Kontinyen “domin Lemal par sa ki byen”

“Pa les lemal domin zot, me okontrer zot domin lemal par sa ki byen.”—ROMEN 12:21.

1. Akoz nou kapab asire ki nou kapab domin lemal?

ESKI i posib reste ferm dan vre ladorasyon ler nou rankontre en gro lopozisyon? Eski nou kapab pli for ki bann lenfliyans ki pe sey trenn nou ankor dan sa lemonn mesan? Larepons tou le de kestyon i wi! Akoz? Akoz sa ki zapot Pol ti dir dan son let pour bann Romen. I ti ekrir: “Pa les lemal domin zot, me okontrer zot [“kontinyen,” NW] domin lemal par sa ki byen.” (Romen 12:21) Si nou met nou konfyans dan Zeova e nou determinen pour pa les lemonn domin nou, lemal ki sorti dan lemonn pa pou pli for ki nou. Deplis, sa lekspresyon ‘kontinyen domin lemal’ i montre ki nou kapab pli for ki lemal si nou pa aret fer zefor dan nou konba kont lemal. Se zis bann ki pa reste vizilan e aret lalit, ki pou les sa lemonn ek son sef mesan, Dyab, domin zot.—1 Zan 5:19.

2. Akoz nou pe al egzamin enn de levennman dan lavi Neemya?

² Apepre 500 zan avan lepok Pol, en serviter Bondye ki ti viv Zerizalenm ti demontre ki sa ki Pol ti dir konsernan domin lemal ti vre. Sa zonm fidel, Neemya, pa ti zis bezwen sirmont lopozisyon bann dimoun ki pa ti servi Bondye me i ti osi domin lemal avek sa ki byen. Ki defi i ti bezwen fer fas avek? Kwa ki ti ed li reisi? Ki mannyer nou kapab imit son legzanp? Pour reponn sa bann kestyon, annou egzamin enn de levennman dan lavi Neemya. *

3. Ki nou konnen lo Neemya e ki travay remarkab i ti arive fer?

³ Neemya ti servi dan lakour rwayal Lerwa Artakzerses sorti Pers. Menm si Neemya ti  viv avek bann dimoun ki pa ti servi Bondye, i pa ti “swiv bann koutim” “lemonn” ki i ti viv ladan. (Romen 12:2) Ler i ti annan en bezwen dan pei Zida, Neemya ti sakrifye son lavi konfortab, fer sa vwayaz difisil pour al Zerizalenm, e i ti antreprann sa gro travay pour rekonstri miray lavil. (Romen 12:1) Menm si i ti gouverner Zerizalenm, i ti travay dir ansanm avek son bann konpatriyot Izraelit depi granmaten ziska fernwanr. Pour sa rezon, sa travay ti ganny konplete dan zis de mwan! (Neemya 4:21; 6:15) Sa ti remarkab akoz pandan sa travay, bann Izraelit ti ganny plizyer kalite lopozisyon. Lekel bann ki ti opoz Neemya, e ki ti zot bi?

4. Ki lopozisyon ki liv Neemya pe dekrir?

⁴ Bann ki ti opoz li partikilyerman ti Sannbalat, Tobya, Gesenm, bann gran dimoun ki ti reste pros avek pei Zida. Vi ki zot ti bann lennmi pep Bondye, pour zot sa ti paret “tre mal ki [Neemya] ti’n vin rod en bon keksoz pour bann garson Izrael.” (Neemya 2:10, 19) Bann lennmi Neemya ti determinen pour anpes Neemya konstri miray menm par servi bann move konplo si i fodre. Eski Neemya ti pou ‘les li ganny dominen par lemal’?

“Ankoler e vreman ofanse”

5, 6. (a) Ki bann lennmi Neemya ti fer ler i ti konmans rekonstri miray? (b) Akoz Neemya pa ti per zot?

⁵ Avek kouraz Neemya ti motiv lepep: “Annou rekonstri miray Zerizalenm.” Zot ti reponn: “Nou devret konstri.” Neemya ti remarke ki “zot ti fortifye zot lanmen pour fer sa bon travay,” me bann ki ti opoz nou ti “konmans monk nou e get nou avek mepri e dir: ‘Kisisa ki zot pe fer? Eski se kont lerwa ki zot pe rebele?’” Me Neemya pa ti per zot lensilt ek fo lakizasyon. I ti dir zot: “Sa Bondye lesyel, se li ki pou fer nou reisi, e nou, son bann serviter, nou pou leve, e nou devret konstri.” (Neemya 2:17-20) Neemya ti determinen pour al pli devan avek “sa bon travay.”

⁶ Enn sa bann lennmi, Sannbalat, “ti ankoler e vreman ofanse” alor i ti dir en bann parol. I ti monk zot an dizan: “Ki sa bann Zwif fay fay pe fer?” “Eski zot pou donn lavi sa bann ros ki dan sa ta salte ek lapousyer?” Tobya ti antre ladan par dir: “Si en renar ti tap ladan, i ti pou vreman kas zot miray ros.” (Neemya 4:1-3) Ki ti reaksyon Neemya?

7. Ki mannyer Neemya ti reazir ler i ti rankontre lopozisyon?

⁷ Neemya pa ti antren sa bann sikannri. I ti swiv konmann Bondye e i pa ti esey revanze. (Levitik 19:18) Okontrer, i ti les sa sitiasyon dan lanmen Zeova. Dan son lapriyer i ti dir: “Ekoute, O nou Bondye, parski nou’n ganny meprize, fer zot bann repros retourn lo zot prop latet.” (Neemya 4:4) Neemya ti annan konfyans dan parol Zeova: “Se mwan ki pou revanze e ki pou fer peye.” (Deterononm 32:35) Deplis, Neemya ek son pep “ti kontinyen konstri sa miray.” Zot pa ti les zot ganny distrer. Anfet, “miray antye ti zwenn ansanm ziska lanmwatye son oter, e lepep ti kontinyen met zot leker dan louvraz.” (Neemya 4:6) Bann lennmi vre ladorasyon pa ti’n arive fer zot aret travay! Ki mannyer nou kapab fer parey Neemya?

8. (a) Ki mannyer nou kapab imit Neemya ler nou rankontre lopozisyon? (b) Rakont en leksperyans ki montre ki i pli bon pour pa rann mal pour mal. I kapab enn ki ou’n pas ladan oubyen ki ou’n tande.

⁸ Ozordi, bann dimoun ki opoz nou i kapab dan travay, kot lekol e menm dan nou lakour. Kekfwa, zot pou sikann oubyen akiz nou. Toudmenm, laplipar di tan, pli vomye aplik sa prensip dan Labib: “I annan . . . en letan pour reste trankil.” (Eklezyast 3:1, 7) Alors, parey Neemya, nou pa koz parey zot, par servi bann parol blesant. (Romen 12:17) Dan lapriyer, nou met nou konfyans dan sa enn ki’n asir nou ki se li “ki pou fer peye.” (Romen 12:19; 1 Pyer 2:19, 20) Dan sa fason, nou pa les bann ki opoz nou distrer nou dan sa louvraz ki nou’n ganny demande pour fer,  setadir pres sa bon nouvel Rwayonm Bondye e fer dimoun vin bann disip Zezi. (Matye 24:14; 28:19, 20) Sak fwa nou partisip dan predikasyon e nou pa les nou dekouraze par lopozisyon, nou demontre menm leta lespri fidelite ki Neemya ti manifeste.

‘Sirman nou pou touy zot’

9. Ki kalite lopozisyon Neemya ti gannyen avek son bann lennmi, e konman i ti reazir?

⁹ Ler bann ki ti opoz vre ladorasyon dan lepok Neemya ti tande ki “reparasyon bann miray Zerizalenm ti’n al pli devan,” zot ti pran zot lepe pour “lager kont Zerizalenm.” Pour bann Zwif, i ti paret ki napa okenn lespwar. Dan nor, ti annan bann Samariten, dan les, bann Amonit, bann Arab dan sid ek bann ki sorti Asdod dan was. Zot ti toultour Zerizalenm, bann ki ti pe rekonstri Zerizalenm ti’n pri. Ki zot ti pou fer? Neemya ti dir: “Nou ti priy nou Bondye.” Bann lennmi ti menas zot an dizan: “Sirman nou pou touy zot e met en lafen avek sa travay.” Neemya ti reazir par donn bann travayer sa latas pour defann lavil “avek zot lepe, zot lans, ek zot lark.” I vre i ti paret ki sa ptigin Zwif ti napa en sans devan tou sa bann lennmi, me Neemya ti ankouraz zot: “Pa per . . . mazin Zeova sa Enn ki gran e efreyan.”—Neemya 4:7-9, 11, 13, 14 [5].

10. (a) Kwa ki ti fer bann lennmi Neemya bezwen sanz plan en sel kou? (b) Ki Neemya ti fer toudmenm?

¹⁰ Me en sel kou sitiasyon ti sanze. Bann lennmi ti aret zot latak. Akoz? Neemya i rakonte: “Sa vre Bondye ti’n gat zot plan.” Selman, Neemya ti konnen ki sa bann lennmi ti ankor en menas pour zot. Alor avek lasazes, i ti fer en sanzman dan lafason ki zot ti travay. Apartir sa moman, “zot ti tre okipe pe travay avek en kote lanmen anmezir ki lot kote ti pe tyonbo zot lans.” Neemya ti osi demann en zonm pour “soufle tronpet” pour averti bann travayer an ka lennmi i atake. Pli enportan ankor, Neemya ti rasir lepep an dizan: “Bondye li menm pou konbat pour nou.” (Neemya 4:15-20) Avek sa lankourazman ek preparasyon pour reazir an ka latak, bann travayer ti kontinyen travay. Ki leson nou kapab tire ladan?

11. Ki mannyer bann vre Kretyen i tenir ferm dan bann pei kot nou travay predikasyon i enterdir, e konman zot domin lemal par lebyen?

¹¹ Parler, bann vre Kretyen osi i fer fas avek lopozisyon ki vyolan. Anfet, dan serten pei, bann opozan vre ladorasyon ki vreman pa bon i zwenn ansanm e vin en lafors ki vreman fer per. Ler ou gete, i pa paret ki nou bann frer ek ser dan lafwa i annan okenn sans pour sirviv. Toudmenm, sa bann Temwen i annan konfyans ki ‘Bondye pou konbat pour zot.’ Vreman, bann ki’n ganny persekite akoz zot krwayans in souvandfwa vwar ki mannyer Zeova i reponn lapriyer e ‘gat plan’ bann lennmi pwisan. Menm dan bann pei kot nou travay in ganny enterdir, bann Kretyen i rod fason pour zot kontinyen anons sa bon nouvel. Parey bann travayer dan letan Zerizalenm ti sanz zot fason travay, avek pridans Temwen Zeova ozordi i aziste fason ki zot prese ler zot ganny persekite. Byensir, zot pa servi okenn zarm ki kapab bles lezot. (2 Korentyen 10:4) Menm si dimoun i menas pour servi vyolans kont zot, sa pa aret zot dan travay predikasyon. (1 Pyer 4:16) Okontrer, sa bann frer ek ser kouraze i kontinyen “domin lemal par sa ki byen.”

“Vini e annou zwenn”

12, 13. (a) Ki bann lennmi Neemya ti esey fer? (b) Akoz Neemya pa ti aksepte pour zwenn avek bann ki ti opoz li?

¹² Apre ki bann lennmi Neemya ti realize ki zot konplo ti’n tonm dan delo, zot ti konmans bann kalite latak anba anba. Anfet, zot ti esey trwa fason diferan. Ki sa trwa fason?

¹³ Premyerman, bann lennmi Neemya ti esey anbet li. Zot ti dir li: “Vini, e annou met  en randevou pour nou zwenn ansanm dan bann vilaz lo laplenn dan vale Ono.” Ono ti sitye ant Zerizalenm ek Samari. Alor bann lennmi ti ofer Neemya pour li zwenn zot lanmwatye semen ant sa de lavil pour rezourd sa bann diferans. Kekfwa Neemya ti’n kapab mazinen: ‘I paret fer sans. Pli bon koze ki lager.’ Me Neemya pa ti aksepte. I ti eksplike akoz: “Zot ti pe plàn pour fer mwan ditor.” I ti konpran zot byen, i pa ti ganny anbete. Kat fwa i ti dir zot: “Mon pa pe kapab desann. Akoz louvraz i devret arete pandan ki mon kit isi pour desann kot zot?” Lesey sa bann lennmi pour ki Neemya i fer konpromi pa ti marse. I ti reste konsantre lo son travay pour fini son louvraz konstriksyon.—Neemya 6:1-4.

14. Ki Neemya ti fer avek sa bann fo lakizasyon?

¹⁴ Dezyenmman, bann lennmi Neemya ti esey fann bann fo rimer, zot ti akiz Neemya konmkwa i “pe fer plan pour rebel” kont Lerwa Artakzerses. Ankor en fwa, zot ti dir Neemya: “Annou konsilte ansanm.” E Neemya ti refize menm, parski i ti konnen son bann lennmi ti annan en move lentansyon. Neemya ti eksplike: “Zot tou ti pe esey fer nou per, an dizan: ‘Zot lanmen pou tonbe e aret fer sa travay e alor i pa pou ganny fer.’” Safwasi, Neemya ti defann son lekor kont sa bann lakizasyon, i ti dir: “Bann keksoz parey zot pe dir pa’n arive, me se dan zot prop leker ki zot pe envant tousala.” Deplis, Neemya ti demann led Zeova dan lapriyer: “Fortifye mon lanmen.” I ti annan konfyans ki avek led Zeova i ti pou kapab anpes sa move konplo arive e i ti pou al pli devan avek sa konstriksyon.—Neemya 6:5-9.

15. Ki en fo profet ti konsey Neemya pour fer, e akoz Neemya pa ti aksepte?

¹⁵ Trwazyenmman, bann lennmi Neemya ti servi en tret, en Izraelit nonmen Semaya pour esey fer Neemya kas lalwa Bondye. Semaya ti dir Neemya: “Annou met en randevou pour nou zwenn dan lakaz sa vre Bondye, dan tanp, e annou ferm laport tanp, akoz zot pe vin touy ou.” Semaya ti dir Neemya ki i pe al ganny touye alor pour sov son lavi, i devret al kasyet dan tanp. Me, Neemya pa ti en pret. I ti pou fer en pese si i ti al kasyet dan lakaz Bondye. Eski i ti pou fer sa pour li sov son lavi? Neemya ti dir: “Lekel sa zonm parey mwan ki ti pou kapab antre dan tanp e reste vivan? Mon pa pou antre!” Akoz Neemya pa ti tonm dan sa latrap? Akoz i ti konnen ki menm si Semaya ti en Izraelit parey li, “pa Bondye ki ti anvoy li.” Apre tou, en vre profet pa ti pou zanmen konsey li pour kas lalwa Bondye. Ankor enn fwa, Neemya pa ti les li ganny anbete par sa bann move lennmi. Zis apre sa, i ti kapab dir: “Finalman sa miray ti fini vennsenkyenm zour [mwan] Eloul, dan senkannde zour.”—Neemya 6:10-15; Nonm 1:51; 18:7.

16. (a) Ki nou devret fer si nou ganny lopozisyon avek bann swadizan zanmi, bann fo frer ek fo lakizasyon? (b) Ki mannyer nou kapab montre ki nou refize fer konpromi avek nou krwayans, dan travay, kot lekol e dan lakour?

 ¹⁶ Parey Neemya, nou osi nou kapab fer fas avek dimoun ki opoz nou, parfwa zot pou fer krwar ki zot nou zanmi, ouswa zot koz lalang lo nou oubyen zot fer krwar zot nou frer. Parey bann opozan ti demann Neemya, serten i kapab envit nou pour zwenn lanmwatye semen. Andotmo, zot kapab esey konvenk nou ki si nou servi Zeova avek en pti pe mwens devouman, nou ti kapab pourswiv lezot lobzektif dan sa lemonn an menm tan. Toutfwa, nou pa oule fer konpromi akoz nou met Rwayonm Bondye premye dan nou lavi. (Matye 6:33; Lik 9:57-62) Bann ki opoz nou i fann bann fo lakizasyon kont nou. Dan serten pei, zot dir ki nou en menas pour Leta, parey zot ti akiz Neemya konmkwa i ti pe rebel kont lerwa. Dan serten ka, nou’n nobou defann nou lekor an kour. Antouka, menm si rezilta pa neseserman dan nou faver dan tou ka, nou priy avek konfyans ki Zeova pou diriz keksoz dapre son lavolonte. (Filipyen 1:7) Lopozisyon i osi kapab sorti kot bann ki pretann pe servi Zeova. Zis parey sa Zwif ki ti esey persyad Neemya kas lalwa Bondye pour sov son lavi, serten ki ti Temwen avan i kapab esey enfliyans nou pour fer konpromi dan en fason ou en lot. Me nou rezet tou propagann bann ki’n sorti parmi nou, parski nou konnen ki nou pou ganny nou lavi sove, pa par kas lalwa Bondye, me par swiv zot! (1 Zan 4:1) Wi, avek led Zeova, nou kapab domin tou sort kalite lemal.

Anons bon Nouvel malgre Lopozisyon

17, 18. (a) Ki Satan ek son bann siporter pe esey fer? (b) Ki ou determinen pour fer, e akoz?

¹⁷ Parol Bondye i dir sa lo bann Kretyen swazir, bann frer Kris: “Zot in ganny laviktwar lo [Satan] akoz . . . parol mesaz ki zot in anonse.” (Revelasyon 12:11) Alors, anons bon nouvel Rwayonm i relye avek ranport laviktwar lo Satan ki sours lemal. I pa sirprann nou prezan, ki Satan pa zanmen aret atak bann Kretyen swazir ki ankor lo later ek sa “gran lafoul” atraver lopozisyon ki nou gannyen.—Revelasyon 7:9; 12:17.

¹⁸ Parey nou’n vwar, lopozisyon i kapab vin atraver parol, menas pour servi vyolans, ouswa menm dan bann fason anba anba. Antouka, bi Satan se toultan pour fer sa travay predikasyon arete. Toudmenm, tou son zefor pou tonm dan delo akoz parey Neemya, pep Bondye i determinen pour kontinyen “domin lemal avek sa ki byen.” Pep Bondye pou kontinyen anons sa bon nouvel Rwayonm ziska ler Zeova pou dir ki sa travay in konplete!—Mark 13:10; Romen 8:31; Filipyen 1:27, 28.

[Not anba lo paz]

Eski ou rapel?

• Ki lopozisyon bann serviter Bondye dan letan lontan e konmela in fer fas avek?

• Ki ti lobzektif bann lennmi Neemya, e ki lobzektif bann lennmi Bondye ozordi?

• Ki mannyer nou kontinyen domin lemal par lebyen ozordi?

[Kestyon]

[Bwat lo paz 31]

Leson dan Liv Neemya

Bann Serviter Bondye i fer fas avek

• sikannri

• menas

• bann anbeter

Bann Anbeter i kapab vin atraver

• swadizan zanmi

• fo lakizasyon

• fo frer

Bann Serviter Bondye i domin lemal par

• kontinyen fer travay Bondye

[Portre lo paz 32]

Vre Kretyen pa per pour anons sa bon nouvel