En zonm ris i fer en move desizyon

SA ZENNONM ris ti en dirizan ki ti pe fer sa ki byen, i ti obeisan anver bann lalwa e i ti osi byen relizye. Kan i ti ariv kot Zezi i ti tonm azenou devan li e demann li: “Bon Met, ki mon bezwen fer pour ganny lavi eternel?”

An repons Zezi ti dir ki pour ganny lavi eternel sa zonm ti pou bezwen obeir bann komannman Bondye. Kan i ti demann Zezi pour vin pli presi, Zezi ti dir li: “Pa fer krim, pa komet adilter, pa vole, pa fer fo lakizasyon, onor ou papa ek ou manman, e kontan ou prosen parey ou prop lekor.” Sa ti bann komannman tre enportan dan Lalwa ki ti ganny donnen avek Moiz. Apre sa, sa zennonm ti dir: “Mon’n obeir tou sa bann konmannman. Ki mon devre fer ankor?”—Matye 19:16-20.

Zezi “ti annan lanmour pour li” e i ti dir li: “Ou mank en sel keksoz: ale, vann tou sa ki ou annan e donn bann pov, e ou ava ganny en trezor dan lesyel; apre vini e swiv mwan.”―Mark 10:17-21, NW.

En sel kou sa zennonm ti annan en gro desizyon pour pran. Ki i ti pou fer? Eski volonterman i ti pou abandonn son larises e vin en disip Zezi, oubyen eski i ti pou reste atase avek son bann keksoz materyel? Eski i ti pou akimil bann trezor lo later ouswa i ti pou akimil bann trezor dan lesyel? Sa ti vreman bezwen en desizyon difisil pour li fer. I kler ki i ti vreman enterese avek keksoz spirityel akoz i ti pe obeir Lalwa e i ti anvi konnen kwa ki i ti a kapab fer anplis pour ganny benediksyon Bondye. Me ki desizyon i ti fer? “I ti ale byen tris akoz i ti posed bokou byen.”—Mark 10:22.

Desizyon sa zennonm pa ti saz. Si i ti vin en disip fidel Zezi, i ti pou kapab ganny sa ki i ti pe rode, lavi eternel. Nou pa konnen ki ti arive avek sa zennonm.  Me nou konnen toudmenm ki apepre kat deseni plitar larme Romen ti detri Zerizalenm e en bon bout Zide. Bokou Zwif ti perdi zot larises ensi ki zot lavi.

Kontrerman avek sa zennonm, zapot Pyer ek lezot disip Zezi ti fer en bon swa. Zot ti “kit tou keksoz” e swiv Zezi. Sa ti vreman benefisye zot! Zezi ti dir zot ki zot ti pou ganny anplis tou sa ki zot in kit deryer. Deplis, zot ti pou resevwar lavi eternel. Zot ti fer en desizyon ki zot pa ti pou regrete plitar.—Matye 19:27-29.