Zeova i apresye ou Lobeisans

“Vin saz, mon garson, e rezwir mon leker.”—PROVERB 27:11.

1. Ki leta lespri ki vreman evidan ozordi?

SA LETA lespri kot dimoun i oule fer zis sa ki zot oule ek dezobeisans, i vreman evidan dan sa lemonn ozordi. Dan son let ki i ti ekri bann Efezyen, zapot Pol ti eksplike akoz sa lemonn i koumsa: “Zot ti pe viv dapre mannyer lemonn, an swivan sef pisans dan lespas, sa menm lespri ki aprezan pe travay dan bann zanfan dezobeisans.” (Efezyen 2:1, 2) Wi, petet ou kapab dir ki Satan sa “sef pisans dan lespas” in afekte lemonn antye par sa leta lespri dezobeisans. Dan premye syek i ti pe fer sa, e depi ler i’n ganny zete lo later ver menm letan ki Premye Lager Mondyal ti konmanse, Satan pe fer tou sa ki i kapab pour fer tou dimoun azir dan sa fason.—Revelasyon 12:9.

2, 3. Ki rezon nou annan pour obei Zeova?

² Me nou konman Kretyen, nou konnen ki Zeova i merite ki nou obei li avek tou nou leker, akoz i nou Kreater, sa enn ki gard nou vivan, i en Bondye ki egzers son lotorite avek lanmour e sa enn ki sov nou. (Psonm 148:5, 6; Akt 4:24; Kolosyen 1:13; Revelasyon 4:11) Bann Izraelit dan letan Moiz ti konnen ki Zeova ti sa Enn ki ti donn zot lavi ek sa Enn ki ti delivre zot. E se pour sa rezon ki Moiz ti dir zot: “Zot devret fer sir ki zot fer egzakteman parey Zeova zot Bondye in konmann zot pour fer.” (Deterononm 5:32) Wi, Zeova ti merite ganny zot lobeisans. Me pa mank lekou, zot ti dezobei zot Bondye.

³ Ki kantite i enportan pour obei Kreater  liniver? En fwa Bondye ti fer profet Samyel dir Lerwa Sail: “Pour obei i pli bon ki en sakrifis.” (1 Samyel 15:22, 23) Akoz?

Akoz Lobeisans “i pli bon ki en Sakrifis”

4. Ki nou kapab fer anver Zeova?

⁴ Tou keksoz materyel ki nou annan i pour Zeova, akoz li ki Kreater. Alors, si sa i leka, eski i annan okenn keksoz ki nou kapab donn li? Wi, nou kapab fer en keksoz vreman presye. Kwa sa? Nou kapab trouv larepons dan sa konsey swivan: “Vin saz, mon garson, e rezwir mon leker, pour ki mon a kapab reponn sa enn ki pe provok mwan.” (Proverb 27:11) Nou kapab obei nou Bondye. Menm si nou tou nou sitiasyon i diferan e nou’n grandi dan diferan sirkonstans, kan nou obei Bondye nou pe ede reponn sa move lakizasyon ki Satan in fer. Se ki imen pa pou reste fidel avek Bondye ler zot pas dan problenm. Pa sa i en privilez!

5. Ki lefe dezobeisans i annan lo nou Kreater? Donn en legzanp pour demontre sa.

⁵ Bondye i enterese avek bann swa ki nou fer. Si nou dezobei li, sa i annan en move lefe lo li. Ki mannyer? I fer li lapenn kan i vwar en dimoun fer en move swa dan lavi. (Psonm 78:40, 41) Meton, en dimoun ki ganny dyabet i deside pour pa swiv sa ladyet ki en bon dokter in demann li pour swiv pour son prop byennet. I deside pour kontinyen manz sa ki pa bon pour son lasante. Ki mannyer sa dokter pou santi? Pareyman, nou kapab asire ki i pa fer Zeova plezir kan nou dezobeir, akoz i konnen ki konsekans sa pou anmennen ler nou rezet son bann lalwa ki’n ganny fer pour protez nou lavi.

6. Kwa ki kapab ed nou pour obei Bondye?

⁶ Kwa ki kapab ed nou personnelman pour obei Bondye? Zis parey Lerwa Salomon ti fer, i byen pour nou tou demann Bondye “en leker obeisan.” I ti demann Bondye pour donn li en leker obeisan pour li kapab “fer ladiferans ant sa ki byen ek sa ki mal,” afen pour li ziz bann Izraelit. (1 Lerwa 3:9) Nou osi nou bezwen “en leker obeisan” si nou anvi fer ladiferans ant sa ki bon ek sa ki mal dan en lemonn kot lamazorite dimoun i annan en leta lespri dezobeisans. Bondye in fourni nou avek son Parol, bann piblikasyon baze lo Labib, bann renyon Kretyen, ek bann ansyen ki enterese avek nou, pour ki nou kapab devlop “en leker obeisan.” Eski nou pe byen profit sa bann provizyon ki Zeova in fourni avek lanmour?

7. Akoz Zeova i met plis lanfaz lo lobeisans ki lo sakrifis?

⁷ An rapor avek sa, annou pa bliye ki dan lepase Zeova ti dir son pep ki i pli enportan pour obei ki ofer sakrifis zannimo. (Proverb 21:3, 27; Osea 6:6; Matye 12:7) Be pa Zeova ki ti konmann son pep pour ofer sa bann sakrifis? Me sa enn ki ti ofer sa sakrifis, avek ki motivasyon i ti fer li? Eski i ti fer li pour fer plezir Bondye oubyen i ti pe zis swiv en rit koumsa menm? Si en serviter i vreman anvi fer plezir Bondye, i pou fer sir ki i obei tou komannman Bondye. Bondye pa bezwen sakrifis zannimo, me en keksoz valer ki nou kapab ofer li i nou lobeisans.

En Lavertisman

8. Akoz Bondye ti tir Sail konman lerwa?

⁸ Sa resi lo Lerwa Sail i met lanfaz lo sa gran lenportans ki lobeisans i annan. Kan Sail ti vin lerwa, i ti annan limilite e i ti abes son lekor. I ti napa en gran lopinyon lo li menm. Me avek letan, desizyon ki i ti pran ti ganny enfliyanse par lorgey ek fo rezonnman. (1 Samyel 10:21, 22; 15:17) En fwa i ti bezwen al lager kont bann Filisten. Samyel ti dir Sail esper li vini pour ofer Zeova sakrifis e pour ganny plis lenformasyon ki zot pou fer. Me Samyel ti tarde vini, e bann dimoun ti konmans ale. Me kan Sail ti vwar sa, i “ti al ofer sakrifis brile.” Zeova ti mekontan par sa ki i ti fer. Finalman kan Samyel ti arive, Sail ti rod fason pour ekskiz son lekor. I ti dir ki Samyel ti an retar, alors i ‘ti fors son lekor’ pour ofer sakrifis brile pour ganny faver Zeova. Pour Lerwa Sail, i ti pli enportan  pour ofer sa sakrifis olye esper Samyel parey i ti’n ganny demande, pour vin fer sa sakrifis. Samyel ti dir li: “Ou’n azir parey en bet. Ou pa’n obei komannman ki Zeova ou Bondye ti komann ou.” Akoz son dezobeisans i ti ganny tire lerwa.—1 Samyel 10:8; 13:5-13.

9. Ki mannyer Sail ti kontinyen demontre son dezobeisans anver Bondye?

⁹ Eski sa lerwa ti aprann en leson? Non! Plitar, Zeova ti komann Sail pour detri bann Amalekit, ki ti’n atak Izrael pli boner, san ki bann Izraelit ti provok zot. Sail pa ti devret prezerv zot bann zannimo domestik. I ti obei Zeova par “lager kont Amalek depi Avila ziska Sour.” Kan Samyel ti vin zwenn li, Sail ti dan en gran lazwa akoz i ti’n ranport laviktwar, e i ti dir: “Zeova i beni ou. Mon’n fer sa ki Zeova in dir.” Me zot ti’n fer lekontrer avek bann lenstriksyon byen kler ki zot ti gannyen. Sail ek son pep ti les Lerwa Agag, “bann pli bon mouton, ek bann pli bon bef, sa ki gra . . . bann mal mouton . . . ek tou sa ki ti bon” viv. Pour zistifye son move aksyon Lerwa Sail ti dir: “Sa pep ti annan konpasyon pour sa bann pli bon mouton ek bann pli bon bef, pour zot sakrifye pour Zeova ou Bondye.”—1 Samyel 15:1-15.

10. Ki leson Sail pa ti aprann?

¹⁰ Alors, Samyel ti dir Sail: “Eski Zeova i annan otan plezir dan lofrann brile ek sakrifis ki dan obei lavwa Zeova? Gete! Pour obei i pli bon ki en sakrifis, pour port latansyon i pli bon ki lagres bann mal mouton.” (1 Samyel 15:22) Lefe ki Zeova ti’n fini deside pour detri sa bann zannimo, zot pa ti pou kapab ganny ofer konman sakrifis.

Montre ou obeisan dan tou Keksoz

11, 12. (a) Ki mannyer Zeova i vwar zefor ki nou fer pour ador li? (b) Ki mannyer en dimoun i kapab anbet son lekor pour krwar ki i pe fer lavolonte Bondye kan an realite i pe dezobeir?

¹¹ Pa i bezwen fer plezir Zeova kan i vwar son bann serviter fidel pe reste for malgre zot ganny persekite, ler zot anons sa bon nouvel Rwayonm malgre dimoun pa ekoute, e kan zot asiste bann renyon menm si zot bezwen trimouse pour ganny zot dipen toulezour! Kan nou montre nou obeisan dan sa bann domenn enportan ki annan pour fer avek nou lavi Kretyen, sa i fer leker Zeova rezwir! Nou zefor pour ador Zeova i presye dan son lizye, sirtou kan nou fer li akoz nou kontan. Lezot i kapab oubliy travay ki nou fer, me Bondye i remark sa bann sakrifis ki nou fer ki sorti ofon nou leker e i pa bliy zot.—Matye 6:4.

¹² Pour nou toultan fer plezir Bondye, nou bezwen obei li dan tou laspe nou lavi. Fodre pa ki nou anbet nou lekor pour krwar ki nou kapab kas serten lalwa Bondye, osi lontan ki nou pe ador li dan lezot laspe nou lavi. Par egzanp, en dimoun i kapab anbet son lekor pour krwar ki si i fer serten keksoz ki Bondye i demande, zis par routin, i kapab fer imoralite seksyel oubyen lezot pese grav san rekolte son konsekans. Pa sa pou en fot!—Galat 6:7, 8.

13. Konman nou lobeisans anver Bondye i kapab ganny teste dan nou lavi prive?

¹³ Alors, i byen pour demann nou lekor, ‘Eski mon pe obei Zeova dan tou sa ki mon fer, menm dan mon lavi prive?’ Zezi ti dir: “Bann ki onnet [oubyen fidel] dan pti keksoz, i osi onnet dan sa ki enportan, e bann ki malonnet dan pti keksoz i osi malonnet dan sa ki enportan.” (Lik 16:10) Ler nou ‘dan nou lakaz’ kot personn pa vwar nou, eski ‘nou mars avek en leker san defo dan nou lakaz?’ (Psonm 101:2) Anfet, ler nou kot nou dan nou lakaz, se la ki nou fidelite i kapab ganny teste. Dan bokou pei kot preski tou dimoun i annan en konpiter se li, zis de pti klik i fasil pour vwar bann portre obsenn. Detrwa letan pase, pour en dimoun vwar bann keksoz obsenn, i ti pou bezwen al dan bann landrwa kot zot montre bann keksoz imoral konman en fason pour diverti. Eski avek lobeisans nou pou pran aker parol Zezi? “En dimoun ki get madanm en lot zonm avek dezir in deza komet adilter avek li dan son leker.” Si nou fer sa, nou pa pou menm anvi get bann keksoz imoral? (Matye 5:28; Zob 31:1, 9,  10; Psonm 119:37; Proverb 6:24, 25; Efezyen 5:3-5) Me konsernan bann progranm televizyon ki montre vyolans? Eski nou annan menm pwennvi avek nou Bondye ki ‘vreman ay nenport ki, ki kontan vyolans’? (Psonm 11:5) Me konsernan bwar tro bokou lalkol an prive? Labib i kont en lavi soular, e i osi averti Kretyen kont sa labitid pour bwar “en kantite diven.”—Tit 2:3, NW; Lik 21:34, 35; 1 Timote 3:3, not anba lo paz.

14. Dan ki fason nou kapab montre nou lobeisans anver Bondye an rapor avek larzan?

¹⁴ En lot laspe kot nou bezwen fer byen atansyon i annan pour fer avek larzan. Par egzanp, eski nou pou enplik nou dan bann tranzaksyon ki pou fer nou vin ris en sel kou me ki preski parey frod? Eski nou ganny tante pour fer bann prosedir ilegal pour nou pa pey taks? Oubyen eski nou fer sir ki nou obei sa komannman pour “rann sakenn sa ki zot devre: ki swa taks”?—Romen 13:7.

Lobeisans ki sorti dan Leker

15. Akoz ou obei komannman Zeova?

¹⁵ Ler nou obei lalwa Bondye, nou ganny en kantite benediksyon. Par egzanp, nou kapab evite ganny bann maladi kan nou pa fimen, ler nou pa anmenn en lavi dezord oubyen kan nou annan respe pour disan ki sakre. Deplis, kan nou viv annakor avek laverite dan Labib dan lezot laspe nou lavi, nou kapab benefisye ekonomikman, sosyalman oubyen dan lafanmir. (Izai 48:17) Tou sa bann benediksyon i prouve ki lalwa Bondye i pratik. Me kantmenm sa, rezon prensipal akoz nou obei Zeova se akoz nou kontan li. Nou pa servi Bondye pour bann rezon egois. (Zob 1:9-11; 2:4, 5) Bondye in donn nou sa laliberte pour obei nenport ki ki nou oule. Me nou swazir pour obei Zeova akoz nou anvi fer li plezir e akoz nou anvi fer sa ki byen.—Romen 6:16, 17; 1 Zan 5:3.

16, 17. (a) Ki mannyer Zezi ti obei Bondye avek tou son leker? (b) Ki mannyer nou kapab imit Zezi?

 ¹⁶ Zezi in donn en legzanp parfe lo konman pour obei Zeova avek tou nou leker. (Zan 8:28, 29) Kan i ti lo later, Zezi “ti aprann lobeisans atraver sa ki i ti soufer.” (Ebre 5:8, 9) Ki mannyer sa? I ti “aksepte viv dan limilite e montre li obeisan ziska lanmor, menm lanmor lo en [poto martir].” (Filipyen 2:7, 8) Menm si Zezi ti toultan obei depi ler i ti dan lesyel, son lobeisans ti osi ganny teste ler i ti lo later. Nou kapab asire ki Zezi i byen kalifye pour servi konman Gran Pret pour son bann frer swazir e osi pour tou dimoun ki krwar dan li.—Ebre 4:15; 1 Zan 2:1, 2.

¹⁷ Me nou? Nou kapab imit Zezi par toultan met lavolonte Bondye premye dan nou lavi. (1 Pyer 2:21) Personnelman, nou kapab ganny satisfaksyon si nou lanmour pour Bondye i pous nou pour fer sa ki Zeova i demann nou pour fer, menm si parfwa nou kapab anba presyon oubyen ganny tante pour fer sa ki mal. (Romen 7:18-20) Sa i enkli ki nou pare pour obei lenstriksyon sorti kot bann ansyen ki pran latet dan vre ladorasyon, menm si zot enparfe. (Ebre 13:17) Kan nou obei bann komannman Bondye dan nou lavi prive, sa i en keksoz presye dan lizye Zeova.

18, 19. Ki rezilta nou gannyen ler nou obei Bondye avek tou nou leker?

¹⁸ Ozordi, pour nou montre nou lobeisans anver Bondye i kapab vedir andir persekisyon pour nou kapab reste fidel. (Akt 5:29) Osi pour obei sa komannman Zeova pour prese e ansenny lezot, nou bezwen andire ziska lafen sa sistenm. (Matye 24:13, 14; 28:19, 20) Nou bezwen annan landirans pour nou kontinyen asosye avek nou bann frer ek ser menm si nou santi sa gro presyon ki sa lemonn pe met lo nou. Nou Bondye lanmour i konsyan ki nou pe fer zefor pour obei dan sa bann laspe nou lavi. Me pour nou konpletman obei Bondye, nou pou bezwen lager kont sa move tandans dan nou pour fer pese, rezet sa ki mal anmezir ki nou devlop lapresyasyon pour sa ki byen.—Romen 12:9.

¹⁹ Kan nou servi Zeova akoz nou kontan li e avek lapresyasyon, pour nou i vin sa enn ki “rekonpans tou bann ki rod li.” (Ebre 11:6) En bon sakrifis i neseser e i fer plezir Zeova, me kan nou obei li konpletman akoz nou kontan li, sa i fer li pli kontan ankor.—Proverb 3:1, 2.

Ki ou pou reponn?

• Akoz nou kapab dir ki nou kapab donn Zeova en keksoz?

• Ki fot Sail ti fer?

• Ki mannyer ou kapab montre ki ou krwar ki lobeisans i pli bon ki sakrifis?

• Kwa ki pous ou pour obei Zeova?

[Kestyon]

[Portre lo paz 22]

Eski ou pe obei komannman Bondye dan ou lavi prive?