Led sorti kot “Bondye ki donn Pasyans ek Konsolasyon”

IANNAN apepre 2,000 an pase, depi ki zapot Pol en ekriven Labib ti dekrir Zeova konman sa “Bondye ki donn pasyans ek konsolasyon.” (Romen 15:5) Vi ki Labib i asir nou ki Zeova pa sanze avek letan, nou kapab annan konfyans ki Bondye i touzour donn konsolasyon sa bann ki servi li. (Zak 1:17) Anfet, Labib i montre ki Zeova i donn konsolasyon dan diferan fason sa bann ki dan bezwen. Ki serten sa bann fason? Bondye i donn lafors sa bann ki priy li pour demann li son led. I osi ankouraz bann vre Kretyen pour konsol kanmarad. E dan son Parol, Labib, Zeova in kit bann resi ki donn rekonfor e ki vreman ankourazan pour bann ki dan sagrinasyon akoz lanmor enn zot zanfan. Annou vwar enn par enn sa trwa fason ki mannyer Zeova i donn konsolasyon.

‘Zeova li menm in tande’

Lerwa David ti ekrir sa konsernan nou Kreater Zeova: “Met ou konfyans dan li toultan, O pep. Devan li devid ou leker. Bondye i en refiz pour nou.” (Psonm 62:8) Akoz David ti annan sitan konfyans dan Zeova? David ti pe mazin son prop leksperyans kan i ti ekrir: “Sa enn ki aflize in kriye e Zeova li menm in tann li. I’n sov li kont tou son bann soufrans.” (Psonm 34:6) Dan tou bann soufrans ki i ti pas ladan, David ti toultan priy Bondye pour ganny led, e Zeova ti toultan ed li. David ti konnen par son prop leksperyans ki Bondye ti pou siport li e ed li pour andire.

 I enportan pour bann paran ki dan dey konnen ki Zeova pou soutenir zot dan sa profon latristes ki zot ladan, zis parey i ti fer pour David. Zot kapab apros sa enn ki “ekout lapriyer,” avek konfyans ki i pou ed zot. (Psonm 65:2) William, ki ti ganny mansyonnen dan sa premye lartik i fer sa remark: “Plizyer fwa mon ti santi ki mon ti nepli kapab kontinyen avek lavi san mon garson, e mon ti demann Zeova pour donn mwan soulazman. I ti touzour donn mwan lafors ek kouraz pour kontinyen viv.” Ou osi si ou kontinyen priy Zeova avek lafwa, sa gran Bondye lesyel pou soutenir ou. Apre tou, Zeova i fer sa promes avek tou sa bann ki fer zefor pour servi li: “Parski mwan, Zeova, mon ou Bondye, mon pe tyonbo ou lanmen drwat, sa Enn ki pe dir ou, ‘Pa bezwen per. Mon pou ed ou.’”—Izai 41:13.

Sipor bann vre Zanmi

Bann paran ki zot zanfan in mor zot souvan bezwen letan kot zot tousel, pour plere e pour esey konpran zot santiman. Me, i pa pou saz si zot evite vwar lezot dimoun pour en tro gran kantite letan. Dapre Proverb 18:1, “sa ki izol son lekor” i kapab fer ditor li menm. Alor, bann ki dan dey i devret fer atansyon pour zot pa tonm dan sa pyez pour izol zot lekor.

Bann zanmi ki annan lakrent pour Bondye i kapab en gran led pour sa bann ki pe soufer. Proverb 17:17 i dir: “En vre konpanyon i kontan ou toultan, e i en frer ki’n ne pour letan ladetres.” Lucy, ki ti osi ganny mansyonnen dan sa premye lartik, ti ganny konsole par bann vre zanmi apre lanmor son garson. Ler i ti pe koz lo son bann zanmi dan kongregasyon i ti dir: “Zot vizit ti ed nou en kantite, menm si parler zot pa ti koz bokou. En zanmi ti rann mwan vizit zour ki mon ti mon tousel. I ti konnen ki mon ti pou kot mwan pe plere, e souvan i ti pase e pler ansanm avek mwan. En lot li, i ti telefonn mwan toulezour pour donn mwan lankourazman. Lezot ankor ti envit nou kot zot pour manze, e zot kontinyen fer li.”

Menm si i pa fasil pour sa profon douler  ale konpletman apre lanmor zot zanfan, lapriyer e lefe ki zot zwenn ansanm avek bann vre zanmi Kretyen, sa pou vreman donn zot konsolasyon. En kantite paran Kretyen ki enn zot zanfan in mor i santi ki Zeova i soutenir zot. Wi, Zeova “pe geri sa bann ki zot leker in brize, e i pe pans zot blesir.”—Psonm 147:3.

Bann Resi Labib ki donn Konsolasyon

Apard lapriyer ek lankourazman ki zot gannyen ler zot zwenn avek bann frer ek ser Kretyen, Parol Bondye i en sours konsolasyon pour bann ki dan dey. Bann resi Labib i montre ki Zezi i vreman anvi e i annan sa pouvwar pour fer bann paran ki dan dey, nepli santi sa douler, par resisit zot zanfan ki’n mor. Pour bann ki dan sagrinasyon sa bann resi Labib i donn zot sa vre konsolasyon. Annou vwar de legzanp.

Dan Lik sapit 7 i dekrir sa ki ti arive kan Zezi ti zwenn en laprosesyon lanterman dan lavil Nain. Bann dimoun ti pe al anter sa sel garson ki en vev ti annan. Dan verse 13 i dir “Kan Zezi ti war sa vev‚ i ti pran pitye pour li‚ e dir li‚ . . . ‘Pa plere!’”

I byen rar ki dimoun pou oze dir avek en manman ki pe asiste lanterman son garson aret plere. Me akoz Zezi ti dir sa? Akoz i ti konnen ki dan ankor en pti moman sa manman ti pou nepli dan sagrinasyon. Sa resi i kontinyen koumsa: “I ti avanse e tous serkey, e sa bann dimoun ki ti pe anmenn sa serkey ti arete. Zezi ti dir, ‘Zenn-onm, mon dir ou, leve!’ E sa zonm ki ti’n mor ti asize e i ti konmans koze. Zezi ti rann li avek son manman.”  (Lik 7:14, 15) Sa levennman ti bezwen fer sa manman rekonmans plere, me sa voyaz i ti plere avek lakontantman.

Lo en lot lokazyon, en zonm ki ti apel Zairis, ti apros Zezi e ti demann li led pour son pti fiy douz an ki ti gravman malad. En pti pe letan apre, Zairis ti ganny enformen ki son fiy ti’n mor. Zairis ti dezespere kan i ti tann sa nouvel, me Zezi ti dir li: “Pa bezwen per, zis krwar.” Kan i ti ariv kot lakaz Zairis, Zezi ti antre anndan e al kot lekor sa pti fiy. I ti pran son lanmen e dir: “Pti fiy, mon dir ou, leve!” Ki ti arive? “Deswit sa pti fiy ti leve e marse.” Ki ti reaksyon son paran? ‘Zot tou zot ti dan en gran letonnman ek lazwa.’ Kan Zairis ek son madanm ti may zot fiy, zot ti santi en gran lazwa. Ou a krwar zot ti pe reve.—Mark 5:22-24, 35-43.

Sa bann resi detaye lo rezireksyon bann zanfan i montre bann paran ki dan dey, ki zot annan en lespwar. Zezi ti dir: “Ler pe arive kan tou bann mor ki dan tonbo pou tann son lavwa, e zot pou sorti dan zot tonbo.” (Zan 5:28, 29) Zeova in fer laranzman pour ki son Garson i resisit bann ki’n mor. Sa plizyer milyon zanfan ki’n mor pou “tann son lavwa” kan i pou dir avek sakenn ant zot: “Mon dir ou, leve!” Sa bann zanfan pou kapab marse e koz ankor. Zis parey Zairis ek son madanm, paran sa bann zanfan pou dan ‘en gran letonnman ek lazwa.’

Si enn ou garson oubyen enn ou fiy in mor, asire ki Zeova i kapab fer ou sagrinasyon vin lazwa par resisit bann ki’n mor. Pour benefisye avek sa lespwar merveye, ou pou bezwen obeir lankourazman sa psalmis: “Rod Zeova ek son lafors. Rod li konstaman. Mazin bann travay merveye ki i’n fer, son bann mirak.” (Psonm 105:4, 5) Wi, servi sa vre Bondye, Zeova, e ador li dan sa fason ki fer li plezir.

Ki bann byenfe ou kapab gannyen konmela menm si ou “rod Zeova”? Ou pou ganny lafors atraver lapriyer, ou pou ganny konsole par lentere ranpli avek lanmour ki bann vre zanmi Kretyen pou demontre anver ou, e ou pou ganny lankourazman ler ou etidye Parol Bondye. Deplis, byento, ou pou vwar ‘bann travay merveye ek bann mirak’ ki Zeova pou akonpli pour ou byenfe eternel ek pour ou zanfan ki’n mor.

[Bwat lo paz 5]

“Anmenn sa Madanm ki son de Zanfan in mor”

Kehinde ek Bintu zot en koup Nizeryen ki Temwen Zeova e ki zot de zanfan ti mor dan en aksidan loto. Sa maler in anmenn bokou soufrans lo zot e zot ankor pe soufer. Me kantmenm sa, zot konfyans dan Zeova i soutenir zot, e zot kontinyen partaz avek zot prosen sa mesaz lespwar ki dan Labib.

Vi ki Kehinde ek Bintu ti reste kalm e demontre kouraz dan sa sitiasyon, lezot ti remark sa. En zour en madanm ki apel Madanm Ukoli ti dir avek enn zanmi Bintu: “Anmenn sa madanm ki tou le de son zanfan ti mor anmenmtan, e ki pe kontinyen pres mesaz Labib. Mon oule konnen kwa ki donn li lafors pour andire.” Kan Bintu ti ariv kot lakaz Madanm Ukoli, i ti dir li: “Mon oule konnen akoz ou kontinyen koz konsernan sa Bondye ki’n touy ou bann zanfan. Bondye in pran mon sel fiy ki mon ti annan. Depi sa, mon nepli enterese avek li.” Bintu ti servi Labib pour eksplik li pour ki rezon dimoun i mor e akoz nou kapab annan lespwar ki bann dimoun ki nou ti kontan ki’n mor pou ganny resisite en zour.—Akt 24:15; Romen 5:12.

Apre sa, Madanm Ukoli ti dir: “Avan mon ti krwar ki Bondye ki pran bann dimoun. Me aprezan mon konn laverite.” I ti deside pour konmans etidye Labib avek Temwen Zeova pour aprann plis lo bann promes Bondye.

[Bwat lo paz 6]

‘Mon anvi ede, me mon pa konnen ki mannyer’

Pandan ki bann paran oubyen bann frer ek ser sa zanfan ki’n mor i santi en profon sagrinasyon, de lot kote zot bann zanmi i kapab santi zot enkyet. Zot anvi donn zot siport sa fanmiy me zot per ki si zot dir oubyen fer en keksoz ki pa apropriye sa pou zis ogmant zot sagrinasyon. La serten sizesyon pour bann ki ti ava anvi ede me ki pa konnen ki mannyer.

❖ Pa bezwen evit en dimoun ki dan dey akoz ou pa konnen ki pour dir oubyen fer. Si ou pas letan avek zot, sa pou donn zot kouraz. Eski ou pa konnen ki pour dir? Zis anmay zot e dir zot senserman “mon pran par dan ou maler,” i fer zot konnen ki ou enterese avek zot. Eski ou per ki si ou konmans plere, ou pou fer zot pli sagren ankor? Labib i dir: “Pran lapenn avek sa ki dan lapenn.” (Romen 12:15) Ou larm i montre ki ou partaz zot sagrinasyon, e sa i anmenn rekonfor.

❖ Pran linisyativ. Eski ou kapab prepar en repa senp pour sa fanmiy? Eski ou kapab lav zot bann zafer sal ki’n akimile? Eski ou kapab rann zot bann pti servis, par egzanp fer zot konmisyon? Pa dir zot, “Les mwan konnen si ou bezwen okenn keksoz?” Menm si ou senser, sa bann parol pou fer bokou paran ki dan dey krwar ki ou tro okipe pour ed zot. Plito, demann zot, “Ki mon kapab fer pour ed ou?” e apre fer sa ki zot demann ou pour fer. Me evite enterfer dan zot lavi prive.

❖ Evite dir, “Mon konnen ki mannyer ou santi.” Sak dimoun i reazir dan en fason diferan kan en dimoun ki zot kontan i mor. Menm si ou osi ou’n deza annan en zanfan ki’n mor, ou pa vreman konnen san poursan ki mannyer zot santi.

❖ I pou demann en bon pe letan avan ki keksoz i vreman retourn normal kot sa lakour. Kontinyen ede otan ki ou kapab. Okonmansman, i souvan annan en kantite latansyon ki ganny demontre anver sa fanmiy ki dan dey, me zot bezwen plis ki sa. Vey byen pour pran swen avek zot dan bann semenn ek mwan ki pe vini. *

[Not anba lo paz]

[Portre lo paz 7]

Bann resi Labib i montre ki Zezi i annan sa pouvwar e i vreman anvi resisit bann zanfan