Konman nou kapab reziste bann Demon?

“Bann lanz ki pa ti satisfe avek lotorite ki zot ti’n gannyen e ki ti abandonn zot prop demer, ti ganny ansennen avek bann lasenn eternel dan fernwanr . . . pour sa gran Zour kan zot pou ganny kondannen.”—ZID 6.

1, 2. Ki kestyon ki ganny souleve lo Satan ek son bann demon?

ZAPOT Pyer ti donn en lavertisman: “Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore.” (1 Pyer 5:8) Kan i ti pe koz lo bann demon zapot Pol ti dir: “Mon pa oule ki zot partisip avek bann demon. Zot pa kapab bwar an menm-tan lakoup Senyer ek lakoup demon. Zot pa kapab an menm-tan partisip atab avek Senyer e avek demon.”—1 Korentyen 10:20, 21.

² Me lekel Satan ek son bann demon? Ki mannyer e kan zot ti egziste? Eski Bondye ki ti kree zot? Ziska ki degre zot kapab enfliyans imen? Eski i annan okenn fason pour nou protez nou lekor kont zot? Si wi, konman?

Kote zot sorti?

3. Ki mannyer en lanz Bondye ti vin Satan?

³ Byen boner dan listwar imen, kan Bondye ti’n met sa premye koup imen dan zarden Edenn, enn son lanz ti rebele. Akoz i ti fer sa? Akoz i pa ti kontant li avek son plas ki i ti annan dan lesyel. Apre ki Adan ek Ev ti’n ganny kree, bon pye divan, Satan ti profite pour fer zot dezobei Bondye e fer zot ador li olye sa vre Bondye. Par son aksyon i ti rebele kont Bondye e tant sa premye koup imen pour pran en move semen. Par fer tousala i ti fer son lekor vin Satan. Avek letan, en kantite lanz ti pran menm semen avek li. Dan ki fason?—Zenez 3:1-6; Romen 5:12; Revelasyon 12:9.

4. Ki serten lanz rebel ti fer avan Deliz dan letan Noe?

⁴ Labib i dir nou ki en pe letan avan sa gran Deliz ki ti arive dan letan Noe, serten lanz ti konmans annan lentere dan bann fanm lo later e sa ti kont zot natir. Labib i dir nou ki avek en move lentansyon, “bann garson [dan lesyel] sa vre Bondye ti remarke ki bann fiy lo later ti zoli. Zot ti swazir serten e pran zot konman zot madanm.” Sa relasyon seksyel ki zot ti annan avek sa bann fiy ti kont natir, e an rezilta bann zanfan ki ti ne ti en melanz, zot ti vin bann Nefilim. (Zenez 6:2-4) Alors, sa bann lanz ki ti dezobei Bondye ti vin konplis dan rebelyon Satan kont Zeova.

5. Ki ti arive avek sa bann rebel kan Zeova ti anmenn Deliz pour detrir limanite?

 ⁵ Kan Zeova ti anmenn Deliz lo later, bann Nefilim ek zot manman ti perdi zot lavi. Sa bann lanz rebel ti oblize abandonn zot lekor imen e retourn konman bann lespri dan lesyel. Me zot pa ti kapab reganny ‘pozisyon ki zot ti annan’ avan. Plito zot ti ganny lese dan en gran ‘fernwanr spirityel,’ ki apel Tartar.—Zid 6; 2 Pyer 2:4.

6. Konman bann demon i anbet dimoun?

⁶ Depi ki bann move lanz in perdi zot pozisyon, zot in vin menm konplis avek Satan e zot siport son bann move lanbisyon. Depi sa zour, zot ti nepli annan sa pouvwar pour fer zot vin imen. Me kantmenm sa, zot kapab tant zonm ek fanm pour pratik relasyon seksyel ki kont natir. Bann demon i osi aktif dan sa travay pour anbet dimoun par mwayen grigri, bonnonm dibwa, ek bann ki kominik avek demon. (Deterononm 18:10-13; 2 Kronik 33:6) Sa bann move lanz pou ganny menm pinisyon avek Dyab, sa i destriksyon enn fwa pour tou. (Matye 25:41; Revelasyon 20:10) Me an atandan ki sa i vin vre, nou bezwen reste solid e pa les zot ganny nou. I pou byen si nou egzaminen ziska ki degre Satan i kapab enfliyans imen e konman nou kapab evite tonm dan pyez ki li ek son bann demon i met devan nou.

Ziska ki degre Satan i kapab enfliyans Imen?

7. Ki pouvwar Satan i annan lo sa lemonn?

⁷ Toudilon listwar imen, Satan in fer fo lakizasyon lo Zeova. (Proverb 27:11) E lamazorite dimoun pe ganny kontrole par Satan. 1 Zan 5:19 i dir: “Lemonn antye i dan pouvwar dyab.” Se pour sa rezon ki Dyab ti kapab tant Zezi par ofer li “tou bann rwayonm later,” kot i ti pou ganny lotorite ek laglwar. (Lik 4:5-7) Zapot Pol ti dir sa lo Satan: “Sepandan, si nou Levanzil i ankor annan en vwal lo la, i annan en vwal lo la pour bann ki pe perdi. Pour bann enkredil, ki bondye . . . sa syek i’n avegle zot lentelizans, pour ki zot pa war lalimyer Bonn Nouvel, konsernan laglwar Kris, ki zimaz Bondye.” (2 Korentyen 4:3, 4) Satan “i manter e papa tou mansonz,” me i degiz li “konman lanz lalimyer.” (Zan 8:44; 2 Korentyen 11:14) I annan sa pouvwar ek bann bon teknik pour avegle lespri bann dirizan ek zot bann siporter. Avek tou son bann propagann, fo zistwar ek mansonz ki bann larelizyon i fannen, Satan in reisi lapes imen.

8. Ki Labib i fer resorti lo lenfliyans ki Satan i annan?

⁸ Apepre senk syek avan nou lepok, dan letan profet Danyel, i ti evidan ki Satan ki ti pe kontrol sa lemonn. Kan Zeova ti anvoy en lanz pour dir Danyel en mesaz ki ti pou ankouraz li, i ti bezwen fer fas avek lopozisyon sorti kot en “prens [lespri oubyen demon] dan rwayonm Pers.” Sa lanz fidel ti bezwen espere pour 21 zour, ziska ki “Misel, enn parmi bann premye prens,” ti vin sekour li. Sa menm resi i koz lo “[demon] ki prens Lagres.” (Danyel 10:12, 13, 20) Dan Revelasyon 13:1, 2, Satan i ganny dekrir konman en “dragon” ki’n donn “son pisans, son tronn ek en gran pouvwar” avek sa bebet ki reprezant sistenm politik.

9. Kont kwa vre Kretyen pe lager?

⁹ Se pour sa rezon ki zapot Pol ti ekrir: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.” (Efezyen 6:12, nou ki’n met an italik.)  Menm ziska ozordi, bann demon anba kontrol Satan i ankor la par deryer rido. Zot annan lenfliyans lo bann dirizan imen, e osi lo limanite an zeneral, bann demon i motiv zot pour fer bann akt zenosid ki ou pa kapab trouv mo pour dekrir, pour vin bann teroris ek kriminel. Aprezan annou egzaminen konman nou kapab pa tonm dan pyez sa bann move lanz pwisan.

Konman pour defann nou Lekor?

10, 11. Konman nou kapab reziste Satan ek son bann demon?

¹⁰ Avek nou prop lafors, ki swa lafors fizik oubyen mantal, nou pa pou kapab reziste Satan avek son bann demon. Zapot Pol ti donn nou sa konsey: “Rod ou lafors dan linyon avek Senyer e dan son gran pisans.” Nou bezwen depan lo Bondye si nou anvi ganny proteze. Apre zapot Pol ti azoute: “Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab.” ‘Met lo zot, tou bann lekipman batay ki Bondye in donn zot. Alor kan bann move zour difikilte i ava arive, zot a kapab defann zot kont latak lennmi, e kan zot a’n fini lite ziska zot dernyen zour, zot ava ankor kapab tenir ferm.’—Efezyen 6:10, 11, 13.

¹¹ De fwa, Pol ti ankouraz son bann frer ek ser Kretyen pour met lo zot ‘tou bann lekipman batay’ ki Bondye i donnen. Sa mo “tou,” i vedir ki en dimoun ki met zis en bout sa lekipman, sa pa pou sifi pour li reziste bann latak demon. Alors, lekel sa bann parti tre enportan sa lekipman spirityel ki bann Kretyen ozordi i bezwen pa tarde pour mete pour zot kapab reziste bann demon?

Konman “tenir zot tou Letan pare”?

12. Ki mannyer bann Kretyen i kapab ser zot leren avek laverite?

¹² Pol i eksplike: “Zot bezwen alor tenir zot tou letan pare: pran laverite konman en sang otour zot leren; pran ladrwatir konman en proteksyon lo zot pwatrin.” (Efezyen 6:14) De parti sa lekipman ki ganny mansyonnen la, i sang oubyen sentir ek proteksyon lo pwatrin. En solda ti bezwen ser byen son sang pour kapab protez son leren (ki enkli bavant e laans) e pour kapab siport pwa son lepe. Pareyman, laverite dan Labib i bezwen ganny sere otour nou leren, zis parey sa sang, pour ki nou kapab viv an armoni avek sa ki i ansennyen. Eski nou annan en progranm pour lir Labib toulezour? Eski nou fer li an fanmiy? Eski nou abitye egzamin teks pour lazournen an fanmiy? Deplis, eski nou reste azour avek leksplikasyon ki “lesklav fidel e pridan” i pibliye dan nou bann piblikasyon? (Matye 24:45, NW) Si wi, nou pe fer bokou zefor pour aplik konsey ki Pol ti donnen. Nou osi annan bann kaset video ek DVD ki kapab donn nou gidans baze lo Labib. Kan nou kontan laverite avek tou nou leker, sa i kapab ed nou fer bon desizyon e anpes nou fer move swa dan lavi.

13. Ki mannyer nou kapab protez nou leker senbolik?

¹³ Sa proteksyon lo pwatrin ti ganny servi pour protez lestoman, leker ek lezot lorgann enportan en solda. En Kretyen i kapab protez son leker senbolik, savedir sa dimoun ki i ete anndan. E pour kapab fer sa i bezwen devlop lanmour pour ladrwatir Bondye e reste atase avek bann standar drwat Zeova. Sa proteksyon senbolik lo nou pwatrin i anpes nou atas mwens  lenportans avek Parol Bondye. Anmezir ki nou “ay sa ki move e kontan sa ki bon,” nou lipye pa pou travers “okenn move semen.”—Amos 5:15; Psonm 119:101.

14. Ki savedir “met lentere pour anons levanzil konman en soulye dan zot lipye”?

¹⁴ Bann solda Romen ti bezwen met bon soulye pour kapab fer gran traze plizyer santenn kilomet lo bann gran semen partou dan lanpir Romen ki ti zwenn avek kanmarad. Ki sa i vedir pour bann Kretyen ler Labib i dir, “Met lentere pour anons levanzil konman en soulye dan zot lipye”? (Efezyen 6:15) I vedir ki nou’n pare pour azir. Nou’n pare pour partaz sa bon nouvel lo Rwayonm Bondye dan tou lokazyon ki konvenab. (Romen 10:13-15) Kan nou aktif dan predikasyon, nou pou ganny proteze kont bann “riz” Dyab oubyen kont son bann “taktik anba anba.”—Efezyen 6:11; not anba lo paz dan New World Translation.

15. (a) Kwa ki montre ki sa gran boukliye lafwa i endispansab? (b) Ki kalite “dart alimen” ki kapab detri nou lafwa?

¹⁵ Zapot Pol ti kontinyen: ‘Sirtou, pran lafwa konman en proteksyon ki en boukliye i donnen. Avek sa zot a kapab tenny dife tou bann dart alimen ki Dyab i anvoye.’ (Efezyen 6:16) Avan ler zapot Pol ti konsey bann Kretyen pour pran lafwa konman en proteksyon ki boukliye i donnen, i ti dir, ‘sirtou.’ Alors, sa i montre ki sa parti lekipman i endispansab. Fodre nou lafwa i reste toultan for. Zis parey en gran boukliye, nou lafwa i protez nou kont bann “dart alimen” Dyab. Ki sa bann dart i kapab reprezante ozordi? I kapab lensilt ki penetre zis parey en dart, i kapab mansonz, lenformasyon pibliye par nou lennmi ek aposta, ki annan en bout laverite e en bout mansonz avek bi pour detrir nou lafwa. Sa bann “dart” i kapab sa lanvi pour ganny en kantite keksoz materyel, pas tou nou letan aste en kantite keksoz e menm fer nou fer konpetisyon avek sa bann ki’n tonm dan sa labitid pour fer ekstravagans zis pour atir latansyon lo zot menm. Petet zot in aste pli bon e pli gro lakaz ek transpor, oubyen zot fer tou dimoun vwar zot ta bizou ser ek dernyen lanmod lenz. Nenport kwa ki lezot i fer nou bezwen annan en lafwa solid pour nou kapab defann nou lekor kont sa bann “dart alimen.” Konman nou kapab batir e mentenir en lafwa solid?—1 Pyer 3:3-5; 1 Zan 2:15-17.

16. Kwa ki kapab fer nou lafwa vin solid?

¹⁶ Nou kapab vin pros avek Bondye si nou annan en letid personnel ki regilye e si nou sipliy Bondye dan lapriyer. Nou kapab sipliy Zeova pour batir nou lafwa e apre nou bezwen fer zefor pour viv an armoni avek nou lapriyer. Par egzanp, eski nou abitye prepare pour letid Latour Veyer, avek bi pour reponn? Nou lafwa pou vin solid si nou etidye Labib ek bann piblikasyon baze lo Labib.—Ebre 10:38, 39; 11:6.

17. Konman nou kapab aksepte sa ‘kas delivrans’?

¹⁷ Pour konklir son diskisyon lo sa lekipman batay, Pol ti donn sa konsey: “Pran osi konman kas lo zot latet delivrans ki Bondye i donnen, e pran Laparol Bondye konman en lepe ki Lespri i donnen.” (Efezyen 6:17) Sa kas ti protez latet ek laservel sa solda, sa parti lekor ki i servi pour fer desizyon. Pareyman, nou lespwar i protez nou abilite pour reflesir. (1 Tesalonisyen 5:8) Olye toultan mazinen konman nou pou akonpli bann lobzektif dan sa lemonn, konman pour ganny en kantite keksoz materyel, nou devret konsantre lo sa  lespwar ki Bondye in donn nou, zis parey Zezi ti fer.—Ebre 12:2.

18. Akoz nou pa devret negliz nou progranm pour lir Labib regilyerman?

¹⁸ En dernyen keksoz ki kapab protez nou kont lenfliyans Satan ek son bann demon, i parol Bondye, oubyen son mesaz ki trouve dan Labib. Sa i en lot rezon akoz nou pa devret negliz nou progranm pour lir Labib toulezour. En konnesans byen aprofondi lo Parol Bondye, i anpes nou ganny anbete par mansonz Satan ek propagann demon, oubyen piblikasyon pibliye par bann aposta kot zot zis eksprim zot laenn kont nou.

“Priye dan tou Sirkonstans”

19, 20. (a) Ki pou arive avek Satan ek son bann demon byento? (b) Kwa ki kapab donn nou lafors spirityelman?

¹⁹ Byento Satan ansanm avek son bann demon ek sa move lemonn pou disparet. Satan i konn tre byen ki i reste li “zis en pti pe letan.” I pe tir son lakoler e i pe lager avek sa bann “ki obei konmannman Bondye e ki fidel avek temwanyaz Zezi.” (Revelasyon 12:12, 17) I tre enportan ki nou pa les Satan ek son bann demon ganny nou.

²⁰ Pa nou devret vreman apresye sa konsey pour met tou sa lekipman batay ki Bondye i donnen! Pour termin son diskisyon lo sa lekipman spirityel, zapot Pol ti donn sa konsey: “Fer tousala dan lapriyer an sipliyan Bondye pour son led. Priye dan tou sirkonstans, e les zot ganny gide par Lespri. Fodre alor, ki zot reste vizilan e touzour fidel; e priye pour tou bann sen.” (Efezyen 6:18) Lapriyer i kapab donn nou sa lafors spirityelman e ed nou reste vizilan. Annou pran aker parol zapot Pol, e kontinyen priye akoz sa pou ed nou reziste Satan ek son bann demon.

Ki ou’n aprann?

• Kote Satan ek son bann demon i sorti?

• Ziska ki degre Dyab i kapab enfliyans dimoun?

• Konman nou kapab defann nou lekor kont Satan ek son bann demon?

• Konman nou kapab met tou sa lekipman batay ki Bondye i donnen?

[Kestyon]

[Portre lo paz 17]

‘Bann garson sa vre Bondye ti remark bann fiy lo later’

[Portre lo paz 19]

Eski ou kapab idantifye sa sis parti dan nou lekipman batay spirityel?

[Portre lo paz 21]

Konman ki ler nou partisip dan sa bann aktivite, sa i vin en defans pour nou kont Satan ek son bann demon?