Fidel avek Kris ek son Lesklav

“Son met pou met li ansarz tou son byen.”—MATYE 24:45-47.

1, 2. (a) Dapre Labib lekel ki nou Lider? (b) Kwa ki montre ki Kris pe diriz aktivman kongregasyon Kretyen?

“PA LES dimoun kriy ou ‘lider’—ou annan zis en lider, Kris!” (Matye 23:10, The New Testament in Modern English) La Zezi ti fer kler ki okenn zonm lo later pa kapab vin lider son bann disip. Zot annan zis en Lider ki dan lesyel e sa i Zezi Kri li menm. Se Bondye ki’n apwent Zezi dan sa pozisyon. Zeova “ti resisit li . . . [e] etabli li konman pli gran sef lo tou keksoz [kongregasyon], ki son lekor.”—Efezyen 1:20-23.

² Vi ki Kris i “sef lo tou keksoz” kongregasyon, sa i vedir i egzers son lotorite lo tou sa ki deroule dan kongregasyon. I konn tou sa ki arive dan kongregasyon. I vey byen lo kondisyon spirityel sak group Kretyen oubyen kongregasyon. Sa i vreman evidan dan sa revelasyon ki ti ganny donnen avek zapot Zan ver lafen premye syek nou lepok. Zezi ti dir senk fwa ki i konn tou bann aktivite sa set kongregasyon. I ti konn zot pwen for e feb, e i ti donn zot konsey ek lankourazman dapre zot sitiasyon. (Revelasyon 2:2, 9, 13, 19; 3:1, 8, 15) I evidan osi ki Kris ti konn tre byen kondisyon spirityel lezot kongregasyon Lazi miner, Palestin, Siri, distrik Babilonn, Lagres, Litali ek lezot ankor. (Akt 1:8) Be ozordi, eski i diferan?

 En Lesklav fidel

3. Akoz i apropriye pour konpar kongregasyon avek en lekor e Kris avek latet sa lekor?

³ Apre son rezireksyon e zis avan i ti mont dan lesyel kot son Papa, Zezi ti dir son bann disip: “Mon’n ganny tou pouvwar dan lesyel ek lo later. . . . E konnen ki mwan mon avek zot toulezour, ziska lafen [sa sistenm].” (Matye 28:18-20) I ti pou kontinyen diriz zot aktivman. Dan son bann let pour bann Kretyen Efez ek Kolos, zapot Pol ti konpar kongregasyon Kretyen avek en “lekor,” e Kris avek Latet sa lekor. (Efezyen 1:22, 23; Kolosyen 1:18) Sa liv The Cambridge Bible for Schools and Colleges i dir ki sa legzanp oubyen metafor i “endike ki i annan en linite neseser ant lekor ek Latet, me sirtou ki lavolonte Latet [setadir Kris] i ganny fer atraver bann manm [sa lekor]. [Bann parti sa lekor] i Son zouti.” Lekel sa group ki Kris in servi konman son zouti depi ler i’n vin lerwa an 1914?—Danyel 7:13, 14.

4. Parey profet Malaki ti profetize, ki Zeova ek Zezi ti vwar ler zot ti fer lenspeksyon tanp spirityel?

⁴ Profesi Malaki ti anonse ki Zeova, “sa vre Senyer,” e osi “sa mesaze lalyans,” Kris Zezi, Garson Bondye dan son nouvo pozisyon konman lerwa, zot tou le de ti pou vin ziz e fer lenspeksyon Son “tanp,” oubyen son lakaz spirityel kot i ganny adore. I evidan ki “letan fikse” pour ‘zizman pep Bondye’ ti arive an 1918. * (Malaki 3:1; 1 Pyer 4:17) I normal ki bann ki ti pretann pe reprezant Bondye ek vre ladorasyon lo later ti ganny egzaminen. Bann legliz swadizan Kretyen ki ti ansenny bann krwayans ki sali Bondye e ki ti enplike en kantite dan bann masak dan Premye Lager Mondyal ti ganny rezete. En pti group Kretyen swazir ki ti ankor lo later ti ganny teste, rafinen konmsi avek dife, e finalman aprouve pour vin “pep Zeova ki donn en lofrann avek ladrwatir.”—Malaki 3:3.

5. Parey i ti ganny mansyonnen dan profesi Zezi konsernan son ‘prezans,’ lekel finalman ki’n ganny rekonnet konman ‘lesklav’ fidel?

⁵ Lo menm laliny avek profesi Malaki, Zezi ti koz avek son bann disip lo en siny ki ti annan diferan laspe. Sa siny ti pou permet son bann disip pour rekonnet kan Zezi ti pou ‘prezan’ konman lerwa, kan ‘lafen sa sistenm’ ti pou vini e pour ed zot idantifye sa group dimoun ki ganny apele sa ‘lesklav.’ Zezi ti dir: “Lekel sa [“lesklav fidel e pridan,” NW] ki son met in plas ansarz tou lezot serviter pour donn zot zot manze kan i ler? Ere sa [lesklav] ki son met i war li pe fer son devwar ler i arive! An verite mon dir zot, son met pou met li ansarz tou son byen.” (Matye 24:3, 45-47) “Ler i [ti] arive” pour fer lenspeksyon sa ‘lesklav’ an 1918, Kris ti trouv sa bann Kretyen swazir ki ankor lo later pe donn “manze kan i ler,” par egzanp an servan sa magazin Latour Veyer ki ganny pibliye depi 1879 ek lezot liv baze lo Labib. I ti aksepte zot konman en group ki ti vin son zouti oubyen ‘lesklav,’ e an 1919 i ti met zot responsab pour okip tou son byen lo later.

‘Lesklav’ pe okip bann Byen Kris lo Later

6, 7. (a) Dan ki lot fason Zezi ti koz lo sa ‘lesklav’ fidel? (b) Zezi i servi sa mo ‘reziser,’ ki sa i enplike?

⁶ Parey nou ti vwar, Zezi ti donn en profesi lo son prezans konman lerwa e i ti koz lo en ‘lesklav’ ki ti pou reprezant li lo later. Me detrwa mwan avan sa, i ti koz lo sa menm ‘lesklav’ dan en lot fason ki ed nou konpran pli byen responsabilite sa ‘lesklav.’ La Zezi ti dir: “Lekel sa [“reziser fidel, sa enn onnet,” NW], ki son met, pou met ansarz son lakour pour donn lezot zot rasyon manze kan i ler? Vreman mon dir zot, son met pou met li ansarz tou son byen.”—Lik 12:42, 44.

 ⁷ La dan sa verse, sa lesklav i ganny apele en reziser, sa i sorti dan en mo Grek ki dekrir “en administrater en lakour oubyen en propriyete.” Sa group ki konpoz sa reziser i pa zis en group savan ki donn bann bon leksplikasyon lo Labib. I vre ki zot donn manze spirityel “kan i ler,” me sa ‘reziser fidel’ ti pou ganny apwente lo tou bann disip Zezi e se zot ki ti pou okip tou bann lentere Kris lo later, setadir “tou son byen.” Ki sa responsabilite ti pou enplike?

8, 9. Ki sa ‘byen’ ki lesklav pe okipe?

⁸ Sa lesklav i responsab bann diferan batiman ek lizin ki bann disip Zezi i servi pour devlop nou bann aktivite Kretyen. Sa i enkli biro prensipal ek tou bann biro brans Temwen Zeova, bann Lasal Rwayonm ek bann Lasal Lasanble dan lemonn antye. E sa ki pli enportan ankor, sa lesklav i responsab pour organiz bann progranm letid Labib dan bann renyon Kretyen tou le semenn e osi progranm regilye dan bann diferan lasanble. Dan sa bann renyon ek lasanble, lenformasyon lo bann profesi Labib i ganny detaye, e en gidans lo konman pour aplik bann prensip Labib i ganny donnen.

⁹ Responsabilite sa reziser i osi enkli sirvey sa travay enportan pour anons “sa Bonn Nouvel Rwayonm” e pour ‘fer tou pep vin bann disip Zezi.’ Sa kanpanny lansennyman i enplik osi montre bann dimoun konman pour obei tou sa ki Zezi, Sef kongregasyon, ti demann nou pour fer pandan sa letan lafen. (Matye 24:14; 28:19, 20; Revelasyon 12:17) Sa travay predikasyon ek lansennyman in ede pour rasanble en “gran lafoul” dimoun ki fidelman siport bann Kretyen swazir ki ankor lo later. Sa bann “keksoz presye sorti dan tou nasyon” i osi fer parti sa “byen” Zezi ki sa lesklav fidel pe pran swen avek.—Revelasyon 7:9; Agai 2:7.

En Konsey Direkter ki reprezant sa Lesklav

10. Lekel sa group ki ti pran desizyon dan premye syek, e ki lefe sa ti annan lo bann kongregasyon?

¹⁰ I evidan ki sa lesklav ti pou annan sa gro responsabilite pour pran bokou desizyon. Lepok bann premye Kretyen, bann zapot ek ansyen Zerizalenm ti reprezant sa lesklav e se zot ki ti fer bann desizyon pour tou bann Kretyen. (Akt 15:1, 2) Ler konsey direkter dan premye syek ti pran serten desizyon, zot ti met bann kongregasyon okouran swa par let swa par anvoy serten son bann reprezantan. Bann premye Kretyen ti kontan pour aksepte sa bann gidans byen kler, e vi ki zot ti aksepte volonterman gidans konsey direkter, sa ti promouvwar lape ek linite.—Akt 15:22-31; 16:4, 5; Filipyen 2:2.

11. Lekel ki Kris i servi ozordi pour diriz kongregasyon, e ki mannyer nou devret vwar sa group Kretyen swazir?

¹¹ Parey dan lepok bann premye Kretyen, en pti group Kretyen swazir i form sa Konsey Direkter bann disip Kris ozordi lo later. Avek son “lanmen drwat,” son lafors an aksyon, Kris ki Sef kongregasyon pe diriz sa bann zonm fidel dan zot travay pour okip zot responsabilite. (Revelasyon 1:16, 20) Dan son biografi, Albert Schroeder, en frer ki’n mor me ki’n lo Konsey Direkter pour bokou lannen ti ekrir: “Konsey Direkter i zwenn tou le Merkredi e zot konmans sa renyon avek en lapriyer pour demann gidans lespri Zeova. Zot fer bokou zefor pour ki tou sa ki ganny diskite e pour ki tou desizyon ki ganny fer i an armoni avek Parol Bondye Labib.” * Nou kapab annan konfyans dan Konsey Direkter, sa group Kretyen swazir fidel. Parol Pol i aplik byen pour nou: “Obei zot bann dirizan e [soumet avek] zot lord; parski zot pe kontinyelman vey lo zot lam.”—Ebre 13:17.

 En Respe apropriye pour sa Lesklav fidel

12, 13. Ki rezon dan Labib i annan pour demontre respe pour lesklav fidel?

¹² Rezon prensipal akoz nou bezwen demontre en respe apropriye pour sa lesklav fidel, se ki ler nou fer sa nou demontre respe pour zot Met, Zezi Kri. Pol ti ekrir bann Kretyen swazir: “En zonm ki lib ler i ganny apele, i vin lesklav Kris. Zot in ganny aste pour en gran pri.” (1 Korentyen 7:22, 23; Efezyen 6:6) Alors, ler nou fidelman aksepte gidans lesklav fidel ek son Konsey Direkter, nou pe obei Kris, Met sa lesklav. Sa respe apropriye pour sa zouti ki Kris pe servi pour okip son byen lo later, i en fason ki nou demontre piblikman oubyen “proklanmen, ki Zezi-Kri i Senyer pour laglwar Bondye, Papa.”—Filipyen 2:11.

¹³ En lot rezon pour nou demontre sa respe pour lesklav fidel, i ki Labib i dekrir bann Kretyen swazir lo later konman en “Tanp” ki Zeova i reste ladan par “Lespri,” e pour sa rezon zot “sen.” (1 Korentyen 3:16, 17; Efezyen 2:19-22) Se avek sa group ki ganny konpare avek en tanp sen ki Zezi in konfye son byen lo later. Sa i vedir ki serten responsabilite ek drwa dan kongregasyon i zis pour sa group lesklav. Pour sa rezon, tou dimoun dan kongregasyon i vwar li konman zot responsabilite pour swiv e aksepte gidans ki sorti kot lesklav fidel ek son Konsey Direkter. Anfet, bann Kretyen ki dan group ‘lezot mouton’ i vwar li en gran privilez pour ed sa lesklav pran swen bann lentere zot Met.—Zan 10:16.

Siport zot fidelman

14. Parey Izai ti profetize, dan ki sans bann Kretyen ki form parti lezot mouton i mars deryer bann Kretyen swazir e zot parey bann “labourer ki pa ganny peye”?

¹⁴ Bann Kretyen ki dan sa group ki apel lezot mouton i soumet avek limilite avek bann Kretyen swazir oubyen Izrael spirityel. Sa ti ganny profetize par Izai ler i ti dir: “La sa ki Zeova in dir: ‘Bann labourer ki pa ganny peye sorti Lezip ek bann marsan Letyopi ek bann dimoun Seba, bann gran zonm, pou pas kot ou, e zot pou vin pour ou. Zot pou marse deryer ou; zot pou dan lasenn ler zot pase, e zot pou prostern devan ou. Zot pou priy avek ou, an dizan: “Wi Bondye i an linyon avek ou, e napa lot ki li; napa en lot Bondye.”’” (Izai 45:14) Dan en sans senbolik, ozordi lezot mouton pe mars deryer Izrael spirityel setadir zot swiv gidans sa group oubyen sa lesklav swazir ek son Konsey Direkter. Zot bann “labourer ki pa ganny peye” dan sa sans ki zot volonterman donn zot lafors fizik ek zot bann resours pour siport travay predikasyon mondyal ki Kris in konfye bann Kretyen swazir lo later.—Akt 1:8; Revelasyon 12:17.

15. Ki mannyer profesi dan Izai 61:5, 6 i fer resorti relasyon ki egziste ant Izrael spirityel ek bann lezot mouton?

 ¹⁵ Bann Kretyen ki form parti lezot mouton i kontan e rekonesan ki zot kapab servi Zeova anba gidans sa lesklav fidel ek son Konsey Direkter. Zot rekonnet ki se bann Kretyen swazir ki “Izrael Bondye.” (Galat 6:16, NW) Zot parey bann “etranze” ki pe asosye avek bann Izraelit spirityel, e zot kontan pour servi konman bann “fermye” ek “bann ki plant pye rezen” anba direksyon bann Kretyen swazir ki “bann pret Zeova” ek bann ‘minis Bondye.’ (Izai 61:5, 6) Avek devouman zot partisip dan travay pour anons sa bon nouvel e pour fer bann dimoun sorti dan tou bann nasyon vin disip Zezi. Avek tou zot leker, zot donn lanmen sa bann ki form sa lesklav pour pran swen e donn manze bann nouvo ki zwenn pep Bondye.

16. Kwa ki pous lezot mouton pour donn fidelman zot sipor avek lesklav fidel e pridan?

¹⁶ Lezot mouton i rekonnet ki zot in benefisye en kantite par bann gro zefor ki sa lesklav fidel in fer pour fourni manze spirityel aler. Avek limilite, zot aksepte ki si lesklav pa ti’n donn zot tou sa bann nouritir spirityel, zot ti pou konn zis en pti gin lo konnesans presye ki dan Labib, par egzanp lo kestyon si Zeova i annan drwa pour dirize, lo sangtifikasyon non Bondye, lo Rwayonm, lo nouvo lesyel ek nouvo later, nanm, kondisyon bann mor ek laverite lo Zeova, son Garson ek lespri sen. Alor avek bokou lapresyasyon ek fidelite, lezot mouton i siport avek lanmour bann “frer” Kris ki’n ganny swazir ki ankor lo later dan sa letan lafen.—Matye 25:40.

17. Ki Konsey Direkter in vwar neseser pour fer, e ki nou pou vwar dan lot lartik?

¹⁷ Vi ki lakantite Kretyen swazir pe deplizanpli diminyen, zot pa kapab la prezan dan tou bann kongregasyon pour okip bann byen Kris. Alor, Konsey Direkter i apwent bann zonm ki sorti dan lezot mouton dan serten responsabilite dan bann biro brans, konman sirveyan rezyonal e distrik, e dan bann kongregasyon Temwen Zeova. Eski nou latitid vizavi sa bann berze ki anba direksyon Kris i montre ki kantite nou fidel avek Kris ek son lesklav? Nou pou vwar sa size dan lot lartik.

[Not anba lo paz]

Revizyon

• Lekel nou Lider, e kwa ki montre i konn byen ki pe deroule dan kongregasyon?

• Ler lenspeksyon “tanp” ti ganny fer, lekel ki ti ganny aksepte konman lesklav fidel, e kisisa sa byen ki’n ganny konfye avek li?

• Ki rezon i annan dan Labib pour nou fidelman siport sa lesklav fidel?

[Kestyon]

[Portre lo paz 25]

Sa bann “byen” ki sa ‘reziser’ pe okipe i enkli bann batiman ek lizin, progranm spirityel ek travay predikasyon

[Portre lo paz 26]

Bann ki dan lezot mouton i siport lesklav fidel par pres avek devouman