Lemal—Eski i an deor Kontrol?

En pti garson kirye i anmas en keksoz dan en laplenn, sa ti en min, sa min ti eksploze e sa pti garson ti vin aveg e gravman andikape pour lavi. En manman i abandonn son pti baba fek ne, par kasyet li parmi bann salte obor semen. En travayer ki’n ganny pouse dan son travay i retourn kot i ti travay e konmans tir fizi lo nenport dimoun ki i trouve dan sa landrwa, e apre i touy son lekor. En sitwayen respektab i abiz seksyelman bann zanfan ki pa kapab defann zot lekor.

MALEREZMAN, bann rapor konsernan bann move aksyon in vin vreman komen dan nou letan. Sa ki fer li pli tris, se ki bann resi lo zenosid ek terorism i souvan ankor pli pir ki sa bann rapor. En zournal ki ti ganny pibliye an 1995 ti dir: “Sa syek, ti syek Satan, sa enn pli pir ki’n deza egziste. Zanmen dan listwar, imen in deza demontre sa sitan gran kapasite ek dezir pour touy plizyer milyon dimoun akoz zot ras, larelizyon oubyen ran sosyal.”

Anmenmtan, imen pe polye ler, kontamin later, diminyen son bann resours, e pe detri en gran kantite lespes zannimo ki pros pour disparet. Eski imen i kapab sirmont tou sa bann move keksoz e fer sa lemonn en meyer landrwa, pli an sekirite? Oubyen eski sa zefor pour esey fer sa i zis parey ler en dimoun pe sey pous laroul an aryer avek en balye? En profeser ki’n ekri en kantite konsernan bann keksoz mal ki pe arive ozordi ti dir: “Mon vreman santi sa gran bezwen pour anmenn en sanzman dan sa lemonn, pour amelyor sa lemonn. Me i kler ki sa lemonn pa pe amelyore.” Petet ou santi parey.

Sa lemonn pe al dan en direksyon ki kapab ganny konpare avek en bato ki lo en lanmer ki pe vin pli move e pli danzere sak zour. Kantmenm, personn pa oule al dan sa direksyon, tou zefor ki ganny fer pour sanz sa direksyon pa’n abouti dan nanryen. Sa bato pe diriz san en kontrol dan en tanpet byen danzere, ki pa kapab ganny arete.

Dan en serten degre nou kapab dir ki sa sitiasyon ki pe deteryore de zour an zour i akoz lenperfeksyon imen. (Romen 3:23) Me nivo ki lemal in arive, lefe ki i partou e pe kontinyen san en kontrol, sa pa kapab zis bann imen ki senpleman lakoz. Eski i posib ki imen pe ganny kontrole par en lafors envizib me pwisan e satanik? Si sa i leka, kisisa sa lafors, e ki mannyer nou kapab protez nou? Sa lartik swivan pou reponn sa bann kestyon.

[Credit line lo paz 3]

© Heldur Netocny/Panos Pictures