Rezireksyon—Eski sa Lespwar i reel pour ou?
Rezireksyon—Eski sa Lespwar i reel pour ou?
‘I pou annan en rezireksyon.’—AKT 24:15.
1. Akoz i apropriye pour apel lanmor en lennmi?
“LANMOR ek taks i de keksoz dan sa lemonn ki nou pa kapab evite.” Bokou in konsider sa komanter, ki ti ganny ekri an 1789 par Benjamin Franklin, en zonm politik dan Lanmerik, konman en komanter entelizan. Me en kantite dimoun malonnet pa pe pey zot taks konman i fodre. I paret ki zis lanmor ki nou pa kapab evite. Lo nou menm, personn parmi nou pa kapab sov lanmor pour touzour. Nou pa kapab evit li. Zis parey en dimoun lafen ki son vant pa zanmen plen, Seol, la kot tou bann mor i ale pe devor dimoun ki nou ti kontan. (Proverb 27:20) Me, annou egzamin en panse ki donn rekonfor.
2, 3. (a) Akoz ki serten dimoun pa pou mor? (b) Ki nou pou egzaminen dan sa lartik?
2 Parol Zeova i asir nou sa lespwar rezireksyon, ki bann mor pou retourn vivan ankor. Sa pa zis en rev, e okenn lafors dan sa liniver pa kapab anpes Zeova fer sa lespwar vin en realite. Kantmenm sa, i annan en kantite dimoun ozordi ki pa realize ki serten dimoun pa pou mor. Akoz? Akoz en “gran lafoul” pou sirviv sa ‘gran ladetres,’ ki pou arive byento. (Revelasyon 7:9, 10, 14) Zot pou kontinyen viv, e zot pou annan sa posibilite pour viv pour leternite. Alor, zot pa pou mor. Deplis, ‘lanmor pou ganny detrir.’—1 Korentyen 15:26.
3 Nou bezwen annan menm lasirans konsernan rezireksyon parey zapot Pol, ki ti dir: “Dimoun bon konman move, pour resisite.” (Akt 24:15) Annou egzamin trwa kestyon konsernan rezireksyon. Premyerman, kwa ki garanti nou ki sa lespwar pou vin vre? Dezyenmman, ki mannyer ou kapab personnelman ganny rekonforte par sa lespwar rezireksyon? Trwazyenmman, ki mannyer sa lespwar i kapab annan en lenfliyans lo nou lavi konmela menm?
Rezireksyon—en Garanti
4. Ki mannyer rezireksyon i zwe en rol esansyel dan plan Bondye?
4 I annan en kantite fakter ki garanti nou ki rezireksyon pou vin vre. Premyerman i zwe en rol esansyel dan plan Zeova. Pa bliye, ki Satan ti pous bann imen pour fer pese e rekolte son konsekans, lanmor ki pa kapab ganny evite. I pour sa rezon ki Zezi ti dir sa lo Satan: “Depi okonmansman i en kriminel.” (Zan 8:44) Me Zeova ti promet ki son “fanm,” oubyen son lorganizasyon dan lesyel ki parey son madanm, ti pou prodwi en “desandans” ki ti pou kraz sa “serpan lantikite” dan latet, setadir detri Satan konpletman. (Zenez 3:1-6, 15; Revelasyon 12:9, 10; 20:10) Anmezir ki Zeova ti revel son plan enkli sa desandans ki ti pou vin Mesi, i ti vin aparan ki sa desandans ti pou fer plis ki detri Satan. Labib i dir: “La rezon akoz Garson Bondye in aparet, se zisteman pour detri bann travay dyab.” (1 Zan 3:8) Lanmor ki nou’n erite akoz pese Adan, i parmi bann premye travay Satan ki Zeova i anvi met en lafen avek, par mwayen Zezi Kri. Se pour sa ki sakrifis ranson Zezi ek son rezireksyon i vreman enportan.—Akt 17:21; Romen 6:23.
5. Akoz rezireksyon pou glorifye non Zeova?
5 Zeova i determinen pour glorifye son non ki sakre. Satan in sali non Bondye e i’n propaz bann mansonz. I ti koz manti par dir ki Adan ek Ev ‘pa ti pou mor’ si zot ti manz sa fri ki Bondye ti’n defann zot. (Zenez 2:16, 17; 3:4) Depi sa, Satan in kontinyen senm menm kalite mansonz, tel parey sa fo lansennyman ki dir ki en keksoz i kontinyen viv apre lanmor. Me atraver rezireksyon, Zeova pou devwal tou sa bann mansonz ki’n ganny ansennyen. I pou etabli enn fwa pour tou, ki zis li tousel ki kapab prezerv e redonn lavi.
6, 7. Ki mannyer Zeova i santi lefe ki i pou resisit bann dimoun e ki mannyer nou konnen sa ki i santi?
6 Zeova i vreman anvi resisit bann dimoun. Labib i fer kler ki santiman Zeova konsernan rezireksyon. Par egzanp, reflesir lo sa bann parol ki Zob en zonm fidel ti dir anba lenspirasyon: “Si en zonm kosto i mor, eski i kapab viv ankor? Toulezour mon korve mon pou espere, ziska mon soulazman i arive. Ou pou apel mwan, e mon pou reponn ou. Ou pou vreman anvi vwar travay ou lanmen.” (Zob 14:14, 15) Ki sa bann parol i vedir?
7 Zob ti konnen ki apre son lanmor, i ti pou bezwen esper en pe letan dan lanmor konmsi i ti dan en profon sonmey. I ti konsider sa letan konman en “korve” en peryod letan kot i ti oblize espere ziska ki i ganny libere. Zob ti garanti ki i ti pou ganny libere. I ti asire ki sa ti pou arive. Akoz? Akoz i ti konn santiman ki Zeova i annan. Zeova ti pou “vreman anvi” vwar son fidel serviter ankor. Wi, Bondye i anvi resisit tou bann dimoun drwat. Zeova pou osi donn lezot dimoun loportinite pour viv pour touzour dan Paradi lo later. (Lik 23:43; Zan 5:28, 29) Vi ki i lavolonte Bondye pour akonpli son plan, lekel ki kapab anpes li?
8. Ki mannyer Zeova in “donn laprev” konsernan nou lespwar pour lavenir?
8 Rezireksyon Zezi i donn nou lasirans ki nou lespwar pour lavenir pa dan vid. Dan son diskour ki i ti donnen dan lavil Atenn, Pol ti dir: “[Bondye] i’n fikse en zour pour li ziz lemonn antye avek lazistis, par en zonm ki i’n swazir. I’n donn laprev pour nou tou, an resisitan sa zonm.” (Akt 17:31) Kan zot ti tann Pol koz lo rezireksyon serten ti monk li. Me kantmenm sa, en ptigin ti vin bann krwayan. Petet zot ti ganny atire par sa lespwar akoz zot ti’n ganny en laprev. Par resisit Zezi, Zeova ti akonpli sa mirak pli remarkab. I ti resisit son Garson, pa konman en zonm, me konman en lespri pwisan. (1 Pyer 3:18) Enn fwa ki Zezi ti ganny resisite i ti vin pli enportan ki sa lepok kot i ti pe viv dan lesyel avan vin lo later. Vi ki i imortel e i sa enn ki pli pwisan apre Zeova, aprezan Zezi i kapab akonpli bann travay remarkab ki son Papa i donn li. Zeova i servi Zezi pour akonpli tou lezot rezireksyon, swa lavi dan lesyel oubyen lo later. Zezi li menm ti dir “Mwanmenm, larezireksyon ek lavi.” (Zan 5:25; 11:25) Par resisit son Garson, Zeova in donn lasirans tou bann imen fidel ki sa lespwar rezireksyon, ki swa pour viv dan lesyel oubyen lo later, pou vin vre.
9. Ki mannyer resi Labib i prouve ki rezireksyon i en realite?
9 Rezireksyon ti ganny akonpli devan bann temwen e in ganny rikorde dan Parol Bondye. I annan bann deskripsyon detaye dan bann resi Labib lo sa wit rezireksyon kot bann dimoun ti ganny resisite lo later. Sa bann mirak pa ti ganny fer an sekre me an piblik, souvan devan bokou temwen. Zezi ti resisit Lazar ki ti’n mor depi kat zour, devan en lafoul ki ti pe plere, san dout devan son fanmiy, zanmi, ek vwazen. Sa levidans ki Zezi ti’n ganny anvoye par Zeova ti telman pwisan ki bann zonm relizye ki ti opoz Zezi pa’n zanmen renyen sa ki ti arive. Okontrer, zot ti fer konplo pour touy pa zis Zezi, me osi Lazar! (Zan 11:17-44, 53; 12:9-11) Wi, nou kapab annan konfyans ki rezireksyon i en realite. Bondye in donn nou bann resi lo rezireksyon ki’n ganny akonpli dan lepase pour ki sa i rekonfort nou e batir nou lafwa.
Trouv Rekonfor dan sa Lespwar Rezireksyon
10. Kwa ki pou ed nou pour ganny rekonfor dan bann resi rezireksyon ki dan Labib?
10 Eski ou ti pou kontan ganny rekonforte kan ou fer fas avek lanmor? San okenn dout nou kapab ganny rekonfor atraver bann resi lo rezireksyon ki trouve dan Labib. Kan ou lir sa bann resi, reflesir lo zot, e esey vwar dan ou lespri sa bann levennman, i kapab fer sa lespwar rezireksyon vin pli reel pour ou. (Romen 15:4) Sa pa zis bann zistwar. Sa bann levennman ti arive avek bann dimoun ki ti vreman egziste parey ou, ki ti viv dan en lepok e dan en landrwa reel. Annou egzamin an bref en legzanp, sa premye rezireksyon ki ti ganny rikorde dan Labib.
11, 12. (a) Ki levennman tris sa vev dan lavil Tsarfat ti pas ladan, e ki mannyer i ti reazir okonmansman? (b) Eksplike ki Zeova ti permet son profet Eliya pour fer pour sa vev.
11 Mazin sa senn dan ou lespri. Depi plizyer semenn, profet Eliya in ganny resevwar konman en envite kot sa vev dan lavil Tsarfat, dan en lasanm anler. I en lepok difisil. Lafamin ek lasesres in frap sa rezyon. En kantite dimoun pe mor. Deza, Zeova ti’n servi Eliya pour akonpli en mirak ki’n dire pour en peryod letan pour rekonpans sa vev ki ti annan lafwa ek limilite. Sa vev ek son pti garson ti pres pour napa nanryen pour manze, ti reste zot en dernyen repa, kan Bondye ti donn pouvwar Eliya pour akonpli en mirak kot son rasyon lafarin ek delwil pa ti diminyen. Me aprezan, maler i frap sa vev. Son pti garson i tonm malad, e dan ankor en pti moman i aret respire. Sa vev i dan en profon sagrinasyon. I ti deza difisil pour li viv san sipor ek soutyen en mari, me aprezan in perdi son sel garson. Dan son sagrinasyon, i menm blanm Eliya ek son Bondye, Zeova! Ki sa profet pou fer?
12 Eliya pa ti reprimann sa vev ki ti’n akiz li an mal. Okontrer, i ti dir: “Donn mwan ou garson.” Apre ki i ti’n anmenn sa pti garson dan lasanm anler, Eliya ti priy plizyer fwa pour ki sa garson i retourn vivan. Finalman, Zeova ti azir! Zis mazin lazwa lo figir Eliya kan i ti vwar lestoman sa pti garson pe monte desan anmezir ki i ti konmans respire. Popyer lizye sa pti garson ti ouver, e son lizye ti briye ranpli avek lavi. Eliya ti anmenn sa pti garson anba kot son manman e dir: “Gete, ou garson i vivan.” Lazwa ki sa vev ti ladan pa kapab ganny dekrir. I ti dir: “Aprezan, wi, mon konnen ki ou en zonm sorti kot Bondye e ki parol Zeova ki sorti dan ou labous i vre.” (1 Lerwa 17:8-24) Son lafwa dan Zeova e dan son reprezantan ti vin pli for ki zanmen oparavan.
13. Akoz sa resi konsernan pti garson sa vev ki Eliya ti resisite i donn nou rekonfor ozordi?
13 Par reflesir lo en resi koumsa, ou pou sirman ganny en gran rekonfor. Pa i kler ki Zeova i kapab ganny laviktwar lo nou lennmi lanmor! Zis mazin dan ou lespri sa zour kan plizyer milye dimoun pou eksperyans menm lazwa ki sa vev, ler bann mor pou resisite! I pou osi annan en gran lazwa dan lesyel akoz Zeova pou rezwir ler i pou donn son Garson lotorite pour akonpli rezireksyon lo later antye. (Zan 5:28, 29) Eski en dimoun ki ou kontan in mor? Pa i vreman gou pour konnen ki Zeova i kapab e i pou redonn lavi bann ki’n mor!
Ou Lespwar ek ou Lavi konmela menm
14. Ki mannyer lespwar rezireksyon i kapab annan en lefe lo ou lavi?
14 Ki mannyer lespwar rezireksyon i kapab annan en lefe lo ou lavi konmela menm? Ou kapab ganny lafors atraver sa lespwar ler ou rankontre difikilte, persekisyon, oubyen danze. Par aksepte en promes anven pour ganny proteze, Satan i anvi ki ou telman per lanmor, ki ou pou anvi abandonn ou latasman avek Bondye. Mazin byen ki Satan ti dir avek Zeova: “Lapo pour lapo, e tou sa ki en zonm i annan i pou donnen pour son lavi.” (Zob 2:4) Par dir sa parol, Satan in koz manti lo nou tou, enkli ou. Eski i vre ki ou pou aret servi Bondye si ou eksperyans danze? Si ou pran letan pour byen reflesir lo lespwar rezireksyon, ou kapab ranforsi ou determinasyon pour kontinyen fer lavolonte ou Papa dan lesyel.
15. Ki mannyer parol Zezi ki’n ganny rikorde dan Matye 10:28 i kapab rekonfort nou ler nou dan danze?
15 Zezi ti dir: “Pa per bann ki touy lekor me ki pa kapab touy lam; per plito sa ki kapab detri ou lekor ek ou lam dan [“Zeenn,” NW].” (Matye 10:28) Nou pa devret per Satan oubyen son bann reprezantan imen. I vre, ki serten i kapab koz nou ditor, petet menm touy nou. Me, keksoz pli pir ki zot kapab fer i zis tanporer. Zeova i kapab e i pou repar okenn domaz ki son bann serviter fidel in sibir, menm ziska resisit zot. Nou merit annan lakrent zis pour Zeova, e zis li ki merit nou profon respe ek ladmirasyon. Zis li tousel ki annan sa pouvwar pour pran lavi e detri tou lespwar pour lavenir, par detri lekor ek nanm dan Zeenn. Erezman, Zeova pa oule sa i arive avek ou. (2 Pyer 3:9) Akoz lespwar rezireksyon, konman bann serviter Bondye nou kapab touzour asire ki nou an sekirite. Lavi eternel i devan nou osi lontan ki nou reste fidel, e napa nanryen ki Satan oubyen bann ki pe servi li, i kapab fer pour sanz sa.—Psonm 118:6; Ebre 13:6.
16. Ki mannyer nou pwennvi i kapab annan en lenfliyans lo bann priyorite ki nou etablir?
16 Si lespwar rezireksyon i reel pour nou, i pou ed nou annan en bon pwennvi lo lavi. Nou realize ki “swa ki nou viv swa ki nou mor, nou apartenir a [Zeova].” (Romen 14:7, 8) Ler nou pe etabli bann priyorite, alors nou pe swiv sa konsey Pol: “Pa swiv bann koutim sa monn konmela me les Bondye transform zot par en sanzman konplet dan zot lentelizans. Pour ki zot a kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:2) En kantite dimoun i prese pour satisfer tou zot dezir, lanbisyon, ek swe. Akoz zot konsider zot lavi kourt, zot oule a tou pri akonpli zot bann dezir deswit, e si zot annan en fason pour ador Bondye, i sirman pa an armoni avek ‘Son lavolonte parfe.’
17, 18. (a) Ki mannyer Parol Zeova i fer vwar ki lavi imen i kourt, me ki Bondye i anvi fer pour nou? (b) Akoz nou annan sa lanvi pour loue Zeova sak zour?
17 I vre lavi i kourt. “I pas vreman vit, e nou anvole” petet ziska laz 70 oubyen 80 zan. (Psonm 90:10) Bann imen i aparet e disparet parey zerb ver, parey en lonbraz ki pase, parey en lavaper. (Psonm 103:15; 144:3, 4) Me i pa ti dan plan Bondye ki nou viv zis detrwa dizenn lannen, grandi e devlop lasazes ek leksperyans zis pour viv ankor detrwa dizenn lannen pour ptitapti vin vye, tonm malad e mor. Zeova ti kre imen avek sa dezir pour viv pour touzour. Labib i dir nou ki “I’n menm met dezir pour viv pour letan endefini dan zot leker.” (Eklezyast 3:11) Eski Bondye i kriyel, pour donn nou en tel dezir apre fer li enposib pour akonplir? Anfet, non, akoz “Bondye i lanmour.” (1 Zan 4:8) I pou fer ki rezireksyon i ofer bann ki’n mor sa posibilite pour ganny lavi eternel.
18 Gras a sa lespwar rezireksyon, nou pou kapab annan en lavenir stab. Nou pa bezwen degaze, santi nou oblize pour reisi fer tou sa ki nou kapab fer la konmela oplivit posib. Nou pa bezwen ‘profit omaksimonm’ sa bann keksoz dan sa lemonn ki pe al disparet. (1 Korentyen 7:29-31; 1 Zan 2:17) Kontrerman avek bann ki napa okenn vre lespwar, nou annan sa kado merveye: Nou konnen ki si nou reste fidel avek Zeova, nou pou annan leternite pour loue li e rezwir lavi. Alors, annou fer tou nou posib pour loue Zeova sak zour, li ki garanti nou sa lespwar rezireksyon!
Ki ou pou reponn?
• Ki mannyer nou devret santi konsernan sa lespwar rezireksyon?
• Ki fakter ki garanti nou ki sa lespwar rezireksyon i reel?
• Ki mannyer ou kapab ganny rekonforte par sa lespwar rezireksyon?
• Ki lefe sa lespwar rezireksyon i kapab annan lo lafason ki ou viv?
[Kestyon]
[Portre lo paz 20]
Zob ti konnen ki Zeova ti vreman anvi resisit bann dimoun drwat
[Portre lo paz 23]
“Gete, ou garson i vivan”