Bann pwen enteresan dan liv Osea
Parol Zeova i vivan
Bann pwen enteresan dan liv Osea
VRE ladorasyon ti’n preski disparet dan sa dis tribi dan rwayonm nor Izrael. Avek Yarobam 2 ki ti pe dirize, Izrael ti en pei ris, me deswit apre son lanmor zot ti konmans perdi zot larises. Ti annan dezord ek problenm politik apartir sa moman. Kat parmi sa sis sikseser ki ti vin lerwa ti ganny asasinen. (2 Lerwa 14:29; 15:8-30; 17:1-6) Sa 59 lannen ki Osea ti profetize, ti konmans an 804 A.N.L., e terminen dan sa letan kot ti napa stabilite Izrael.
Lafason ki Zeova ti santi anver nasyon Izrael enfidel, i ganny demontre dan en fason vivan par sa ki ti arive dan lavi maryaz Osea. Mesaz ki Osea ti prese ti kontyen laverite lo fot ki Izrael ti’n fer ek zizman profetik kont Izrael ek rwayonm Zida. Tousala in ganny ekrir dan sa liv ki port son non, kot parler i’n koz dan en fason zantiy e avek tandres, oubyen parfwa i’n koz serye, direk e kler. Lefe ki i form parti parol Bondye ki enspire, son mesaz i vivan e i annan pisans.—Ebre 4:12.
“PRAN EN MADANM FORNIKASYON POUR OU”
Zeova ti dir Osea: “Ale, pran en madanm fornikasyon pour ou.” (Osea 1:2) I ti obeir e Gomer sa madanm ki i ti’n pran ti donn nesans en garson pour li. Sa de zanfan ki i ti donn nesans apre ti aparaman ilezitim. Zot ti apel Lo-Rouama ek Lo-Ami. Zot non i vedir ki Zeova pa pou montre mizerikord anver Izrael e ki i pou rezet son pep enfidel.
Ki mannyer Zeova ti santi konsernan son pep rebel? I ti dir Osea: “Ale ankor enn fwa. Kontan en fanm ki en lot dimoun in kontan e ki’n komet adilter, parey Zeova in kontan bann garson Izrael menm si zot pe tourn ver lezot bondye.”—Osea 3:1.
Larepons pour bann kestyon lo Labib:
1:1—Akoz ki Osea ti mansyonn tou le kat lerwa ki ti dirize Zida pandan ki i ti pe akonplir son minister, tandis ki i ti nonm zis en lerwa Izrael? Sa i akoz zis bann lerwa sorti dan desandans David ki ti annan sa drwa pour diriz sa pep ki Bondye ti’n swazir. Bann lerwa dan rwayonm nor pa ti sorti dan desandans David.
1:2-9—Eski Osea ti vreman pran en madanm fornikasyon? Wi, Osea ti marye avek en madanm ki plitar ti fer adilter. Napa nanryen ki sa profet ti dir konsernan son lavi fanmir, ki endike ki sa ti en rev oubyen en vizyon.
1:7—Kan ki Bondye ti demontre mizerikord anver Zida e sov li? Sa ti arive an 732 A.N.L. letan Izkiya ti lerwa. Sa zour, Zeova ti met en fren avek menas ki larme Asiryen ti pe fer kont Zerizalenm. I ti fer en lanz touy 185,000 solda dan en lannwit. (2 Lerwa 19:34, 35) Alors, Zeova ti sov Zida, pa “par en lark oubyen par en lepe ouswa par lager, par seval oubyen par kavalye,” me par en lanz.
1:10, 11—Vi ki rwayonm nor Izrael ti trouv son lafen an 740 A.N.L., ki mannyer bann garson Izrael “ti ganny rasanble ansanm dan linite” avek bann garson Zida? Bokou ki ti reste dan rwayonm nor Izrael ti’n al Zida avan ki bann zabitan Zida ti ganny anmennen an egzil Babilonn an 607 A.N.L. (2 Kronik 11:13-17; 30:6-12, 18-20, 25) Kan bann Zwif ti retourn kot zot sorti an egzil an 537 A.N.L., bann desandans sa bann ki ti sorti dan rwayonm nor Izrael ti parmi sa bann Zwif ki ti retourn Zerizalenm.—Ezra 2:70.
2:21-23—Ki Zeova ti oule dir par sa parol: “Sirman mon pou senm [Yizreel] konman lagrenn pour mwan dan later, e mon pou annan mizerikord anver li”? Premye garson ki Osea ti gannyen avek Gomer ti apel Yizreel. (Osea 1:2-4) Sa non i vedir ki “Bondye pou senm lagrenn,” e dan en fason profetik sa non ti pe montre ki Zeova ti pou rasanble bann Zwif fidel an 537 A.N.L. e i ti pou senm zot parey lagrenn dan Zida. Sa later ki ti’n reste dezerte pour 70-z-an ti pou aprezan bezwen prodwir lagrenn, diven dou ek delwil. Dan en fason poetik, sa profesi ti fer resorti ki sa bann bon keksoz ti pou obliz later pour donn son bann bon eleman ki i annan, e later ti pou demann lapli sorti dan lesyel. E lesyel li i ti pou sipliy Bondye pour fer lapli tonbe. Tou sa ti pou arive avek bi pour pran byen swen avek sa bann ki ti pou retourn dan zot pei. Zapot Pol ek Pyer ti aplik Osea 2:23 avek sa letan kot sa bann ki form parti Izrael spirityel ti pou ganny rasanble.—Romen 9:25, 26; 1 Pyer 2:10.
Leson pour nou:
1:2-9; 3:1, 2. Zis mazin sakrifis ki Osea ti bezwen fer pour pa separe avek son madanm, zis parey Bondye ti’n demande! An rapor avek lavolonte Bondye, ziska ki degre nou pare pour fer bann sakrifis?
1:6-9. Zeova i vreman pa kontan ler nou fer adilter spirityelman, zis parey i pa kontan ler en dimoun i komet adilter.
1:7, 10, 11; 2:14-23. Sa ki Zeova ti predir konsernan Izrael ek Zida ti vin vre. Tou sa ki Zeova i dir i toultan vin vre.
2:16, 19, 21-23; 3:1-4. Zeova i pare pour pardonn sa bann ki senserman repantir. (Neemya 9:17) Zis parey Zeova, nou devret demontre konpasyon ek mizerikord dan lafason ki nou azir avek lezot.
“ZEOVA I POURSWIV [ZOT] AN KOUR”
“Zeova i pourswiv bann zabitan sa pei an kour.” Akoz? Akoz “napa ni laverite ni labonte leker, ni konnesans Bondye dan sa pei.” (Osea 4:1) Bann Izraelit enfidel in fer frod, vers disan, e zot in fer fornikasyon ki swa fizikman oubyen spirityelman. Olye al rod sekour kot Bondye, “zot in kriy Lezip e zot in al Lasiri.”—Osea 7:11.
Zeova i anons son zizman: “Izrael i devret ganny anvale.” (Osea 8:8) Rwayonm Zida i koupab. Osea 12:2 i dir: “Zeova i pourswiv Zida an kour, wi i pou fer Zakob rann kont konsernan son semen, i pou rann li dapre sa ki i’n fer.” Me san okenn fot zot pou retourn dan zot pei, akoz Bondye ti fer sa promes: “Mon pou liber zot dan lanmen Seol, mon pou repran zot dan lanmor.”—Osea 13:14.
Larepons pour bann kestyon lo Labib:
6:1-3—Lekel ki ti pe dir: “Vini, zot lepep, e annou retourn ver Zeova”? I kapab ki bann Izraelit enfidel ti pe ankouraz kanmarad pour retourn kot Zeova. Si sa ti leka, zot ti pe zis fer krwar ki zot ti’n repantir. Zot labonte leker ti ptigin, tanporer parey “nyaz dan bomaten e. . . laroze ki en pti kou i disparet.” (Osea 6:4) Oubyen i kapab Osea ki ti pe sipliy sa pep pour retourn kot Zeova. Nenport ki ki ti dir sa parol, an tou ka bann zabitan enfidel sorti dan sa dis tribi dan nor Izrael ti pou bezwen demontre vre repantans e vreman retourn kot Zeova.
7:4—Dan ki sans bann Izraelit enfidel ti parey “en four ki’n alimen”? Sa konparezon i montre ki kantite move dezir bann Izraelit ti annan dan zot leker.
Leson pour nou:
4:1, 6. Si nou anvi kontinyen ganny laprouvasyon Zeova, nou bezwen konstaman aprann konn li e aplik sa ki nou aprann.
4:9-13. Zeova pou fer sa bann ki pratik limoralite seksyel e ki kontinyen partisip dan move ladorasyon, rann kont pour zot aksyon.—Osea 1:4.
5:1. Bann ansyen i devret rezet konpletman lansennyman bann aposta. Si non, zot kapab ankouraz serten pour enplike dan fo ladorasyon ki kapab vin ‘en latrap ek en pyez’ pour zot.
6:1-4; 7:14, 16. Si nou dir nou’n repantir zis avek nou labous, sa i ipokrit e i pa vo nanryen. Pour ki en dimoun ki’n fer pese i ganny mizerikord Bondye, i bezwen repantir ofon son leker. I bezwen demontre sa kan i al ver en keksoz ki “pli o,” savedir en form ladorasyon pli siperyer. Son aksyon i bezwen an armoni avek standar onivo Bondye.—Osea 7:16, not anba lo paz.
6:6. Kan nou pratik pese sa i en lendikasyon ki nou pa fidel dan nou lanmour pour Bondye. Napa okenn sakrifis ki kapab ranplas sa febles.
8:7, 13; 10:13. Sa prensip ki “en dimoun i rekolte sa ki in senmen” ti vin vre pour bann Izraelit ki ti ador zidol.—Galat 6:7.
8:8; 9:17; 13:16. Bann profesi konsernan rwayonm nor ti vin vre kan son kapital, Samari, ti ganny konkerir par Lasiri. (2 Lerwa 17:3-6) Nou kapab annan konfyans ki Bondye pou fer sa ki i’n dir e i pou akonplir son parol.—Nonm 23:19.
8:14. Zeova ti anvoy “dife dan lavil [Zida]” an 607 A.N.L. I ti servi bann Babilonnyen pour fer sa e i ti fer sir ki Zerizalenm ek Zida ti reste dezerte parey i ti’n predir. (2 Kronik 36:19) Parol Bondye pou toultan ganny realize.—Zozye 23:14.
9:10. Menm si zot ti’n dedye zot lavi avek sa vre Bondye, bann Izraelit “ti al kot Baal Peor, e zot ti dedye zot avek sa keksoz degoutan.” Nou demontre ki nou saz si nou tir en leson avek zot move legzanp e veye ki nou pa vin enfidel anver nou dedikasyon avek Zeova.—1 Korentyen 10:11.
10:1, 2, 12. Nou devret servi Bondye avek tou nou leker san okenn lipokrizi. Kan ‘nou senm lagrenn pour nou lekor dan ladrwatir, nou rekolte dapre labonte leker Bondye.’
10:5. Bet-Avenn (ki vedir “Lakaz sa ki move”) i en non degradan ki’n ganny donnen pour Betel (ki vedir “Lakaz Bondye”). Kan sa pti bef ki zot ti adore Bet-Avenn ti ganny anmennen an egzil, bann zabitan Samari ti dan sagrinasyon kan zot ti perdi sa keksoz ki zot ti donn zot devosyon avek. Pa i bet pour met konfyans dan zidol ki pa kapab protez son lekor!—Psonm 135:15-18; Zeremi 10:3-5.
11:1-4. Zeova i toultan tret son pep avek lanmour. I pa fer nou soufer kan nou soumet avek Bondye.
11:8-11; 13:14. Parol Zeova pour ralye son pep ankor enn fwa ver vre ladorasyon, ‘pa ti retourn kot li san okenn rezilta.’ (Izai 55:11) An 537 A.N.L., bann Zwif ti nepli bann egzile Babilonn, e serten ti retourn Zerizalenm. (Ezra 2:1; 3:1-3) Tou sa ki Zeova in dir atraver son profet pou vin vre san okenn fot.
12:6. Nou devret vreman determinen pour montre labonte leker, lazistis e pour toultan esper Zeova.
13:6. Bann Izraelit ‘ti konmans satisfe e zot ti konmans elev zot lekor. Se pour sa rezon ki zot ti oubliy [Zeova].’ Nou bezwen veye ki nou pa tant pour elev nou lekor.
“SEMEN ZEOVA I DRWAT”
Osea i sipliye: “O Izrael, retourn kot Zeova ou Bondye, parski ou’n tonbe akoz ou fot.” I ti sipliy sa pep pour dir Zeova: “Fotespere ki ou pardonn fot, e aksepte sa ki byen, e an retour nou pou ofer bann zenn toro nou labous.”—Osea 14:1, 2.
En dimoun ki’n repantir i devret al kot Zeova, aksepte son semen, e loue li. Akoz sa? Parski “semen Zeova i drwat, e bann dimoun drwat ki pou mars lo la.” (Osea 14:9) Pa nou kontan ki bokou pou “vreman vin kot Zeova e kot son labonte dan bann dernyen zour”!—Osea 3:5.
[Portre lo paz 15]
Lavi fanmir Osea ti demontre fason ki Zeova ti azir avek Izrael
[Portre lo paz 17]
Kan Samari ti ganny detrir an 740 A.N.L., sa dis tribi dan nor Izrael ti nepli egziste