Nou Kapab Benefisye Ler Nou Andir Soufrans
Nou Kapab Benefisye Ler Nou Andir Soufrans
‘Nou konsider zot byennere zot ki’n andire.’—ZAK 5:11.
1, 2. Kwa ki montre ki i pa ti lavolonte Zeova pour imen soufer?
SI EN dimoun son lespri i bon, zanmen i ti pou kontan soufer, ni menm nou Kreater, nou Bondye Zeova pa oule ki imen i soufer. Nou kapab vwar sa ler nou egzamin son Parol enspire e remark sa ki ti arive apre ki i ti’n kree zonm ek fanm. Premyerman, Bondye ti kree zonm. “Zeova ti alor form zonm avek lapousyer sorti dan later e i ti soufle souf lavi dan son nennen, e sa zonm ti vin en nanm vivan.” (Zenez 2:7) Adan ti annan en lekor ek en lespri parfe e i pa ti pou ni tonm malad oubyen mor.
2 Dan ki kondisyon Adan ti viv ladan? “Alors, Zeova ti fer en zarden an Edenn, dan les, e i ti met zonm ki i ti’n formen ladan. Alors Zeova Bondye ti fer pouse dan later tou pye dibwa ki zoli pour gete e ki bon pour manze.” (Zenez 2:8, 9) Vreman, Adan ti reste dan en landrwa merveye. Ti napa okenn soufrans dan zarden Edenn.
3. Ki lespwar sa premye koup imen ti annan?
3 Zenez 2:18 i dir: “Zeova ti dir: ‘I pa bon pour zonm kontinyen reste li tousel. Mon pou fer en led pour li, enn ki pou al byen avek li.’” Alors, Zeova ti kree en fanm parfe pour Adan, e fer li posib pour zot annan en lavi fanmir ere. (Zenez 2:21-23) Deplis Labib i dir nou ki: “Bondye ti beni zot e Bondye ti dir zot: ‘Fer zanfan e vin bokou, ranpli later e kontrol li.’” (Zenez 1:28) Sa premye koup imen ti pou annan sa privilez merveye pour agrandi zarden Edenn ziska ki later antye i ganny transformen pour vin en paradi. E zot ti pou ganny bann zanfan ki pa ti pou konn soufrans. Pa sa ti en zoli konmansman!—Zenez 1:31.
Konmansman soufrans
4. Ler nou get listwar, kwa ki evidan konsernan imen?
4 Me kan nou get kondisyon ki imen i ladan diran listwar, i kler ki i annan en keksoz ki’n al vreman mal. I’n ariv en ta move keksoz e bann imen in soufer en kantite. Diran sa bann syek ki’n pase, tou bann desandans Adan ek Ev in tonm malad, zot in vyeir e finalman zot in mor. Later pa ditou en paradi ranpli avek bann dimoun ere lo la. Sa sitiasyon in ganny byen dekrir dan Romen 8:22: “Ziska aprezan tou lakreasyon Bondye pe soupire e soufer.”
5. Ki mannyer nou premye paran ti responsab pour anmenn soufrans lo imen?
5 Zeova pa responsab pour sa kantite soufrans ki’n egziste depi tou sa letan. (2 Samyel 22:31) Parkont bann imen i en pe responsab. “Zot pa’n fer sa ki byen, zot in kondwir zot dan en move fason.” (Psonm 14:1) Tou sa ki nou premye paran ti gannyen okonmansman ti bon. Sa ki ti neseser pour ki keksoz i kontinyen koumsa menm, ti lobeisans anver Bondye, me Adan ek Ev ti swazir pour pa depan lo Zeova. Vi ki nou premye paran ti rezet Zeova, zot ti nepli parfe. Zot ti deteryore ziska ki zot mor. Nou’n erit lenperfeksyon avek zot.—Zenez 3:17-19; Romen 5:12.
6. Ki rol Satan in zwe ki’n anmenn soufrans?
6 Sa lanz ki plitar ti vin Satan ek Dyab ti osi responsab pour konmansman tou soufrans. I ti’n ganny kree avek sa liberte pour swazir. Me i ti mal servi sa abilite avek en bi pour resevwar ladorasyon. Zis Zeova tousel ki devret ganny adore, me pa son kreasyon. Se Satan ki ti pous Adan ek Ev pour rod zot lendepandans avek Zeova, konmsi zot ti pou kapab vin parey Bondye, pour “konn sa ki bon ek sa ki move.”—Zenez 3:5.
Zis Zeova ki annan sa drwa pour dirize
7. Ki konsekans sa rebelyon kont Zeova in demontre?
7 Sa bann move konsekans ki sa rebelyon in anmennen i demontre ki zis Zeova Souvren Liniver, ki annan sa drwa pour dirize e zis son fason dirize ki drwat. Sa plizyer milye lannen ki’n pase in demontre ki sa enn ki’n vin “sef lemonn,” Satan, in devlop en move dominasyon, ki enzis, vyolan e ki pa ditou akseptab. (Zan 12:31) Sa kantite letan ki imen in dominen dan soufrans anba kontrol Satan, in osi demontre ki zot napa sa abilite pour diriz dan en fason ki drwat. (Zeremi 10:23) Alors, nenport ki dominasyon ki imen i kapab mazinen apard sa enn ki pour Zeova, pou otomatikman fel. Listwar in prouv sa, san okenn dout.
8. Ki plan Zeova an rapor avek tou kalite form dominasyon imen e ki mannyer i pou akonpli son plan?
8 Lefet ki Zeova in permet imen pour eksperyans diferan form dominasyon pour plizyer milye lannen san ki i enterfer, aprezan i annan tou drwa pour retir tou kalite form dominasyon lo later e ranplas li par son prop gouvernman. Konsernan sa, en profesi i dir: “Dan bann zour sa bann lerwa [setadir dominasyon imen], Bondye lesyel pou etabli en rwayonm [oubyen son gouvernman dan lesyel anba dominasyon Kris] ki pa pou zanmen ganny detrir. . . . I pou kraz e met en lafen avek tou sa bann rwayonm, e li menm i pou dire pour en letan endefini.” (Danyel 2:44) Dominasyon bann demon ek bann imen pou arete, zis Rwayonm Bondye dan lesyel ki pou egziste e ki pou kontrol later. Kris pou vin sa Lerwa e i pou annan 144,000 asosye, bann imen fidel sorti lo later, ki pou renny avek li.—Revelasyon 14:1.
Soufrans i kapab anmenn byenfe
9, 10. Ki mannyer Zezi ti benefisye atraver soufrans ki i ti pas ladan?
9 I pou enteresan pour vwar ki kalifikasyon sa bann ki pou rennyen dan sa Rwayonm dan lesyel i annan. Premyerman, Zezi in montre ki mannyer li menm i kalifye dan son rol konman Lerwa. I’n pas en gran kantite letan ki nou pa ni menm konnen, akote son Papa Zeova pour fer son lavolonte, konman en “zouvriye abil.” (Proverb 8:22-31) Kan Zeova ti fer laranzman pour li vin lo later, Zezi ti volonterman aksepte. Pour koz avek lezot konsernan drwa Zeova pour dirize ek son Rwayonm, ti sa keksoz pli enportan pour Zezi kan i ti lo later. Zezi in kit en bon legzanp pour nou tou, par montre en lobeisans total anver lotorite Zeova.—Matye 4:17; 6:9.
10 Zezi ti sibir persekisyon e finalman i ti ganny met a mor. Pandan son minister partou kot i ti ale i ti kapab vwar kondisyon deplorab ki limanite ti ladan. Lefet ki i’n vwar tousala e ki li menm in soufer personnelman, eski sa in anmenn okenn benefis pour li? Wi. Ebre 5:8 i dir: “Menm ki i ti Garson [Bondye] i ti aprann lobeisans atraver sa ki i ti soufer.” Sa ki Zezi ti eksperyanse pandan ki i ti lo later in fer li annan plis konpreansyon ek konpasyon. I’n fer son prop leksperyans konsernan kondisyon ki imen i ladan. I ti kapab senpatiz avek sa bann ki ti pe soufer e i ti kapab pli byen konpran son rol pour vin sov zot. Remarke ki mannyer zapot Pol ti met lanfaz lo sa dan Ebre: “I ti neseser ki i vin parey son bann frer dan tou fason, pour ki i vin zot Gran-Pret fidel, ranpli avek labonte dan son servis devan Bondye pour ki lepep i ganny pardonnen. Parski i’n soufer limenm, e i’n ganny tante, alor i aprezan kapab vin an ed tou sa ki ganny tante.” “Nou Gran-Pret i pa enn ki pa kapab senpatiz avek nou febles, me enn ki’n ganny tante dan tou keksoz, parey nou, pourtan san fer pese. Alor annou apros avek konfyans devan tronn lagras Bondye, pour ki nou ganny pardonnen e trouv lagras pour ed nou dan moman neseser.”—Ebre 2:17, 18; 4:14-16; Matye 9:36; 11:28-30.
11. Lefe ki bann fitir lerwa ek pret in viv lo later, ki mannyer sa pou benefisye zot konman dirizan?
11 Nou kapab dir menm keksoz konsernan sa 144,000 dimoun ki’n “ganny aste” sorti lo later pour vin bann asosye ki pou renny avek Kris dan son Rwayonm. (Revelasyon 14:4, NW) Zot tou zot ti ne konman bann imen lo later, grandi dan en lemonn kot in annan soufrans partou kote, e zot menm zot in soufer. En kantite in ganny persekite, e serten in menm ganny touye akoz zot in reste fidel avek Zeova e akoz zot in oule swiv Zezi. Me, zot pa’n ‘onte pour koz an faver nou Senyer. Me okontrer, zot in soufer avek mwan pour levanzil.’ (2 Timote 1:8) Akoz zot leksperyans lo later sa i fer zot byen kalifye pour ziz imen lo later. Zot in aprann pour pli byen konpran lezot, pour annan labonte e pare pour ed lezot.—Revelasyon 5:10; 14:2-5; 20:6.
Bann ki annan lespwar pour viv lo later i dan lazwa
12, 13. Ki mannyer bann ki annan sa lespwar pour viv lo later i kapab benefisye ler zot pas dan soufrans?
12 Eski bann soufrans aktyel i kapab anmenn okenn benefis pour bann ki annan sa lespwar pour viv pour touzour dan paradi lo later kot maladi, sagrinasyon ek lanmor pou ganny retire? Sa douler ek lenkyetid ki soufrans i anmennen i pa en keksoz ki nou swete i ariv nou. Me kan nou andir bann tel soufrans, sa i fer nou amelyor ankor plis nou bann kalite e sa i kapab anmenn lazwa.
13 Konsider par egzanp sa ki Parol enspire Bondye i dir konsernan sa: “Me malgre ki zot soufer an fezan sa ki byen, zot ere.” “Si zot ganny maltrete pour non Kris, zot ere.” (1 Pyer 3:14; 4:14) “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. Rezoui e santi zot ere akoz zot annan en gran rekonpans dan lesyel.” (Matye 5:11, 12) “Byennere, sa dimoun ki reste ferm dan leprev, parski apre son leprev i pou resevwar kouronn lavi.”—Zak 1:12.
14. Dan ki sans soufrans i kapab fer bann adorater Zeova ere?
14 Byensir, i pa sa soufrans ki nou kapab pas ladan aktyelman ki pou fer nou ere. Sa lazwa ek satisfaksyon i vin atraver lefet ki nou konnen ki nou pe soufer akoz nou pe fer lavolonte Zeova e pe swiv legzanp Zezi. Par egzanp, dan premye syek, serten parmi bann zapot ti ganny met dan prizon e zot ti ganny anmennen devan gran lakour Zwif e zot ti ganny denonse oubyen menase akoz zot ti pe pres konsernan Zezi Kri. Zot ti ganny fwete e apre large. Ki latitid zot ti annan? Sa resi Labib i dir ki zot “ti kit lasal konsey, byen kontan, ki zot ti’n ganny konsidere diny pour ganny maltrete pour sa Non Senyer.” (Akt 5:17-41) Zot ti dan lazwa pa akoz zot ti’n ganny fwete ni akoz sa douler, me akoz zot ti konpran ki sa ki ti’n ariv zot, ti akoz zot in reste fidel avek Zeova e swiv legzanp Zezi.—Akt 16:25; 2 Korentyen 12:10; 1 Pyer 4:13.
15. Ki mannyer ler nou andir soufrans la konmela i kapab benefisye nou dan lavenir?
15 Si nou andir lopozisyon ek persekisyon avek en bon latitid, sa i kapab fer nou devlop landirans. Sa pou ed nou andir bann soufrans ki nou pou fer fas avek alavenir. Nou lir: “Mon bann frer, konsider konman en lazwa, tou bann leprev ki zot bezwen pas ladan. Parski zot konnen ki si zot lafwa i reste ferm dan bann leprev, sa i prodwi pasyans [oubyen “landirans,” NW].” (Zak 1:2, 3) Pareyman, Romen 5:3-5 i dir nou: “Nou rezoui osi dan nou bann soufrans, akoz nou konnen ki lasoufrans i prodwi perseverans [oubyen “landirans,” NW], perseverans i prodwi fidelite dan leprev e fidelite i prodwi lesperans. Sa lesperans pa tronp nou.” Alors pli nou andir bann leprev la konmela akoz nou Kretyen, pli nou vin pli byen ekipe pour andir bann lezot leprev ki nou pou fer fas avek dan sa move lemonn.
Zeova pou rekonpans nou
16. Ki Zeova pou fer pour rekonpans bann fitir lerwa ek pret pour soufrans ki zot in andire?
16 Menm ler nou perdi lo kote materyel akoz lopozisyon oubyen persekisyon pour reste fidel konman Kretyen, nou kapab ere akoz nou konnen ki Zeova pou rekonpans nou. Par egzanp, zapot Pol ti ekrir konsernan serten ki ti annan lespwar pour al viv dan lesyel: “Kan zot ti ganny arase zot byen, zot ti aksepte sa avek lazwa, parski zot ti konnen ki zot ti posed bann byen bokou meyer e ki dirab pour touzour” konman bann dirizan dan Rwayonm Bondye. (Ebre 10:34) E mazin sa lazwa ki zot pou annan ler anba direksyon Zeova ek Kris zot pou donn lanmen anmenn sa bann benediksyon merveye lo bann zabitan sa nouvo lemonn lo later. Sa parol ki zapot Pol ti dir avek bann Kretyen fidel i laverite: “Mon annan sa lasirans ki sa ki nou pe soufer konmela i san konparezon avek laglwar ki Bondye pou revel nou dan lavenir.”—Romen 8:18.
17. Ki Zeova pou fer pour bann ki annan lespwar pour viv lo later ki pe servi li fidelman konmela menm?
17 Pareyman, nenport ki keksoz sa bann ki annan lespwar pour viv lo later i kapab perdi oubyen donnen volonterman akoz zot pe servi Zeova, i pou rekonpans zot par sa ki i pou fer byento e sa pou plis ki sa ki zot kapab ekspekte. I pou donn zot lavi parfe e eternel dan paradi lo later. Dan sa nouvo lemonn, Zeova “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans.” (Revelasyon 21:4) Pa sa i en promes merveye! Napa nanryen dan sa lemonn ozordi ki nou kapab donnen volonterman oubyen perdi akoz nou oule servi Zeova, ki kapab ganny konpare avek sa lavi merveye ki i pou byento donn son bann serviter fidel ki pe andir soufrans.
18. Ki promes rekonfortan Zeova i donn nou dan son Parol?
18 Nenport soufrans ki nou pou kapab andire alavenir pa pou afekte nou lespwar lavi eternel ki nou pou rezwir dan sa nouvo lemonn ki Bondye in promet. Tou bann soufrans pou ganny konpletman rekonpanse par sa kondisyon manifik ki pou egziste dan sa nouvo lemonn. Izai 65:17, 18 i dir nou: “Bann keksoz dan lepase pa pou vin dan nou lespri, zot pa pou ni vin dan leker. Me rezwir zot lepep, e dan lazwa pour touzour akoz sa ki mon pe kree.” Pour sa rezon i ti apropriye pour Zak demi frer Zezi dir: ‘Nou konsider zot byennere zot ki’n reste fidel.’ (Zak 5:11) Wi, si nou andir fidelman soufrans la konmela, nou kapab ganny bann byenfe depi ozordi menm e alavenir.
Ki ou pou reponn?
• Akoz bann imen i soufer?
• Ki benefis soufrans i kapab anmennen pour bann ki pou diriz later byento ek son bann zabitan?
• Akoz nou kapab dan lazwa la konmela malgre soufrans?
[Kestyon]
[Portre lo paz 18]
Nou premye paran ti annan en lavenir merveye devan zot
[Portre lo paz 20]
Soufrans ki Zezi ti vwar ti prepar li pour vin en bon Lerwa ek Gran Pret
[Portre lo paz 22]
Bann zapot ti ‘kontan ki zot ti’n ganny konsidere diny pour ganny maltrete akoz zot lafwa’