Ansenny Ou Zanfan Pour Kontan Zeova
Ansenny Ou Zanfan Pour Kontan Zeova
“Bann garson en zennonm i parey bann dart dan lanmen en zonm for.” —PSONM 127:4.
1, 2. Ki mannyer bann zanfan i parey “bann dart dan lanmen en zonm for”?
EN DIMOUN i annan en dart dan en kote lanmen e en fles dan lot kote lanmen. I servi son lafors pour li ris lakord sa fles e menm si i difisil, i pran son letan pour li viz byen son target. E en sel kou i large, e sa dart i anvol dan lezer! Eski i pou ariv zis lo target? I pou depan lo plizyer fakter, parey sa dart li menm, divan ek abilite sa dimoun ki tyonbo sa fles.
2 Lerwa Salomon ti konpar bann zanfan avek “bann dart dan lanmen en zonm for.” (Psonm 127:4) Akoz i ti servi sa legzanp? En dimoun ki servi en fles, i annan sa dart zis en pti moman letan dan son lanmen pour li vize, epi i bezwen les sa dart ale pour li ariv kot son target. Pareyman, paran napa bokou letan pour zot devlop lanmour pour Zeova dan leker zot zanfan. Letan i pas vit e dan en pti moman, zanfan i gran e zot kit lakour. (Matye 19:5) Eski dart bann paran pou ariv kot sa target? Eski zot zanfan pou kontinyen kontan e servi Zeova ler zot in kit lakour? I pou depan lo plizyer fakter. Trwa ladan i abilite sa paran, lanvironnman ki zanfan i grandi ladan, e lafason ki sa ‘dart’ setadir sa zanfan pour les li ganny dirize par sa ledikasyon ki i resevwar. Annou egzamin sa trwa fakter an detay. Premyerman, nou pou egzamin kwa ki fer en dimoun vin en bon paran.
En bon paran i demontre en bon legzanp
3. Akoz paran i bezwen met an pratik sa ki zot ansenny zot zanfan?
3 Zezi ti kit en bon legzanp pour bann paran parski i ti met an pratik sa ki i ti ansenny lezot. (Zan 13:15) Parkont, i ti kondann bann Farizyen ki ti “prese, me zot pa [ti] met an pratik.” (Matye 23:3) Si nou oule motiv nou zanfan pour kontan Zeova, nou aksyon i devret annakor avek nou parol. Si nou pa pe fer sa ki nou ansenny nou zanfan, nou parol i dan vid, i napa litilite zis parey en fles ki napa lakord.—1 Zan 3:18.
4. Ki kestyon paran i kapab demann zot lekor, e akoz?
4 Akoz legzanp paran i sitan enportan? Zis parey bann adilt i kapab devlop lanmour pour Bondye par imit legzanp Zezi, de menm zanfan i kapab devlop lanmour pour Zeova par swiv bon legzanp zot paran. Dimoun ki en zanfan i pas letan avek, i kapab swa ankouraz li ouswa gat son bon labitid. (1 Korentyen 15:33) Pour en bon pe letan lavi en zanfan, espesyalman pandan son bann premye lannen ki tre enportan, relasyon avek son paran i sa relasyon pli entim e ki pou annan bokou lenfliyans lo sa zanfan. Pour sa rezon, paran i bezwen demann zot lekor: ‘Ki lenfliyans mon annan lo mon zanfan? Eski mon legzanp i ankouraz mon zanfan pour devlop bann bon labitid? Ki legzanp mon donnen dan bann domenn ki tre enportan parey lapriyer ek letid Labib?’
En bon paran i priy avek son zanfan
5. Ki en zanfan i kapab aprann atraver lapriyer son paran?
5 Ou zanfan i kapab aprann en bon pe lo Zeova par ekout ou bann lapriyer. Si zot ekout ou pe remersye Zeova avan en repa e priye avan zot etidye Labib, ki konklizyon zot pou tire? Probableman zot pou aprann ki Zeova i donn nou sa ki nou bezwen lo plan fizik e ki nou bezwen remersye li pour sa, e ki i ansenny nou laverite dan Labib. Sa i bann leson enportan.—Zak 1:17.
6. Ki mannyer paran i kapab ed son zanfan vwar ki Zeova i enterese avek sak dimoun dan fanmir?
6 Toudmenm, si ou priy dan lezot moman apard ki bann repa oubyen ler ou pe etidye Labib e ou koz avek Zeova lo bann size spesifik ki annan pour fer avek ou ek ou zanfan, sa pou kapab anmenn bann pli bon rezilta ankor. Ou pou ed ou zanfan santi ki Zeova i form parti ou fanmir, e ki i vreman enterese avek sak dimoun dan ou fanmir. (Efezyen 6:18; 1 Pyer 5:6, 7) En papa i rakonte: “Depi zour nesans nou fiy, nou ti fer lapriyer avek li. Ler i ti pe grandi, nou ti priye konsernan son relasyon avek lezot dimoun, ek lezot keksoz ki ti kapab afekte li. Ziska i ti kit lakour pour li marye, i pa ti pas en zour san ki nou ti fer lapriyer avek li.” Eski ou kapab priye avek ou zanfan sak zour? Eski ou kapab ed zot vwar Zeova konman zot Zanmi ki donn nou sa ki nou bezwen lo plan fizik e spirityel, me osi ki pran swen avek nou lo plan emosyonnel?—Filipyen 4:6, 7.
7. Pour ki zot lapriyer i spesifik, ki paran i bezwen konnen?
7 Byensir, pour ou kapab fer lapriyer spesifik, ou bezwen konn sa ki pe deroule dan lavi ou zanfan. En papa ki ti elve de zanfan i dir: “A lafen sak semenn, mon ti demann mon lekor de kestyon: ‘Ki keksoz ki’n preokip mon zanfan pandan sa semenn? Ki bon keksoz ki’n arive dan lavi mon zanfan?’” Paran, eski ou kapab demann ou lekor bann tel kestyon e apre mansyonn larepons sa bann keksoz dan ou lapriyer avek ou zanfan? Si ou fer sa, ou pou ed ou zanfan aprann pa zis pour priy Zeova, sa Enn ki ekout lapriyer, me pour kontan li osi.—Psonm 65:2.
En bon paran i ankouraz bann bon labitid letid
8. Akoz paran i devret ed son zanfan pour devlop labitid etidye Parol Bondye?
8 Ki mannyer latitid paran vizavi letid Labib pou ed en zanfan devlop en bon relasyon avek Zeova? Pour en relasyon devlope e dire, bann dimoun konsernen i bezwen koz avek kanmarad e osi ekout kanmarad. En fason pour ekout Zeova, se ler nou etidye Labib avek led bann piblikasyon ki sorti kot “lesklav fidel.” (Matye 24:45-47, NW; Proverb 4:1, 2) Alor, pour ou zanfan devlop en relasyon avek Zeova ki dirab e kot i annan lanmour, paran i bezwen ankouraz zot zanfan pour devlop sa labitid pour etidye Parol Bondye.
9. Ki mannyer zanfan i kapab ganny ede pour devlop bann bon labitid letid?
9 Ki mannyer en zanfan i kapab ganny ede pour annan bann bon labitid pour etidye? Pli bon fason se legzanp paran. Eski ou zanfan i vwar ki ou kontan lir ouswa etidye Labib regilyerman? I vre, tre probab ou byen okipe pe pran swen avek ou zanfan, e parfwa ou demann ou lekor kote ou kapab annan letan pour lir oubyen etidye. Me selman, demann ou lekor sa kestyon, ‘Eski mon zanfan i vwar mwan pe regilyerman get televizyon?’ Si i leka, eski mon kapab servi en pe sa letan pour donn en bon legzanp an sa ki konsern letid personnel?
10, 11. Akoz paran i devret annan en letid regilye lo Labib an fanmir?
10 En lot fason pratik kot paran i kapab ansenny zot zanfan pour ekout Zeova, i ler zot annan en diskisyon regilye lo Labib an fanmir. (Izai 30:21) Serten i kapab demande, ‘Akfer annan en letid an fanmir si nou annan labitid anmenn zanfan bann renyon kongregasyon?’ I annan plizyer bon rezon. Zeova in donn responsabilite prensipalman avek paran pour ansenny zot zanfan. (Proverb 1:8; Efezyen 6:4) En letid Labib an fanmir i montre zanfan ki nou ador Zeova pa senpleman par labitid an piblik, me osi an fanmir dan nou lavi prive.—Deterononm 6:6-9.
11 Deplis, en bon letid lo Labib an fanmir i donn paran loportinite pour konpran pli byen pwennvi zot zanfan lo bann kestyon moral e spirityel. Par egzanp, ler bann zanfan i ankor ptipti, paran i kapab servi bann liv parey Ekout sa Gran Ansennyan. * Dan preski tou paragraf sa liv, zanfan i ganny demande pour eksprim zot pwennvi lo sa size ki zot pe diskite. Paran ki rezonn avek zot zanfan lo sa bann verse Labib ki ganny mansyonnen, i kapab ed zot zanfan pour “konn fer diferans ant sa ki byen ek sa ki mal.”—Ebre 5:14.
12. Ki mannyer paran i kapab adapte letid an fanmir dapre bezwen zot zanfan? Kwa ki ou’n vwar i marse dan sa domenn?
12 Anmezir ki ou zanfan pe grandi, adapte sa letid avek zot bezwen. Get lafason ki en koup ti ed zot zanfan adolesan pour rezonnen si zot ti pou aksepte al en parti danse. Sa papa i dir: “Nou ti dir nou zanfan ki dan prosen letid fanmir, mon madanm ek mwan ti pou zwe rol zanfan, e nou bann fiy ti pou pretann ki zot nou paran. Zot ti pou swazir lekel ki ti pou zwe rol Papa ek Manman, me zot ti pou bezwen fer bann resers ansanm lo sa size e rod gidans lo bann parti danse.” Ki rezilta sa ti anmennen? Sa papa i kontinyen: “Nou ti sirprann pour vwar ki kantite responsab nou bann fiy ti ete (dan rol paran) pour eksplik nou (dan rol zanfan) akoz dapre Labib i pa ti pou rezonnab pour al sa parti danse. Sa ki ti vreman enpresyonn nou, se ki zot ti prevwar bann sizesyon lo lezot keksoz ki kapab ganny fer dan plas sa aktivite. Sa ti ed nou konpran zot fason panse ek zot lanvi.” I vre i demann perseverans ek limazinasyon pour gard letid an fanmir regilye e adapte avek bezwen fanmir, me sa zefor i vo lapenn.—Proverb 23:15.
En latmosfer anpe
13, 14. (a) Ki mannyer paran i kapab devlop en latmosfer anpe dan lakour? (b) Ki lavantaz i annan ler paran i rekonnet ler i’n fer en fot?
13 En dart pou pli fasilman ariv kot son target si letan i kalm. Pareyman, zanfan pou pli fasilman aprann kontan Zeova si zot paran i gard en latmosfer anpe kot lakour. Zak ti ekrir: “Fri lazistis i ganny senmen dan lape par bann ki viv dan lespri lape.” (Zak 3:18) Ki mannyer paran i kapab devlop en latmosfer anpe dan lakour? Msye ek madanm i bezwen gard en bon relasyon avek kanmarad. Si tou le de i demontre lanmour ek respe pour kanmarad, i pou pli fasil pour zot ansenny zot zanfan pour kontan e annan respe pour lezot, enkli pour Zeova osi. (Galat 6:7; Efezyen 5:33) Lanmour ek respe i promot lape. Deplis, en koup ki viv anpe pou pli fasilman fer fas avek bann pti dispit ki kapab leve dan fanmir.
14 Nou konnen ki napa maryaz ki parfe, e napa fanmir ki parfe osi lo sa later konmela. Paran i kapab pa arive demontre fri lespri dan zot relasyon avek zanfan. (Galat 5:22, 23) Si sa i arive, ki paran i devret fer? Si zot rekonnet ler zot fer en fot, eski sa pou fer zanfan nepli annan respe pour zot? Annou get legzanp zapot Pol. I ti parey en papa spirityel pour bokou dan kongregasyon. (1 Korentyen 4:15) Pourtan, i ti rekonnet ki i ti fer fot parler. (Romen 7:21-25) Me olye fer nou perdi respe pour li, sa limilite ek lonnekte ki i ti demontre par rekonnet son fot, i fer nou annan plis respe pour li. Menm si i ti enparfe, Pol ti kapab ekri kongregasyon Korent avek konfyans: “Imit mwan parey mwan mon imit Kris.” (1 Korentyen 11:1) Si ou osi ou rekonnet ler ou annan tor, tre probab ou zanfan pa pou pran kont sa bann fot.
15, 16. Akoz bann paran i devret montre zot zanfan pour kontan zot bann frer ek ser Kretyen? Ki mannyer zot kapab fer sa?
15 Eski i annan lezot keksoz ki paran i kapab fer pour devlop en latmosfer anpe kot lakour, pour ed zot zanfan kontan Zeova? Zapot Zan ti ekrir: “Si en dimoun i dir: ‘Mon kontan Bondye,’ e i ay son frer, i en manter, parski si en dimoun i ay son frer ki i war, i pa kapab kontan Bondye ki i pa war.” (1 Zan 4:20, 21) Alor, ler ou montre ou zanfan konman pour kontan bann frer ek ser Kretyen, anfet ou pe montre li pour kontan Bondye. Paran i kapab demann son lekor, ‘Ler mon koz lo bann frer ek ser dan kongregasyon, an zeneral eski mon koz an byen oubyen mon kritik zot?’ Ki mannyer ou kapab konnen? Ekout byen lafason ki ou zanfan i koz lo bann renyon ouswa lo bann manm kongregasyon. Probableman, ou pou tann zot koze parey ou osi ou koze.
16 Ki paran i kapab fer pour ki zot zanfan i kontan zot bann frer ek ser spirityel? Peter, papa de garson adolesan i dir: “Depi ptipti menm, nou de garson in annan labitid ki nou annan bann dimoun matir ki vin dinen kot nou, pour pas letan avek nou e i ti gou ler nou ti fer sa. Nou de garson in grandi avek dimoun ki kontan Zeova, e konmela zot vwar ki servi Zeova i en fason viv ki agreab.” Dennis, papa ki annan senk fiy i dir: “Nou ti ankouraz nou bann fiy pour fer zanmi avek bann pionye pli aze dan kongregasyon, osi souvan ki posib nou ti envit sirveyan rezyonal ek son madanm.” Eski ou osi, ou kapab pran linisyativ pour ed ou zanfan vwar kongregasyon konman ou gran fanmir?—Mark 10:29, 30.
Responsabilite en zanfan
17. Finalman, ki desizyon tou zanfan i bezwen fer?
17 Mazin ankor legzanp sa dimoun avek son fles ek dart? Menm si i annan en bon abilite, tre probab i pa pou kapab atenn son target si sa dart li menm i tord. Byensir, paran pou fer fason pour esey dres sa dart, par aziste move pwennvi ki zanfan i kapab annan. Me finalman, en zanfan i bezwen fer son desizyon si i pou les lemonn moul li dan son fason ouswa si i pou les Zeova ‘fer drwat son santye.’—Proverb 3:5, 6; Romen 12:2.
18. Ki lefe swa en zanfan i annan lo lezot?
18 Menm si paran i annan en responsabilite enportan pour “elve zot [zanfan] dan en ledikasyon ek lenstriksyon Senyer,” sa ki sa zanfan pou devenir demen i dan lanmen sa zanfan li menm. (Efezyen 6:4) Pour sa rezon, zanfan, demann zot lekor, ‘Eski mon pou aksepte ledikasyon ranpli avek lanmour ki mon paran pe donn mwan?’ Si ou fer li, ou pe fer sa pli bon swa dan lavi. Ou paran pou vreman kontan e pli enportan ankor, ou pou fer Zeova kontan.—Proverb 27:11.
[Not anba lo paz]
^ par. 11 Pibliye par Temwen Zeova.
Eski ou rapel?
• Ki mannyer paran i kapab demontre en bon legzanp an sa ki konsern lapriyer ek letid Labib?
• Ki mannyer paran i kapab devlop en bon latmosfer kot lakour?
• Ki swa zanfan i bezwen fer, e ki lefe son swa pou annan lo lezot?
[Kestyon]
[Portre lo paz 30]
Eski ou pe kit en bon legzanp pour ou zanfan an sa ki konsern letid personnel?
[Portre lo paz 31]
En latmosfer anpe dan fanmir i promot boner