Eski Ou Pou Kontinyen “Les Lespri Diriz” Ou?
Eski Ou Pou Kontinyen “Les Lespri Diriz” Ou?
“Les Lespri diriz zot lavi, [e ou] pa [pou] satisfer [okenn] dezir natir imen.” —GALAT 5:16.
1. Ki mannyer nou kapab sirmont lafreyer ki nou pou fer en pese kont lespri sen?
I ANNAN en fason pour sirmont lafreyer ki nou pou fer en pese kont lespri sen Zeova. Pour sa, nou bezwen fer sa ki zapot Pol ti dir: “[Kontinyen] les Lespri diriz zot lavi, [e ou] pa [pou] satisfer [okenn] dezir natir imen.” (Galat 5:16) Si nou les lespri Bondye gid nou, bann move dezir akoz nou lenperfeksyon pa pou domin nou.—Romen 8:2-10.
2, 3. Si nou kontinyen les lespri sen diriz nou, ki byenfe nou pou gannyen?
2 Si nou kontinyen “les Lespri [Bondye] diriz [nou] lavi,” lafors aktif Bondye pou motiv nou pour obei Zeova. Nou pou demontre bann kalite ki Bondye i annan dan nou minister, dan kongregasyon, dan lakour, e lezot landrwa ankor. Fri lespri sen pou evidan dan nou relasyon avek nou msye ouswa nou madanm, nou zanfan, lezot Kretyen ek lezot dimoun ankor.
3 Viv “parey Bondye, par Lespri,” i fer li posib pour nou rezet pese. (1 Pyer 4:1-6) Si nou les lespri sen enfliyans nou, sertennman nou pa pou fer en pese ki pa kapab ganny pardonnen. Ki lezot byenfe nou pou gannyen dan lavi si nou kontinyen les lespri sen diriz nou?
Reste pros avek Bondye ek Kris
4, 5. Ler nou les nou ganny dirize par lespri sen, ki lefe sa pou annan lo nou pwennvi lo Zezi?
4 Parski nou les lespri sen diriz nou, nou kapab gard en relasyon entim avek Bondye ek son Garson. Ler Pol ti pe ekri konsernan bann don spirityel, i ti dir bann Kretyen Korent: “Mon oule ki zot [bann ki ti ador zidol avan] byen konpran, ki personn si Lespri i avek li pa kapab dir: ‘Zezi i modi,’ e personn pa kapab non pli dir, ‘Zezi i Senyer’ si i pa ganny dirize par Lespri Sen.” (1 Korentyen 12:1-3) Si en lafors i pous en dimoun pour modi Zezi i bezwen sorti kot Dyab. Me nou konman Kretyen ki pe les nou ganny dirize par lespri sen, nou konvenki ki Zeova ti resisit Zezi e ti met li dan en pozisyon pli o ki tou kreasyon. (Filipyen 2:5-11) Nou annan lafwa dan ranson ek sakrifis Kris e nou aksepte ki Bondye in apwent Zezi konman nou Senyer.
5 Serten swadizan Kretyen dan premye syek nou lepok pa ti aksepte ki Zezi ti vin konman en zonm lo later. (2 Zan 7-11) Akoz serten ti aksepte sa pwennvi, zot ti rezet bann vre lansennyman lo Zezi, sa Mesi. (Mark 1:9-11; Zan 1:1, 14) Ler nou les nou ganny dirize par lespri sen, sa i anpes nou ganny anbete avek bann tel fo lansennyman. Se selman par reste vizilan spirityelman, ki nou kapab kontinyen resevwar gran labonte Zeova e “[kontinyen] swiv laverite.” (3 Zan 3, 4) Alor annou determinen pour rezet fo lansennyman bann ki pe kritik laverite pour ki nou kapab gard en bon relasyon avek nou Papa dan lesyel.
6. Ki sa bann kalite ki lespri Bondye i prodwi dan bann ki les lespri sen kontrol zot?
6 Pol ti endike ki idolatri ek bann sekt i form parti “bann aktivite natir imen” parey kondwit deregle ek fornikasyon. Me i ti eksplike: “Bann ki pour Kris Zezi in [klout lo poto] zot natir imen avek tou son bann pasyon ek bann dezir. Si nou viv par Lespri, annou les Lespri osi kontrol nou lavi.” (Galat 5:19-21, 24, 25) Ki sa bann kalite ki lafors aktif Bondye i prodwi dan bann ki viv par lespri sen e les li kontrol zot lavi? Zapot Pol i reponn: “Fri Lespri se: Lanmour, lazwa, lape, pasyans, labonte, [“lafwa,” NW], ladouser, kontrol lo son prop lekor.” (Galat 5:22, 23) Annou egzamin sa bann laspe fri lespri.
“Kontan nou Kanmarad”
7. Ki si sa lanmour, e mansyonn serten laspe lanmour?
7 Lanmour i en laspe sa fri lespri. I souvan enplik annan bokou lafeksyon pour lezot, en lentere senser dan byennet lezot, ek en relasyon pros avek lezot. Labib i dir ki “Bondye i lanmour” akoz napa personn ki kapab demontre sa kalite parey li. En legzanp sa gran lanmour ki Bondye ek son garson in demontre, i sakrifis Zezi Kri. (1 Zan 4:8; Zan 3:16; 15:13; Romen 5:8) Konman bann disip Zezi, dimoun i rekonnet nou par lanmour ki nou demontre pour kanmarad. (Zan 13:34, 35) Anfet, sa i en komannman ki nou “devre kontan nou kanmarad.” (1 Zan 3:23) Deplis, Pol ti dir ki lanmour i pasyan e bon. I pa zalou, i pa vant son prop lekor, i pa fer nanryen ki fer onte, oubyen i pa rod son prop lentere. Lanmour pa pran lakoler ouswa gard rankin. I kontan laverite pa lenzistis. Lanmour i pardonn tou, i krwar tou, i esper tou, i siport tou. E deplis, lanmour i reste pour touzour.—1 Korentyen 13:4-8.
8. Akoz nou devret demontre lanmour pour nou bann frer ek ser Kretyen?
8 Si nou les lespri Bondye prodwi lanmour dan nou, sa kalite pou evidan dan nou relasyon avek Bondye ek nou prosen. (Matye 22:37-39) Zapot Zan ti ekrir: “Sa ki napa lanmour i ankor dan lanmor. Dimoun ki ay son frer i en kriminel e zot konnen ki napa kriminel ki posed lavi eternel dan li.” (1 Zan 3:14, 15) Dan lepok bann Izraelit, ler en dimoun ti touy en lot dimoun par aksidan, i ti kapab sov dan en lavil refiz selman si i pa ti ay sa dimoun. (Deterononm 19:4, 11-13) Si lespri sen pe diriz nou, nou pou demontre lanmour pour Bondye, nou bann frer ek ser Kretyen ek lezot.
“Lazwa sorti kot Zeova i zot Lafors”
9, 10. Ki si sa lazwa, e ki rezon nou annan pour nou dan lazwa?
9 Lazwa se ler nou santi nou vreman ere. Zeova i en “Bondye ere.” (1 Timote 1:11, NW; Psonm 104:31) Pour son garson, i en plezir pour fer lavolonte son Papa. (Psonm 40:8; Ebre 10:7-9) E “lazwa ki sorti kot Zeova i [nou] lafors.”—Neemya 8:10.
10 Lazwa ki Bondye i donnen i anmenn en gran satisfaksyon ler nou pe fer son lavolonte menm si nou pe fer fas avek bann difikilte, latristes oubyen persekisyon. Pa ‘konnesans lo Bondye’ i anmenn lazwa! (Proverb 2:1-5) Nou zwaye akoz nou annan en bon relasyon avek Bondye ki baze lo sa konnesans egzakt ek lafwa dan Bondye e dan sakrifis Zezi. (1 Zan 2:1, 2) Lefe ki nou form parti sa sel vre lorganizasyon enternasyonal frer ek ser, sa osi i en sours lazwa. (Tsefanya 3:9; Agai 2:7) Nou lespwar konsernan Rwayonm ek sa gran privilez pour anons sa bon nouvel i fer nou zwaye. (Matye 6:9, 10; 24:14) Nou dan lazwa osi akoz nou annan lespwar pour viv pour touzour. (Zan 17:3) Ler nou mazin sa bann lespwar merveye, nou devret “ranpli zis avek lazwa.”—Deterononm 16:15.
Promouvwar Lape ek Pasyans
11, 12. (a) Donn en definisyon lape. (b) Ki lefe lape Bondye i annan lo nou?
11 Lape ki en lot laspe sa fri lespri, i ler ou santi ou trankil, ou pa pe trakase. Nou papa dan lesyel i en Bondye lape e i’n donn nou sa lasirans: “Zeova li menm pou beni son pep avek lape.” (Psonm 29:11; 1 Korentyen 14:33) Zezi ti dir son bann disip: “Mon kit lape avek zot, mon donn zot mon lape.” (Zan 14:27) Ki mannyer sa ti pou ed son bann disip?
12 Sa lape ki Zezi ti donn son bann disip ti fer zot ganny en trankilite dan zot leker ek lespri e ti ed zot sirmont zot lafreyer. Sa ti sirtou evidan ler zot ti resevwar lespri sen ki zot ti’n ganny promet. (Zan 14:26) Lefe ki nou les lespri sen diriz nou lavi e ki nou lapriyer i ganny reponn, alor nou kapab resanti “lape Bondye” ki napa son parey, e nou santi nou leker ek lespri i anpe. (Filipyen 4:6, 7) Deplis, lespri Zeova i ed nou pour reste kalm e anpe avek nou bann frer ek ser spirityel ek lezot osi.—Romen 12:18; 1 Tesalonisyen 5:13.
13, 14. Ki si sa pasyans, e akoz nou devret demontre sa kalite?
13 Pasyans i relye avek lape, akoz ler nou pasyan nou pare pour andir bann provokasyon oubyen ditor, avek lespwar ki sitiasyon pou amelyore. Bondye i pasyan. (Romen 9:22-24) Zezi osi i demontre sa kalite. Nou kapab benefisye avek pasyans Zezi akoz Pol ti ekrir: “I’n fer mwan gras pour ki par mwan, pli gran peser, Zezi-Kri i montre tou son pasyans pour servi en legzanp pour tou bann ki pou krwar pli tar e resevwar lavi eternel.”—1 Timote 1:16.
14 Pasyans i ed nou andire ler lezot i dir oubyen fer bann keksoz blesan ouswa san reflesir. Pol ti ankouraz son bann frer ek ser Kretyen: “Pran pasyans avek zot tou.” (1 Tesalonisyen 5:14) Vi ki nou tou nou enparfe e nou fer fot, alor nou osi nou anvi lezot i pasyan avek nou oubyen zot pare pour siport nou ler nou fer fot dan nou relasyon avek zot. Alor annou fer bokou zefor pour “pran pasyans avek lazwa.”—Kolosyen 1:9-12, NW.
Demontre Labonte
15. Ki si sa labonte? Donn legzanp.
15 En laspe labonte i ler nou demontre en lentere pour lezot par egzanp par bann parol oubyen aksyon ki demontre ki nou anvi ede e ki nou zantiy. Zeova ek Zezi i bon. (Romen 2:4; 2 Korentyen 10:1) Bann serviter Bondye ek Kris i devret zot osi demontre labonte. (Mika 6:8; Kolosyen 3:12) Menm dimoun ki napa en relasyon avek Bondye in kapab “tre bon anver [lezot].” (Akt 27:3; 28:2) Alor, i toutafe normal ki nou nou demontre labonte akoz nou kontinyen “les lespri diriz” nou.
16. Dan ki sirkonstans nou devret santi nou pouse pour demontre labonte?
16 Nou kapab demontre labonte menm si nou annan en bon rezon pour ankoler akoz en aksyon oubyen en parol blesan. “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot. . . . Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efezyen 4:26, 27, 32) I vreman apropriye pour demontre labonte anver bann ki pe soufer akoz bann leprev. Byensir, en ansyen pa ti pou demontre labonte si i ti ezite pour donn en konsey baze lo Labib zis akoz i pa ti oule ofans en dimoun ki pros pour abandonn semen “labonte, ladrwatir, ek laverite.”—Efezyen 5:9.
17, 18. Ki sa lot laspe labonte, e ki rol sa kalite i devret zwe dan nou lavi?
17 I annan en lot laspe labonte. Si en keksoz i bon, savedir i byen, andotmo labonte i osi vedir ler en keksoz i byen moralman. Bondye i bon dan en fason parfe. (Psonm 25:8; Zekarya 9:17) Zezi osi i bon e ekselan lo plan moral. Pourtan, i pa ti aksepte ki dimoun i servi sa mo “Bon” pour li konman en tit ler zot ti kriy li “Bon Met.” (Mark 10:17, 18) I evidan ki i pa ti aksepte sa tit akoz i ti rekonnet ki napa en lot ki demontre labonte parey Bondye li menm.
18 Pese ek lenperfeksyon i kapab anpes nou demontre labonte oubyen fer sa ki byen. (Romen 5:12) Toudmenm, nou kapab demontre sa kalite si nou priy Bondye pour ‘ansenny nou pour annan labonte.’ (Psonm 119:66) Pol ti dir bann Kretyen Ronm: “Mon bann frer, personnelman mon sir ki zot ranpli avek labonte e ki zot annan konnesans.” (Romen 15:14) En sirveyan dan kongregasyon i devret “kontan sa ki byen.” (Tit 1:7, 8) Si nou ganny dirize par lespri sen Bondye, nou pou ganny repitasyon konman en dimoun ki kontan sa ki byen, e Zeova pou ‘mazin nou pour sa dibyen ki nou’n fer.’—Neemya 5:19; 13:31.
“En Lafwa senser”
19. Ki si sa lafwa dapre Ebre 11:1?
19 Lafwa i osi form parti sa fri lespri. Lafwa “i lasirans dan keksoz ki ou pe espere, e sertitid keksoz ki ou pa’n war.” (Ebre 11:1) Si nou annan lafwa, nou asire ki tou sa ki Zeova in promet nou, i pou vreman realize. Levidans bann keksoz ki nou pa vwar i sitan konvenkan, ki Labib i dir ki lafwa i parey sa levidans. Par egzanp, bann keksoz ki’n ganny kree i en levidans ki i annan en Kreater. Nou demontre sa kalite lafwa si nou kontinyen les lespri sen diriz nou.
20. Ki sa “pese ki anvlop nou si fasilman,” e ki mannyer nou kapab rezet bann aktivite natir imen enparfe?
20 Mank lafwa i en “pese ki anvlop nou si fasilman.” (Ebre 12:1) Nou bezwen depan lo lespri sen Bondye pour nou rezet bann aktivite natir imen enparfe, parey tay deryer keksoz materyel ek bann fo lansennyman ki kapab detri nou lafwa. (Kolosyen 2:8; 1 Timote 6:9, 10; 2 Timote 4:3-5) Lespri sen Bondye i prodwi dan bann serviter Zeova nou letan en lafwa ki parey lafwa bann serviter Bondye avan lepok Kretyen, ek lezot ki Labib i mansyonnen. (Ebre 11:2-40) E nou prop “lafwa senser” i kapab osi batir lafwa lezot.—1 Timote 1:5; Ebre 13:7.
Demontre Ladouser ek Kontrol lo ou Lekor
21, 22. Ki si sa ladouser, e akoz nou devret demontre sa kalite?
21 Ladouser i ler en dimoun i dous, poli oubyen zantiy. En laspe personnalite Zeova i ladouser. Nou konn sa akoz Zezi ti en zonm dous e sa ti reflekte parfetman personnalite Zeova. (Matye 11:28-30; Zan 1:18; 5:19) Alors ki nou bann serviter Bondye nou bezwen fer dan sa domenn?
22 Konman Kretyen, nou bezwen montre nou “poli [oubyen “dous,” NW] avek tou dimoun.” (Tit 3:2) Nou demontre ladouser dan nou travay predikasyon. Bann ki annan kalifikasyon spirityel i ganny demande pour redres en Kretyen ki pe fer en keksoz mal “avek en lespri ladouser.” (Galat 6:1) Nou tou nou kapab ede pour promouvwar lape ek linite Kretyen par demontre “limilite [ek] ladouser.” (Efezyen 4:1-3) Nou kapab manifeste ladouser si nou les lespri sen diriz nou e nou demontre kontrol lo nou lekor.
23, 24. Ki si sa kontrol lo nou lekor, e ki mannyer sa kalite i kapab ed nou?
23 Kontrol lo nou lekor i ed nou pour kontrol nou panse, parol ek aksyon. Zeova “ti kontinyen kontrol son lekor” dan lafason ki i ti tret bann Babilonnyen ki ti detri Zerizalenm. (Izai 42:14) Son garson in kit “en legzanp” pour nou dan lafason ki i ti kontrol son lekor dan soufrans. E zapot Pyer ti konsey son bann frer ek ser Kretyen pour “azout avek konnesans, disiplin lo zot lekor.”—1 Pyer 2:21-23; 2 Pyer 1:5-8.
24 Bann ansyen dan kongregasyon i devret demontre kontrol lo zot prop lekor. (Tit 1:7, 8) Anfet, tou bann ki ganny dirize par lespri sen i kapab demontre kontrol e alor rezet bann limoralite seksyel, parol sal, ek nenport lezot konportman ki Zeova pa kontan. Si nou les lespri sen Bondye prodwi sa kontrol dan nou, sa pou evidan akoz lezot pou vwar sa dan nou bon parol ek kondwit.
Kontinyen les Lespri sen diriz ou
25, 26. Ki lefe les lespri sen diriz nou pou annan lo nou relasyon avek lezot konmela e lo nou lespwar dan lavenir?
25 Si nou kontinyen les lespri sen diriz nou, nou pou anons sa bon nouvel Rwayonm avek devouman. (Akt 18:24-26) I pou gou pour lezot asosye avek nou, sirtou pour bann dimoun ki annan devosyon pour Bondye. Vi ki nou ganny gide par lespri sen, nou pou vin en sours lankourazman pour lezot serviter Zeova. (Filipyen 2:1-4) Pa sanmenm ki tou Kretyen i anvi fer?
26 I vre dan en lemonn ki ganny dirize par Satan, i pa fasil pour les lespri sen diriz nou. (1 Zan 5:19) Toudmenm, plizyer milyon dimoun pe fer li dan nou letan. Si nou met nou konfyans dan Zeova avek tou nou leker, nou lavi pou gou la konmela, e nou pou kapab swiv semen drwat sa Enn ki sours lespri sen pour leternite.—Psonm 128:1; Proverb 3:5, 6.
Ki ou pou reponn?
• Ler nou ‘les lespri sen diriz nou,’ ki lefe sa i annan lo nou relasyon avek Bondye ek son Garson?
• Ki bann kalite ki form parti sa fri lespri?
• Dan ki fason nou kapab demontre fri lespri sen Bondye?
• Ler nou les lespri sen diriz nou, ki lefe sa i annan lo nou lavi la konmela e dan lavenir?
[Kestyon]
[Portre lo paz 13]
Demontre labonte par nou parol ek aksyon