Parol Zeova i vivan

Bann Pwen enteresan dan Liv Ezekyel—2

I DAN mwan Desanm an 609 A.N.L., lerwa Babilonn ti’n konmans son dernyen latak kont Zerizalenm. Ziska prezan Ezekyel in konsantre lo zis en keksoz dan son mesaz pour bann Zwif ki ti an egzil Babilonn. Se ki zot lavil Zerizalenm, ki zot kontan en kantite pou tonbe e ganny detrir. Aprezan son mesaz i sanze, i koz lo destriksyon bann nasyon, ki pou dan lazwa kan pep Bondye pou pas dan maler. Dizwit mwan plitar kan Zerizalenm i tonbe, ankor enn fwa Ezekyel i enkli en lot mesaz. Safwasi i anonse ki vre ladorasyon pou ganny reetabli.

Dan Ezekyel 25:1–48:35, i annan profesi lo bann nasyon dan lantouraz Izrael, e konsernan delivrans pep Bondye. * Apard sapit 29:17-20, sa resi in ganny ekri dan lord kronolozik e son topik osi i ganny mete dan lord. Me parkont sa kat verse ki nou’n fek mansyonnen, zot zot pa’n ganny ekri dan lord kronolozik, me i form parti profesi konsernan Lezip. Vi ki i form parti Labib, sa liv i annan en mesaz ki ‘vivan e ki annan pisans.’—Ebre 4:12.

‘SA PEI POU VIN PAREY ZARDEN EDENN’

(Ezekyel 25:1–39:29)

Zeova ti konnen ki mannyer bann lezot nasyon ti pou azir kan Zerizalenm ti pou tonbe, i ti fer Ezekyel profetiz kont Amonn, Moab, Edom, Filisti, Tir ek Sidon. Lezip ti pou perdi son bann keksoz. ‘Lerwa Lezip, Faraon, ansanm avek son lafoul’ i ganny konpare avek en pye sed ki pou ganny koupe avek “lepe lerwa Babilonn.”—Ezekyel 31:2, 3, 12; 32:11, 12.

Sis mwan apre destriksyon Zerizalenm an 607 A.N.L., en sirvivan ti vin dir Ezekyel: ‘Sa lavil in ganny detrir!’ Sa profet ti ‘nepli koz pa,’ i ti koz avek bann ki an egzil. (Ezekyel 33:21, 22) I ti annan bann profesi lo restorasyon pour li anonse. Zeova ti “pou anvoy en berze pour zot, [son] serviter David.” (Ezekyel 34:23) Edom ti pou san okenn zabitan, me pei Zida li ti pou vin “parey zarden Edenn.” (Ezekyel 36:35) Zeova ti promet pour protez son pep, ki ti pou’n retourn se zot, kont latak “Gog.”—Ezekyel 38:2.

Larepons pour bann Kestyon lo Labib:

29:8-12—Kan ki ti napa personn Lezip pour 40 an? Apre destriksyon Zerizalenm an 607 A.N.L., bann sirvivan ki ti Zida ti al rod refiz Lezip, menm si profet Zeremi ti averti zot pour pa fer sa. (Zeremi 24:1, 8-10; 42:7-22) Me zot pa ti an sekirite Lezip, akoz Neboukadnetsar ti atak Lezip e pran kontrol lo li. I kapab ki ti napa personn Lezip pour 40 an apre ki tousala ti’n arive. Menm si bann Istoryen pa’n mansyonn okenn levidans ki sa ti arive, nou kapab annan konfyans ki i ti en realite akoz Zeova i sa enn ki akonpli profesi.—Izai 55:11.

29:18—Ki mannyer ‘tou latet ti vin sov e tou zepol ti deplise’? Kan Neboukadnetsar ek son larme ti atak lavil Tir lo lakot, sa ti en gro loperasyon ki ti demann bokou lafors ek lenerzi. Diran sa moman zot latet ti vin sov akoz zot kas ti pe konstaman frot avek zot latet e zot zepol ti deplise akoz zot ti pe frote avek sa bann materyo ki zot ti pe anmennen  pour konstri bann latour ek miray.—Ezekyel 26:7-12.

Leson pour nou:

29:19, 20. Lefe ki bann dimoun Tir ti sove pour al kasyet dan zot lavil lo zil, zot ti anmenn avek zot preski tou zot keksoz materyel, alors Neboukadnetsar pa ti ganny bokou keksoz Tir. Menm si lerwa Neboukadnetsar ti en dirizan payen ki ti fyer e mazin zis son prop lekor, Zeova ti rekonpans li pour son servis. Zeova ti donn li Lezip konman “lapey pour son lafors militer.” Pa nou devret imit sa vre Bondye par pey taks ki bann gouvernman i demande pour servis ki zot ofer nou? Nenport fason bann ki dan gouvernman i kondwir zot oubyen nenport kwa ki zot fer avek sa larzan, nou oblize pey taks.—Romen 13:4-7.

33:7-9. Bann Kretyen swazir ki ankor lo later, ki pe azir konman sa gardyen dan nou letan ek son bann asosye, pa devret zanmen ezite pour pres sa bon nouvel Rwayonm e averti dimoun ki i annan en “gran ladetres” ki pe vini.—Matye 24:21, NW.

33:10-20. Pour nou kapab ganny sove nou bezwen rezet sa ki mal e fer sa ki Bondye i demann nou pour fer. Anfet, Zeova i fer keksoz dan en fason “ki byen aziste.”

36:20, 21. Kan bann Izraelit ki ti “pep Zeova” pa ti fer sa ki zot ti ekspekte fer konman pep Bondye, zot ti sali non Bondye parmi bann nasyon. Nou pa serviter Bondye zis akoz nou port son non, i annan plis keksoz ki enplike.

36:25, 37, 38. Sa paradi spirityel ki nou pe rezwir ozordi i ranpli avek “en troupo ki sen.” Alors, nou devret fer bokou zefor pour gard li prop.

38:1-23. Lefe ki Zeova pou sov son pep zour Gog ki sorti dan pei Magog pou atak zot, eski pa sa i ankourazan! Apre ki i ti’n ganny pouse dan lesyel, Satan, ki “sef lemonn” ti ganny apele Gog. Pei Magog i reprezant zalantour later kot Satan ek son bann demon in ganny zete.—Zan 12:31; Revelasyon 12:7-12.

“MET OU LEKER DAN TOU SA KI MON PE MONTRE OU”

(Ezekyel 40:1–48:35)

I fer 14 an depi destriksyon lavil Zerizalenm. (Ezekyel 40:1) I reste ankor 56 an pour zot pase an egzil. (Zeremi 29:10) Ezekyel i pros pour ganny 50 an. Dan en vizyon i ti vwar ki pe pase Izrael. En lavwa ti dir li: “Garson zonm, get avek ou lizye, e ekout avek ou zorey, met ou leker dan tou sa ki mon pe montre ou.” (Ezekyel 40:2-4) Ezekyel ti’n bezwen vreman eksite pour vwar en nouvo tanp dan sa vizyon!

Sa tre zoli tanp ki Ezekyel ti vwar i annan 6 baro, 30 lasal a manze, en landrwa Sen ek enn Tre Sen, en lotel an dibwa, ek en lotel pour ofer lofrann brile. “Sorti kot” sa tanp ti annan en pti larivyer ki ti pe koule e ki vin en toran. (Ezekyel 47:1) Ezekyel ti osi ganny en vizyon kot sak tribi ti ganny en bout later. Sak kare later ti konmans dan les ziska was, e ant kare later Zida ek Benzamen i ti annan en porsyon later ki ti ganny servi pour fer travay ladministrasyon. “Sangtyer Zeova” ek “sa lavil” ki ti apel Zeova-Sama, ti sitye lo sa porsyon later.—Ezekyel 48:9, 10, 15, 35, not anba lo paz.

Larepons pour bann Kestyon lo Labib:

40:3–47:12—Ki sa tanp dan vizyon Ezekyel i reprezante? An realite sa manman tanp avek plizyer lasanm ki Ezekyel ti vwar pa ti zanmen ganny konstri. Sa ti pe reprezant tanp spirityel Bondye, savedir son laranzman pour vre ladorasyon dan nou letan. (Ezekyel 40:2; Mika 4:1; Ebre 8:2; 9:23, 24) Sa vizyon lo tanp pe ganny akonpli dan “bann dernyen zour” kan sa laranzman pret i ganny rafinen. (2 Timote 3:1; Ezekyel 44:10-16; Malaki 3:1-3) Me i pou trouv son  lakonplisman final dan paradi. Annefe, sa vizyon ti en promes pour bann Zwif ki sa vre ladorasyon pou ganny reetablir e ki sak fanmir ti pou ganny en bout later.

40:3–43:17—Ki savedir ler sa tanp i ganny mezire? Kan sa tanp i ganny mezire, sa i en lendikasyon ki plan Zeova an rapor avek vre ladorasyon pou vin vre.

43:2-4, 7, 9—Ti kwa sa bann “karkas zot lerwa” ki ti bezwen ganny tire dan tanp? I paret ki sa bann karkas ti bann zidol. Bann dirizan Zerizalenm ek son pep ti’n sali tanp Bondye avek zot bann zidol, anfet zot ti pe fer sa bann zidol vin zot lerwa.

43:13-20—Ki sa lotel ki Ezekyel ti vwar dan son vizyon i reprezante? Sa lotel senbolik pe reprezant lavolonte Bondye an rapor avek sakrifis ki Zezi Kri ti pou fer. Vi ki Bondye in anvoy son garson konman en sakrifis, sa in fer li posib pour bann Kretyen swazir ganny konsidere drwat e sa “gran lafoul” i prop e pir devan Bondye. (Revelasyon 7:9-14; Romen 5:1, 2) Petet sanmenm sa rezon akoz dan sa vizyon tanp, Ezekyel pa vwar sa gro manman basen delo an kwiv kot tanp Salomon, ki bann pret ti benny ladan pour zot vin prop.—1 Lerwa 7:23-26.

44:10-16—Ki sa group pret i reprezante? Sa group pret i reprezant sa group Kretyen swazir dan nou letan. Zot ti ganny rafinen an 1918 kan Zeova ti vin “rafin e netway” sa bann dan son tanp spirityel. (Malaki 3:1-5) Sa bann ki ti prop oubyen ki ti repantir ti annan sa privilez pour kontinyen servi Bondye. Depi sa zour, zot ti bezwen travay dir pour zot ‘pa ganny sali par sa lemonn.’ Zot in osi kit legzanp pour sa “gran lafoul” ki ganny reprezante par bann tribi ki pa ti ganny apwente pret.—Zak 1:27; Revelasyon 7:9, 10.

45:1; 47:13–48:29—Ki sa “later” ek son bann diferan divizyon i reprezante? Sa later i reprezant landrwa kot pep Bondye i fer zot aktivite. Nenport landrwa kot en adorater Zeova i ete, sa dimoun i lo sa later ki’n ganny restore osi lontan ki i siport vre ladorasyon. Sa divizyon pour donn tou dimoun son bout later pou finalman ganny akonpli dan sa nouvo lemonn kot sak imen fidel pou ganny son landrwa.—Izai 65:17, 21.

45:7, 16—Ki sa kontribisyon ki bann dimoun ti fer pour bann pret ek sa sef ti pe endike? An rapor avek sa tanp spirityel, sa pe prensipalman refer avek sa sipor spirityel ki egziste, kot bann manm i ofer lasistans e korpere.

47:1-5—Ki sa larivyer dan vizyon Ezekyel i reprezante? Sa larivyer i reprezant bann provizyon spirityel ki Zeova i ofer pour ganny lavi, ki enkli sakrifis Zezi Kri ek konnesans lo Bondye ki trouve dan Labib. (Zeremi 2:13; Zan 4:7-26; Efezyen 5:25-27) Pli ale sa larivyer i vin pli fon, pour li kapab siport sa kantite nouvo ki pe aksepte vre ladorasyon. (Izai 60:22) Pandan sa mil an, sa larivyer pou koul pli for ankor e plis konprenezon lo sa bann nouvo “liv” ki pou ouver, pou osi enkli dan sa larivyer.—Revelasyon 20:12; 22:1, 2.

47:12—Ki sa bann pye dibwa ki raport fri i reprezante? Sa bann pye dibwa senbolik i reprezant  bann provizyon spirityel ki Bondye in donnen pour fer imen vin parfe ankor.

48:15-19, 30-35, not anba lo paz—Ki sa lavil dan vizyon Ezekyel i reprezante? Sa lavil “Zeova-Sama” i sitye dan sa pei ‘’ki pa sakre.’ Alors sa i montre ki i bezwen pe reprezant en keksoz lo later. I paret ki sa lavil pe reprezant sa ladministrasyon lo later ki pou benefisye sa bann ki pou form parti sa “nouvo later” kot tou keksoz pou drwat. (2 Pyer 3:13) Lefe ki i annan baro lo sak kote, sa i montre ki i fasil pour dimoun ganny akse avek. I devret fasil pour bann manm dan kongregasyon apros bann sirveyan.

Leson pour nou:

40:14, 16, 22, 26. Bann karving pye palm lo miray dan larantre tanp, i montre ki zis bann ki annan en lavi drwat moralman ki pou kapab antre. (Psonm 92:12) Sa i montre nou ki pour Zeova aksepte nou ladorasyon, nou bezwen drwat.

44:23. Pa nou vreman apresye servis ki sa group pret dan nou letan pe fer! “Lesklav fidel e pridan” pe fourni nou avek nouritir spirityel ki vin zis atan pour ed nou fer ladiferans ant sa ki sal ek sa ki prop devan Zeova.—Matye 24:45, NW.

47:9, 11. Konnesans, ki en laspe enportan dan sa delo senbolik, in akonpli en mirak merveye dan nou letan. Nenport landrwa kot dimoun i pran sa konnesans, i fer zot vin vivan spirityelman. (Zan 17:3) De lot kote, sa bann ki pa aksepte sa delo lavi, pou ganny ‘lese dan disel,’ savedir detri konpletman. Pa i vreman enportan ki nou fer tou sa ki nou kapab pour “anons byen mesaz laverite”!—2 Timote 2:15.

“Sirman mon pou sangtifye mon gran Non”

Apre ki sa dernyen lerwa dan desandans David ti ganny tire, Zeova ti les en bon pe letan pase avan sa Enn “ki annan drwa legal” pour vin lerwa i vini. Me pandan tou sa letan, Bondye pa ti kas son lalyans avek David. (Ezekyel 21:27; 2 Samyel 7:11-16) Profesi Ezekyel i koz lo “mon serviter David” ki pou vin en “berze” ek “lerwa.” (Ezekyel 34:23, 24; 37:22, 24, 25) Sa enn, i pa lot ki Zezi Kri ki annan pouvwar dan son Rwayonm. (Revelasyon 11:15) Par mwayen sa Rwayonm dan lanmen Mesi, Zeova pou “sangtifye [son] gran non.”—Ezekyel 36:23.

Tre byento, tou sa bann ki sali non Bondye pou ganny detrir. Me sa bann ki sangtifye sa non, par ador Zeova dan sa fason ki fer li plezir, zot pou ganny lavi eternel. Alors, annou profit omaksimonm sa delo lavi ki pe koule annabondans ozordi, e fer vre ladorasyon vin sa premye keksoz dan nou lavi.

[Not anba lo paz]

[Portre lo paz 22]

Ki sa larivyer lavi i reprezante dan vizyon Ezekyel?

[Credit line]

◀ Pictorial Archive (Near Eastern History) Est.

[Portre lo paz 23]

Sa tre zoli tanp dan vizyon Ezekyel