Ki Lefe bann Lanz i annan lo Limanite?

“Apre sa, mon ti war en lot lanz desann sorti dan lesyel. I ti annan en gran lotorite . . . I ti kriye avek en lavwa for: ‘I’n tonbe, Gran Babilonn, in tonbe.’” —REVELASYON 18:1, 2.

1, 2. Akoz nou kapab dir ki Zeova i servi bann lanz pour akonpli son lavolonte?

KAN i ti an egzil lo zil Patmos, dan son vye zour zapot Zan ti ganny bann vizyon profetik. Anba [“lenspirasyon” NW] i ti vwar bann levennman eksitan, kan i ti dan “Zour Senyer.” “Zour Senyer” ti konmans an 1914 kan Zezi Kri ti ganny kouronnen Lerwa e i kontinyen ziska lafen sa Mil an ki Zezi pou dirize.—Revelasyon 1:10.

² Zeova pa ti donn Zan sa revelasyon direkteman. I ti servi en mwayen pour fer sa. Revelasyon 1:1 i dir: “Revelasyon Zezi-Kri, ki Bondye ti donn li pour montre son bann serviter sa ki devre arive byento, e ki Kris in fer konnen son serviter Zan, an anvoyan son lanz kot li.” Par mwayen Zezi, Zeova ti servi en lanz pour fer Zan konn bann keksoz merveye konsernan “Zour Senyer.” En lot moman, Zan ti “war en lot lanz desann sorti dan lesyel. I ti annan en gran lotorite.” Ki sa lanz ti’n ganny anvoye pour fer? “I ti kriye avek en lavwa for: ‘I’n tonbe, Gran Babilonn, in tonbe.’” (Revelasyon 18:1, 2) Sa lanz pwisan ti ganny sa privilez pour fer konnen ki Gran Babilonn, savedir tou bann fo larelizyon, ti’n tonbe. Alors, nou kapab san poursan asire ki Zeova i servi bann lanz dan en fason tre enportan pour akonpli son lavolonte. Avan ki nou egzamin an detay ki rol bann lanz i zwe dan plan Bondye e ki lefe zot annan lo nou, annou egzaminen kote zot sorti.

Kote zot sorti?

3. Ki move konprenezon bokou dimoun i annan lo bann lanz?

³ En kantite dimoun ozordi i krwar dan lanz. Me bokou pa byen konnen lekel zot e kote zot sorti. Par egzanp, serten dimoun relizye i krwar ki ler en dimoun ki zot kontan i mor, sa dimoun in ganny apele pour zwenn Bondye dan lesyel e ki i vin en lanz li osi. Eski sanmenm sa ki Parol Bondye i ansennyen lo kreasyon, legzistans ek bi bann lanz?

4. Ki Labib i dir nou lo lorizin bann lanz?

⁴ Sa lanz pli pwisan, avek plis lotorite e ki sef tou lanz, i apel Misel Arkanz. (Zid 9) I pa lot ki Zezi Kri. (1 Tesalonisyen 4:16) Plizyer milye lannen pase, kan Zeova ti deside pour konmans kree, premye keksoz ki i ti kree ti son Garson ki ti en lanz. (Revelasyon 3:14) Plitar, par mwayen son premye Garson, i ti kree tou lezot lanz. (Kolosyen 1:15-17) Kan i ti pe refer avek lanz konman son bann garson, Zeova ti demann patrias Zob: “Kote ou ti ete kan mon ti etabli later? Dir mwan, si ou annan konprenezon. . . . Lekel ki ti met son ros dan kwen fondasyon, ler bann zetwal bomaten ti kriye ansanm dan lazwa, e tou bann garson Bondye ti konmans aplodi?” (Zob 38:4, 6, 7) I kler alors ki bann lanz i kreasyon Bondye e zot ti ganny kree en bann letan avan imen.

5. Konman bann lanz in ganny klase?

⁵ Nou lir dan 1 Korentyen 14:33: “Bondye  pa en Bondye dezord, me en Bondye lape.” Alors, Zeova in klas son bann lanz dan trwa kategori. Premyerman bann Serafen. Zot bann serviter kot tronn Bondye, zot fer konn son sentete e gard pep Bondye prop spirityelman. Dezyenmman bann seriben, zot soutenir souvrennte Zeova, e trwazyenmman bann lezot lanz ki zot zot akonpli lavolonte Bondye. (Psonm 103:20; Izai 6:1-3; Ezekyel 10:3-5; Danyel 7:10) Dan ki fason bann lanz i annan en lefe lo limanite?—Revelasyon 5:11.

Ki Rol zot zwe?

6. Ki mannyer bann seriben ti ganny servi an rapor avek zarden Edenn?

⁶ Premye fwa ki bann lanz i ganny mansyonnen dan Labib i dan Zenez 3:24, ki dir: “[Zeova] ti pous zonm an deor zarden i ti met bann seriben ver les zarden Edenn, ek en lepe avek son lanm an flanm ki ti pe kontinyen tournen pour vey sa semen ki anmenn ver pye lavi.” Sa bann seriben ti fer sir ki Adan ek Ev pa antre ankor dan sa zarden kot zot ti ete. Me sa ti okonmansman listwar imen. Alors, ki rol bann lanz in zwe depi tou sa letan?

7. Ki nou aprann lo enn bann rol ki bann lanz i annan, ler nou egzamin sinifikasyon sa mo orizinal ki’n ganny tradwir “lanz”?

⁷ Lanz i ganny mansyonnen preski 400 fwa dan Labib. Sa mo Ebre ek Grek ki’n ganny tradwir “lanz,” i osi kapab ganny tradwir “mesaze.” Alors, bann lanz ti ganny servi konman en mwayen pour Bondye kominik avek imen lo later. Parey nou’n vwar dan sa de premye paragraf, Zeova ti servi en lanz pour fer zapot Zan konn son mesaz.

8, 9. (a) Ki lefe vizit en lanz ti annan lo Manoa ek son madanm? (b) Ki leson bann paran i kapab tire avek sa ki Manoa ti demann sa lanz?

⁸ Bondye i osi servi bann lanz pour donn sipor e ankouraz son bann serviter lo later. Par egzanp, pandan letan bann Ziz an Izrael, Manoa ek son madanm ki pa ti kapab fer zanfan, ti telman anvi en piti. Zeova ti anvoy son lanz pour fer madanm Manoa konnen ki i ti pou ganny en garson. Sa resi i dir nou: “Gete! ou pou ansent, e sirman ou pou donn nesans en garson, e okenn razwar pa pou ganny pase lo son latet, apre ki i pou’n fini ne i pou vin en Nazireen pour Bondye, e li ki pou pran latet pour sov Izrael dan lanmen bann Filisten.”—Ziz 13:1-5.

⁹ Alafendefen, madanm Manoa ti donn nesans en pti garson, ki ti apel Sanmson, i ti vin en personnaz renonmen dan listwar Labib. (Ziz 13:24) Avan ki Samson ti ne, Manoa ti demann sa lanz pour retourn kot zot pour montre zot ki zot bezwen fer pour enstri zot garson anmezir ki i grandi. Manoa ti demande: “Ki mannyer sa zanfan pou viv e ki travay i pou akonpli?” Sa lanz ti repet sa ki i ti’n dir avek son madanm. (Ziz 13:6-14) Pa sa ti’n bezwen ankouraz Manoa! I vre ki ozordi bann lanz pa vin vizit nou parey ti leka dan lepase. Me zis parey Manoa, bann paran ozordi i kapab rod gidans kot Zeova kan zot pe elve zot zanfan.—Efezyen 6:4.

10, 11. (a) Kan larme Siryen ti’n antour lavil, ki lefe sa ti fer lo Elisa ek son serviter? (b) Ki byenfe nou kapab gannyen ler nou reflesir lo sa levennman?

 ¹⁰ En legzanp remarkab kot lanz ti donn sipor bann serviter Bondye, ti dan letan profet Elisa. Elisa ti pe reste dan en lavil Izrael ki ti apel Dotann. En zour granmaten kan en serviter Elisa ti leve e get deor, i ti vwar ki sa lavil ti’n antoure par bann seval ek saret lager. Lerwa Siri ti’n anvoy en lafors militer vreman blende pour tyonbo Elisa. Ki ti reaksyon sa serviter? Avek lafreyer, i ti panik e i ti kriye: “Ar wi mon met! Ki nou pou fer?” Pour li, tou ti’n paret fini. Me Elisa ti reponn li: “Pa bezwen per, parski i annan plis avek nou ki avek zot.” Ki i ti oule dir par sa?—2 Lerwa 6:11-16.

¹¹ Elisa ti konsyan ki en latroup lanz ti la dan son kote. Me son serviter li i pa ti vwar nanryen. Alors, “Elisa ti konmans priye e dir: ‘O Zeova, ouver son lizye, silvouple, pour ki i kapab vwar.’ Deswit Zeova ti ouver lizye sa serviter pour ki i kapab vwar, e gete! partou lo montanny ti ranpli avek seval ek saret lager an dife toultour Elisa.” (2 Lerwa 6:17) Aprezan, sa serviter ti kapab vwar sa latroup lanz. Avek nou lizye lafwa, nou osi nou kapab vwar ki bann lanz anba direksyon Zeova ek Zezi Kri zot donn zot sipor e protez pep Zeova.

Sipor bann Lanz dan Letan Zezi

12. Ki sipor Mari ti gannyen avek lanz Gabriyel?

¹² Annou egzamin sa sipor ki en vyerz Zwif apele Mari ti gannyen kan i ti ganny enformen en mesaz: “Ou pou ansent, ou pou ganny en garson, e ou ava apel li Zezi.” Zis avan ki i ti dir li sa mesaz ki ti pou sirprann li, lanz Gabriyel ki Bondye ti’n anvoye ti dir Mari: “Pa per Mari, ou’n ganny lagras devan Bondye.” (Lik 1:26, 27, 30, 31) Sirman ler Mari ti’n konnen ki i annan laprouvasyon Bondye, sa ti’n bezwen ankouraz e fortifye li en kantite!

13. Ki mannyer bann lanz ti donn Zezi zot sipor?

¹³ En lot moman kot bann lanz ti donn zot sipor, ti apre ki Satan ti’n esey tant Zezi trwa fwa dan dezer. Labib i dir ki apre i ti’n ganny tante, “Dyab ti kit Zezi, e bann lanz ti vin port li swen.” (Matye 4:1-11) Preski menm zafer ti arive sa zour swar avan son lanmor. Dan profon sagrinasyon, Zezi ti azenou e konmans priye: “Papa, si sa i ou lavolonte, eparny mwan sa lakoup; e pourtan non pa dapre mon lavolonte, me ou lavolonte. En lanz sorti dan lesyel, ti aparet devan li e i ti ankouraz li.” (Lik 22:42, 43) Me konman bann lanz i donn nou zot sipor ozordi?

Sipor bann Lanz dan nou Letan

14. Ki persekisyon bann Temwen in bezwen andire dan nou letan, e ki’n arive finalman?

¹⁴ Kan nou egzamin sa travay predikasyon ki bann Temwen Zeova pe fer ozordi, eski pa i evidan ki zot annan sipor bann lanz? Par egzanp, zot ti kapab andir bann persekisyon kriyel koze par sistenm Nazi Lalmanny ek bann pei Was Lerop avan e pandan Dezyenm Lager Mondyal (1939-45). Anba sistenm diktatir Fascist Katolik an Itali, Lespanny ek Portigal, bann Temwen ti bezwen sibir persekisyon pour plis letan. E pour plizyer lannen zot ti andir persekisyon sorti kot ansyen Linyon Sovyetik, ek lezot nasyon ki ti anba son kontrol. San oubliy sa persekisyon ki bann Temwen ti bezwen andire dan serten pei Lafrik. * Pa bokou letan pase, Lazorzi, bann Temwen ti ganny persekite dan  en fason brital. Satan in fer tou sa ki i kapab pour anpes bann Temwen Zeova kontinyen fer zot travay. Me kantmenm sa, konman en lorganizasyon zot in ranport laviktwar malgre sa bann persekisyon e zot in prospere. Sa in posib akoz bann lanz in annan en rol pour zwe ladan, avek zot boukliye zot ti pe protez pep Bondye.—Psonm 34:7; Danyel 3:28; 6:22.

15, 16. Ki sipor lanz i donn bann Temwen dan zot travay predikasyon?

¹⁵ Pour bann Temwen Zeova, sa latas pour pres sa bon nouvel dan lemonn antye e fer disip par ansenny laverite sa bann ki enterese, i en keksoz tre serye pour zot. (Matye 28:19, 20) Me zot konn tre byen ki san sipor bann lanz zot pa pou kapab akonpli sa travay. Alors, sa parol dan Revelasyon 14:6, 7 in toultan ankouraz zot. I dir: “Apre mon [zapot Zan] ti war en lot lanz pe anvole atraver lesyel, avek en levanzil eternel pour anons tou zabitan later, tou nasyon, tribi, lalang ek pep. I ti kriy avek en lavwa for: ‘Donn Bondye loner e rann li glwar, parski ler son zizman in arive. Ador sa Enn ki’n fer lesyel, later, lanmer ek bann sours delo!’”

¹⁶ Sa i montre klerman ki sa travay predikasyon ki bann Temwen Zeova pe fer dan lemonn antye i annan sipor bann lanz e i pe ganny fer anba zot direksyon. Zeova pe servi bann lanz pour fer bann dimoun senser zwenn bann Temwen. Pareyman, bann lanz in fer bann Temwen zwenn sa bann ki senser. Se pour sa rezon ki plizyer fwa, en Temwen Zeova i zwenn en dimoun zis pandan sa letan ki i pe pas dan en moman difisil dan son lavi e i bezwen led spirityelman. Sa i ariv tro souvan pour dir ki lazar in tonm dan potis.

Byento zot pou zwe en gran Rol

17. Ki ti arive avek bann Asiryen kan en sel lanz ti atak zot?

¹⁷ Apard ki vin bann mesaze ek bann led ki fortifye pour bann adorater Zeova, i annan en lot fason ki bann lanz i ganny servi. Dan lepase zot ti egzekit zizman Bondye. Par egzanp, dan wityenm syek A.N.L., en gran lafoul larme Asiryen ti menas Zerizalenm. Ki ti reaksyon Zeova? I ti dir: “Akoz mwan, sirman mon pou defann sa lavil pour sov li, e akoz mon serviter David.” Labib i rakont nou ki ti arive: “Sa zour swar  lanz Zeova ti sorti e touy san katreven senk mil zonm dan kan Asiryen. Kan bann dimoun ti leve granmaten, tou sa bann zonm ti’n vin bann kadav mor.” (2 Lerwa 19:34, 35) Pa larme imen i parey lapousyer konpare avek lafors zis en lanz!

18, 19. Ki gran rol bann lanz pou zwe byento, e ki lefe sa pou annan lo limanite?

¹⁸ Byento, Bondye pou servi bann lanz pour egzekit son zizman. I pa reste bokou letan pour Zezi vini avek “son bann lanz pisan, avek laflanm dife.” Zot pou “tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.” (2 Tesalonisyen 1:7, 8) Pa sa pou annan en gro lefe lo limanite! Sa bann ki rezet sa bon nouvel lo Rwayonm Bondye ki pe ganny prese dan lemonn antye pou ganny detrir. Zis sa bann ki rod Zeova, ladrwatir ek limilite ki pou ganny “kasyet zour lakoler Zeova” e zot pa pou ganny okenn dimal.—Tsefanya 2:3.

¹⁹ Lefe ki Zeova i servi son bann lanz pwisan pour donn nou sipor e pour ankouraz nou, sa i en rezon akoz nou kapab montre lapresyasyon. Ler nou konn rol ki bann lanz i zwe dan plan Bondye, sa i vreman rekonfortan akoz i annan en kantite lanz ki’n rebele kont Zeova e ki soumet avek Satan. Dan lot lartik nou pou vwar ki keksoz bann vre Kretyen i kapab fer pour protez zot kont lenfliyans Satan ek son bann demon.

[Not anba lo paz]

Ki ou’n aprann?

• Kote bann lanz i sorti?

• Konman Bondye ti servi bann lanz dan letan Labib?

• Dapre Revelasyon 14:6, 7 ki bann lanz pe fer ozordi?

• Ki gran rol bann lanz pou zwe byento?

[Kestyon]

[Portre lo paz 13]

Manoa ek son madanm ti ganny lankourazman sorti kot en lanz

[Portre lo paz 15]

“I annan plis ki avek nou ki avek zot”