Parol Zeova i vivan Bann

Pwen enteresan dan Liv Ezekyel—1

NOU dan lannen 613 A.N.L. Profet Zeremi i Zida, san okenn lafreyer i pe pres sa mesaz destriksyon ki byento Zerizalenm pe al eksperyanse e ki Zida pou ganny devaste. Lerwa Babilonn, Neboukadnetsar, in anmenn en kantite Zwif an kaptivite. Danyel ek son trwa konpanyon ti serten parmi sa bann Zwif e zot ti travay dan lakour rwayal, Kaldeen. Laplipar bann Zwif an egzil ti obor larivyer Kebar “dan pei bann Kaldeen.” (Ezekyel 1:1-3) Zeova pa ti les zot san en mesaze. I ti apwent Ezekyel, ki sa lepok ti annan 30 an, konman profet.

Sa liv ki kouver bann levennman ki’n arive pandan 22 zan, ti konplete an 591 A.N.L. Ezekyel ti en dimoun ki ti ekri avek bokou latansyon. Par egzanp, kan i ti ekri sa bann profesi i ti fer resorti son zour, mwan ek lannen. Sa premye parti dan mesaz Ezekyel i konsantre lo lafason ki Zerizalenm pou tonbe e ganny detrir. Sa dezyenm parti i enkli en mesaz zizman kont bann nasyon dan zalantour, e sa dernyen parti i annan pour fer avek sa letan kot ladorasyon Zeova pou ganny reetablir. Sa lartik pou fer resorti bann pwen enteresan dan Ezekyel 1:1–24:27, ki enkli bann vizyon, profesi, e kot Ezekyel i akt pour montre ki mannyer Zerizalenm pou tonbe.

“MON’N FER OU VIN EN GARDYEN”

(Ezekyel 1:1–19:14)

Apre ki i ti’n resevwar en vizyon enpresyonan lo tronn Zeova, Ezekyel ti ganny son misyon. Zeova ti dir li: “Mon’n fer ou vin en gardyen pour pep Izrael, e ou devret antann parol sorti dan mon labous e ou devret averti zot pour mwan.” (Ezekyel 3:17) Pour profetize ki mannyer Zerizalenm ti pou ganny atake e ki lefe sa ti pou annan, Ezekyel ti ganny lord pour akt pour montre konman sa ti pou arive. Zeova ti dir Ezekyel konsernan Zida: “La mon la! Mon pe anmenn en lepe lo zot e sirman mon pou detri ou bann landrwa” fo ladorasyon. (Ezekyel 6:3) I ti dir avek sa bann zabitan: “Sa kouronn [maler] i devret vin kot ou.”—Ezekyel 7:7.

Dan en vizyon ki i ti gannyen an lannen 612 A.N.L., Ezekyel ti kapab vwar ki ti pe pase Zerizalenm. Pa i ti degoutan sa bann keksoz ki i ti vwar pe arive dan tanp Bondye! Kan Zeova i anvoy son bann larme sorti dan lesyel (ki ganny reprezante par sa “sis zonm”) pour tir son lakoler lo sa bann aposta, zis bann ki annan ‘en mark lo zot fron’ ki pou ganny sove. (Ezekyel 9:2-6) Me premyerman, “sa labrez dife,” ki reprezant sa mesaz destriksyon ki parey en dife, i bezwen ganny anvoye lo sa lavil. (Ezekyel 10:2) Menm si ‘Zeova pou fer bann move dimoun anmenn zot move semen lo zot latet,’ i promet ki i pou rasanble ankor bann Izraelit ki’n fann fannen partou.—Ezekyel 11:17-21.

Dan son vizyon Ezekyel i retrouv li an Kalde pour ankor enn fwa. En senn i demontre ki mannyer Lerwa Sidkya ek son pep i fann kler Zerizalenm. Bann fo profet i ganny denonse. Bann adorater zidol i ganny rezete. Zida i ganny konpare avek en pye rezen ki napa valer. En zedmo lo leg ek pye rezen i montre move konsekans Zerizalenm apre ki zot in al tap laport Lezip. Sa zedmo i fini avek sa promes ki ‘Zeova pou anmenn en pti bourzon lo en montanny ki o.’ (Ezekyel 17:22) Me pou “napa okenn baton lerwa pour dirize” Zida.—Ezekyel 19:14.

 Larepons pour bann Kestyon lo Labib:

1:4-28—Ki sa kales dan lesyel i reprezante? Sa kales i reprezant lorganizasyon Zeova dan lesyel ki konpoze avek tou bann ki dan lesyel e ki fidel. I ganny son lafors atraver lespri sen Zeova. Sa enn ki pe kondwir sa kales i reprezant Zeova, e i difisil pour trouv mo pour dekrir son laglwar. E sa zoli larkansyel i reprezant son karakter dous.

1:5-11—Lekel sa kat kreatir vivan? Dan sa dezyenm vizyon ki Ezekyel ti gannyen lo sa kales, i ti fer resorti ki sa kat kreatir vivan ti bann seriben. (Ezekyel 10:1-11; 11:22) I ti dir ki figir sa toro i reprezant “figir seriben.” (Ezekyel 10:14) Sa i pa drol akoz dan Labib toro i reprezant pwisans ek lafors, e anfet bann seriben i vreman pwisan.

2:6—Akoz tou dilon sa liv, Ezekyel i ganny apele “garson zonm”? Zeova i apel Ezekyel “garson zonm” pour rapel li ki i’n ganny fer avek laser ek disan, e sa i met lanfaz lo sa gran diferans ki egziste ant bann mesaze imen ek Bondye ki anvoy zot pour proklanm son mesaz. Dan Levanzil, Zezi Kri i ganny apele apepre 80 fwa konman “garson zonm” oubyen fisdelonm. Sa i klerman montre ki Garson Bondye ti vin lo later konman en imen, i pa ti en lanz ki ti pran lekor imen tanporerman.

2:9–3:3—Akoz sa roulo kantik ki eksprim dey ek sagrinasyon ti dou pour Ezekyel? Sa roulo kantik ti dou pour Ezekyel akoz i ti annan en bon latitid anver sa travay ki i ti’n ganny konfye. I ti kontan pour vin profet Zeova.

4:1-17—Eski Ezekyel ti vreman akt pour montre ki mannyer Zerizalenm ti pou ganny atake? Lefe ki Ezekyel ti demann Zeova pour donn li en lot keksoz pour li kwi manze avek, e Zeova ti aksepte son demann, sa i endike ki i ti vreman akt pour montre ki ti pou arive avek Zerizalenm. Vi ki i ti dormi lo son kote gos, sa ti pe reprezant sa 390 an ki sa dis tribi Rwayonm Izrael ti pou fer sa ki mal. Sa ti konmanse depi ler zot ti ganny formen an 997 A.N.L. ziska ki zot ti ganny detri an 607 A.N.L. Ler Ezekyel ti dormi lo son kote drwat, sa ti reprezant sa 40 an ki Zida ti pou fer pese, depi lepok ki Zeremi ti vin en profet an 647 A.N.L. ziska 607 A.N.L. Tou dilon sa 430 zour, Ezekyel ti viv lo zis en ptigin manze ek delo, e dan en fason profetik sa ti pe montre ki ti pou annan en lafamin pandan sa letan ki Zerizalenm ti pou ganny atake.

5:1-3—Ki i vedir ler Ezekyel i pran en ptigin seve dan sa ta ki i ti sipoze anvoy dan divan e i met zot dan son lenz? Sa ti en lendikasyon ki apre sa 70 an an egzil, serten Zwif ti pou retourn Zida e rekonmans pratik vre ladorasyon.—Ezekyel 11:17-20.

17:1-24—Lekel sa de gran leg, ki mannyer bann pti bourzon pye sed in ganny kase, e lekel “sa enn tann” ki Zeova in anmennen? Sa de leg i reprezant bann dirizan Babilonn ek Lezip. Sa premye leg i vin anler lo bout pye sed, savedir kot sa dirizan dan gouvernman ki sorti dan desandans rwayal David. Sa leg i kas bann pti bout anler dan leker ki’n bourzonnen, ki ti reprezant sa letan kot Lerwa Yeoakin sorti Zida ti pou ganny ranplase par Sidkya. Menm si i ti’n fer en ve fidelite, Sidkya ti al rod led avek sa lot leg, savedir bann dirizan Ezipsyen, me sa pa ti abouti li dan nanryen. I ti pou ganny anmennen an egzil e i ti pou  mor Babilonn. Zeova i osi kas sa “enn tann,” sa i Mesi ki plitar ti pou vin Lerwa. I ganny anmennen lo “en montanny ki o e eleve,” lo Montanny Siyon dan lesyel, kot i pou vin en “gro pye sed” ki pou anmenn vre benediksyon lo later.—Revelasyon 14:1.

Leson pour nou:

2:6-8; 3:8, 9, 18-21. Nou pa devret les bann move dimoun fer nou per, oubyen anpes nou pres mesaz Bondye, kot nou osi pe averti zot. Kan dimoun pa enterese oubyen zot opoz nou, nou bezwen vin solid parey en dyanman. Me selman, nou bezwen fer sir ki nou pa vin ensansib oubyen dir dan lafason ki nou tret zot. Zezi ti annan konpasyon pour bann dimoun ki i ti pres avek, e nou osi nou devret les sa kalite motiv nou pour pres avek dimoun.—Matye 9:36.

3:15. Apre ki i ti’n ganny son misyon, Ezekyel ti reste Tel-Abib, ‘i ti reste sezi pour set zour,’ pe esey reflesir oprofon lo sa mesaz ki i ti pou prese. Eski pa nou devret pran letan pour etidye seryezman e reflesir lo bann keksoz profon dan Labib pour nou kapab konpran zot?

4:1–5:4. Ezekyel ti bezwen annan limilite ek kouraz pour li kapab akt pour montre ki mannyer sa de vizyon profetik ti pou ganny akonpli. Nou osi nou bezwen annan kouraz ek limilite afen pour fer nenport keksoz ki Bondye i demann nou.

7:4, 9; 8:18; 9:5, 10. Nou pa bezwen pran pitye oubyen annan konpasyon pour bann ki eksperyans lakoler Bondye.

7:19. Kan Zeova pou vin ziz sa lemonn, larzan pa pou kapab fer nanryen pour nou.

8:5-18. Bann aposta i annan pour bi detrir relasyon en dimoun avek Bondye. “Par son labous, sa enn ki aposta pou detri son prosen.” (Proverb 11:9) Nou montre ki nou saz ler nou pa ni menm anvi ekout sa ki zot annan pour dir.

9:3-6. Pour nou kapab sirviv sa “gran ladetres,” i enportan ki nou annan sa mark. Savedir ki nou’n dedye nou lavi avek Bondye, batize e ki nou annan en personnalite Kretyen. (Matye 24:21, NW) Bann Kretyen swazir, ki ganny reprezante par sa zonm ki annan en pti po lank ki sekreter i servi, i devan dan sa travay pour mark bann dimoun. Sa i ganny fer par sa travay predikasyon e pour fer disip. Si nou anvi gard nou mark, avek devouman nou bezwen donn zot en koudmen dan sa travay.

12:26-28. Ezekyel ti pou menm dir sa bann ki ti boufonn li akoz son mesaz: “Tou sa bann parol ki [Zeova] in dir pou nepli ganny anvoye pour plitar.” Nou bezwen fer tou sa ki nou kapab pour ed lezot pour met zot konfyans dan Zeova avan i tro tar.

14:12-23. Tou i depan lo nou si nou anvi ganny sove. Personn pa kapab pran sa responsabilite dan nou plas.—Romen 14:12.

18:1-29. Nou responsab pour konsekans nou aksyon.

“MON POU FER LI VIN DEBRI, DEBRI, DEBRI”

(Ezekyel 20:1–24:27)

Dan sa setyenm lannen an egzil, 611 A.N.L., bann dimoun aze Izrael ti al kot Ezekyel pour zot kapab “kestyonn Zeova.” Ezekyel ti rakont zot ki mannyer Izrael ti rebele dan lepase e i ti averti zot ki ‘Zeova pou anmenn son lepe’ kont zot. (Ezekyel 20:1; 21:3) Kan i ti pe koz avek sa enn ki ti pe dirize Izrael (Sidkya), Zeova ti dir: “Tir sa tirban ek sa kouronn. Keksoz pa pou reste parey. Met sa ki ba anler e abes sa ki o. Mon pou fer li vin debri, debri, debri. Sa osi pa pou vin pour personn ziska sa enn ki annan drwa legal [Zezi Kri] i vini, e mon a donn avek li.”—Ezekyel 21:26, 27.

Zerizalenm in ganny trouve koupab pour son bann pese. Pese Oola (Izrael) ek Ooliba (Zida) in ganny dekouver. Oola ti’n fini ganny donnen “dan lanmen sa bann ki kontan li avek pasyon, dan lanmen bann garson Asiri.”  (Ezekyel 23:9) Byento Ooliba pou ganny devaste. An 609 A.N.L., Zerizalenm ti konmans ganny atake, e sa ti dire pour 18 mwan. E finalman kan sa lavil pou tonbe, bann Zwif pou’n sitan soke ki zot pa pou kapab eksprim zot sagrinasyon. Ezekyel ti napa drwa koz mesaz Bondye avek sa bann ki an egzil, ziska ki i ti ganny mesaz avek “bann ki ti reste vivan,” konsernan destriksyon sa lavil.—Ezekyel 24:26, 27.

Larepons pour bann Kestyon lo Labib:

21:3—Lekel sa “lepe” ki Zeova i tire dan son fouro? Sa “lepe” i reprezant Lerwa Babilonn Neboukadnetsar ek son larme, ki Zeova i servi pour anmenn son zizman lo Zerizalenm ek Zida. I osi kapab enkli lorganizasyon Zeova dan lesyel ki konpri bann kreatir spirityel pwisan.

24:6-14—Ki sa larouy lo marmit i reprezante? Kan Zerizalenm ti ganny atake i ti parey en gro marmit. Sa larouy i reprezant tou sa bann move vis ki ti pe arive dan sa lavil. Sa i enkli, lenpirte, move kondwit deregle, ek versman disan ki i ti responsab. Degre i ti’n fer en kantite pese, menm si zot ti met sa marmit vid lo dife, e les li vin vreman so, sa pa ti ase pour retir sa larouy.

Leson pour nou:

20:1, 49. Reaksyon bann zonm aze Izrael i montre ki zot ti annan dout konsernan sa ki Ezekyel ti dir. Fotespere ki nou pa zanmen annan dout lo bann lavertisman sorti kot Bondye.

21:18-22. Menm si Neboukadnetsar ti al ver sa bann ki devinen, se Zeova ki ti fer sir ki sa bann dirizan payen i vir kont Zerizalenm. Sa i montre ki menm bann demon pa kapab vin en lobstak pour sa bann ki Zeova i servi pour anmenn son zizman.

22:6-16. Zeova i deteste sa bann ki koz an mal lo lezot, kondwit deregle, labi pouvwar ek bann ki aksepte gous. Nou bezwen reste determinen pour rezet sa bann move tre.

23:5-49. Kan Izrael ek Zida ti fer bann trete politik, sa ti fer zot aksepte fo ladorasyon sa bann alye politik. Annou fer atansyon ki nou pa sitan vin pros avek lemonn ki kapab detrir nou lafwa.—Zak 4:4.

En Mesaz ki vivan e ki annan Pisans

Pa nou’n aprann bann bon leson dan sa 24 sapit dan liv Ezekyel! Sa bann prensip i montre kwa ki fer en dimoun perdi faver Bondye, ki mannyer nou kapab ganny son mizerikord, e akoz nou devret averti bann move dimoun. Sa profesi konsernan destriksyon Zerizalenm i klerman montre ki Zeova i en Bondye ki ‘fer son pep konn bann nouvo keksoz avan ki zot konmans zermen.’—Izai 42:9.

Sa bann profesi dan Ezekyel 17:22-24 ek 21:26, 27 i fer resorti ki mannyer sa Rwayonm kot Zezi pou dirize dan lesyel pou ganny etabli. Tre byento, sa Rwayonm pou akonpli lavolonte Bondye lo later. (Matye 6:9, 10) Avek konviksyon ek en lafwa for, nou kapab antisipe pour ganny bann benediksyon ki sa Rwayonm pou anmennen. Wi, “Parol Bondye i vivan e i annan pisans.”—Ebre 4:12.

[Portre lo paz 12]

Ki sa kales dan lesyel i reprezante?

[Portre lo paz 14]

Kan nou partisip avek devouman dan predikasyon sa i ed nou pour gard nou “mark”