Ki Mannyer Ou Kapab Trouv Vre Spirityalite?

ZAPOT Pol ti ekrir: “Pour preokip nou panse avek bann keksoz laser i anmenn lanmor, me pour nouri nou lespri avek keksoz spirityel i anmenn lavi ek lape.” (Romen 8:6, King James Version) Par sa bann parol, zapot Pol ti pe montre ki vin en dimoun spirityel i enplik plis ki zis fer en swa personnel oubyen annan en kalite latitid oubyen santiman. An realite, i enplik lavi ek lanmor. Me dan ki sans en dimoun spirityel i resevwar “lavi ek lape”? Dapre Labib, en tel dimoun i annan lape lespri la konmela, lape avek Bondye e i pou ganny beni avek lavi eternel dan lavenir. (Romen 6:23; Filipyen 4:7) I pa etonan alors ki Zezi ti fer sa remark: “Ere bann ki konsyan zot bezwen spirityel.”—Matye 5:3, NW.

Lefet ki ou pe lir sa magazin i montre ki ou annan en lentere dan keksoz spirityel e sa i byen. Kantmenm sa, pwennvi dimoun lo sa size i vreman varye en kantite, alors, petet ou pe mazinen: ‘Ki si sa vre spirityalite? E ki mannyer en dimoun i kapab vin spirityel?’

“Lespri Kris”

Anplis ki montre lenportans ek benefis pour vreman konsantre lo keksoz spirityel, zapot Pol ti annan bokou pour dir konsernan ki si sa vre spirityalite. Pol ti eksplik bann Kretyen dan ansyen lavil Korent, diferans ant en zonm fizik, savedir en dimoun ki swiv son bann dezir, ek en zonm spirityel, en dimoun ki kontan keksoz spirityel. Pol ti ekrir: “En zonm natirel [oubyen fizik] pa resevwar Lespri Bondye, akoz i en lafoli pour li.” De lot kote, Pol ti eksplike ki en zonm spirityel i ganny rekonnet akoz i annan “Lespri Kris.”—1 Korentyen 2:14-16.

Pour annan “Lespri Kris” i senpleman vedir annan menm latitid oubyen fason panse ki Zezi Kri ti annan. (Romen 15:5; Filipyen 2:5) Andotmo, en zonm spirityel i enn ki mazin parey Zezi e ki swiv Son legzanp. (1 Pyer 2:21; 4:1) Pli en dimoun i mazin parey Kris, i pou vin en dimoun ki pli for spirityelman e i pou annan plis sans pour li ganny “lavi ek lape.”—Romen 13:14.

Ki mannyer nou kapab konn “Lespri Kris”

Parkont pour en dimoun annan lespri Kris i devret premyerman konnen ki mannyer Kris i panse. Alors, premye letap pour devlop ou spirityalite i pour aprann konn fason panse Kris. Me konman ou kapab konn fason panse en dimoun ki’n viv lo later 2,000 an pase? Konman par egzanp, ou ti konn listwar bann dimoun renonmen dan ou pei? Posibleman, par lir konsernan zot. Pareyman, lir listwar konsernan Zezi i en pa tre enportan pour konn lespri Kris.—Zan 17:3.

I annan kat resi istorik byen vivan lo Zezi. Sa i bann Levanzil ki’n ganny ekri par Matye, Mark, Lik ek Zan. Ler ou lir sa bann resi atantivman, sa pou ed ou konpran fason panse Zezi, son santiman pli profon e sa ki ti motiv li pour fer sa ki i ti fer. Ler ou pran letan pour reflesir lo sa ki ou’n lir konsernan Zezi, sa pou kree en portre dan ou lespri lo ki kalite personnaz Zezi ti ete. Menm si ou deza konsider ou lekor konman en disip Kris, lir e reflesir lo lavi Zezi pou ed ou “kontinyen grandi dan lagras ek konnesans nou Senyer e Sover Zezi-Kri.”—2 Pyer 3:18, nou ki’n met an italik.

 Avek sa antet, annou egzamin serten pasaz dan Levanzil pour vwar kwa ki ti fer Zezi sa kalite dimoun spirityel. Apre, demann ou lekor ki mannyer ou kapab imit sa model ki i’n kite.—Zan 13:15.

Spirityalite ek “Fri Lespri”

Lik, en ekriven Levanzil, ti dir ki Bondye ti anvoy son lespri sen lo Zezi ler i ti pe batize e ki Zezi ti “ranpli avek Lespri Sen.” (Lik 3:21, 22; 4:1) An retour, Zezi ti montre son bann disip lenportans pour ganny gide par lespri sen Bondye oubyen “lafors aktif.” (Zenez 1:2; Lik 11:9-13) Akoz sa i sitan enportan? Akoz lespri sen Bondye i annan sa pouvwar pour transform nou lespri pour ki nou mazin parey Kris. (Romen 12:1, 2) Lespri sen i prodwir dan en dimoun bann kalite parey “lanmour, lazwa, lape, pasyans, labonte, fidelite, ladouser, kontrol lo son prop lekor.” Sa bann kalite ki Labib i apel “fri Lespri,” i idantifye en dimoun ki vreman spirityel. (Galat 5:22, 23) Andotmo, en dimoun ki spirityel i enn ki ganny gide par lespri sen Bondye.

Zezi ti demontre fri lespri tou dilon son minister. Bann kalite parey lanmour ek labonte ti sirtou evidan dan lafason ki i ti tret bann ki ti ganny konsidere konman dernyen dimoun dan lasosyete. (Matye 9:36) Par egzanp, remark sa lensidan ki ti ganny dekrir par zapot Zan. Nou lir: “Ler Zezi ti pe pase dan en serten landrwa i ti war en zonm ki ti aveg depi son nesans.” Bann disip Zezi ti osi remark sa zonm me zot ti war li konman en peser. Zot ti demande: “Lekel ki’n fer pese, . . . li ouswa son paran?” Son bann vwazen osi ti vwar sa zonm, me pour zot i ti zis en mandyan. Zot ti dir: “Pa limenm li sa zonm ki ti abitye asize e mandyan?” Parkont, Zezi ti vwar sa zonm konman en endividi ki ti bezwen led. I ti koz avek sa zonm aveg e geri li.—Zan 9:1-8.

Ki sa lensidan i dir ou lo fason panse Zezi? Premyerman, Zezi ti enterese avek bann dernyen dimoun e i ti tret zot avek tandres ek konpasyon. Dezyenmman, i ti pran linisyativ pour ed lezot. Eski ou krwar ou pe swiv sa model ki Zezi in kite? Eski ou vwar dimoun parey Zezi ti vwar zot, par donn zot sa led ki zot bezwen pour amelyor zot lavi e en lespwar pour en lavenir pli ere? Oubyen, eski ou pli kontan bann ki annan en pozisyon pli o e ou pa fatig ou avek bann ki ganny konsidere konman dernyen dimoun? Si ou vwar dimoun parey Zezi ti vwar zot ou pe sirman swiv legzanp Kris.—Psonm 72:12-14.

Spirityalite ek Lapriyer

Bann resi dan Levanzil i montre ki souvan Zezi ti tourn ver Bondye dan lapriyer. (Mark 1:35; Lik 5:16; 22:41) Pandan son minister lo later, Zezi ti met letan dekote ekspre pour priye. Matye en disip ti ekrir: ‘Apre ki i ti’n fer lafoul ale, i ti mont li tousel lo en pti montanny pour priye.’ (Matye 14:23) Se dan bann tel moman ki i ti kominik trankilman avek son Papa dan lesyel ki Zezi ti ganny lafors. (Matye 26:36-44) Pareyman bann dimoun ki vreman spirityel ozordi, i rod loportinite pour kominik avek Bondye. Zot konnen ki sa pou ranforsi zot relasyon avek zot Kreater e ed zot vin pli parey Zezi dan zot fason panse.

Souvan Zezi ti pas en kantite letan pour fer lapriyer. (Zan 17:1-26) Par egzanp, avan swazir sa 12 zonm ki ti pou vin son zapot, Zezi ti “al lo montanny pour priye, e i ti priy Bondye tou lannwit.” (Lik 6:12, nou ki’n met an italik.) Menm si zot pa neseserman priye tou lannwit, bann ki spirityel i swiv legzanp Zezi. Avan zot fer bann gran desizyon dan zot lavi, zot pran bokou letan pour priy Bondye, pour ki son lespri sen i gid zot pour fer bann bon swa ki pou fer zot vin pli for spirityelman.

Dan son lapriyer, Zezi ti osi montre sa senserite ki nou devret imite dan nou lapriyer.  Remarke ki Lik ti ekrir konsernan lafason ki Zezi ti priye sa zour swar avan i ti mor. “Dan son lagoni, i ti kontinyen priy plis ankor avek plis lentansite, son transpirasyon ti tonm ater parey gro gout disan.” (Lik 22:44, NW) Zezi ti’n deza priy avek lentansite avan, me lo sa lokazyon, kot i ti pe fer fas avek sa tes pli difisil dan son lavi lo later, i ti priy “avek plis lentansite” e son lapriyer ti ganny reponn. (Ebre 5:7) Dimoun ki spirityel i swiv legzanp Zezi. Kan zot fer fas avek bann leprev ki sirtou difisil, zot priy “avek plis lentansite” pour demann Bondye son lespri sen, gidans ek sipor.

I kler ki Zezi ti en zonm ki ti kontan priye, i pa etonan ki son bann disip ti anvi imit li dan sa domenn. Alors zot ti demann li: “Senyer, montre nou fer lapriyer.” (Lik 11:1) Pareyman ozordi, bann ki apresye keksoz spirityel e ki anvi ganny gide par lespri sen Bondye i swiv legzanp Zezi lo konman zot devret priy Bondye. Vreman, spirityalite ek lapriyer i relye etrwatman avek kanmarad.

Spirityalite ek Predikasyon

Dan Levanzil Mark, nou trouv en resi kot Zezi ti geri bokou dimoun malad, ziska tar dan lannwit. Lannmen gran maten ler i ti pe priye li tousel, son bann disip ti vin kot li e dir li ki bokou dimoun ti pe rod li, petet akoz zot ti anvi ganny geri. Me Zezi ti dir zot: ‘Annou al dan bann vilaz dan zalantour pour ki mon a kapab pres Levanzil laba osi.’ Apre Zezi ti eksplik zot akoz: “Se pour sa rezon ki mon’n vini.” (Mark 1:32-38; Lik 4:43) Menm si geri bann dimoun ti enportan pour Zezi, pres sa  bon nouvel Rwayonm Bondye ti sa travay prensipal pour li.—Mark 1:14, 15.

Ozordi, koz avek lezot konsernan Rwayonm Bondye i sa mark ki ankor pe idantifye bann ki annan lespri Kris. Zezi ti donn sa konmann avek tou dimoun ki anvi vin son disip: “Ale e fer tou pep vin mon bann disip. . . . Ansenny zot pour obei tou sa ki mon’n konmande.” (Matye 28:19, 20) Deplis, Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Lefet ki Parol Bondye i endike ki sa travay predikasyon pe ganny akonpli gras a pwisans lespri sen, pran par dan sa travay i en siny ki en dimoun i vreman spirityel.—Akt 1:8.

Pres sa mesaz Rwayonm avek dimoun partou dan lemonn i demann zefor plizyer milyon dimoun e ganny fer dan larmoni. (Zan 17:20, 21) Bann ki pran par dan sa travay i bezwen pa zis spirityel me osi byen organize partou dan lemonn. Eski ou kapab idantifye sa bann dimoun ki pe swiv legzanp Kris e ki pe pres sa bon nouvel Rwayonm partou dan lemonn?

Eski ou ranpli sa Kriter?

Byensir, i annan lezot karakteristik ki idantifye en dimoun ki vreman spirityel. Me dapre sa ki nou’n egzaminen ziska prezan, eski ou santi ki ou pe ranpli sa bann kriter? Pour ou konnen, demann ou lekor: ‘Eski mon lir Parol Bondye Labib regilyerman e reflesir lo sa ki mon lir? Eski mon pe demontre fri lespri dan mon lavi? Eski mon fer lapriyer regilyerman? Eski mon anvi asosye avek bann dimoun ki pe pres sa bon nouvel Rwayonm Bondye dan lemonn antye?’

Si ou onnetman egzamin ou lekor, sa pou ed ou konnen ki degre spirityel ou spirityel. Nou ankouraz ou pour fer bann pa neseser la konmela pour ki ou a ganny “lavi ek lape.”—Romen 8:6; Matye 7:13, 14; 2 Pyer 1:5-11.

[Bwat/Portre lo paz 5]

EN DIMOUN SPIRITYEL I

◆ annan lanmour pour Parol Bondye

◆ demontre fri lespri

◆ priy Bondye regilyerman e senserman

◆ partaz sa bon nouvel Rwayonm avek lezot