Eski Ou’n Fer Pese Kont Lespri Sen?

“Me i annan pese ki anmenn lanmor.”—1 ZAN 5:16.

1, 2. Ki mannyer nou konnen ki i posib pour fer pese kont lespri sen Bondye?

“M ON’N toultan vreman enkyet akoz mon panse ki mon’n fer pese kont lespri sen.” Sa i sa ki en madanm Lalmanny ti dir, menm si i en serviter Bondye. Eski en Kretyen i kapab vreman fer pese kont lespri sen Bondye oubyen son lafors aktif?

² Wi, i posib pour fer pese kont lespri sen Zeova. Zezi ti dir: “En dimoun i kapab ganny pardonnen tou pese e tou blasfenm, me sa ki blasfenm kont Sent-Espri pa pou zanmen ganny pardonnen.” (Matye 12:31) Nou ganny sa lavertisman: “Si nou kontinyen pese apre ki nou’n konn laverite, i pou nepli annan sakrifis ki kapab fer disparet nou pese. Pou annan zis en laper letan nou pe esper zizman.” (Ebre 10:26, 27) E zapot Zan ti ekrir: “I annan pese ki anmenn lanmor.” (1 Zan 5:16) Me eski se sa enn ki’n fer en pese grav ki determinen  si i’n fer en “pese ki anmenn lanmor”?

Repantans ek Pardon

3. Si nou vreman sagren akoz en pese ki nou’n fer, ki nou kapab dir lo nou repantans?

³ An sa ki konsern zizman bann peser, desizyon final i dan lanmen Zeova. Annefe, nou tou nou pou bezwen rann kont avek Bondye, e Bondye i touzour fer sa ki drwat. (Zenez 18:25; Romen 14:12) Se Zeova ki deside si nou’n fer en pese ki pa kapab ganny pardonnen e se li ki kapab tir son lespri sen lo nou. (Psonm 51:11) Toutfwa, si nou vreman sagren dan nou leker akoz en pese ki nou’n fer, i tre probab ki nou pe senserman repantir. Me ki si sa vre repantans?

4. (a) Ki savedir repantir? (b) Kwa ki vreman rekonfortan dan Psonm 103:10-14?

⁴ Repantir i vedir ki nou sanz nou latitid vizavi en keksoz mal ki nou’n fer ouswa ki nou ti anvi fer. Savedir ki nou santi en sagrinasyon oubyen regre e ki nou rezet sa move latitid. Si nou’n fer en pese grav me nou’n pran aksyon ki demontre ki nou’n vreman repantir, nou kapab ganny rekonfor atraver parol ki dan sa Psonm: “[Zeova] pa’n azir avek nou selon nou bann pese e i pa’n anmenn lo nou sa ki nou ti merite dapre nou bann fot. Parski parey lesyel i pli o ki later, son labonte leker i pli siperyer anver bann ki annan lakrent pour li. Parey kot soley i leve i lwen avek kot soley i kouse, pareyman i’n met nou bann lofans lwen avek nou. Parey en papa i demontre mizerikord anver son bann garson, Zeova in demontre mizerikord anver bann ki annan lakrent pour li. Parski li i konn byen avek kwa nou ganny formen, i mazinen ki nou lapousyer.”—Psonm 103:10-14.

5, 6. Ki 1 Zan 3:19-22 i dir, e ki sinifikasyon parol sa zapot?

⁵ Parol zapot Zan osi i rekonfortan: “La ki mannyer nou pou konnen ki nou apartenir avek laverite, e ki nou posed lasirans devan li. Se ki dan nenport ki sirkonstans ki nou leker i kondann nou, nou konnen ki Bondye i pli gran ki nou leker e i konn tou. Mon bann byenneme, si nou leker pa kondann nou, nou posed lasirans devan Bondye. E nenport keksoz ki nou demann li, nou pou gannyen parski nou gard son konmannman e nou fer sa ki fer li plezir.”—1 Zan 3:19-22.

⁶ Nou “konnen ki nou apartenir avek laverite” akoz nou demontre lanmour pour nou bann frer ek ser e ki nou pa fer li en labitid pour nou fer pese. (Psonm 119:11) Si nou santi nou koupab pour en serten rezon, i byen pour nou mazinen ki “Bondye i pli gran ki nou leker e i konn tou.” Zeova i demontre mizerikord anver nou, akoz i konnen ki nou ‘kontan nou bann frer senserman’ san lipokrizi, ki nou lalit avek pese, e ki nou fer zefor pour nou fer son lavolonte. (1 Pyer 1:22) Nou leker “pa kondann nou” si nou met nou konfyans dan Zeova, si nou demontre en lanmour senser pour nou bann frer ek ser e nou pa kontinyen volonterman fer pese. Nou pou koz libreman dan lapriyer avek Bondye, e i pou reponn nou lapriyer akoz nou swiv son bann komannman.

Zot ti fer Pese kont Lespri sen

7. Kwa ki determinen si en pese i kapab ganny pardonnen oubyen non?

⁷ Ki pese ki pa ganny pardonnen? Pour nou ganny larepons, annou get enn de legzanp dan Labib. Sa pou rekonfort nou si nou pe  repantir me selman nou pe santi nou ankor vreman dekouraze akoz sa fot grav ki nou’n fer. Nou pou vwar ki i pa sitan ki kalite pese ki nou’n fer me plito i sa motivasyon, sa kondisyon leker, e ki kantite volonter sa pese i ete, ki kapab determinen si sa pese pou ganny pardonnen oubyen non.

8. Ki mannyer serten dirizan larelizyon Zwif dan premye syek ti fer pese kont lespri sen?

⁸ Dan premye syek, bann dirizan larelizyon Zwif ki ti britalman persekit Zezi Kri ti pe fer pese kont lespri sen. Zot ti vwar ki mannyer lespri Bondye ti pe travay dan Zezi atraver son bann mirak ki ti onor Zeova. Pourtan, bann lennmi Kris ti dir ki sa lafors ti sorti kot Dyab. Dapre Zezi, bann ki ti blasfenm kont lespri sen Bondye dan sa fason ti pe fer en pese ki pa ti pou ganny pardonnen ni dan “sa monn ni dan sa lot” ki pe vini.—Matye 12:22-32.

9. Ki si sa blasfenm, e ki Zezi ti dir lo la?

⁹ Blasfenm i vedir ler en dimoun i koz manti, malparl, oubyen gat repitasyon en dimoun. Vi ki lespri sen i lafors ki sorti kot Bondye, dir bann keksoz kont son lespri sen i konmsi ou pe koz kont Zeova. Koz koumsa san repantir, napa pardon pour sa. Parol Zezi lo sa kalite pese i montre ki Zezi ti pe refer avek bann ki volonterman rezet oubyen opoz aksyon lespri sen Bondye. Vi ki lespri sen Zeova ti pe travay dan Zezi me son bann lennmi ti dir son lafors i sorti kot Dyab, zot ti blasfenm e fer pese kont lespri sen. Alor, Zezi ti dir: “Me si en dimoun i blasfenm kont Sent-Espri i pa pou zanmen ganny pardonnen, akoz i koupab pour en pese eternel.”—Mark 3:20-29.

10. Akoz Zezi ti apel Zida “garson destriksyon”?

¹⁰ Annou get legzanp Zida Iskaryot. I ti malonnet parski i ti vol larzan dan bwat ki i ti’n ganny konfye avek. (Zan 12:5, 6) Plitar, Zida ti al kot bann dirizan Zwif pour trai Zezi pour 30 pyes larzan. I vre ki Zida ti santi li koupab  akoz son traizon, me i pa ti zanmen repantir pour sa pese ki i ti fer volonterman. Pour sa rezon, Zida pa pou ganny resisite e alor Zezi ti apel li “garson destriksyon.”—Zan 17:12, NW; Matye 26:14-16.

Zot pa ti fer Pese kont Lespri sen

11-13. Ki mannyer Lerwa David ti fer pese avek Batseba, e ki rekonfor nou kapab tire atraver lafason ki Zeova ti azir avek zot?

¹¹ Parler, serten Kretyen ki’n konfes en pese grav e ki’n resevwar led spirityel avek bann ansyen dan kongregasyon i kapab ankor santi zot dekouraze e enkyet akoz zot ti kas lalwa Bondye dan lepase. (Zak 5:14) Si nou santi dan sa fason, tre probab, nou pou santi nou ankouraze ler nou egzamin sa ki Labib i dir lo serten dimoun ki zot pese ti ganny pardonnen.

¹² Lerwa David ti fer bann pese grav an rapor avek Batseba, madanm Ouriya. Ler David ti lo twa son lakaz, i ti vwar sa zoli madanm pe bennyen. I ti fer kriy li dan pale e dormi avek li. Ler i ti aprann ki i ti ansent, i ti rod en fason pour ki son msye, Ouriya, ti vin dormi avek son madanm pour kasyet sa adilter. Ler son plan ti tonm dan delo, lerwa ti fer laranzman pour Ouriya ganny touye dan lager. Alor, apre Batseba ti vin madanm David e i ti ganny en zanfan ki ti mor finalman.—2 Samyel 11:1-27.

¹³ Se Zeova ki ti tret sitiasyon David ek Batseba. Bondye ti pardonn David aparaman akoz David ti repantir e osi akoz lalyans Rwayonm ki ti’n ganny fer avek li. (2 Samyel 7:11-16; 12:7-14) I evidan osi ki Batseba ti repantir, akoz i ti ganny sa privilez pour vin manman Lerwa Salomon ek zanset Zezi Kri. (Matye 1:1, 6, 16) Si nou’n fer pese, i bon pour nou mazinen ki Zeova i vwar si nou repantir.

14. Ziska ki degre Zeova i kapab pardonnen parey nou vwar dan ka Manase?

¹⁴ Nou kapab vwar ziska ki degre Zeova i kapab pardonnen dan ka Lerwa Manase dan Zida. I ti fer sa ki mal devan Zeova. Manase ti konstri bann lotel pour Baal, i ti ador “tou bann larme lesyel,” i ti menm fer bann lotel pour bann fo bondye dan de lakour tanp. I ti sakrifye son bann garson dan dife, i ti ankouraz grigri e i ti fer bann zabitan Zerizalenm ek Zida “fer pli pir ki bann nasyon ki Zeova ti’n eliminen devan bann garson Izrael.” I pa ti ekout bann lavertisman ki bann profet ti donnen. Finalman, lerwa Asiri ti met Manase dan prizon. Ler i ti dan prizon, Manase ti repantir e ti kontinyelman priy Bondye avek limilite. Bondye ti pardonn li e fer li revin lerwa Zerizalenm, kot i ti promouvwar vre ladorasyon.—2 Kronik 33:2-17.

15. Ki mannyer sa ki ti ariv avek Pyer i montre ki Zeova i pardonn en kantite?

¹⁵ Bokou letan apre sa, zapot Pyer ti fer en pese grav ler i ti renye Zezi. (Mark 14:30, 66-72) Toudmenm, Zeova ti pardonn Pyer en kantite. (Izai 55:7) Akoz? Akoz Pyer ti senserman repantir. (Lik 22:62) I evidan ki Bondye ti pardonn Pyer akoz 50 zour plitar, zour Lapannkot, Pyer ti annan sa privilez pour donn en diskour avek lardyes lo Zezi. (Akt 2:14-36) Eski Zeova pou diferan? Eski pa i pou pardonn bann Kretyen ki pe vreman repantir ozordi? En Psonm i dir: “Si ou ti vey bann fot, O Ya, O Zeova, lekel ki ti pou kapab debout devan ou? Akoz vre pardon i sorti kot ou.”—Psonm 130:3, 4.

Sirmont Lafreyer ki ou’n fer Pese kont Lespri sen

16. Ki nou bezwen fer pour ki Zeova i kapab pardonn nou?

¹⁶ Sa bann legzanp ki nou fek vwar i devret ed nou sirmont lafreyer ki nou’n fer pese kont lespri sen. Sa bann legzanp i montre ki Zeova i vreman pardonn bann ki repantir. En keksoz tre enportan se ki nou priy Bondye dan en fason vreman senser. Si nou’n fer pese, nou kapab sipliy Zeova pour pardonn nou gras a sakrifis Zezi e gras a mizerikord Zeova. Nou devret osi sipliy Bondye pour pran  an konsiderasyon nou lenperfeksyon ek fidelite ki nou’n demontre dan son servis. Vi ki nou konn gran labonte Zeova, nou kapab demann li pardon avek lasirans ki i pou pardonn nou.—Efezyen 1:7.

17. Ki nou devret fer si nou’n fer en pese e nou bezwen lasistans spirityel?

¹⁷ Be meton nou telman malad spirityelman akoz sa pese, ki menm priye nou pa kapab. Lo sa size, disip Zak ti ekrir: “I devre apel bann ansyen dan [kongregasyon], e zot a priy pour li e zot a vers delwil lo li o non [Zeova]. Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.”—Zak 5:14, 15.

18. Akoz si en dimoun i ganny ekskli dan kongregasyon, sa pa neseserman vedir ki i’n fer en pese ki pa kapab ganny pardonnen?

¹⁸ Menm si en dimoun ki’n fer en pese grav, pa repantir e ganny ekskli dan kongregasyon, sa pa neseserman vedir ki i’n fer en pese ki pa kapab ganny pardonnen. Konsernan en Kretyen swazir ki ti’n ganny ekskli dan kongregasyon Korent, Pol ti ekrir: “Pour en tel zonm, blanm ki mazorite in donn li i ase, zot devre plito pardonn li e ankouraz li pangar i ava tro ganny akable e tonm dan dezespwar.” (2 Korentyen 2:6-8; 1 Korentyen 5:1-5) Toutfwa, pour li retrouv en bon relasyon avek Bondye, sa dimoun pou bezwen aksepte led spirityel baze lo Labib ki bann ansyen dan kongregasyon pe donn li e demontre en repantans senser. Zot devret “prodwi bann bon fri repantans.”—Lik 3:8.

19. Kwa ki kapab ed nou reste ‘solid dan nou lafwa’?

¹⁹ Ki kapab lakoz par deryer ki fer nou santi nou’n fer pese kont lespri sen? Si nou vreman tro sansib konsernan nou lenperfeksyon ouswa nou annan en move lasante. Dan en ka parey, lapriyer ek plis repo i kapab ede. Sirtou, nou pa devret les Satan dekouraz nou pour ki finalman nou aret servi Bondye. Vi ki Zeova pa pran okenn plezir dan lanmor en move dimoun, i evidan ki i pa en lazwa pour li si i arive perdi enn son serviter. Alor si nou per ki nou’n fer pese kont lespri sen, nou devret kontinyen nouri nou atraver Parol Bondye, par egzanp ler nou lir bann Psonm ki kapab rekonfort nou. Nou devret kontinyen asiste bann renyon kongregasyon e partisip dan predikasyon. Ler nou fer sa, i pou ed nou reste ‘solid dan nou lafwa’ e pa enkyet akoz nou krwar nou’n fer en pese ki pa kapab ganny pardonnen.—Tit 2:2.

20. Ki rezonnman ki kapab ed en dimoun vwar ki i pa’n fer pese kont lespri sen?

²⁰ Si en dimoun i per pangar i’n fer pese kont lespri sen, i kapab demann son lekor: ‘Eski mon’n blasfenm kont lespri sen? Eski mon ti senserman repantir pour sa pese ki mon ti fer? Eski mon annan lafwa ki Bondye i pardonnen? Eski mon en dimoun ki rezet net lalimyer spirityel e ki pa oule repantir?’ Tre probab, bann tel dimoun pou realize ki zot pa’n blasfenm kont lespri sen Bondye, e zot pa bann lennmi laverite. Zot in repantir, e zot annan en lafwa dirab ki Zeova i kapab pardonnen. Alor, zot pa’n fer pese kont lespri sen Zeova.

21. Ki kestyon nou pou egzaminen dan lot lartik?

²¹ Pa i en benediksyon pour nou asire ki nou pa’n fer pese kont lespri sen! Parkont, konsernan lespri sen, i annan serten kestyon ki nou pou egzaminen dan lot lartik. Par egzanp, nou kapab demann nou lekor: ‘Eski lespri sen Bondye pe vreman diriz mwan? Eski son fri i evidan dan mon lavi?’

Ki ou pou reponn?

• Akoz i posib pour fer pese kont lespri sen?

• Ki savedir repantir?

• Lekel ki ti fer pese kont lespri sen ler Zezi ti lo later?

• Ki mannyer nou kapab sirmont lafreyer ki nou’n fer pese ki pa kapab ganny pardonnen?

[Kestyon]

[Portre lo paz 8]

Menm si Pyer ti renye Zezi, i pa ti fer en pese ki pa kapab ganny pardonnen