Kote pour trouv bann bon Konsey?

Ki mannyer mon kapab prezerv mon lasante?

Ki mon kapab fer pour ki mon lavi fanmiy i pli ere?

Ki mannyer mon kapab ogmant mon sans pour gard en travay?

ESKI ou’n deza demann okenn sa bann kestyon? Eski ou’n trouv okenn larepons pratik ki ti marse? Sak lannen, apepre 2,000 diferan liv i ganny pibliye ki donn konsey lo sa bann size ek lezot size enportan ankor. Zis Langleter, bann lekter i depans preski 120 milyon ero dan en lannen lo bann liv ki donn konsey lo lafason en dimoun i kapab fer fas avek bann problenm dan lavi. Letazini, lavant bann liv ki ofer konsey pratik, i ariv en total apepre 480 milyon ero dan en lannen. Sirman pa zis ou tousel ki pe rod bon konsey konman pour fer fas avek lavi toulezour.

Konsernan sa bann konsey ki ganny trouve dan sa kantite piblikasyon, en ekriven ti dir: “Bokou nouvo liv i zis repet sa ki’n deza ganny ekrir.” An realite, bokou sa bann konsey ki ganny trouve dan sa bann liv i senpleman en refleksyon sa lasazes ki trouve dan enn parmi sa pli vye liv dan lemonn. San okenn dout, sa liv in ganny plis distribye partou dan lemonn. I’n ganny tradwir swa an antye oubyen an parti dan apepre 2,400 langaz. An tou, plis ki 4.6 bilyon kopi in ganny enprimen dan lemonn antye. Sa liv i Labib.

Labib i klerman dir: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.” (2 Timote 3:16) I vre ki prensipalman Labib pa ti ganny ekrir konman en liv ki donn konsey pratik. Son bi prensipal i pour revel plan Bondye pour limanite. Kantmenm sa, i annan en kantite lenformasyon dan Labib lo konmann nou kapab fer fas avek bann problenm ki nou tou nou kapab rankontre, e i promet ki bann ki swiv son gidans se zot menm ki pou ganny bann byenfe. (Izai 48:17, 18) Nenport ki ras, kiltir oubyen nivo ledikasyon ki en dimoun i annan, ler i aplik sa bann konsey pratik dan Labib, sa i toultan marse.