‘Fer Atansyon Groker’

“Lavi en zonm pa depann lo larises ki i posede.”—LIK 12:15.

1, 2. (a) Dapre sa ki ou’n remarke, kwa ki dimoun i tay deryer konmela? (b) Ki mannyer sa i kapab afekte nou?

LARZAN, later, lakaz, en bon repitasyon, en bon travay, en fanmir, sa i detrwa keksoz ki laplipar dimoun i konsider ki se sa ki anmenn sikse oubyen sekirite pour lavenir. I evidan ki dan bann pei ris e pov, bokou dimoun i tay deryer larises ek sikse. De lot kote, pli ale pli dimoun napa lentere dan bann keksoz spirityel.

² Tousala i egzakteman sa ki Labib ti predir. I ti dir: “Dan bann dernyen zour pou annan letan difisil. Parski zonm pou vin egois, kontan larzan, . . . kontan plezir plis ki Bondye, zot pou montre en laparans lapiete, me rezet son vre pisans.” (2 Timote 3:1-5) Viv avek bann dimoun koumsa lannen ale lannen vini, bann vre Kretyen i toultan anba presyon pour devlop menm mantalite ek labitid ki sa bann dimoun. Kwa ki kapab ed nou rezet zefor sa lemonn pour ‘fors nou antre dan son moul’?—Romen 12:2, The New Testament in Modern English, by J. B. Phillips.

3. Ki konsey Zezi nou pou egzaminen?

³ Zezi i “sa enn ki linisyater nou lafwa, e ki anmenn li ziska perfeksyon,” e pour sa rezon i ansenny nou bann tre bon leson lo sa size. (Ebre 12:2) En fwa, ler Zezi ti pe ansenny en lafoul lo bann keksoz spirityel, en zonm ti enteronp sa diskisyon pour demann en keksoz avek Zezi: “Met, dir mon frer partaz avek mwan bann byen ki nou’n erite.” Larepons ki Zezi ti donnen, ti en konsey serye pour sa zonm e osi pour tou bann ki ti la. Zezi ti averti zot pour pa vin groker e pour byen met lanfaz lo la, i ti servi en legzanp ki fer reflesir. Nou osi nou devret pran aker sa lavertisman Zezi e egzaminen ki mannyer nou pou benefisye si nou aplik sa konsey dan nou lavi.—Lik 12:13-21.

En Demann ki pa ti apropriye

4. Akoz i pa ti apropriye pour sa zonm enteronp Zezi?

⁴ Zis avan ki sa zonm ti demann sa kestyon, Zezi ti pe koz avek son bann disip ek lezot dimoun lo lenportans pa vin ipokrit, annan kouraz pour dir ki nou rekonnet fisdelonm e resevwar led lespri sen. (Lik 12:1-12) Sa ti vreman bann topik enportan ki bann disip ti bezwen pran aker. Zezi ti pe koz lo en size ki ti fer reflesir son lodyans, e la sa zonm ti enteronp Zezi e demann li pour rezourd en dispit ki son fanmir ti annan lo zot posesyon materyel. Me selman, i annan en leson enportan ki nou kapab tire dan sa ki ti arive.

5. Ki nou aprann lo sa zonm ler nou egzamin son kestyon?

⁵ Dimoun in deza dir ki “ou kapab konn personnalite en zonm dapre sa ki i mazin lo la, ler i pe ekout bann konsey relizye.” Anmezir ki Zezi ti pe koz lo en size spirityel enportan, i paret ki sa zonm li ti pe mazinen ki mannyer i kapab ganny plis keksoz materyel. Sa resi pa dir si sa zonm ti annan rezon oubyen tor dan sa sitiasyon familyal. Kekfwa, i ti pe esey kapitaliz lo lefet ki Zezi ti annan en bon repitasyon ek lotorite konman en bon ziz. (Izai 11:3, 4; Matye 22:16) An tou ka, son kestyon ti montre ki dan fon son leker,  i ti annan en problenm, i ti napa ase lapresyasyon pour keksoz spirityel. Pa sa i donn nou en bon rezon pour egzamin nou lekor? Pandan nou bann renyon Kretyen par egzanp, i fasil pour les nou lespri mazin lezot keksoz oubyen pour konsantre lo keksoz ki nou pou fer pli tar. Plito, nou devret konsantre lo sa ki pe ganny dir e mazinen ki mannyer nou kapab met li an pratik personnelman afen ki nou kapab amelyor nou relasyon avek Zeova nou Papa dan lesyel e osi avek nou bann frer ek ser Kretyen.—Psonm 22:22; Mark 4:24.

6. Akoz Zezi pa ti aksepte pour mel dan zafer sa zonm?

⁶ Nou pa konnen kwa ki ti motiv sa zonm pour demann sa kestyon Zezi, me Zezi pa ti aksepte pour mel ladan. Plito, Zezi ti dir li: “Mon zanmi, lekel ki’n apwent mwan ziz pour fer zot partaz?” (Lik 12:14) Par sa parol, Zezi ti pe refer avek en keksoz ki dimoun ti konn byen. Dapre Lalwa Moiz, se bann ziz dan lavil ki ti’n ganny apwente pour ziz bann zafer parey. (Deterononm 16:18-20; 21:15-17; Rit 4:1, 2) Zezi li, ti pe konsantre lo bann keksoz pli enportan, sa i rann temwannyaz lo laverite konsernan Rwayonm e pour ansenny lavolonte Bondye. (Zan 18:37) Parey Zezi, nou pa les nou ganny distrer par serten problenm lemonn. Plito, nou servi nou letan ek lenerzi pour anons sa bon nouvel e pour fer dimoun, sorti dan ‘tou pep vin bann disip’ Zezi.—Matye 24:14; 28:19.

Fer atansyon groker

7. Ki Zezi ti dir ki vreman fer sans?

⁷ Zezi i kapab desifre sa ki dan fon nou leker, e alor i ti vwar problenm sa zonm. I pa ti pe zis rod led avek Zezi pour rezourd en problenm personnel, me i ti annan en keksoz pli grav par deryer sa. Alors, olye zis refize pour ed sa dimoun, Zezi ti adres problenm reel par deryer sa sitiasyon. E i ti dir: “[Kontinyen gard zot lizye ouver, e, NW] fer atansyon, lavaris [ouswa tou sort kalite groker, NW] akoz lavi en zonm pa depann lo larises ki i posede.”—Lik 12:15.

8. Ki si sa groker, e ki lefe i kapab annan lo en dimoun?

⁸ Ler en dimoun i groker, i pa zis anvi larzan oubyen serten keksoz materyel ki i ti kapab byen servi pour en serten rezon.  Dapre en diksyonner, groker i en “dezir abnormal pour larises oubyen posesyon ouswa sa ki en lot dimoun i annan.” I kapab enplik sa dezir voras pour ganny touzour plis keksoz, oubyen lanvi pour zis ganny keksoz ki lezot i annan, menm si nou pa bezwen li oubyen i kapab annan en move lefe lo lezot. An realite, en dimoun groker i les sa keksoz ki i anvi, vin son bondye parski i mazin zis sanmenm e tou son aksyon i relye avek sa ki i anvi. Pa bliye ki zapot Pol ti dir ki en dimoun voras i parey en dimoun ki ador zidol, ki pa pou ganny en plas dan Rwayonm Bondye.—Efezyen 5:5; Kolosyen 3:5.

9. Dan ki fason en dimoun groker i kapab azir? Donn enn de legzanp.

⁹ I enteresan ki Zezi ti averti nou kont “tou sort kalite groker.” Groker i vin dan diferan fason. Dernyen dan sa Dis Komannman i mansyonn enn de legzanp: “Ou pa devret anvi lakaz ou prosen. Ou pa devret anvi madanm ou prosen, ni son lesklav zonm oubyen son lesklav fanm ni son toro ni son bourik ni okenn keksoz ki pour ou prosen.” (Egzod 20:17) I annan plizyer legzanp dan Labib kot dimoun in tonm dan bann pese grav akoz zot ti groker dan en fason ou en lot. Satan li menm ti premye pour groker sa ki pa ti pour li, par egzanp laglwar, loner, lotorite ki selman pour Zeova. (Revelasyon 4:11) Ev ti anvi diriz son prop lekor, e lefe ki i ti ganny anbete i’n anmenn tou bann imen lo semen pese ek lanmor. (Zenez 3:4-7) Bann lanz ki ti vin demon pa ti satisfe avek ‘lotorite [oubyen pozisyon] ki zot ti’n gannyen e ti abandonn zot prop demer’ pour ganny keksoz ki zot ti napa drwa gannyen. (Zid 6; Zenez 6:2) Mazin osi Balaam, Akann, Geazi, ek Zida Iskaryot. Olye apresye sa ki zot ti annan, zot ti les en dezir abnormal pour bann keksoz materyel fer zot mal servi zot pozisyon, tonm byen ba e ganny detrir.

10. Ki mannyer nou devret “kontinyen gard nou lizye ouver” parey Zezi ti dir?

¹⁰ Pa i apropriye ki avan koz lo groker Zezi ti dir: “Kontinyen gard zot lizye ouver”! Akoz? Akoz i sitan fasil pour dimoun vwar si lezot i voras oubyen groker, me pa souvan ki zot realize ki zot menm zot annan sa move tre. Pourtan, zapot Pol i fer remarke ki “lanmour larzan i rasin [tou sort keksoz mal, NW].” (1 Timote 6:9, 10) Disip Zak i eksplike ki move dezir, “enn fwa ki i’n ganny formen i donn nesans pese.” (Zak 1:15) Alor annakor avek konsey Zezi, nou devret ‘gard nou lizye ouver,’ pour pa get nou kanmarad me pour egzaminen si nou, dan nou leker, nou “fer atansyon tou sort kalite groker.”

Lavi ek Larises

11, 12. (a) Ki lavertisman Zezi ti donnen konsernan vin groker? (b) Akoz nou devret pran aker sa lavertisman?

¹¹ I annan en lot rezon akoz nou pa devret vin groker. Get sa ki Zezi ti dir: “Lavi en zonm pa depann lo larises ki i posede.” (Lik 12:15) Nou devret byen reflesir lo sa pwen, vi ki nou pe viv dan en lemonn ki zis mazin keksoz materyel, en lemonn kot larises ek prosperite i vedir boner ek sikse. Par sa parol, Zezi ti oule montre ki en lavi vreman ere, e ki satisfezan, pa depan lo bann posesyon materyel e sa i leka menm si en dimoun i vreman ris.

¹² I vre serten i kapab pa dakor avek sa. Zot kapab dir ki keksoz materyel i fer lavi pli konfortab e agreab, andotmo ki fer lavi annan plis valer. Alor, zot dedye tou zot zefor pour kapab aste tou sort kalite komodite ek lekipman elektronik dernyen model ki zot anvi. Zot panse ki tou sa bann zafer pou fer zot ere dan lavi. Me zot pa konpran sa pwen ki Zezi ti pe fer pase.

13. Ki pwennvi balanse nou devret annan lo lavi ek bann keksoz materyel?

¹³ Olye konsantre lo si sa i byen ouswa  mal pour annan bokou keksoz materyel, Zezi ti met lanfaz lo lefet ki lavi en dimoun pa depan lo sa “ki i posede,” setadir lo bann keksoz ki i deza annan. An realite, nou tou nou konnen ki pour nou viv, nou pa bezwen en kantite keksoz. I demann en pe manze, lenz, ek en landrwa pour dormi. En dimoun ris i annan tou sa la annabondans, en dimoun mizer i kapab bezwen triyange pour li ganny son dekwa. Me selman, ki diferans i annan ler tou le de ris ek pov pe al mor, tou sa la pa servi dan nanryen. (Eklezyast 9:5, 6) Alor, pour nou lavi annan en sans ek valer, i pa kapab e i pa devret zis pour aste oubyen posed bann keksoz materyel. Sa i evidan ler nou egzaminen ki kalite lavi Zezi ti pe koz lo la.

14. Ki nou kapab aprann avek sa mo “lavi” ki’n ganny servi dan Lik 12:15?

¹⁴ Ler Zezi ti dir ki “lavi en zonm pa depann lo larises ki i posede,” sa mo “lavi” ki ganny servi dan Levanzil Lik (Grek, zo·eʹ) pa pe refer avek lafason ki nou viv, me avek lavi li menm setadir ler nou vivan. * Zezi ti pe dir ki nou ris oubyen pov, ki nou viv en lavi deliks ouswa nou pe trimouse pour zwenn en bout avek en lot, nou napa vreman en kontrol lo konbyen letan nou pou viv oubyen si nou pou menm vivan demen. Zezi ti dir dan son sermon lo montanny: “Lekel parmi zot ki krwar si i pran traka i kapab viv pli lontan?” (Matye 6:27) Labib i montre klerman ki se selman Zeova ki “sours lavi,” e selman li ki kapab donn son bann serviter fidel “vre lavi,” setadir “lavi eternel,” swa dan lesyel ouswa lo later.—Psonm 36:9; 1 Timote 6:12, 19.

15. Akoz plizyer dimoun i met zot konfyans dan bann keksoz materyel?

¹⁵ Parol Zezi i montre ki i fasil pour nou anbet nou lekor vizavi nou pwennvi konsernan lavi. Ki swa nou ris ouswa pov, tou imen i enparfe e tou imen i fini parey. Moiz dan letan lontan ti dir: “Nou bann lannen i ariv swasanndis an; e si akoz en lafors pa ordiner i ariv katreven zan, selman zot anmenn plis maler ek keksoz fer mal; akoz i pas vitman, e nou anvole.” (Psonm 90:10; Zob 14:1, 2; 1 Pyer 1:24) Pour sa rezon, dimoun ki pa’n devlop en bon relasyon avek Bondye i souvan swiv sa rezonnman ki zapot Pol ti koz lo la, “Annou manze e bwar, parski demen nou pou mor.” (1 Korentyen 15:32) Lezot ki remarke ki lavi i kourt e pa stab, i esey trouv sekirite ek stabilite dan bann keksoz materyel ki paret pe fer lavi pli stab. Alors, zot rente zanmen fini pour anmas larzan ek keksoz materyel, akoz zot ganny anbete pour krwar ki sa pou anmenn sekirite ek boner.—Psonm 49:6, 11, 12.

En Lavenir asire

16. Lo kwa vre valer lavi pa baze?

¹⁶ I vre ki en standar lavi pli onivo avek tou sort kalite manze, lenz, lakaz, ek lezot keksoz deliks i kapab fer lavi pli konfortab. Nou osi kapab ganny akse avek bann pli  bon kalite tretman medikal e petet fer nou viv enn de lannen an plis ki sa ki nou ti pou viv. Toudmenm, eski sa kalite lavi i vreman pli stab? Eski i vreman fer sans? Vre valer lavi en dimoun pa depan lo konbyen letan i viv ouswa kantite keksoz ki i annan. Zapot Pol ti fer kler danze ki i annan ler en dimoun i met tro bokou konfyans dan sa bann keksoz. I ti ekri Timote: “Pour bann ki posed larises dan sa monn mon rekomann zot ki zot pa annan lorgey, dir zot pa met zot lesperans dan sa bann larises enserten, me met lesperans dan Bondye ki donn nou tou keksoz an labondans pour nou zouir.”—1 Timote 6:17.

17, 18. (a) Lekel ki ti annan en bon pwennvi lo keksoz materyel ki en legzanp remarkab pour nou? (b) Ki parabol Zezi nou pou egzaminen dan lot lartik?

¹⁷ I pa fer sans pour met nou konfyans dan larises akoz larises i “enserten” setadir i pa stab. Sa zonm fidel Zob ti ris, me ler maler ti arive san ekspekte, son larises pa ti kapab ed li. I ti perdi son keksoz. I ti son bon relasyon avek Bondye ki ti ed li pas atraver tou sa bann leprev ek difikilte. (Zob 1:1, 3, 20-22) Abraam pa ti les tou son bann keksoz materyel anpes li aksepte sa misyon difisil sorti kot Zeova, e i ti ganny beni par vin “papa en lafoul nasyon.” (Zenez 12:1, 4; 17:4-6) Nou kapab imit sa de legzanp ek lezot ankor. Zenn konman vye, nou bezwen egzamin nou lekor pour vwar sa ki vreman enportan pour nou dan lavi e dan kwa nou met nou konfyans.—Efezyen 5:10; Filipyen 1:10.

¹⁸ Pa parol Zezi lo pa vin groker e annan en bon pwennvi lo lavi i vreman fer sans! Me Zezi ti ankor annan lezot pwen antet ler i ti rakont en parabol oubyen legzanp lo en zonm ris ki pa ti rezonnab. Sa pou fer nou reflesir. Ki mannyer sa parabol i aplikab pour nou, e ki nou kapab aprann atraver li? Annou vwar sa dan lot lartik.

[Not anba lo paz]

Ki ou pou reponn?

• Ki nou aprann atraver larepons Zezi avek sa zonm dan lafoul?

• Akoz nou pa devret groker, e ki mannyer nou kapab fer sa?

• Akoz lavi pa depan lo sa ki nou posede?

• Kwa ki kapab fer lavi stab e annan en vre valer?

[Kestyon]

[Portre lo paz 25]

Akoz Zezi pa ti aksepte pour mel dan zafer sa zonm?

[Portre lo paz 25]

En leta lespri groker i kapab anmenn bann move rezilta