“Divize akoz Langaz me ini par Lanmour”

Delivrans. Liberasyon. Ganny sove. Depi plizyer syek, dimoun i annan sa lanvi pour ganny soulaze avek zot bann fardo ek lenkyetid. Ki mannyer nou kapab fer fas avek bann problenm lavi? Eski en zour pou annan delivrans? Si wi, ki mannyer?

SA BANN kestyon ti ganny konsidere pandan sa trwa zour lasanble distrik ki ti konmanse an Me 2006, organize par Temwen Zeova. Son tenm ti “Delivrans i pros!”

Plizyer milye delege sorti dan diferan pei ti asiste nef parmi sa bann lasanble. Sa nef lasanble ti ganny fer pandan mwan Zilyet ek Out 2006, par egzanp Prague, kapital Repiblik Tyek; Bratislava, kapital Slovaki; Chorzow ek Poznan, Lapolonny, * e dan senk lavil Lalmanny, Dortmund, Frankfurt, Hamburg, Leipzig, ek Munich. Lasistans pour tou sa nef lasanble ti desot 313,000.

Ki mannyer lanbyans ti ete pandan sa bann lasanble? Ki kalite remark zot ti gannyen? E ki mannyer bann ki’n asiste lasanble ti santi apre?

Bann Preparasyon

Bann delege, osi byen ki bann Temwen dan sa pei ti pe esper sa levennman spirityel avek enpasyans e zot ti asire ki i ti pou en lokazyon inoubliyab. Fer laranzman pour trouv landrwa reste pour bann delege, ti en gro latas. Par egzanp pour lasanble ki ti ganny fer dan Chorzow Temwen Zeova dan Lapolonny ti ofer landrwa reste kot zot, avek apepre 13,000 envite sorti dan Les Lerop. Bann delege ki ti asiste sa lasanble ti sorti Larmeni, Belarus, Lestoni, Kazakhstan, Kyrgyzstan, Larisi, Latvya, Lazorzi, Leta-z-ini, Litwani, Moldova, Tajikistan, Turkmenistan, Likrenn ek Uzbekistan.

Bokou delege ti bezwen konmans fer preparasyon pour zot vwayaz plizyer mwan davans. Tatiana, en pionye ordiner dan Kamchatka, en rezyon dan Larisi ki sitye nor les avek Zapon, ti konmans fer lekonomi pour son vwayaz enn an davans. I ti bezwen vwayaz en zistans apepre 10,500 km. Premyerman, i ti vwayaz senk erdtan par avyon; apre i ti vwayaz preski trwa zour par tren, e finalman i ti pas 30 erdtan dan en bis pour ariv Chorzow.

Plizyer milye volonter ti partisip dan bann travay preparasyon avan lasanble, pour fer sa bann stad ek zot lanvironnman vin en landrwa ladorasyon ki apropriye. (Deterononm 23:14) Zis pour sit en legzanp, dan Leipzig bann Temwen dan sa landrwa ti  byen netway sa stad e zot ti promet pour fer parey alafen lasanble. Pour fini kont, bann zofisye ki ti responsab sa stad ti kennsel sa sonm ki zot ti devret peye an plis pour kouver fre netwayaz.

Bann Lenvitasyon

Bann kongregasyon partou dan lemonn ti byen partisip dan sa kanpanny otan ki zot ti kapab pour anons Lasanble “Delivrans i pros!” Bann Temwen ki ti pou asiste sa bann lasanble spesyal ti partisip dan sa kanpanny avek bokou lantouzyasm. Zot ti kontinyen anons sa lasanble ziska tar aswar, lavey lasanble. Eski zot devouman ti prodwir okenn bon rezilta?

En Temwen sorti Lapolonny ki apel Bogdan ti zwenn en msye lo laz ki ti anvi asiste sa lasanble me i ti dir ki son pti pansyon ki i touse pa pou permet li vwayaz sa 120 km ziska Chorzow. Zisteman, ti annan en plas vid dan sa bis ki sa kongregasyon lokal ti’n lwe. Bogdan i rakonte: “Nou ti dir avek sa msye ki si i vin landrwa kot bis pou kite 5:30 bomaten, i pou kapab al avek nou pour nanryen.” Sa msye ti aksepte sa lenvitasyon e i ti asiste sa lasanble. Plitar i ti ekrir sa bann frer, an dizan: “Apre ki mon’n asiste sa lasanble, mon determinen pour vin en pli bon dimoun.”

En zonm ki ti pe reste dan en lotel Prague kot ti annan bann delege sorti Langleter, ti dir avek en delege en zour swar ki li osi i ti’n asiste lasanble sa zour. Kwa ki ti pous li pour vini? Sa zonm ti dir ki apre ki i ti’n resevwar bann lenvitasyon sorti kot dis diferan proklanmater lo semen dan sa lavil, i ti santi li pouse pour vini. I ti vreman enpresyonnen e enpasyan pour aprann plis.—1 Timote 2:3, 4.

En Progranm spirityel byen solid

Sa progranm ti diskit lo konman pour fer fas avek diferan problenm. Bann konsey direk baze lo Labib ti montre konman sa bann problenm i kapab ganny rezourd oubyen konman pour andire malgre bann problenm.

Bann dimoun ki trouble akoz lavyeyes, move lasante, akoz zot in perdi en dimoun ki zot kontan dan lanmor, oubyen lezot problenm personnel, ti resevwar lankourazman sorti dan Labib pour ed zot annan en pwennvi pli pozitif lo lavi. (Psonm 72:12-14) Bann koup marye ek bann paran ti ganny konsey ki ti montre zot konman pour rezwir en lavi maryaz ki ere e ki mannyer pour reisi elve zot zanfan dan sa bon fason. (Eklezyast 4:12; Efezyen 5:22, 25; Kolosyen 3:21) Bann zenn Kretyen ki ganny ekspoze avek bann move lenfliyans kot lekol, me ki ganny bann konsey saz sorti dan Parol Bondye kot zot e kot lasal, ti resevwar bann konsey pratik. Zot ti aprann ki mannyer pour reziste presyon sorti kot zot kanmarad e ki mannyer pour ‘gard zot lekor kont sa bann pasyon lazenes.’—2 Timote 2:22.

En vre Fanmir enternasyonal

Temwen Zeova i touzour resevwar bann bon gidans pratik baze lo Labib dan zot bann renyon. (2 Timote 3:16) Me sa ki ti fer sa bann lasanble diferan, ti sa lasosyasyon avek bann frer ek ser sorti dan lemonn antye. Tou sa bann lasanble  spesyal ti prezant menm progranm spirityel dan plizyer langaz. Sak zour, bann manm Konsey Direkter ti prezant bann diskour ek rapor sorti dan lezot pei, ki ti fer sa lasanble vreman enteresan. Sa bann diskour ek rapor ti ganny tradwir pour bann group ki koz diferan langaz ki ti prezan sa zour, afen pour zot benefisye.

Bann delege ti enpasyan pour zwenn zot bann frer ek ser ki sorti dan lezot pei. En delege ti dir: “Diferans ant langaz pa ti vreman koz okenn problenm. Okontrer, i ti fer en pli bon lanbyans. Bann delege ti sorti dan plizyer kiltir diferan, me zot tou zot ti ini par menm lafwa.” Bann ki ti asiste lasanble dan Munich ti eksprim zot dan sa fason: “Divize akoz langaz me ini par lanmour.” Kantmenm zot ti sorti dan bann landrwa diferan oubyen koz en langaz diferan, dimoun ki ti asiste sa lasanble ti santi zot antoure par bann vre zanmi—zot bann frer ek ser spirityel.—Zekarya 8:23.

Zot ti eksprim zot Rekonnesans

Sa kondisyon letan rafal sa bann lasanble Lapolonny, ti vreman teste leta lespri ek landirans bann delege. Pa ti zis annan lapli me i ti osi ase fre, apepre 14 degre santigrad. En frer sorti Leta-z-ini ti fer sa remark: “Sa ti letan pli pir e pli fre ki mon’n deza eksperyanse dan en lasanble, an plis mon pa ti konpran preski nanryen pandan sa progranm. Me tou sa bann dimoun sorti dan diferan pei ki ti’n zwenn ansanm ti kree en latmosfer enkrwayab. I ti vreman annan en bon lanbyans e sa lospitalite eksepsyonnel ki nou ti gannyen, tousala ti kouver tou sa bann lenkonvenyan. Sa lasanble pou reste grave dan mon memwar!”

En lot keksoz ki pou reste grave dan memwar bann dimoun sorti Lapolonny ki ti asiste sa lasanble, i ler ti ganny anonse ki sa liv Insight on the Scriptures pou aprezan egziste dan zot prop langaz. Lefe ki zot ti’n siport lapli ek lafreser, sa ti vin konman en zoli rekonpans pour zot. Sa liv Live With Jehovah’s Day in Mind ki ti sorti dan tou sa bann lasanble “Delivrans i pros,” ti osi anmenn bokou lazwa.

En kantite parmi bann ki ti prezan, pou gard dan zot memwar sa lasanble pour lezot rezon ankor. Kristina, en ser sorti Repiblik Tyek ki ti volonter pour akonpanny en group delege lo en bis, i rakonte: “Ler nou ti pe dir orevwar en ser ti anmenn mwan dekote, i ti ser mwan dan son lebra e dir: ‘Ou’n vreman pran byen swen avek mwan! Ou ti anmenn manze kot nou ti pe asize, e ou ti menm donn nou delo pour bwar. Mersi bokou pour sa sakrifis ranpli avek lanmour ki ou’n fer.’’’ An dizan sa bann parol, sa ser ti pe koz konsernan dezennen ki ti ganny prepare pour bann delege. En frer ti eksplike, “Nou ti napa okenn leksperyans pour sa kalite travay. Sa travay ti enplik anmenn dezennen pour apepre 6,500 dimoun sak zour. Ti tousan pour vwar sa kantite dimoun ki ti volonter pour ede, enkli osi bann zanfan.”

En ser ki ti vwayaz depi Likrenn ziska Chorzow pour asiste lasanble ti dir: “Nou vreman touse par lanmour, swen ek zenerozite ki nou bann frer ek ser in demontre anver nou. Nou napa mo pour eksprim nou rekonnesans.” Annika en pti fiy wit an, ki sorti Finlenn ti ekrir biro brans Temwen Zeova Lapolonny: “Mon ti vreman kontan sa lasanble, mon pa ti krwar i ti pou koumsa. I gou ki nou form parti lorganizasyon Zeova, akoz nou kapab annan en ta zanmi dan lemonn antye!”—Psonm 133:1.

Komanter bann ki ti pe obzerve

Avan lasanble, laranzman ti ganny fer pour ki serten delege i vizit bann landrwa. Dan  lakanpanny Bavaria, bann delege ti aret kot en kongregasyon lokal, kot zot ti ganny byen akeyir. En gid ki pa ti Temwen ti vreman enpresyonnen par lafason ki bann frer ek ser ti demontre lafeksyon pour kanmarad. En delege i rakonte “Kan nou ti dan bis pe retourn kot lotel sa gid ti dir ki nou ti vreman diferan avek lezot touris. Nou ti byen abiye e tou dimoun ti korpere avek bann ki ti pe responsab group. Ti napa okenn zoure ni okenn dezord. I ti vreman etonnen pour vwar ki mannyer bann dimoun ki pa konn kanmarad ti kapab deswit vin bann bon zanmi.”

En frer ki ti pe travay kot Departman Lenformasyon dan lasanble Prague i rakonte: “Dimans bomaten sa zofisye ki ti ansarz bann gard ki ti’n ganny dezinyen pour fer sir ki i annan lord kot lasanble pe deroule, ti rann nou en vizit. Vi ki i ti remarke ki ti napa okenn dezord i ti dir ki i napa nanryen pour fer. I ti osi mansyonnen ki serten rezidan ki reste dan zalantour stad ti pe demande kwa ki pou deroule kot stad. Ler i ti mansyonn Temwen Zeova, laplipar di tan zot ti eksprim zot mekontantman, me sa zofisye ti reponn zot: ‘Si dimoun ti fer zis lanmwatye parey sa ki Temwen Zeova i fer, nou pa ti pou bezwen lapolis.’”

En kantite in deza fini ganny delivre!

Parol Bondye, Labib, i parey en pon ant bann kiltir, i reini bann Kretyen ansanm dan lape ek linite. (Romen 14:19; Efezyen 4:22-24; Filipyen 4:7) Lasanble spesyal “Delivrans i pros!” in prouv sa. Temwen Zeova in deza fini ganny delivre avek sa kantite fleo ki pe fer dimoun dan lemonn antye soufer. Entolerans, latak vyolan, ek rasizm i zis detrwa parmi bann problenm dan lasosyete ki’n preski disparet parmi zot. E zot pe esper avek enpasyans sa letan kot lemonn antye pou ganny libere avek tou sa bann problenm.

Dimoun ki ti asiste sa bann lasanble ti eksperyans personnelman sa linite ki egziste parmi Temwen Zeova sorti dan diferan pei ek kiltir. Sa ti vreman evidan alafen sa bann lasanble. Tou dimoun ti pe aplodi, bann ki’n fek vin zanmi pe may kanmarad dan lebra e pe tir bann dernyen portre. (1 Korentyen 1:10; 1 Pyer 2:17) Bann delege ti ere e konvenki ki sa letan kot zot pou ganny delivre avek tou zot difikilte ek lenkyetid i pros. Zot ti retourn dan zot pei ek kongregasyon avek plis determinasyon pour kontinyen reste vreman atase avek “parol lavi” ki sorti kot Bondye.—Filipyen 2:15, 16.

[Not anba lo paz]

[Portre lo paz 10]

Malgre zot koz vennsis diferan Langaz zot ini

[Bwat lo paz 10]

Dan tou sa nef lasanble, sa progranm ti ganny prezante dan sa langaz lokalman. Pandan sa bann lasanble Lalmanny, bann diskour ti osi ganny fer dan 18 lezot langaz. An Dortmund bann diskour ti ganny prezante dan Arabik, Espanyol, Farsi, Portige ek Ris; Frankfurt an Angle, Franse, Serb ek Kroat; Hamburg an Danish, Dutch, Swedish, ek Tamil; Leipzig an Polish, Sinwan ek Tirk; e Munich an Grek, Italyen, ek langaz pour bann sourd an Alman. Tou diskour Lasanble Prague, ti ganny fer an Angle, Ris ek Tyek. Bratislava, progranm ti ganny prezante an Angle, Hungarian, Slovak ek langaz pour bann sourd an Slovak. Chorzow, an Polish, Ris, Ukrainian, e langaz bann sourd an Polish. E Poznan, ti ganny fer an Finnish ek Polish.

An tou vennsis langaz! I vre, sa bann ki ti asiste lasanble ti divize akoz langaz, me zot ti ini par lanmour.

[Portre lo paz 9]

Bann delege sorti Kroasi ki ti Frankfurt ti eksite pour resevwar “New World Translation” dan zot prop langaz