Bann Dimoun aze ki pe prospere spirityelman

“Bann ki’n ganny plante dan lakaz Zeova . . . pou ankor kontinyen prospere kan zot seve in vin blan.”—PSONM 92:13, 14.

1, 2. (a) Ki mannyer lavyeyes i ganny souvan dekrir? (b) Ki Labib i promet an sa ki konsern bann konsekans pese Adan?

LAZ pe antre, ki sa i vedir pour ou? Bann pli lo lapo? Lekor fer mal? Konmans pa byen tande? Ouswa lezot keksoz ki ganny dekrir dan Eklezyast 12:1-7 pandan “bann zour penib”? Si sa i leka, i bon pour mazinen ki Eklezyast sapit 12 pe dekrir bann konsekans lavyeyes akoz lenperfeksyon. Me pa ti dan sa fason ki Zeova, nou Kreater ti’n plàn bann move lefe ki laz ti pou annan lo lekor imen, me sa i akoz pese ki Adan in transmet avek limanite.—Romen 5:12.

² Vin deplizanpli vye lo li menm pa en malediksyon, akoz si nou oule kontinyen viv, sa i vedir ki lannen pou bezwen pase. Annefe, devlopman ek matirite i bon pour tou sa ki vivan. Tou move konsekans ki’n vin avek sis mil an pese ek lenperfeksyon ki partou kote pou byento disparet, e tou bann imen obeisan pou viv ere parey i ti dan plan Bondye, zot pa pou soufer avek lavyeyes ek lanmor ankor. (Zenez 1:28; Revelasyon 21:4, 5) Sa letan, “okenn zabitan pa pou dir: ‘Mon malad.’” (Izai 33:24) Dimoun aze pou vin zenn ankor avek tou zot lafors e zot lapo pou vin parey lapo en pti baba. (Zob 33:25) Parkont konmela, nou tou nou bezwen fer fas avek konsekans pese ki Adan in transmet avek nou. Pourtan, bann serviter Zeova i ganny beni dan plizyer fason spesyal anmezir ki zot vin vye.

3. Dan ki fason bann Kretyen i kapab “kontinyen prospere kan zot seve in vin blan”?

³ Parol Bondye i asir nou ki “bann ki’n ganny plante dan lakaz Zeova . . . pou ankor kontinyen prospere kan zot seve in vin blan.” (Psonm 92:13, 14) La sa Psalmis i servi en langaz senbolik pour ansenny en keksoz fondamantal pour demontre ki bann serviter fidel Bondye i kapab kontinyen progrese, devlope e prospere spirityelman, menm si zot lasante oubyen lafors pe diminyen. I annan en bon pe legzanp swa dan Labib swa dan letan modern ki prouv sa.

I pa ti zanmen manke

4. Ki mannyer Ann, en profet aze, ti demontre son devosyon pour Bondye, e konman i ti ganny rekonpanse?

⁴ Annou get legzanp Ann, en madanm ki ti en profet dan premye syek. I ti annan 84 an e “i pa ti kit Tanp. I ti kontinyen servi Bondye, nwit-e-zour dan lapriyer e dan zenn.” Papa sa madanm, ki pa ti en Levit, ti sorti “dan tribi Azer,” alor savedir ki Ann pa ti kapab reste vreman dan tanp. Zis mazinen ki kantite zefor i ti bezwen fer pour li kapab la toulezour dan tanp depi servis bomaten ziska servis aswar! Akoz son devosyon, Ann ti ganny beni en kantite. I ti annan privilez pour la prezan ler Zozef ek Mari ti anmenn Zezi kot tanp pour prezant li avek Zeova parey Lalwa ti demande. Osito ki Ann ti vwar Zezi, “i ti rann glwar Bondye, e koz lo sa zanfan avek tou bann ki ti pe esper delivrans Zerizalenm.”—Lik 2:22-24, 36-38; Nonm 18:6, 7.

5, 6. Dan ki fason plizyer frer ek ser aze in demontre sa menm leta lespri parey Ann?

⁵ Bokou frer ek ser aze parmi nou i parey Ann an sa ki konsern zot lasistans regilye  bann renyon, zot siplikasyon senser dan lapriyer pour devlopman vre ladorasyon, ek zot dezir ardan pour pres sa bon nouvel Rwayonm. En frer ki dan son 80 zan e ki asiste tou son renyon avek son madanm i dir: “Nou’n devlop labitid asiste renyon. Napa en landrwa ki nou anvi ale apard ki sa. La kot pep Bondye i ete, lanmenm ki nou anvi ale. Se la ki nou santi nou byen.” Pa sa i en lankourazman pour nou tou!—Ebre 10:24, 25.

⁶ “Si en keksoz spirityel i ganny organize e mon kapab partisipe, mon oule fer li mwan osi.” Sa i pwennvi Jeanne, en vev dan son 80 zan. “I vre parler mon tris, me eski tou dimoun i devret tris akoz mon pa byen?” Avek lizye kler, i dir ki mannyer i kontan ler i kapab vizit lezot pei pour bann lokazyon spirityel ki ankourazan. Tou dernyenman, i ti dir bann dimoun ki ti vwayaz avek li: “Mon pa le vizit ankor lezot sato, mon anvi al dan predikasyon!” Menm si i pa ti koz langaz sa pei, Jeanne ti kapab ed dimoun annan en lentere dan mesaz Labib. Deplis, pour plizyer lannen, i’n travay dan en kongregasyon kot ti annan en bezwen menm si i ti bezwen aprann en nouvo langaz e vwayaz enn er-d-tan pour al renyon e parey pour retournen.

Gard ou Lespri byen aktif

7. Menm si i ti deza aze, ki mannyer Moiz ti montre ki i ti anvi kontinyen amelyor son relasyon avek Bondye?

⁷ Leksperyans i vin a longer ditan. (Zob 12:12) Parkont, progre spirityel pa vin otomatikman avek laz. Pour sa rezon, olye zis kontant zot avek sa ki zot deza konnen, bann serviter fidel Bondye i fer zefor pour zot “agrandi zot konnesans” avek letan. (Proverb 9:9) Ler Zeova ti swazir Moiz, i ti annan 80 zan. (Egzod 7:7) I paret ki sa letan, pa tou dimoun ki ti viv ziska sa laz, akoz Moiz ti ekri: “Nou bann lannen i ariv swasanndi-z-an; e . . . akoz en lafors pa ordiner i ariv katreven zan.” (Psonm 90:10) Toudmenm, Moiz pa ti zanmen krwar i tro vye pour li aprann. Apre ki i ti’n servi Zeova pour bokou lannen e annan bokou privilez ek gro responsabilite dan servis Zeova, Moiz ti sipliy Zeova: “Fer  mwan konn ou bann semen silvouple, pour ki mon ava konn ou.” (Egzod 33:13) Moiz ti toultan anvi amelyor ankor plis son relasyon avek Zeova.

8. Ki mannyer Danyel ti gard son lespri byen aktif ler i ti dan son 90 zan, e avek ki rezilta?

⁸ Profet Danyel ki tre probab ti dan son 90 zan, ti ankor pe etidye oprofon bann lekritir sen. Petet i ti etidye “bann liv” parey Levitik, Izai, Zeremi, Osea ek Amos, e ladan i ti konpran bann pwen ki ti pous li fer lapriyer senser avek Zeova. (Danyel 9:1, 2) Son lapriyer ti ganny ekoute e i ti ganny lenformasyon sorti kot Bondye lo larive Mesi ek lavenir vre ladorasyon.—Danyel 9:20-27.

9, 10. Ki serten in fer pour zot lespri reste aktif?

⁹ Parey Moiz ek Danyel, nou kapab esey kit nou lespri aktif par reste konsantre lo bann keksoz spirityel osi lontan ki nou kapab. Plizyer i fer sanmenm. Worth, en ansyen dan kongregasyon ki dan son 80 zan, pe fer son mye pour reste azour avek nouritir spirityel ki sorti kot “lesklav fidel e pridan.” (Matye 24:45, NW) I dir: “Mon vreman kontan laverite, pour mwan i en plezir vwar ki mannyer laverite i vin deplizanpli kler.” (Proverb 4:18) I parey pour Fred ki’n pas plis ki 60 an dan servis aplentan, i vwar li vreman eksitan pour konmans bann konversasyon lo Labib avek lezot serviter Bondye. I dir: “Labib i bezwen reste vivan dan mon lespri. Si ou kapab fer Labib vin vivan, ou kapab konpran son sans, e si ou kapab relye li avek sa ki ou deza konnen dan ‘model parol laverite,’ alor ou pa zis annan bann bout bout lenformasyon. Ou kapab vwar ki mannyer sak bout laverite i vin ansanm e i vin en zoli portre.”—2 Timote 1:13.

¹⁰ Pa akoz laz pe antre ki sa i vedir ou nepli kapab aprann bann keksoz nouvo oubyen difisil pour konpran. Dimoun ki dan zot 60, 70, 80 zan oubyen plis, in kapab aprann lir oubyen aprann bann nouvo langaz. Serten Temwen Zeova in fer sa pour zot akonpli lobzektif pour anons sa bon nouvel avek dimoun sorti dan diferan nasyon. (Mark 13:10) Harry ek son madanm, ti pros pour ganny 70 zan ler zot ti deside pour pres avek dimoun ki koz Portige. Harry i dir: “Nou bezwen rekonnet ki avek laz tou keksoz i vin deplizanpli difisil.” Me selman avek zefor ek persistans, zot ti kapab kondwir bann letid Labib an Portige. E pour plizyer lannen, Harry in osi donn bann diskour dan sa langaz dan lasanble distrik.

11. Akoz i byen egzamin sa ki bann frer ek ser aze fidel i fer?

¹¹ Byensir, pa tou dimoun ki annan bann sirkonstans favorab oubyen en bon lasante ki permet zot aksepte bann tel defi. Alor akfer get sa ki serten dimoun aze in fer? Sa pa vedir ki tou dimoun i kapab fer parey. Parkont, zot in ganny mansyonnen lo menm laliny ki sa ki zapot Pol ti ekri bann Kretyen Ebre an sa ki konsern bann ansyen fidel dan kongregasyon: “Get zot mannyer viv, e imit zot lafwa.” (Ebre 13:7) Ler nou get zot legzanp devouman, sa i kapab ankouraz nou pour imit zot lafwa for ki pous sa bann frer ek ser aze pour kontinyen dan servis Bondye. Pour eksplik sa ki motiv li, Harry ki annan 87 an i dir: “Mon ti a kontan byen servi letan ki reste mwan dan en fason saz e itil pour fer sa ki mon kapab dan servis Zeova.” Fred li i ganny en kantite lazwa pour kontinyen desarz son responsabilite dan Betel. I dir: “Ou bezwen konnen ki mannyer pour pli byen servi Zeova e persevere.”

Devoue, menm si Sirkonstans i sanze

12, 13. Menm si son sitiasyon ti’n sanze, ki mannyer Barzilai ti demontre son devosyon avek Bondye?

¹² Aksepte e fer fas avek bann sanzman ki vin avek laz i kapab difisil. Toudmenm, sa bann sanzman pa anpes en dimoun pour demontre son devosyon anver Bondye. Barzilai sorti Gilead i en bon legzanp dan sa domenn.  Ler i ti annan 80 zan, i ti demontre lospitalite ekstraordiner anver David ek son bann solda. I ti donn zot landrwa reste ek manze rafal rebelyon Absalonm. Ler David ti retourn Zerizalenm, Barzilai ti akonpanny zot ziska larivyer Zourden. David ti ofer Barzilai pour vin reste avek li kot lakour rwayal. Ki mannyer Barzilai ti reazir? I ti dir: “Mon annan katreven-z-an ozordi. . . . Eski ou serviter pou kapab gout sa ki i pou manze e sa ki i pou bwar? Oubyen eski mon pou kapab ekout ankor lavwa bann santer ek santez? . . . La ou serviter Kimam. Les li travers lot kote avek mon senyer lerwa; e fer avek li sa ki bon dan ou lizye.”—2 Samyel 17:27-29; 19:31-40.

¹³ Menm si son sirkonstans ti’n sanze, Barzilai ti fer sa ki i kapab pour siport lerwa Zeova. Menm si i ti rekonnet ki i ti nepli kapab goute ouswa tande parey avan, i pa ti mekontan. Plito, i pa ti egois e i ti ofer ki Kimam i ganny sa bann bon keksoz dan son plas. An fezan sa, i ti montre ki kalite zonm i ti ete vreman. Parey Barzilai, plizyer dimoun aze ozordi i demontre en leta lespri zenere e pa ditou egois. Zot fer sa ki zot kapab pour siport vre ladorasyon, parski zot konnen ki “bann sakrifis koumsa ki fer plezir Bondye.” Pa i en benediksyon pour annan bann dimoun fidel parmi nou!—Ebre 13:16.

14. Ki mannyer laz David i fer sa bann parol dan Psonm 37:23-25 ankor pli tousan?

¹⁴ Menm si sirkonstans David ti sanze plizyer fwa dan son lavi, i ti reste konvenki ki Zeova pa zanmen aret pran swen avek son bann serviter fidel. Ver lafen son lavi, David ti konpoz en kantik ki ozordi i Psonm 37. Esey imazin David pe reflesir e zwe larp an santan sa bann parol: “Par Zeova lepa en zonm kosto in ganny prepare, I pran plezir dan son semen. Menm si i arive tonbe, i pa pou ganny zet ater [net], parski Zeova pe tenir son lanmen. Mon ti en zennonm, mon’n menm vin vye, e pourtan mon pa’n vwar okenn dimoun drwat ganny abandonnen konpletman, ni menm son desandans pe rod dipen.” (Psonm 37:23-25) Zeova ti vwar li apropriye pour ki David i mansyonn dan sa psonm enspire ki i ti aze. Pa sa i fer sa bann parol pli tousan!

15. Menm si son sirkonstans ti sanze e i ti byen aze, ki bon legzanp fidelite zapot Zan in kite?

¹⁵ Zapot Zan i osi en bon legzanp en dimoun ki’n reste fidel menm si son sirkonstans ti sanze e i ti byen aze. Apre ki i ti’n servi Bondye pour preski 70 zan, Zan ti ganny egzile lo zil Patmos “akoz Parol Bondye ek temwannyaz Zezi.” (Revelasyon 1:9) Pourtan, son louvraz pa ti fini lanmenm. Anfet, Zan ti ekri tou son bann let ek liv ki dan Labib dan son bann dernyen lannen son lavi. Ler i ti ankor Patmos, i ti resevwar bann vizyon ekstraordiner ki dan liv Revelasyon, e i ti konsyansyezman met li an ekrir. (Revelasyon 1:1, 2) I paret ki i ti ganny large pandan renny Lanperer Romen Nerva. Apre sa, dan bann lannen 98 N.L., ler i ti petet 90 oubyen 100 an, Zan ti ekri sa Levanzil ek sa trwa let ki port son non.

Landirans ki pa pou ganny oubliye

16. Ki mannyer bann ki annan difikilte pour kominike i kapab demontre zot devosyon pour Zeova?

¹⁶ Bann limitasyon i kapab vin dan diferan fason e lo diferan degre. Par egzanp, serten i nepli kapab kominik parey avan.  Me toudmenm, zot ankor apresye sa bon souvenir lanmour ek labonte leker Bondye. Menm si zot pa dir bokou avek zot labous, dan zot leker zot pe dir Zeova: “Konbyen mon kontan ou lalwa! Toulezour i okip mon panse.” (Psonm 119:97) Zeova li, i konnen lekel ki “pans lo son non,” e i apresye ki kantite sa bann i diferan avek larestan limanite ki pa demontre okenn lentere pour son lavolonte. (Malaki 3:16; Psonm 10:4) Pa i vreman rekonfortan pour konnen ki Zeova i kontan bann tel meditasyon dan nou leker!—1 Kronik 28:9; Psonm 19:14.

17. Kwa ki vreman spesyal avek sa ki bann serviter Zeova ki fidel depi lontan in akonplir?

¹⁷ Pa bliye osi ki bann ki’n servi Zeova fidelman pour plizyer dizenn lannen, in akonpli en keksoz vreman spesyal ki ou pa kapab gannyen otreman. Zot in demontre zot landirans e sa pa pou ganny tire avek zot. Zezi ti dir: “Par zot perseverans [oubyen landirans] zot a sov zot lavi.” (Lik 21:19) Landirans i esansyel pour resevwar lavi eternel. Bann parmi zot ki’n “akonpli lavolonte Bondye” e ki’n prouv zot fidelite tou dilon zot lavi i kapab enpasyan pour resevwar “sa ki i’n promet zot.”—Ebre 10:36.

18. (a) Ki Zeova i vreman kontan vwar dan bann dimoun aze? (b) Ki nou pou etidye dan lot lartik?

¹⁸ Pour Zeova, en servis ki ganny fer avek tou nou leker, ki nou fer bokou oubyen pti gin, i annan en kantite valer. Menm si nou lafors ouswa lasante pe diminyen, sa ki nou ete anndan “pe ganny renouvle de zour an zour.” (2 Korentyen 4:16) Ou kapab asire ki Zeova i apresye tou sa ki ou’n fer dan lepase e i kler ki i vreman apresye sa ki ou pe fer la konmela pour son non. (Ebre 6:10) Dan lot lartik, nou pou vwar ki bon lefe en tel fidelite i kapab annan lo lezot.

Ki ou pou reponn?

• Ki bon legzanp Ann in kite pour dimoun aze ozordi?

• Akoz laz pa neseserman limit lakantite ki en dimoun i kapab akonplir?

• Ki mannyer bann dimoun aze i kapab demontre zot devosyon pour Bondye?

• Ki mannyer Zeova i vwar servis bann aze?

[Kestyon]

[Portre lo paz 25]

Plizyer dimoun aze i en legzanp an sa ki konsern lasistans renyon, devouman dan predikasyon ek lanvi pour aprann plis