Benediksyon pour bann Zenn
Bann Dimoun aze i en Benediksyon pour bann Zenn
“Menm ziska lavyeyes ek seve blan, O Bondye, pa kit mwan, ziska ki mon koz lo ou lebra for avek sa zenerasyon, lo ou pwisans avek tou sa bann ki pou vini.” —PSONM 71:18.
1, 2. Ki bann serviter Bondye ki aze i devret realize e ki nou pou vwar dan sa lartik?
E N KRETYEN ki ansyen dan Was Lafrik ti vizit en frer swazir ki aze e i ti demann li, “Konman sava?” Sa frer ti reponn e anmenmtan i ti fer bann zes, “Mon kapab taye, sot sote, mon kapab menm sot lo en kote lipye, me mon pa kapab anvole.” Sa ansyen ti konpran ki sa frer ti pe sey dir. ‘Sa ki mon kapab fer, mon kontan fer li, me sa ki mon pa kapab fer, mon pa fer.’ Sa ansyen ki ti fer sa vizit i dan son 80 zan konmela, e i kontan rapel bann pti dyok ek fidelite sa frer.
2 Bann bon kalite Kretyen ki en dimoun aze i manifeste i kapab annan en lefe dirab lo lezot. I vre ki laz li tousel pa neseserman prodwi lasazes ek lezot kalite ki Kris i demontre. (Eklezyast 4:13) Labib i dir: “Seve blan i en kouronn labote kan i ganny trouve dan semen ladrwatir.” (Proverb 16:31) Si ou aze, eski ou realize ki kantite ou parol ek aksyon i kapab benefisye lezot? Annou vwar enn de legzanp dan Labib ki demontre ki kantite bann dimoun aze in kapab vin en vre benediksyon pour bann pli zenn.
En Lafwa ki anmenn bokou Benediksyon pour lezot
3. Ki mannyer fidelite Noe in vin en benediksyon pour bann ki vivan ozordi?
3 Noe ti reste ferm e i ti annan lafwa, sa in anmenn bann byenfe ziska ozordi. Noe ti pros pour ganny 600 zan ler i ti konstri lars, rasanble bann zannimo e pres avek son bann kontanporen. (Zenez 7:6; 2 Pyer 2:5) Gras a son lakrent ek respe, Noe ek son fanmir ti sirviv Deliz e i ti vin zanset tou bann dimoun ki egziste lo later ozordi. I vre ki bann dimoun ti viv pli lontan sa letan. Selman menm ler i ti pli aze, Noe ti reste fidel e sa in anmenn bann byenfe enportan. Akoz nou dir sa?
4. Ki mannyer fidelite Noe i benefisye bann etidyan Labib ozordi?
4 Noe ti preski 800 zan ler Nimrod ti konmans plàn pour konstri Latour Babel pour met o defi lord Zeova pour “ranpli later.” (Zenez 9:1; 11:1-9) Noe li ti napa nanryen pour fer avek rebelyon Nimrod. Alors, i probab ki son langaz ti reste parey ler Bondye ti sanz langaz sa bann rebel. Pa zis dan son vye zour me toudilon son lavi, Noe ti reste ferm e annan lafwa. Sa i en bon legzanp pour swiv pour bann serviter Bondye, zenn konman vye.—Ebre 11:7.
En bon Lenfliyans dan Fanmir
5, 6. (a) Ki Zeova ti demann Abraam pour fer ler i ti 75 zan? (b) Ki Abraam ti fer?
5 Lenfliyans ki bann dimoun aze i kapab annan lo lafwa zot fanmir i evidan atraver lavi serten zonm fidel ki ti egziste apre lepok Noe. Abraam ti apepre 75 zan ler Bondye ti dir li: “Kit ou pei, e ou bann fanmir e lakaz ou papa e al dan sa pei ki mon pou montre ou; e mon pou fer ou vin en gran nasyon e mon pou beni ou.”—Zenez 12:1, 2.
6 Zis mazinen si ou ti ganny demande pour kit ou lakour, ou bann zanmi, ou pei, sekirite ki ou gannyen atraver ou fanmir pour al dan en pei ki ou pa konnen. Sanmenm ki Abraam ti ganny demande pour fer. I “ti ale parey Zeova ti koz avek li,” e pour larestan son lavi i ti viv anba latant parey en etranze, en rezidan ki bezwen sanz landrwa reste tanzantan dan pei Kanaan. (Zenez 12:4; Ebre 11:8, 9) Menm si Zeova ti promet Abraam ki i ti pou vin “en gran nasyon,” i ti mor byen lontan avan ki son desandans ti vin en kantite. Son madanm, Sara, ti donn Abraam en garson selman apre ki i ti’n reste 25 an dan later promiz. (Zenez 21:2, 5) Pourtan, Abraam pa ti dekouraze e retourn dan lavil kot i ti sorti. Pa sa i en zoli legzanp lafwa ek landirans!
7. Ki lefe landirans Abraam ti annan lo son garson Izaak, e avek ki rezilta pour limanite?
7 Landirans Abraam ti annan en gro lefe lo son garson Izaak ki ti pas tou son lavi setadir 180 zan, konman en etranze dan pei Kanaan. Landirans Izaak ti baze lo lafwa ki i ti annan dan promes Bondye ki ti’n ganny pase avek li par son paran aze, e ranforsi par parol Zeova li menm ler i ti koz avek li. (Zenez 26:2-5) Izaak ti reste ferm e sa ti zwe en rol enportan dan realizasyon promes Zeova ki en desandans sorti dan fanmir Abraam ti pou vin en benediksyon pour limanite. Plizyer santenn lannen plitar, Zezi Kri, parti prensipal sa desandans, ti fer li posib pour tou bann ki demontre lafwa dan li pour rekonsilye avek Bondye e viv eternelman.—Galat 3:16; Zan 3:16.
8. Ki mannyer Zakob ti demontre en lafwa for, e avek ki rezilta?
8 Izaak li ti ed son garson Zakob pour devlop en lafwa for ki ti soutenir li dan son bann vye zour. Zakob ti annan 97 an ler i ti lalit avek en lanz en lannwit antye pour li resevwar en benediksyon. (Zenez 32:24-28) Avan son lanmor a laz 147 an, Zakob ti annan ankor ase lafors pour donn en benediksyon avek sakenn son 12 garson. (Zenez 47:28) Son bann parol profetik ki’n ganny rikorde dan Zenez 49:1-28 ti vin vre e pe ankor ganny realize.
9. Ki lenfliyans bann dimoun aze ki matir spirityelman i kapab annan lo zot fanmir?
9 I kler alor ki bann serviter fidel Bondye ki aze i kapab annan en bon lenfliyans lo zot fanmir. En gidans baze lo Labib avek leksperyans ki zot annan e osi zot legzanp landirans i kapab fer en gro diferans pour ed en zenn ki pe grandi annan en lafwa solid. (Proverb 22:6) Bann dimoun aze pa zanmen devret souzestim sa tre bon lenfliyans ki zot kapab annan lo zot fanmir.
En bon Lenfliyans pour lezot Kretyen
10. Ki Zozef ti demande “konsernan son bann lezo” e ki lefe sa ti annan lo lezot?
10 Bann Kretyen aze i kapab osi annan en bon lenfliyans lo lezot dan kongregasyon. Ler i ti vye, Zozef garson Zakob, ti fer en aksyon ki ti demontre son lafwa, ki ankor annan en bon lenfliyans lo plizyer milyon adorater Zeova ki’n viv apre li. I ti annan 110 zan ler “i ti donn lord konsernan son bann lezo,” setadir ki ler bann Izraelit ti pou finalman kit Lezip, zot ti devret pran son bann lezo avek zot. (Ebre 11:22; Zenez 50:25) Sa ti en reyon lespwar pour bann Izraelit ki ti pas en pake martir pandan plizyer lannen konman lesklav apre lanmor Zozef, e sa ti donn lasirans ki zot ti pou finalman ganny delivre.
11. Ki lenfliyans Moiz ki ti aze ti kapab annan lo Zozye?
11 Moiz ti ganny ankouraze par lafwa Zozef. Ler i ti annan 80 zan, Moiz ti annan sa privilez pour anmenn bann lezo Zozef dan later promiz. (Egzod 13:19) Sanmenm sa lepok ki Moiz ti zwenn Zozye ki ti bokou pli zenn ki li. Pour sa prosen 40 an, Zozye ti vin asistan personnel Moiz. (Nonm 11:28) I ti konmans mont lo montanny Sinai avek Moiz e i ti la pour zwenn Moiz ler i ti desann avek sa de plak ros Lalyans. (Egzod 24:12-18; 32:15-17) Zis mazinen kantite ki Zozye in kapab aprann atraver bann bon konsey ek lasazes ki Moiz ki ti aze ti annan pour ofer!
12. Ki mannyer Zozye ki ti aze ti vin en bon lenfliyans pour nasyon Izrael?
12 Prezan Zozye ti vin en sours lankourazman pour nasyon Izrael tou dilon son lavi. Ziz 2:7 i dir nou: “E sa pep ti kontinyen servi Zeova tou dilon lavi Zozye e tou dilon lavi bann ansyen ki ti ankor vivan apre Zozye e ki ti’n vwar tou bann gran travay ki Zeova ti’n fer pour Izrael.” Parkont apre ki Zozye ek lezot ansyen ti’n mor, pour apepre 300 zan ziska lepok profet Samyel, pep Izrael ti konmans pa tro konnen si zot pou swazir fo ouswa vre ladorasyon.
Samyel ti “etabli Lazistis”
13. Ki Samyel ti fer pour “etabli lazistis”?
13 Labib pa dir ki laz Samyel ti annan ler i ti mor, me bann levennman ki premye liv Samyel i koz lo la i kouver apepre 102 zan, e Samyel ti vwar laplipar sa bann keksoz. Dan Ebre 11:32, 33, nou lir ki bann bon ziz ek profet ti “etabli lazistis.” Wi, Samyel ti annan en lenfliyans lo son bann kontanporen ki i ti fer zot evite oubyen aret fer sa ki mal. (1 Samyel 7:2-4) Ki mannyer i ti fer sa? I ti reste fidel avek Zeova tou dilon son lavi. (1 Samyel 12:2-5) I pa ti per konsey seryezman menm en lerwa. (1 Samyel 15:16-29) Deplis, menm si Samyel “ti vin vye e son seve ti blan,” i ti demontre en bon latitid par priy pour lezot. I ti dir “Mon pa kapab mazinen . . . pour fer pese kont Zeova par aret priy” pour bann Izraelit.—1 Samyel 12:2, 23.
14, 15. Ki mannyer bann dimoun aze i kapab imit legzanp Samyel an sa ki konsern lapriyer?
14 Tou sa ki nou fek vwar i montre en fason enportan ki bann dimoun alaz i kapab annan en bon lenfliyans lo lezot serviter Zeova. Menm si zot annan serten limitasyon akoz lasante oubyen lezot fakter, bann aze i kapab fer lapriyer pour lezot. Frer ek ser aze, eski zot realize ki kantite zot lapriyer i kapab benefisye kongregasyon? Akoz zot lafwa dan disan Kris, zot dan en kondisyon aprouve dan lizye Zeova, e akoz zot landirans pour plizyer lannen, zot lafwa in “ganny teste.” (Zak 1:3; 1 Pyer 1:7) Pa zanmen bliye: “Lapriyer senser en zonm zis i annan en gran pisans.”—Zak 5:16.
15 Nou bezwen zot lapriyer an faver zentere travay predikasyon ek kongregasyon. Serten nou bann frer i dan prizon akoz zot pa pran kote dan bann zafer sa lemonn. Lezot i soufer akoz bann dezas natirel, lager ant pei ek lager sivil. Lezot ankor, lanmenm dan nou kongregasyon, pe fer fas avek lopozisyon ek tantasyon. (Matye 10:35, 36) Bann ki pe organiz travay predikasyon e pran swen avek kongregasyon, i osi bezwen lapriyer ki zot fer regilyerman. (Efezyen 6:18, 19; Kolosyen 4:2, 3) I vreman byen ler zot mansyonn sa bann frer ek ser dan lapriyer parey Epafras ti fer!—Kolosyen 4:12.
Ansenny Zenerasyon ki pe monte
16, 17. Ki Psonm 71:18 ti predir, e ki mannyer sa in vin vre?
16 Bann ki fer parti ‘lezot mouton’ ki annan lespwar pour viv lo later, in ganny en formasyon esansyel avek bann frer fidel ki form parti sa “pti troupo” ki annan lespwar pour viv dan lesyel. (Lik 12:32; Zan 10:16) Sa ti ganny predir dan Psonm 71:18, kot nou lir: “Menm ziska lavyeyes ek seve blan, O Bondye, pa kit mwan, ziska ki mon koz lo ou lebra for avek sa zenerasyon, lo ou pwisans avek tou sa bann ki pou vini.” Avan ki zot ganny glorifye avek Zezi Kri dan lesyel, bann Kretyen swazir in tre kontan pour donn en bon formasyon bann frer dan lezot mouton pour zot desarz plis responsabilite ankor.
17 Parol dan Psonm 71:18 kot i koz lo “bann ki pou vini” i kapab osi ganny aplike lo lezot mouton ki’n resevwar lenstriksyon avek bann Kretyen swazir. Zeova in donn bann Kretyen aze sa privilez pour donn temwannyaz lo li avek bann ki pe aksepte vre ladorasyon la konmela. (Yoel 1:2, 3) Lezot mouton i kontan sa ki zot in aprann avek bann Kretyen swazir e zot santi zot pouse pour partaz sa ki zot konnen avek lezot ankor ki anvi servi Zeova.—Revelasyon 7:9, 10.
18, 19. (a) Ki lenformasyon presye plizyer serviter Zeova aze i kapab pas avek bann pli zenn? (b) Ki lasirans bann Kretyen aze i devret annan?
18 Bann serviter Zeova ki pli aze, ki swa zot bann Kretyen swazir ouswa lezot mouton, in vwar e kapab rakont bann levennman enportan dan nou listwar. Enn de ki ankor vivan ti prezan pour vwar bann premye prezantasyon “Photo-Drama of Creation.” Serten Temwen ti konn personnelman bann frer responsab ki ti ganny met dan prizon an 1918. Lezot ti partisip dan progranm lo radyo WBBR, ki pep Zeova ti servi sa letan. En bon pe i ankor kapab rakont sa lepok kot nou ti bezwen defann nou liberte relizye devan bann lakour siprenm. Serten in tenir ferm menm anba dominasyon bann diktater. Wi, bann frer ek ser aze i kapab eksplike konman nou konprenezon laverite in ptitapti amelyore. Labib i ankouraz nou pour benefisye avek zot gran leksperyans.—Deterononm 32:7.
19 Bann Kretyen pli aze i ganny ankouraze pour vin bann bon legzanp pour bann pli zenn. (Tit 2:2-4) Petet konmela ou pa vwar lefe ki ou landirans, lapriyer ek konsey i annan lo lezot. Noe, Abraam, Zozef, Moiz, ek lezot ankor pa ti kapab realize ki kantite lefe zot fidelite ti pou annan lo bann fitir zenerasyon. Selman, sa leritaz lafwa ek fidelite ki zot in pas avek lezot zenerasyon in annan bokou lefe e i parey pour ou osi.
20. Ki benediksyon pou annan pour bann ki gard zot lespwar ferm ziska lafen?
20 Ki swa ou pas vivan atraver sa ‘gran ladetres’ ouswa ou ganny resisite, pa i pou en gran lazwa pour ou ganny “sa vre lavi”! (Matye 24:21; 1 Timote 6:19) Zis mazinen ki mannyer i pou ete ler Zezi Kri pou lerwa pour mil an e ki Zeova pou retir bann move lefe lavyeyes. Olye vwar nou lekor pe deteryore deplizanpli, nou pou leve tou le bomaten avek plis lafors, nou pa pou bezwen linet, nou pou byen tande, e nou pou annan en pli zoli laparans! (Zob 33:25; Izai 35:5, 6) Bann ki pou ganny beni pour viv dan nouvo lemonn Bondye pou toultan zenn konpare avek sa kantite letan ki zot pou ankor kapab viv. (Izai 65:22) Pour sa rezon, annou gard nou lespwar ferm ziska lafen e annou kontinyen servi Zeova avek tou nou leker. Nou kapab asire ki Zeova pou realiz tou son bann promes e ki i pou fer plis ankor ki nou kapab imazinen.—Psonm 37:4; 145:16.
Ki ou pou reponn?
• Lefet ki Noe ti reste ferm ki mannyer sa in benefisye limanite?
• Ki lefe lafwa serten zonm fidel apre lepok Noe ti annan lo zot desandans?
• Ler zot ti aze, ki mannyer Zozef, Moiz, Zozye ek Samyel ti fortifye lezot serviter Bondye?
• Ki leritaz bann pli aze i kapab pas avek bann pli zenn?
[Kestyon]
[Portre lo paz 29]
Landirans Abraam ti annan en gran lefe lo Izaak
[Portre lo paz 32]
Bann zenn i benefisye ler zot ekout bann aze