Akoz tou Soufrans pou fini byento
Akoz tou Soufrans pou fini byento
“Sa Ros, tou sa ki i fer i parfe.”—DETERONONM 32:4.
1, 2. (a) Akoz ou seri sa lespwar pour viv pour touzour? (b) Kwa ki anpes bokou krwar dan sa Bondye ki fer bann promes merveye pour lavenir?
ESKI ou kontan mazinen ki mannyer lavi pou ete dan Paradi? Petet ou vwar ou pe eksplor sa plannet merveye e pe aprann konsernan preski tou son gran kantite varyete keksoz ki vivan lo la e ki napa en finisyon. Oubyen petet ou pe reflesir ki satisfaksyon ou pou gannyen kan ou pou donn lanmen lezot pour pran swen avek later e ede pour ki i ganny transformen antyerman pour fer li vin en zarden. Oubyen ou kapab mazin bann talan ki ou pou devlope dan lar, larsitektir, lanmizik, oubyen lezot keksoz ki ou anvi fer me ki ou pa trouv letan ozordi akoz presyon lavi. Antouleka, ou seri sa lespwar pour en zour viv sa letan ki Labib i apel sa “vre lavi” ouswa sa lavi ki Zeova ti oule nou viv, avek sa bi pour viv pour touzour.—1 Timote 6:19.
2 I en plezir ek en loner pour partaz sa lespwar baze lo Labib avek lezot, pa i vre? Me, en kantite dimoun i rezet sa lespwar. Zot dir ki sa pa vre, ki i zis en rev pour bann dimoun ki fasilman les zot ganny anbete. Zot menm kapab trouv li difisil pour krwar dan sa Bondye ki promet lavi eternel dan Paradi. Akoz? Sa ki fer li difisil pour serten, se akoz sa problenm ki nou souvan apel, lemal. Zot krwar ki si Bondye i egziste, i tou pwisan, e i annan lanmour, i difisil pour konpran akoz lemal ek soufrans i egziste. Pour zot i pa kapab egziste en Bondye ki toler lemal oubyen si i egziste, swa i pa tou pwisan, oubyen i pa enterese avek nou. Pour serten sa kalite rezonnman i paret fer sans. Vreman Satan i vin en eksper pour avegle lentelizans bann imen.—2 Korentyen 4:4.
3. Ki kestyon difisil nou kapab ed dimoun pour reponn, e akoz nou dan sa pozisyon spesyal pour fer li?
3 Konman Temwen Zeova, nou dan sa pozisyon spesyal pour ed dimoun ki pe ganny tronpe par Satan ek lasazes sa lemonn. (1 Korentyen 1:20; 3:19) Nou konpran akoz en kantite pa krwar dan bann promes Labib. Zot zis pa konn Zeova. I kapab zot pa konn son non oubyen ki son non i vedir, e i probab ki zot konn en pti gin oubyen pa konn nanryen ditou lo son bann kalite, ouswa son repitasyon pour gard son bann promes. I en benediksyon pour nou annan sa kalite konnesans. Detanzaot, i byen pour nou revwar ki mannyer nou kapab ed dimoun ki zot “lespri i dan fernwanr” trouv larepons enn sa bann kestyon pli difisil ki imen i demande, “Akoz Bondye i permet lemal ek soufrans?” (Efezyen 4:18) Premyerman nou pou vwar ki sa pli bon fason nou kapab reponn sa kestyon. Apre nou pou diskit lo ki mannyer bann kalite Zeova i evidan dan lafason ki i azir dan sa sitiasyon.
Pli bon Fason pour reponn sa Kestyon
4, 5. Kwa ki kapab neseser pour nou fer an premye kan en dimoun i demann sa kestyon akoz Bondye i permet soufrans? Eksplike.
4 Ki nou reponn ler en dimoun i demande akoz Bondye i permet soufrans? Nou kapab annan sa tandans pour toudswit fer en gran leksplikasyon detaye, par konmans rakont sa ki ti arive dan zarden Edenn. Dan serten ka, sa i kapab apropriye. Me fer atansyon, pa taye pour donn en larepons. Ti a byen avan pour etablir en baz. (Proverb 25:11; Kolosyen 4:6) Annou egzamin trwa pwen ki nou kapab servi pour ed en dimoun avan ki nou esey reponn sa kestyon.
5 Premyerman, si en dimoun i trouble akoz lemal ki egziste partou dan lemonn, i probab ki li menm ouswa en dimoun ki i kontan in ganny afekte par lemal. Petet i pou saz alor pour konmans par montre dan en fason senser ki ou santi parey li i pe santi. Zapot Pol ti konsey bann Kretyen: “Pran lapenn avek sa ki dan lapenn.” (Romen 12:15) Par montre ki ou annan “menm santiman” avek zot, sa i kapab tous sa dimoun. (1 Pyer 3:8) Si i vwar ki nou enterese avek li, i pou pli pare pour ekout sa ki nou annan pour dir.
6, 7. Akoz i pou byen si nou kapab felisit en dimoun ki demann en kestyon baze lo Labib ki pe trouble li?
6 Dezyenmman, nou kapab felisit sa dimoun pour demann sa kestyon. Serten dimoun ki souvan demann sa bann kestyon, zot krwar ki sa i akoz zot napa lafwa oubyen zot mank respe anver Bondye. I menm posib, ki bann sef relizye ki’n dir sa avek zot. Me sa pa neseserman vre. Apre tou, bann dimoun fidel dan letan Labib ti demann menm kestyon. Par egzanp, psalmis David ti demande: “Akoz, O Zeova ou debout lwen avek mwan? Akoz ou reste kasyet kan mon dan letan ladetres?” (Psonm 10:1) Pareyman, profet Abakouk ti demande: “Konbyen letan O Zeova mon bezwen kriy osekour, san ki ou tann mwan? Konbyen letan fodre mon kriy ou pour demann led kont vyolans, san ki ou sov mwan? Akoz ou fer mwan vwar sa ki fer mal, e ou kontinyen get zis problenm menm? Akoz depouyman ek vyolans i la devan mwan? Akoz dispit i arive e akoz i annan konfli?”—Abakouk 1:2, 3.
7 Sa bann zonm ti bann zonm fidel ki ti annan en kantite respe pour Bondye. Eski zot ti ganny reprimande akoz zot ti demann sa bann kestyon ki ti pe trouble zot? Okontrer, Zeova ti vwar li apropriye ki sa bann kestyon senser i ganny rikorde dan son Parol. Ozordi, en dimoun ki enkyet akoz lemal i partou, i kapab lafen spirityelman e annan sa gran lanvi pour konn bann larepons ki trouve zis dan Labib. Pa bliye, Zezi ti koz an byen lo bann ki ti lafen spirityelman, oubyen ki ti “konsyan zot bezwen spirityel.” (Matye 5:3, NW) Pa i en privilez pour ed sa bann dimoun trouv sa boner ki Zezi in promet!
8. Ki lansennyman ki’n konfiz dimoun, ki fer zot krwar ki Bondye i responsab pour soufrans, e ki mannyer nou kapab ed zot?
8 Trwazyenmman, nou kapab bezwen ed sa dimoun pour vwar ki Bondye pa responsab pour sa kantite mesanste ki partou dan sa lemonn. En kantite dimoun in ganny ansennyen ki Bondye pe diriz sa lemonn ki nou pe viv ladan, ki Bondye in deza deside depi lontan tou sa ki arive avek nou, e rezon akoz i fer imen soufer i en mister. Sa bann lansennyman i fo. Zot anmenn dezonner lo Bondye e zot dir ki i responsab pour mesanste ek soufrans dan lemonn. Alors nou kapab servi Parol Bondye pour koriz sa lerer. (2 Timote 3:16) Zeova pa pe gouvern sa lemonn koronpi, se Satan ki pe fer li. (1 Zan 5:19) Zeova pa desid davans sa ki pou arive avek bann imen ki entelizan; i donn sakenn son liberte ek loportinite pour swazir ant sa ki bon ek move, e ant sa ki byen ek mal. (Deterononm 30:19) E mesanste pa zanmen sorti kot Zeova, i ay mesanste e i enterese avek sa bann ki soufer dan en fason enzis.—Zob 34:10; Proverb 6:16-19; 1 Pyer 5:7.
9. Ki serten piblikasyon “lesklav fidel e pridan” in donnen pour nou kapab ed dimoun konpran akoz Bondye i permet soufrans?
9 Enn fwa ki ou’n etablir sa baz pour sa diskisyon, petet sa dimoun i kapab pare pour aprann akoz Bondye i permet soufrans kontinyen. Pour ed ou, “lesklav fidel e pridan” in met a nou dispozisyon en kantite piblikasyon. (Matye 24:45-47, NW) Par egzanp pandan Lasanble Distrik “Lobeisans anver Bondye” an 2005/06, ti annan en trak ki ti sorti, son tit ti Tou Soufrans pou fini byento! Si sa trak i disponib dan ou langaz, akoz ou pa esey konn byen son konteni? Pareyman, sa liv Ki Labib i vreman dir?, ki aprezan disponib dan 157 langaz, i prezant en sapit antye ki reponn sa kestyon enportan. Servi byen sa bann piblikasyon. Zot eksplik klerman sa seri levennman ki’n ganny dekrir dan Labib, ki ti pase dan zarden Edenn kot sa kestyon konsernan drwa Bondye pour dirize ti ganny souleve e akoz Zeova ti tret sa problenm dan sa fason ki i’n fer. Pareyman ler ou pe diskit lo sa size, gard antet ki ou pe revel avek sa dimoun ki pe ekout ou, sa konnesans pli enportan. Se sa konnesans lo Zeova ek son bann kalite merveye.
Konsantre lo bann kalite Zeova
10. Kwa ki bokou dimoun i vwar difisil pour konpran lefet ki Bondye i permet soufrans, e ki konnesans ki kapab ed zot?
10 Anmezir ki ou ed dimoun pour konpran akoz Zeova in permet bann imen pour gouvern zot lekor anba lenfliyans Satan, esey atir zot latansyon lo bann kalite merveye Zeova. En kantite dimoun i konnen ki Bondye i pwisan; zot abitye avek sa lide akoz zot tann dimoun apel li Bondye Tou Pwisan. Me, zot kapab trouv li difisil pour konpran akoz i pa servi son gran pwisans konmela menm pour met en lafen avek lenzistis ek soufrans. Probableman, zot napa sa konprenezon lo lezot kalite ki Zeova i annan, tel parey sentete, lazistis, lasazes, ek lanmour. Zeova i demontre tou sa bann kalite dan en fason parfe e balanse. Labib i dir: “Tou sa ki i fer i parfe.” (Deterononm 32:4) Ki mannyer ou kapab met lanfaz lo sa bann kalite Zeova anmezir ki ou reponn bann kestyon ki souvan ganny demande lo sa size? Annou egzamin enn de legzanp.
11, 12. (a) Akoz i pa ti posib pour pardonn Adan ek Ev kan zot ti fer pese? (b) Akoz Zeova pa pou toler pese pour touzour?
11 Eski Zeova pa ti zis kapab pardonn Adan ek Ev? Ti napa okenn posibilite pour pardonnen dan sa ka. Konman bann imen parfe Adan ek Ev ti swazir pour volonterman rezet drwa Zeova pour dirize e aksepte gidans Satan. I pa sirprenan alor, ki sa bann rebel pa ti montre okenn siny repantans. Me, ler dimoun i demande akoz dan sa ka Zeova pa ti zis pardonn zot, i kapab zot pe mazinen akoz Zeova pa ti senpleman bes son standar e permet legzistans pese ek rebelyon. En kalite vreman enportan ki Zeova i annan i enplike dan sa larepons, sa i son sentete.—Egzod 28:36; 39:30.
12 Labib i met lanfaz lo sentete Zeova plizyer santenn fwa. Me malerezman, pa bokou dimoun dan sa lemonn koronpi ki annan konprenezon lo sa kalite. Zeova i prop, pir, e separe avek tou sa ki annan pour fer avek pese. (Izai 6:3; 59:2) Kot i konsern pese, i’n fer laranzman pour ki pese i ganny kouver e efase, me i pa pou toler li pour touzour. Si Zeova ti oule toler pese pour touzour, nou ti pou napa okenn lespwar pour lavenir. (Proverb 14:12) Dan son letan ki i’n fikse, Zeova pou fer ki tou son kreasyon i reganny son sentete. Nou asire, akoz i lavolonte sa Enn ki Sen.
13, 14. Akoz Zeova ti deside pa detri sa bann rebel dan zarden Edenn?
13 Eski Zeova pa ti kapab zis detri sa bann rebel dan zarden Edenn e rekonmans tou keksoz? Byensir i ti annan sa pouvwar pour fer li; byento i pou servi sa pouvwar pour detri tou move dimoun. Serten i kapab demande, ‘akoz i pa ti fer sa kan ti annan zis trwa rebel dan liniver? Eski sa pa ti pou’n evite ki pese i propaze, e anpes tou sa bann mizer ki nou vwar dan lemonn?’ Akoz Zeova pa ti swazir pour azir dan sa fason? Deterononm 32:4 i dir: “Tou son bann semen i lazistis.” Pour Zeova lazistis i vreman enportan. Anfet, “Zeova i kontan lazistis.” (Psonm 37:28) Akoz son lanmour pour lazistis, Zeova pa’n elimin sa bann rebel dan zarden Edenn. Akoz i pa’n fer sa?
14 Rebelyon Satan ti soulev en kestyon konsernan drwa Zeova pour dirize? Vi ki lazistis i enportan pour Zeova, i ti oblize sirmont sa defi ki Satan ti lanse par donn en larepons baze lo lazistis. Menm si sa bann rebel ti merite ganny egzekite deswit, sa pa ti pou reponn sa kestyon dan en fason zis. Sa ti pou donn plis laprev ki Zeova i Tou Pwisan, me pa son pwisans ki ti pe ganny kestyonnen. Anplis ki sa, Zeova ti’n dir avek Adan ek Ev konsernan son plan. Zot ti pou fer zanfan e ranpli later e domin li. Zot ti pou osi annan kontrol lo tou bann kreasyon. (Zenez 1:28) Si Zeova ti’n zis detri Adan ek Ev, sa ki i ti dir konsernan son plan pour imen pa ti pou fer okenn sans. Lazistis Zeova pa pou zanmen permet sa arive, akoz son plan i toultan ganny akonplir.—Izai 55:10, 11.
15, 16. Kan dimoun i sizer bann “solisyon” pour kestyon ki Satan ti souleve dan zarden Edenn, ki mannyer nou kapab ed zot?
15 Eski i annan en dimoun dan liniver ki ti pou kapab rezourd sa problenm rebelyon avek en pli gran lasazes ki Zeova? Serten dimoun i kapab propoz zot prop “solisyon” pour sa rebelyon ki ti arive dan zarden Edenn. Me an fezan sa, eski zot pa pe sizere ki zot kapab annan en pli bon lide ki Bondye konman pour rezourd sa problenm? I kapab zot pa pe fer sa avek en move motivasyon, me zot napa sa konprenezon lo Zeova ek son lasazes ekstraordiner. Ler i ti pe ekri bann Kretyen dan Lavil Ronm zapot Pol ti etidye oprofon lo lasazes Bondye, ek sa “sen sekre” konsernan plan Zeova pour servi son Rwayonm ki pou ganny dirize par Zezi pour sov bann imen fidel e sangtifye Son non sen. Ki mannyer Pol ti santi konsernan lasazes Bondye ki ti fer sa plan? Sa zapot ti fini son let par sa bann parol: “Nou rann glwar Bondye, ki sel i posed lasazes, par Zezi-Kri, pour touzour! Amenn.”—Romen 11:25; 16:25-27.
16 Zapot Pol ti konpran ki zis Zeova ki “posed lasazes”—sa pli onivo lasazes dan liniver. Lekel sa imen enparfe ki ti pou kapab mazin en pli bon fason ki Bondye pour rezourd okenn problenm, sirtou sa problenm pli difisil ki Satan in souleve an rapor avek sa drwa ki Bondye i annan pour dirize? Nou bezwen, alor, ed bann dimoun pour annan sa menm respe ki nou annan pour Bondye ki “annan lasazes dan son leker.” (Zob 9:4) Pli nou konpran lasazes Zeova, pli nou pou annan konfyans ki i rezourd problenm dan sa pli bon fason.—Proverb 3:5, 6.
Apresye sa Kalite pli enportan ki Zeova i annan
17. Ki mannyer en meyer konprenezon lo lanmour Zeova i kapab ed sa bann ki trouble akoz Bondye i permet soufrans?
17 “Bondye i lanmour.” (1 Zan 4:8) Par sa bann zoli parol, Labib i idantifye sa kalite pli dominan ki Zeova i annan, sa enn ki pli atiran parmi tou son bann kalite e pli rekonfortan pour bann ki enkyet akoz lemal i partou. Zeova in demontre son lanmour dan tou sa ki i’n fer pour repar sa move lefe destriktif ki pese in anmennen lo son kreasyon. Lanmour in motiv Zeova pour donn lespwar bann desandans Adan ek Ev. (Zenez 3:15) Bondye ti permet zot pour apros li dan lapriyer e fer li posib pour zot annan en bon relasyon avek li. Lanmour ti pous Zeova pour fourni en ranson ki ti pou permet ki pese i ganny pardonnen totalman e ki imen i retrouv sa lavi parfe, lavi eternel. (Zan 3:16) E lanmour in pous li pour annan pasyans avek imen, par donn otan dimoun sa posibilite pour rezet Satan e swazir Zeova konman Souvren liniver.—2 Pyer 3:9.
18. Ki konprenezon nou ere pour annan, e ki nou pou egzaminen dan lartik swivan?
18 Kan en paster ti adres en lodyans ki ti’n rasanble pour komemor dat lanniverser en latak teroris ki ti koz en kantite dega, i ti dir: “Nou pa konnen pour ki rezon Bondye i permet lemal ek soufrans pour kontinyen.” Pa sa i tris! Eski nou pa ere pour annan konprenezon lo sa size? (Deterononm 29:29) E vi ki Zeova i saz, zis, e annan lanmour, nou konnen ki byento i pou met en lafen avek tou soufrans. Anfet, i promet pour fer li. (Revelasyon 21:3, 4) Eski i annan okenn lespwar pour sa bann ki’n mor toudilon bann syek? Eski fason ki Zeova ti fer fas avek sa problenm dan zarden Edenn ti fer zot napa okenn lespwar? Non. Lanmour in pous li pour fer en keksoz pour zot osi, par mwayen rezireksyon. Nou pou koz lo sa size dan lartik swivan.
Ki ou pou reponn?
• Ki nou kapab dir avek en dimoun ki demande akoz Bondye i les dimoun soufer?
• Ki mannyer sentete ek lazistis Zeova i evidan dan lafason ki i ti fer fas avek sa bann rebel dan zarden Edenn?
• Akoz nou devret ed dimoun pour annan en meyer konprenezon lo lanmour Zeova?
[Kestyon]
[Portre lo paz 15]
Rod fason pour ed sa bann ki trouble akoz soufrans dan sa lemonn
[Portre lo paz 17]
David ek Abakouk de zonm fidel ti senserman demann Bondye bann kestyon