot ti toultan evidan Zerizalenm, vi ki bann profet Bondye ti kontinyen enkli tou bann Izraelit dan zot mesaz restorasyon.
4:3, 4—Ki savedir sa komannman? Bann Zwif enfidel ti pou bezwen prepar, adousi e netway zot leker. Dan en sans senbolik zot ti pou bezwen sirkonsi zot leker, savedir rezet tou bann move panse, santiman ek lentansyon. (Zeremi 9:25, 26; Akt 7:51) Zot ti pou bezwen fer sanzman dan zot fason viv, setadir aret fer sa ki mal e fer keksoz ki ti pou fer zot eksperyans benediksyon Bondye.
4:10; 15:18—Dan ki sans Zeova ti anbet son pep rebel? Dan letan Zeremi, ti annan bann profet ki ti pe ‘profetiz mansonz.’ (Zeremi 5:31; 20:6; 23:16, 17, 25-28, 32) Zeova pa ti anpes zot anons sa bann mesaz pour anbet dimoun.
16:16—Ki i vedir ler Labib i dir ki Zeova in “fer al rod en kantite peser” ek “en kantite saser”? Sa i kapab pe refer avek bann lennmi ki ti ganny anvoye pour al rod bann Zwif enfidel ki Zeova ti pou zize. Kan nou pran an konsiderasyon sa ki Zeremi 16:15 i dir, sa verse i osi kapab pe refer avek resers pour rod bann Izraelit ki ti’n repantir.
20:7—Dan ki fason Zeova ti ‘servi son lafors’ kont Zeremi e anbet li? Lefe ki dimoun pa ti ekout li, i ti ganny rezete e persekite kan i ti pe anons zizman Zeova, Zeremi ti’n kapab santi ki i nepli annan lafors pour kontinyen. Zeova ti servi son lafors kont Zeremi dan le sans ki i ti servi son lafors pour lit kont sa bann santiman ki Zeremi ti annan. Zeova ti donn li lafors pour kontiny son misyon. I ti anbet Zeremi dan le sans ki i ti servi li pour akonpli keksoz ki li menm i pa ti krwar i kapab fer.
Leson pour nou:
1:8. Parfwa Zeova i kapab tir son pep dan persekisyon. I kapab fer sa par servi en ziz ki zis, ranplas bann zofisye ki pa kontan nou par bann ki rezonnab, oubyen i kapab donn son bann adorater sa lafors pour andire.—1 Korentyen 10:13.
2:13, 18. Bann Izraelit enfidel ti fer de move keksoz. Zot ti kit Zeova, sa enn ki donn benediksyon, gidans ek proteksyon. Dan en sans senbolik zot ti fer zot prop basen par esey fer lalyans militer avek Lezip ek Lasiri. Ozordi, si nou abandonn sa vre Bondye pour met nou konfyans dan bann filozofi imen, dan zot teori ek politik, i pou konmsi nou pe ranplas “sa sours delo ki donn lavi” avek “bann basen ki annan trou ladan.”
6:16. Zeova ti ankouraz son pep rebel pour aret en kou, egzamin zot lekor e retourn lo sa “semen” ki zot zanset fidel ti pran. Eski tanzantan pa nou devret egzamin nou lekor pour vwar si nou pe vreman mars dan sa semen ki Zeova i anvi nou marse?
7:1-15. Kan bann Zwif ti met zot konfyans dan tanp, e zot ti konsider li konman en keksoz ki kapab protez zot, sa pa ti sov zot. Nou devret mars avek lafwa pa dapre sa ki nou vwar.—2 Korentyen 5:7.
15:16, 17. Parey Zeremi, nou kapab sirmont dekourazman. Nou kapab reisi fer sa kan nou pran plezir pour fer letid personnel serye, loue non Zeova dan predikasyon e par rezet move frekantasyon.
17:1, 2. Menm si pep Zida ti ofer bann sakrifis, Zeova pa ti pran okenn plezir ladan, akoz zot bann pese. Si nou napa en bon moralite, menm si nou fer bann sakrifis pour loue Zeova, Zeova pa pou aksepte.
17:5-8. Imen ek zot bann lenstitisyon i devret ganny nou konfyans, selman si zot fer keksoz ki an armoni avek lavolonte Bondye ek son bann prensip. An sa ki konsern delivrans, vre lape ek sekirite, nou montre ki nou saz kan nou met tou nou konfyans zis dan Zeova.—Psonm 146:3.
20:8-11. Lefe ki dimoun pa ekoute, zot opoz nou oubyen persekit nou, sa pa devret diminyen nou devouman dan sa travay predikasyon.—Zak 5:10, 11.
“MET OU LIKOU ANBA ZOUG LERWA BABILONN”
Zeremi i anons zizman kont sa kat dernyen lerwa Zida osi kont bann fo profet, move berze ek bann pret koronpi. Kan i ti pe refer avek sa bann Zwif, ki ti’n ganny anmennen an egzil me ki ti fidel, konman bann bon fig, Zeova ti dir: “Mon pou get zot dan en bon fason.” (Zeremi 24:5, 6) I annan trwa profesi dan sapit 25 ki fer en rezimen lo bann zizman ki plitar i ganny eksplike an detay dan lezot sapit.
Bann pret ek profet pe fer konplo pour touy Zeremi. Zeremi ti anonse ki zot devret servi lerwa Babilonn. I ti dir avek Lerwa Sidkya: “Met ou likou anba zoug lerwa Babilonn.” (Zeremi 27:12) Me “sa Enn ki pe dispers Izrael, li menm ki pou rasanble li [Izrael] ansanm.” (Zeremi 31:10) En promes in ganny fer avek bann Rekabit pour en bon rezon. Zeremi i “an konsiny dan Lakour Gard.” (Zeremi 37:21) Zerizalenm in ganny detrir e laplipar son bann zabitan in ganny anmennen an egzil. Zeremi ek son sekreter Barouk, ti de parmi sa pti gin dimoun ki ti reste deryer. Menm si Zeremi ti averti sa bann ki ti’n reste deryer pour pa al Lezip, zot ti ale akoz zot ti per. Sapit 46 ziska 51 i fer resorti sa mesaz ki Zeremi ti dir konsernan bann nasyon.
Larepons pour bann Kestyon lo Labib:
22:30—Eski sa lord i vedir ki Zezi Kri ti pou nepli annan sa drwa pour mont lo tronn David? (Matye 1:1, 11) Non i pa vedir sa. Sa lord ti anpes okenn desandans Yeoakin “asiz lo tronn David . . . Zida.” Zezi ti pou diriz dan lesyel pa lo en tronn Zida.
23:33—Kwa sa, sa “fardo Zeova”? Kan Zeremi konman en profet ti anonse ki Zerizalenm pou ganny detrir, sa ti en fardo pour son bann kontanporen. An retour sa pep ki ti dir tande ti en fardo pour Zeova akoz i ti pou bezwen rezet zot. Pareyman, sa mesaz sorti dan Labib konsernan destriksyon sa bann ki pretann dir zot Kretyen, i en fardo pour zot, e sa bann dimoun ki pa ekout sa mesaz i en lour pour Bondye.
31:33—Ki mannyer lalwa Bondye in ganny ekrir dan leker? Kan en dimoun i telman kontan lalwa Bondye ki i vreman anvi fer lavolonte Bondye avek tou son leker, nou kapab dir ki lalwa Bondye in ganny ekrir dan son leker.
32:10-15—Akoz de kontra an ekrir ti ganny fer pour zis en biznes? Enn sa kontra pa ti ganny kaste pour zot kapab servi li konman en referans. Tandis ki sa lot kontra zot ti kaste avek en sele pour zot servi an ka si zot ti bezwen prouve ki sa kontra ki pa’n ganny kaste, ti vre. Zeremi in kit en bon legzanp pour nou kan i ti swiv bann prosedir legal ki ti rezonnab, kan i ti pe fer biznes avek son fanmiy oubyen avek sa bann ki ti ador menm Bondye avek li.
33:23, 24—Lekel sa “de fanmiy”? Enn i sa fanmiy rwayal ki sorti dan desandans Lerwa David, e lot i sa fanmiy pret ki sorti dan desandans Aaron. Kan Zerizalenm ek tanp Zeova ti ganny detrir, i ti paret ki Zeova ti’n rezet sa de fanmiy e ki i pa ti pou annan ankor en rwayonm lo later, oubyen i ti paret ki son ladorasyon pa ti pou ganny etabli ankor.
46:22—Akoz lavwa Lezip i ganny konpare avek en serpan? Sa i kapab pe refer avek son ki en serpan i fer ler i pe rekile pour li sove. I kapab osi pe refer avek lavwa bann Ezipsyen ki ti pe koz dousman akoz zot ti’n eksperyans maler. Sa konparezon i osi montre nou ki i ti bet pour bann Faraon Ezipsyen met senbol en serpan lo zot latet, ki ti reprezant bondye Ouadze ki ti sipoze protez zot.
Leson pour nou:
21:8, 9; 38:19. Menm ziska lo dernyen minit, Zeova ti donn bann zabitan Zerizalenm enfidel ki ti merit lanmor ankor en swa. Wi, Bondye “i annan en kantite mizerikord.”—2 Samyel 24:14; Psonm 119:156.
31:34. Pa i rekonfortan pour konnen ki Zeova pa gard antet pese sa bann ki i’n pardonnen, e fer zot rann kont alavenir!
38:7-13; 39:15-18. Zeova pa oubliy nou servis ki nou pe fer fidelman, ki enkli ‘servis ki nou kontinyen rann bann sen.’—Ebre 6:10.
45:4, 5. Zis parey i ti leka dan bann dernyen zour avan destriksyon Zida, la i pa lemoman pour nou rod bann “gran keksoz,” dan sa “bann dernyen zour” sa sistenm, tel parey larises, popilarite oubyen konfor materyel.—2 Timote 3:1; 1 Zan 2:17.
ZERIZALENM I ANFLANM
Nou an 607 A.N.L. I fer onz an depi ler Sidkya pe dirize. E pandan sa 18 mwan ki’n pase, Neboukadnetsar, lerwa Babilonn, ti’n antour Zerizalenm avek son lafors militer. Nebouzaradann, sef bodigard ti ariv Zerizalenm, le set, senkyenm mwan diran sa diznevyenm lannen ki Neboukadnetsar ti pe dirize. (2 Lerwa 25:8) Petet dan son kan an deor miray lavil Zerizalenm, Nebouzaradann ti egzamin byen sitiasyon e i ti fer en plan konman pour atak sa lavil. Trwa zour plitar, son dizyenm zour le mwan, i ti antre Zerizalenm. E i ti met dife dan sa lavil.—Zeremi 52:12, 13.
Zeremi i rakont an detay konman Zerizalenm ti ganny detrir. Ler nou egzamin resi Zeremi nou kapab konpran akoz bann Izraelit ti dan profon sagrinasyon. Sa lot liv Labib, Lamantasyon, i koz lo zot sagrinasyon.
[Portre lo paz 8]
Mesaz Zeremi i enkli zizman Zeova kont Zerizalenm
[Portre lo paz 9]
Dan ki fason Zeova ‘ti servi son lafors’ kont Zeremi?
[Portre lo paz 10]
“Mon pou konsider bann egzile sorti Zida parey sa bann bon fig.”—Zeremi 24:5