Eski Sirkonsizyon i vedir en Dimoun in vin en Zonm?

DAN bokou pei, bann garson i fer sirkonsizyon ler zot ankor en pti baba konman en mezir pour protez zot lasante. Tandis ki dan lezot pei, i normal pour bann garson pa ganny sirkonsi ditou. Pour serten, parey bann Zwif ek Mizilman, sirkonsizyon i plis ki zis en mezir lasante; i annan en sinifikasyon relizye.

Parkont, dan serten pei, sirkonsizyon i en seremoni ki ganny fer kan en garson i vin en adilt. Normalman sa i enplik anvoy li dan en lekol ki ansenny bann koutim tradisyonnel. Dan sa lekol i ganny sirkonsi e apre i ganny separe avek larestan dimoun dan son kominote pour detrwa semenn ziska ler i rekipere. Pandan sa letan, i pou swiv bann koutim spesifik e i ganny ansennyen pour vin en zonm. Eski sa kalite sirkonsizyon i neseser pour prouve ki en garson in vin en zonm? Annou egzamin sa ki Labib i dir konsernan pwennvi Bondye lo sirkonsizyon.—Proverb 3:5, 6.

Pwennvi Bondye lo Sirkonsizyon

Serten pep dan letan ansyen, parey bann Ezipsyen, ti fer sirkonsizyon, setadir koup sa lapo lo parti prive en garson oubyen en zonm. Parkont, Abraam pa ti ne dan en tel kiltir. Anfet, pour preski tou son lavi, Abraam pa ti ganny sirkonsi. Deplis, menm si i pa ti’n ganny sirkonsi, Abraam ti demontre ki i ti en zonm for. Kan larme kat lerwa ti kaptir son neve Lot, Abraam ek en group zonm ti tay deryer zot e defet zot. (Zenez 14:8-16) Apepre 14 an plitar, Bondye ti demann Abraam pour sirkonsi e pour sirkonsi tou son fanmir. Akoz Bondye ti demann li pour fer sa?

Sirman sa pa ti en siny ki aprezan Abraam ti pou vin en zonm. Akoz Abraam ti annan 99 an! (Zenez 17:1, 26, 27) Bondye ti eksplike akoz i ti’n demann li pour fer sa an dizan: “Zot devret ganny sirkonsi, e sa i devret vin en siny sa lalyans ant mwan ek zot.” (Zenez 17:11) Sa lalyans ant Abraam ek Bondye ti enkli sa promes ki atraver Abraam, “tou pep lo later” ti pou ganny en kantite benediksyon. (Zenez 12:2, 3) Alors, dan lizye Bondye, sirkonsizyon ti napa nanryen pour fer avek vin en zonm. I ti ganny fer pour endike ki en dimoun ti en desandans Abraam, ki ti annan sa privilez pour ganny ‘konfye avek mesaz Bondye.’—Romen 3:1, 2.

Avek letan, nasyon Izrael ti montre ki zot pa ti merit en tel konfyans akoz zot ti rezet vre Desandans Abraam, Zezi Kri. Alors zot ti ganny rezete par Bondye, e menm si zot ti’n sirkonsi sa ti napa okenn valer devan lizye Bondye. Pourtan, serten Kretyen dan premye syek N.L. ti ensiste ki sirkonsizyon ti en keksoz ki Bondye ti ankor ekspekte zot fer. (Akt 11:2, 3; 15:5) Akoz sa, zapot Pol ti anvoy Tit pour “met lord dan bann keksoz kot i fodre” dan plizyer kongregasyon. Konsernan sa, Pol ti ekri Tit: “I annan bokou, sirtou parmi bann zwif ki an faver sirkonsizyon, ki rebel e tronp lezot par zot bann parol vid. Fodre fer zot aret zot fo lansennyman, akoz zot pe andomaz lafwa en kantite fanmir par bann keksoz ki zot pa devre ansennyen. Zot  fer sa pour ganny larzan dan en fason malonnet.”—Tit 1:5, 10, 11.

Konsey Pol i ankor aplikab ozordi. Sertennman i ti pou kont Labib pour en vre Kretyen ankouraz en dimoun pour sirkonsi son zanfan. Olye “mel dan zafer lezot,” en Kretyen i les sa paran fer bann tel desizyon personnel. (1 Pyer 4:15) Deplis, Pol ti ganny enspire pour ekri lo sirkonsizyon dapre Lalwa Moiz: “Si en zonm ti sirkonsi ler Bondye ti apel li, reste li sirkonsi, si en zonm pa ti sirkonsi i pa devre fer li sirkonsi. Parski ni sirkonsizyon, ni lensirkonsizyon napa lenportans, sa ki konte se lobeisans konmannman Bondye. Sakenn i devre reste dan kondisyon ki i ti ete ler Bondye ti apel li.”—1 Korentyen 7:18-20.

Be ki nou pou dir konsernan bann “Lekol Sirkonsizyon”?

Me si bann paran Kretyen i deside pour sirkonsi zot bann garson? Eski anvoy zot garson dan bann swadizan lekol sirkonsizyon parey in ganny dekrir pli boner i pou an armoni avek Labib? Asiste bann tel lekol i enplik plis ki sa loperasyon pour tir sa lapo lo parti prive en garson. Pour plizyer semenn, sa enn ki pe asiste sa lekol pou reste pros avek bann garson ek ansennyan ki pa ador Zeova. En kantite keksoz ki ganny ansennyen dan sa bann lekol i kont standar moral onivo dan Labib. Labib i averti nou: “Move frekantasyon, i gat repitasyon.”—1 Korentyen 15:33.

Deplizanpli, i annan bann danze fizik osi ki enplike dan asiste sa bann lekol. South African Medical Journal an 2003 ti dir: “Bann rezilta sokan apre ki en sirkonsizyon in ganny fer in ganny obzerve sa lannen ankor. Bann gran lazans zournalis partou dan lemonn pe pibliy bann rapor konsernan bann lanmor e kot parti prive bann garson in ganny severman andomaze pandan sa loperasyon. . . . An bref, bokou sa bann swadizan ‘lekol sirkonsizyon’ ozordi i pa bann vre lekol sirkonsizyon, e i kapab okazyonn lanmor.”

Anplis ki sa risk ki annan pour andomaz parti prive sa dimoun, i annan en pli gran danze spirityel. Bann lansennyman ek pratik dan bann lekol sirkonsizyon i relye etrwatman avek grigri ek ladorasyon bann zanset ki’n mor. Par egzanp, olye admet ki se bann sirizyen ki pa’n pran byen ka pandan sa loperasyon ek bann move kondisyon lizyenn ki responsab pour domaz ki’n ganny fer, bokou i krwar ki sa bann maler i arive akoz swa dimoun in zet en sor lo zot oubyen akoz zot bann zanset i mekontan. Konsernan okenn relasyon avek fo larelizyon, Labib i donn sa komann: “Pa bezwen asosye zot avek bann non-krwaryan. Ki i annan an komen ant lazistis ek mesanste? Ki linyon i kapab annan ant lalimyer avek fernwanr? . . . ‘Pour sa rezon, sorti parmi zot, e separe avek zot,’ Senyer i dir. ‘Pa tous okenn keksoz enpir, e mon a resevwar zot.’” (2 Korentyen 6:14-17) An rapor avek sa konsey, i pa pou saz pour bann paran Kretyen anvoy zot garson dan en lekol sirkonsizyon.

Kwa ki fer en Kretyen vin en Zonm?

Si en Kretyen in ganny sirkonsi oubyen non, sa pa en lendikasyon ki i vin en zonm oubyen pa ankor vin zonm. Bann vre Kretyen i devret pli konsernen avek fer plezir Bondye, me pa pour “fer remark zot dan domenn natir imen.”—Galat 6:12.

Sepandan pour fer plezir Bondye, en Kretyen i devret ganny en ‘sirkonsizyon leker.’ (Deterononm 10:16; 30:6; Matye 5:8) Sa pa ganny fer avek en kouto, me par rezet bann move dezir ek panse ki montre ou orgeye, parey ler ou krwar ki ganny sirkonsi fizikman i fer ou pli siperyer ki lezot. En Kretyen i kapab montre ki i en zonm par andir bann leprev e “reste ferm dan lafwa,” ki swa i’n ganny sirkonsi oubyen non.—1 Korentyen 16:13; Zak 1:12.